في قصة حصلت سنة 2019 .. و كانت مضايقاني جداً

في قصة حصلت سنة 2019 .. و كانت مضايقاني جداً و ماكنتش عايز أحكيها .. و لكن كذا حاجة فكرتني بيها خلال ال كام يوم اللي فاتوا . … في يومين حر زي دلوقتي كده من 6 سنين .. ظهر قدامي بوست عن ( هاكاثون ) برعاية فودافون إسمه ( Innovation hackathon = يعني مسابقة الإبداع ) . هاكاثون ده يعني ( ماراثون تكنولوجيا ) .. مسابقة كده بتتعمل علي مدار يومين أو تلات أيام .. و في المعتاد بيكون عن مين اللي ممكن يحقق هدف معين أو يبني حاجة معينة بأسرع وقت ممكن . . الهاكاثون كان عن : تخيل و إبني حاجة تستخدم تكنولوجيا ال ( 5g ) اللي إن شاء الله و بإذن الله خلال كام سنة حتكون مفرتكة البنية التحتية التكنولوجية في مصر 🤣 . . آخر ميعاد لتقديم الأفكار كان حينتهي خلال ساعات تقريباً .. و في الوقت ده .. كنت فأعماق أعماق شغلي في الإيكوميرس و الأفيلييت … و كان لسة في شركة صغننة طالعة طازة و ناس كتير ماسمعهوش عنها … لكن كانت بتصرف حلو أوي .. و كنا إحنا بفضل الله من أوائل الناس اللي كانت بتحقق آلاف المبيعات للشركة دي يومياً .. مش شهرياً .. الشركة كان إسمها ( نون ) بالمناسبة 🤣 . و كان أيامها عمولة المبيعة الواحدة 18 دولار تقريباً 🤣😁 .. . و لكن .. بما إن دماغي مالهاش خااااااالص فموضوع التركيز في شيء واحد ده أبداً .. و بما إن الفلوس ما كان عمرها الحاجة اللي بتشد إنتباهي .. فطنشت كل ما له علاقة بالشغل .. و إتصلت بأحد أعز أصدقائي .. اللي علمني تقريباً 90% من كل معلوماتي الأساسية عن الكمبيوتر و البرمجة زمااااااااااان أيام الكلية .. و اللي هو فعلاً أحد أكثر ال مبرمجين العباقرة اللي عرفتهم في حياتي ( جوة و برة مصر ) . .. و قلت له : ” عايزك في طلعة 🤣 .. و قلت له علي موضوع الهاكاثون ” قال لي : ” هات فكرة نضيفة .. و لو عجبتني .. حاطلع معاك ” . قلت له : ” بيس .. إديني ساعة ” . … بعد ساعة بالظبط .. كلمته و قلت له : إحنا حنعمل Portals . … إيه بقي موضوع ( Portals ) ده ؟! .. أيامها .. سنة 2019 .. العالم ماكانش لسة بدأ لعب حرب عالمية تالتة زي اليومين دول .. بس كان بدأ يشتم من بعيد ل بعيد 🤣 . روسيا كانت بدأت شتيمة في أوكرانيا .. الهند و باكستان كان دايماً بينهم شتايم في بعض .. و أمريكا كانت مليانة شتايم بين الديموقراطيين و الجمهوريين .. و ناس كتير كانت بدأت تتوقع منظر اللي بيحصل دلوقتي ده . .. و أنا كنت لسة فاكر أيام 2011 .. لما كان الجهل و الهبل هما سادة الموقف .. و إزاي لما كنا واقفين في اللجان الشعبية زمااااااااااان .. بعد تنحي مبارك مباشرة .. كانت الإشاعات بتطلع و تنتشر بسرعة البرق .. اللي هو تسمع إن في ناس كانت مربية ديناصورات و تنانين في الخرابة اللي علي أول البلد .. و طلعوهم و بدأوا يسرقوا البيوت بيها .. . و إنت مافيش عندك أى وسيلة تتأكد بيها شكل و ألوان الديناصورات و التنانين دي إيه 🤣 . و لما كنت تدخل علي أى سوشيال ميديا أيامها .. كنت تلاقي التريند هو اللي مسيطر .. يعني .. لو كان حصل شيء معين في وسط البلد في القاهرة مثلاً … ده كان بيسيطر ك تريند و يملا كل الأخبار .. و كنت صعب جداً جداً تعرف أى معلومة عن اللي بيحصل في الشارع اللي وراك . . فطرأت في دماغي فكرة : ليه ماعملش منصة سوشيال ميديا .. و لكنها مش قائمة علي المحتوي .. و لكن قائمة علي الموقع . . يعني .. تفتح التطبيق .. تلاقي قدامك خريطة العالم .. تفضل تزوووم فيها براحتك لحد ما توصل للحتة اللي إنت عايزها .. للشارع اللي إنت عايزه . و في الشارع ده .. حتلاقي أيقونات كتير لناس فاتحين موبايلاتهم بيعرضوا مباشر اللي بيحصل في الشارع .. إضغط علي موبايل أى حد فيهم .. و إتفرج براحتك عاللي بيحصل هناك . … حتسألني :

