شوية تمارين إبداع .. التمرين رقم (3) .. ضد الغتاتة

- عمرك إشتريت مشاية عشان تجرى عليها أو عجلة ثابتة عشان تبتدى تمرين و تبقى رياضى و عضلات .. و بعد يومين تلاتة بالعدد .. بقت وظيفتها الوحيدة هى الشماعة الجديدة للهدوم فأوضتك ؟

AR 6 د

شوية تمارين إبداع .. التمرين رقم (3) .. ضد الغتاتة ..

بعنوان : ( إخلع كده ورينى إبداعك ولامؤاخذة ) ..

معظمنا عايش حياتين مش حياة واحدة .. الحياة اللى بنعيشها يوم بيوم .. (شغل و دراسة و مسئوليات و تعب و … ) .. و الحياة اللى مابنعيشهاش إلا فخيالنا .. اللى مابنعيشهاش إلا فأحلام اليقظة أو فآخر لحظات سلام قبل ما بننام … و بين الحياتين دول … فى ( المقاومة ) .

لو إنت أى واحد من دول … يبقى إنت عارف إيه هى ( المقاومة ) .

المقاومة هى :

المقاومة هى أوسخ و أشر قوة على وجه الكرة الأرضية . سبب كل التعاسة اللى عند كل البشر سبب الأمراض … سبب الضعف الجنسى .. سبب الحروب .. .. لما المقاومة بتتحكم فيك .. بتستعبدك .. بتشل حركتك .. بتخليك بنى آدم أقل بكتير من اللى تقدر تكونه .. و اللى تستحق تكونه .. بتقتل … عبقريتك .

كل ضوء و ليه ظل .. و المقاومة هى ظل ضوء العبقرية .. و كل ما عبقريتك كانت أقوى .. كل ما المقاومة اللى بتواجهها بتبقى أقوى .. المقاومة أسرع من الطلقات .. أقوى من القطر .. إدمانها أصعب من إدمان الكوكايين و الهرويين .. و على مدار التاريخ .. إستعبدت مليارات من البشر .. مليارات من البشر .. أصبحوا عبيد لها .. و إنتهت حياتهم بسببها .. قبل ما يدركوا إنها إستعبدتهم .

عمرك سمعت عن الست أو الراجل اللى جاله (كانسر) و بلغوه إنه فاضله 6 شهور بالكتير و يودع .. و خلال أيام … يكون إستقال من شغله .. و رجع يحقق أحلامه .. فى السفر .. أو الكتابة .. أو العزف و الموسيقى .. و يقضى وقت أطول مع اللى بيحبهم و يحبوه .. أو يعمل أعمال خيرية كتير .. و بعد كام شهر .. يعمل تحاليل .. و يكتشف إن الكانسر تراجع و إنه بقى أحسن ؟!!

هل دى هى الطريقة الوحيدة إذن ؟ الطريقة الوحيدة لهزيمة المقاومة .. هو إن الواحد يواجه الموت ؟ الطريقة الوحيدة إن الواحد يلاقى الشجاعة إنه يقاومها .. هو لما يكون معندوش حاجة يخسرها خلاص ؟

كام واحد مننا أدمن و بقى عبد لسجارة أو حشيش ؟ كام واحد مننا بقى مدمن مسكنات و مضادات إكتئاب ؟ كام واحد مننا بقى مدمن قعدة قهاوى و قعدات نميمة و سوشيال ميديا تافهة ؟ ببساطة .. ببساطة لأنه مابيعملش الحاجة اللى قلبه من جواه بيصرخ إنه عايز يعملها . الحاجة اللى عبقريته بتظهر فيها .. المقاومة … بتهزمه .

لو بكرة .. حصلت معجزة .. و كل بنى آدم على وجه البسيطة إكتشف المقاومة فحياته و قرر ياخد أول خطوة صح فطريق مواجهتها .. -كل دكاترة النفس حيقفلوا عيادتهم و مايبقاش لهم لازمة .. -كل السجون حتبقى فاضية .. -صناعات السجاير و المخدرات و الخمور حتنتهى بالكامل .. -صناعات الأغذية السريعة بتاعت كنتاكى و ماكدونالدز و كل دول حيفلسوا بالكامل .. -99% من دكاترة التجميل حيقفلوا و يبطلوا شغل .. -معظم شركات الدعاية و الإعلان حتفلس و تقفل ..

بص جوة قلبك .. ما لم أكون أنا مجنون و باخرف .. فى صوت جواك دلوقتى بيقولك حاجة .. بيقولك حاجة قالها لك عشرتلاف مرة على الأقل قبل كده .. بيقولك حاجة بتاعتك إنت بس .. إنت عارفها كويس .. و مش محتاج حد غيرك يقولها لك .. و ما لم أكون برضو مجنون و باخرف .. إنت ماخدتش تجاه الحاجة اللى جواك دى خطوة واحدة على الأقل من إمبارح .. ولا كنت حتاخد الخطوة دى بكرة .. .. مش مفكر إن المقاومة حقيقية ؟! … المقاومة حتدفنك بالحيا ..

تعرف إن هتلر كان عايز يطلع رسام ؟ و هو عنده 18 سنة .. خد شوية الفلوس اللى ورثها .. و راح لفيينا عشان يعيش و يدرس هناك .. قدم فأكاديمية الفنون الجميلة .. و بعد كده فمدرسة العمارة .. .. عمرك شفت لوحة لهتلر ؟! … ولا أنا برضو ! .. المقاومة … هزمته .. قول إنى ببالغ .. و لكنى أكاد أجزم .. إن هتلر كان أسهل عنده إنه يبتدى الحرب العالمية التانية .. عن إنه يمسك فرشة و يقف قدام لوحة فاضية .

الكلام اللى فوق ده مش كلامى أنا ( Eslam Osama El-Gwaily ) . ده كلام واحد إسمه : ستيفن بريسفيلد .. و الكلام ده من كتابه الرائع : حرب الفن … the war of art و أنا ترجمته بتصرف بسيط جداً .. قصة إنى عرفت عن الكتاب منين أساساً لوحدها قصة تستحق إنى أكتبها فبوست لوحدها .. … خلال البوستات القادمة (عن الإبداع ) كمان إن شاء الله .. حاكمل إقتباسات من الكتاب ده خصيصاً .. هو شوية كتب مشابهة ليه .

و الله أعلم .

للتمرين الأول و التانى فى الإبداع .. إلقى نظرة على أول كومنت .

و لباقى كتاباتى فمجالات مختلفة تانية .. تقدر تعمل لايك للصفحة دى : https://www.facebook.com/eslamelgwaily/ حينزل عليها المقالات بشكل أسرع قريباً إن شاء الله ( instant articles ) و تلقى نظرة هنا لو حبيت : http://eslamosama.com/blog/