سنة 2009 .. كنت ماشي جنب أحد أعز أصدقاء حياتي

سنة 2009 .. كنت ماشي جنب أحد أعز أصدقاء حياتي في الشارع ( غالباً هو عارف نفسه 😁) أثناء عملية البحث عن شاشة لجهاز الكمبيوتر اللي كنت باجمعّه في الوقت ده . و ما زلت فاكر كويس جداً إزاي كان بيتسائل .. ليه بادور علي شاشة (23 بوصة ) ؟! .. في حين إني لو كنت إكتفيت بشاشة ( 17 بوصة ) زي ما كان معتاد بالنسبة لأغلب البشر فوقتها .. كنت وفرت جزء كبير من الفلوس اللي كانت معايا وقتها .. و إشتريت حاجة أهم . … فاكر كويس جداً ردي عليه .. ” انا عايز أشوف كل حاجة فنفس الوقت 🤣 ” . … في الوقت ده في حياتي .. كنت لسة ماعرفش يعني إيه ( ADHD ) .. لكن كنت بدأت أفهم تدريجياً إن عقلي مؤمن بمبدأ إن : ” البعيد عن العين بعيد عن القلب 😅 ” . .. أو بصيغة أكثر شياكة .. إن عقلي مش بيشوف غير اللي قدام عينيا .. و ذاكرتي القصيرة مش كفاية إنها تشيل رقم تيليفون أرضي قديم حتي ( اللي هو من 7 خانات ) . … و في الوقت ده أنا كنت منغمس في عوالم رسم المانجا و التصميم .. و الدراسة في الكلية .. و الأبحاث .. و كنت بابقي عايز أفتح 10 نوافذ جنب بعض فنفس ذات الوقت علي الشاشة ال ( سامسونج ال 15 بوصة ) اللي كنت أمتلكها وقتها . … و بالفعل إشتريت الشاشة السامسونج ال23 بوصة .. و بعدين إكتشفت إني أقدر أوصل معاها فنفس الوقت الشاشة ال15 بوصة القديمة .. و ده كان قبل ما يكون دعم أكتر من شاشة متوفر علي نظام الويندوز بشكل طبيعي 🤣. ف” سرقت ” برامج كتير كانت بتقدم خدمات الدعم دي ( زي إن التاسك بار يظهر في الشاشتين , و إن الفيديو أو اللعب تشتغل علي الشاشتين فنفس الوقت , .. و غيرهم ) . … … كل اللي فات ده .. إفتكرته لما قرأت تعليق من شوية علي البوست اللي قبل ده .. بيتسائل ( أنا باكتب و باربط أفكاري ببعضها إزاي ) . 🤣 … … مشهد معتاد في عائلتي من طفولتي .. و ما زال بيحدث حتي الآن .. لما أتكلم مع أهلي .. إني باعمل التالي : باقف فوسط الصالة مثلاً .. و أبص للسجادة علي الأرض .. و أبدأ أتخيل السجادة ك ( سبورة ) ضخمة .. و أكتب و أرسم عليها ( بشكل تخيلي ) بإيديا المواضيع اللي باتكلم عنها .. و أوصل بينهم .. أثناء ما أهلي باصّين معايا علي الأرض 🤣 .. و بيتخيلوا معايا اللي بارسمه ده .. و طبيعي جداً إن بعد 10 دقايق مثلاً من الحوار .. حد من أهلي يشاور علي ركن بعيد من السجادة .. و يناقشني في اللي تخيلناه مرسوم عليه .. و هكذا . .. طول عمري كنت باعمل كده .. و مافهمتش إن ناس كتير ( الأغلبية ) مش بتحتاج تعمل كده .. و بتقدر تحتفظ بنقاط الحوار المشتركة المُلخصة في نقاشاتها في ذاكرتها القصيرة .. إلا لما درست يعني إيه ( ADHD ) . … … فترة ثانوي و بدايات الكلية بالنسبة ليا و لأصدقائي .. كان أحد عناصرها الأساسية هي إننا بنتجمع بشكل شبه يومي .. نلعب شطرنج .. .. أنا بالعب شطرنج من لما كنت في تانية إبتدائي .. و من أيامها .. و لحد النهاردة .. مافتكرش إني قدرت ألعب أى مباراة شطرنج .. إلا و إني لازم أحتفظ بكل القطع اللي ( أكلتها أو إتاكلت من جيشي ) مترتبة بجانب رقعة الشطرنج . .. و كل بضع ثوان .. لازم أبص للقطع دي عشان أتذكرهم .. و أقدر أفكر في وضع الرقعة … .. و بعدين ( بتقدم مستوي أصدقائي في اللعبة ) .. بدأت أعاني بشدة في إني أتذكر أفكاري و خططي لأكثر من حركتين في المستقبل .. و كل ما أتخيل سيناريو مثلاً .. أنسي اللي قبله .. و هكذا . … … طول عمري سيء للغاااااااااااية في لعب الكوتشينة بكل أنواعها .. و مش بسبب إني لا أستطيع تذكر الورق إطلاقاً .. و لكن فلعبة زي الكونكان مثلاً .. اللي بتحتاج إنك تمسك 14 ورقة فنفس الوقت .. من طفولتي ماكنتش مثلاً باعرف أمسك الورق كله فإيدي مرة واحدة .. فكنت بارتب بعض الأوراق ( 3 ,4 ,5 ,6 قلب مثلاً ) .. و أحطهم قدامي .. و أمسك الباقي .. و هكذا . المشهد المعتاد بالنسبة لكل أهلي دايماً .. كان إني كل بضع ثواني .. أبص علي كل الورق اللي أنا واضعه قدامي .. عشان أفتكره .. و أهلي يتريقوا عليا .. و يتعجبوا إزاي أنا مش فاكر !! .. أنا