• طب هو إيه اللي يخلي حد يفتح موبايله كده و يصور لايف اللي بيحصل في أى حتة ؟! . . أرد عليك و أقول :
• ( هندسة الحوافز = Incentive engineering ) سهلة جداً في النقطة دي .. و أبسط صورها هو .. إنك حتي لو مالقيتش حد بيصور مباشر في الشارع اللي إنت عايزه مثلاً .. بتعمل ( طلب = Request ) .. و الطلب ده بيظهر ك إشعار للناس اللي في الشارع ده و قريبة منه .. و اللي يجاوب علي الطلب ده .. بياخد جايزة ( فلوس بقي أو نقط أو أى هري تاني ) . . زي أوبر بالظبط .. . و بعد كده .. إنك تعمل ( ترتيب = ranking ) للناس اللي بتصور لايف في كل منطقة .. و تدي لهم جوايز و نجوم بناءاً علي شغلهم .. و بعدين تفتح ( تمويل = monetization ) .. كل ده سهل جداً جداً جداً . … دي هي الفكرة الأساسية للتطبيق .. إنه يكون ( Portal = بوابة ) علي أى مكان إنت عايز تشوفه مباشر .. و تشوف اللي بيحصل هناك . و فوقها .. كان في ( مزايا = features ) كتييييييييير تانية .. بنينا جزء منها بالفعل .. و شرحنا الخطة الزمنية التفصيلية لبناء الباقي . .. و بالمناسبة .. و لحد النهاردة .. الفكرة دي لسة ماتعملتش 😅 . … قدمت الفكرة .. و بعد يومين وصلني إني ضمن 50 فكرة تانيين .. إتقبلنا من آلاف الأفكار اللي قدمت في الهاكاثون ده .. و جات ليا ( أنا و فريقي .. اللي هو صديقي بس ) الدعوة إننا نروح فودافون في القرية الذكية في تاريخ الهاكاثون .. و إن لو عايزين .. ممكن نبات في الشركة نفسها .. و حيوفروا لنا ( sleeping bags = أكياس نوم بتاعت التخييم ) .. و وجبات .. و شاي و قهوة و مشاريب .. و نت مجاناً … و كان في بينج بونج كمان 🤣🤣 . … و بالفعل .. طلعت أنا و صديقي .. و روحنا عيشنا هناك ال3 أيام بتاعت الهاكاثون .. بنشرب قهوة و ناكل باتيهات .. و نشتغل .. هو بيعمل كل ما له علاقة بالكود .. و أنا باعمل كل ما ليس له علاقة بالكود .. 🤣😁 و دي بالمناسبة تلخيص علاقتنا خلال ال20 سنة اللي فاتوا تقريباً .. ( أى شيء فيه كود .. ده بتاعه … و أى شيء مافيهوش كود .. ده بتاعي أنا ) . … و تم البناء .. ضمن ال50 فكرة اللي كانوا موجودين .. عدد قليل جداً جداً جداً هو اللي بني حاجة فعلاً .. و ماكنش بيعرض فكرة فقط .. .. و إحنا .. الفكرة بتاعتنا مش بس كانت إتبنت بالكامل ك ( MVP = Minimum Viable Product ) خلال يومين بالعدد .. و ده إطلاااااااااقاً ماكنش ساهل ( الكلام ده سنين قبل ما يكون في ذكاء إصطناعي زي دلوقتي بالمناسبة ) .. لا .. إحنا كمان كنا بدأنا نبني خطة إطلاق . … يوم المسابقة الأخير .. جه الناس بتوع فرقة التحكيم .. و سمعوا من كل الأفكار .. و بعدين جات مرحلة الإعلان عن ال10 أو 15 فكرة اللي إستحقوا فرصة العرض العام … و منهم حيتم إختيار 3 فقط ك ( أول و تاني و تالت ) . … و كانت النتيجة .. إننا حتي مش ضمن ال 15 فكرة دول .. 🙂🙂 … جائزة المسابقة بالمناسبة علي ما أتذكر أيامها كانت : 50.000 مصري . … أنا كان واضح جداً عليا إني زعلان و متضايق جداً .. و فعلاً .. ماكنتش فاهم إطلاقاً إزاي حتي ماتمش إختيار شغلنا ضمن ال15 الأولانيين .. .. و فاكر إن أيامها و أنا باتسائل مع ال CTO بتاع فودافون و باشرح له .. رد عليا إن فكرتنا واعدة جداً .. و لها مستقبل مبهر .. و إننا ولاد شُطّار جداً جداً 🤣🤣 .. و لكن معايير الإختيار ممكن تكون كانت مختلفة شوية .. و لكن .. و راح شادد أحد المستثمرين و رواد الأعمال المشهورين حالياً .. و قال لي أكلمه و أشرح له .. و إنه أكيد حيحاول يساعدنا ( مادياً يقصد 🤣) .. … أنا ضحكت فعلاً .. و شكرته و سلّمت عليه .. .. لأن .. أيامها ( 2019 ) .. أنا كنت باصرف يومياً ك إعلانات علي الفيسبوك فقط .. 3 أضعاف قيمة الجايزة تقريباً … علي الأقل . . و وجودي في الهاكاثون ده .. إطلاقاً ماكانش عشان جائزة مادية .. و لكن بحثاً عن : تربة = بيئة معينة = Ecosystem معين .. … أيامها بالمناسبة .. كان في مسابقة ضمن الهاكاثون .. مين اللي البوست بتاع الفكرة بتاعته في صفحة فودافون حياخد أكتر ( لايكات ) 🤣🤣 و دي إحنا كسبناها مناصفة مع فكرة ناس تانيين .. تقريباً بسبب الصورة اللي في البوست دي 🤣 .. و خدنا جايزة علي الموضوع ده شوية ( Vouchers ) من فودافون .. تقريباً قيمتهم كانت 1500 جنيه لو متذكر صح . … ليه بقي إفتكرت القصة دي دلوقتي ؟! . . 1- الشهر ده تم إطلاق ال5g في مصر .. . 2- عالمياً ( مش محلياً بس ) في دوشة كتير أوي عن اللعب في الدعاية عن تكنولوجيا ال ( 5G ) .. و إزاي إن شركات كتير أوي بتخليك شايف الأيقونة الظريفة في الموبايل .. لكنك في الحقيقة ماعندكش سرعة تحميل تخليك تعرف تنزل صورة مبكسلة حتي . . 3- اللي بيحصل عالمياً دلوقتي ( و بقاله شهور ) .. و قد إيه كان ممكن يبقي مفيد لو ( Portals ) شغال و منتشر . . 4- أكثر الأفكار و التطبيقات اللي كانت الناس بتحلم إنها حتبقي حقيقة بإستخدام ال ( 5G ) .. إتضح إنها كانت مجرد أحلام لسة بدري أوي عليها .. لأن التكنولوجيا نفسها غير ناضجة لمرحلة إستيعابها ( زي الجراحة بإستخدام الروبوتات عن بعد , تحكم كامل في العربيات الآلية و توقع للحوادث و منعها , … ) . . 5- من يومين كنت بانضّف أحد مكاتبي .. و لقيت الباور بانك اللي خدته ال(Voucher ) ده 🤣 … … أنا و صديقي دايماً و أبداً مشغولين بعشرات الحاجات المختلفة طول الوقت .. و أتذكر إننا فعلاً عملنا التطبيق أيامها و نزلناه علي جوجل بلاي ستور .. و لكن … و كالمعتاد .. إنشغلنا بحاجات تانية كتير .. لحد ما نسينا موضوع التطبيق ده بالكامل .. .. و بعدين 🤣🤣 .. نهاية 2019 و بداية 2020 .. كانت كورونا .. و العالم كله قعد في بيتهم .. أيامها متذكر إني كنت مازلت شايف إن دي كانت حتبقي حاجة حلوة جداً .. و كان ممكن نعمل (Pivot ) و نخلي الفكرة من التطبيق هي التحدي .. زي ( مين حيقبل التحدي إنه ينزل في حظر التجوال و يصور الميدان القريب منه مثلاً ) .. .. و لكن .. كل طاقتي و مجهودي أيامها كانوا في عوالم أخري ( إيكوميرس و أفيلييت و غيرهم ) . … ما علينا .. ملفات التطبيق و تفاصيله حالياً عايشة في فولدر ضمن مئات الفولدرات علي أحد أجهزتي .. .. و حاكمل سكرولنج مستني ناس تنزل أخبار عن المناطق اللي تهمني في العالم . … و الله أعلم .