حرفياً راجعت نفس الورق عشرات المرات في اللعب حتي الآن .. .. و كنت بأقسم لهم إني فعلاً بانسي .. و مجرد ما باحط الورق علي وجهه قدامي .. بانسي محتواه إيه !! . … … أمثلة كتيييييييييييييييير أوي ممكن أكتبها عن الموضوع ده في حياتي .. موضوع ذاكرتي القصيرة .. .. صعب جداً إن حد يفهم المشكلة دي إلا لو بيعاني منها بنفس الدرجة بالمناسبة .. .. صعب إنك تتخيل تفاصيل حياتك بإيد واحدة مثلاً .. مهما حاولت .. لأن جزء كبير ( الأغلب ) من حياة الإنسان .. الإنسان بيمارسه بشكل تلقائي .. يعني .. إنت مش بتفكر في كل خطوة بتمشيها برجليك .. لأ .. إنت بتمشي بشكل تلقائي .. إنت بتستعمل إيديك بشكل تلقائي .. إنت بتتذكر برضو و بتستخدم ذاكرتك بشكل تلقائي .. .. فبالتالي .. صعب جداً إنك تتخيل حياة كاملة بكل تفاصيلها .. بدون حاجة زي ( إيد , رجل , عين … أو ذاكرة ) . … … لازم تفهم هنا إني باتكلم عن الذاكرة ال ( قصيرة المدي ) .. مش الذاكرة طويلة المدي . … مرض زي ( ألزهايمر ) بيأثر علي الذاكرة طويلة المدي .. أكثر بكتير من تأثيره علي الذاكرة قصيرة المدي . .. فتلاقي مريض ألزهايمر ناسي تفاصيل أصيلة و أساسية في حياته من سنين . لكنه طبيعي يفتكر أحداث و تفاصيل يومية عادية ( علي الأقل في مراحل المرض الأولي ) . … … لكن ال (ADHD) .. بيأثر بشكل مباشر علي الذاكرة قصيرة المدي فقط .. اللي هي تقدر تتخيلها زي ال ( RAM ) في الكمبيوتر بتاعك أو موبايلك .. اللي هي ذاكرة سريعة جداً .. وظيفتها إنها تكون مرحلة وسيطة بين البروسيسور .. و بين الذاكرة البطيئة نسبياً ( اللي هي ال 265 جيجا مثلاً ) . … … عند الشخص ال ( adhd ) .. الذاكرة قصيرة المدي دي .. ضعييييييفة جداً .. .. و نتائج حاجة زي كده .. كتير .. مثلاً زي : من رابع المستحيلات إنك تلاقي الشخص ال ( ADHD) بيتكلم معاك في موضوع واحد .. بدون التشعب لعشرات المواضيع المختلفة .. و ينسي الموضوع الأصلي إيه .. و سبب كده .. مش إنه بيتوّهك والله .. و لكن هو ماعندوش رامات 🤣.. … الذاكرة قصيرة المدي طريقة عملها مختلف بشكل كبير عن الذاكرة طويلة المدي . … الذاكرة قصيرة المدي بتجمع الأفكار و المواضيع بشكل مستقل و مُجرّد .. يعني مش بتربط معلومات ببعضها .. لأن ربط المعلومات بيتطلب ( تفكير + تذكر معلومات قديمة ) .. فبالتالي .. سهل جداً إنك لو عندك ذاكرة قصيرة المدي كويسة .. إنك تركز في شيء واحد بشكل كبير .. و تنجزه صح .. .. لكن الذاكرة طويلة المدي .. مش بتجمع الأفكار و المواضيع بشكل مستقل و مجرد .. إطلاقاً .. الذاكرة طويلة المدي بتعتمد بشكل أساسي علي ال ( علاقات ) .. و عشان كده تلاقي إن معظم الطرق اللي بتشرح إزاي تقوي ذاكرتك .. بتكون حاجات زي ( Mind palace , Mnemonic Devices , …و غيرهم ) .. و دي كلها طرق بتعتمد علي العلاقات و الروابط بشكل أساسي . … … عند الشخص ال ( ADHD ) .. العلاقات و الروابط دي بتكون أقوي بكتييييييييييييييييير جداً من الشخص العادي .. .. و ده لأن زي ما قلت الشخص ال ( adhd ) ماعندوش ذاكرة قصيرة المدي تقريباً .. فبيعتمد بشكل شبه كلي علي ذاكرته طويلة المدي طول الوقت .. … فكل ما ييجي يفتكر موضوع معين .. يلاقي نفسه بيفتكر عشر مواضيع تانيين 🤣🤣 .. … … اللي بيكتشف بقي قوة حاجة زي كده و مزاياها .. بيبدأ يكتشف القوة الخارقة الحقيقية لل ( ADHD ) .. بيبدأ يشوف علاقات و روابط و قوالب ( Patterns ) بين كل حاجة و أى حاجة في الحياة . … طبعاً لو ماعرفش يتحكم في الموضوع ده بقواعد قوية في العلوم و طرق التفكير عموماً .. قدرته علي إنه يشوف علاقات و روابط بين كل حاجة في الحياة ممكن تقوده لمصايب كتير .. زي : الوهم , بارانويا , pseudoscience , … و غيرها من القناعات اللي بيكون الشخص مؤمن بيها .. و لكنها مالهاش أى أساس من الصحة إطلاقاً . … … لكن لو قدرت تتحكم في القدرة دي .. و زي ما قلت تدعمها بأكبر قدر ممكن من الدراسة ( العلمية و المنطقية ) .. بتكون النتيجة هي إنك بتتميز في كل شيء بيحتاج ( تفكير ) عموماً .. … … و الله أعلم .