إيه القرف ده ؟!!!!!!!!!!!!!!!!!

إيه القرف ده ؟!!!!!!!!!!!!!!!!!. … من أسبوع بدأت تجربة جديدة كنت مأجلها لفترة الأجازات بتاعت آخر السنة دي ( آخر السنة بالنسبة لشركات كتير من اللي باشتغل معاهم عامل زي رمضان بالنسبة لينا هنا فمصر .. الكل بيبدأ يعلن شعار ” بعد الكريسماس و في السنة الجديدة و عليك بخير ” ) . .. المهم .. التجربة دي هي ( Streaming Gaming = إنتاج محتوي معتمد علي الفيديو جيمز و لعبها ) . بالإنجليزي .. .. البوست ده مش عن ( ليه باعمل كده دلوقتي .. و في الظروف دي بالذات ) .. البوست ده عن أحد أدوات التجربة دي .. و هو لما عملت أكاونت ( تيك توك ) جديد خاص بالتجربة دي . … و … إيه القرف ده !!!!!!!!!!!!! . … أكبر غلطة أعتقد إني عملتها ( و لكني قررت أكمل فيها و بيها ) .. هو إني لما عملت أكاونت التيك توك . ماكنتش مشغل أى VPN .. و إستخدمت إيميل و رقم موبايل مصريين ..و بالتالي .. كان واضح إني من مصر .. و النتيجة .. قرففففففففففففففف و ماقصدش بالقرف كونتنت جنسي مثلاً .. أو بنات بترقص أو قالعين .. إطلاقاً .. أقصد بالقرف هو تكرار أصوات و مقتطفات لأشخاص .. أقسم بالله العلي العظيم باقرف أشوفهم .. الأشخاص دول حالياً بيتم إستخدامهم في الأفلام و المسلسلات .. و المحتوي اللي بيتم تداوله و بناء ( تريندات ) عليه .. هو مقتطفات من حواراتهم عن فضايحهم و مشاكلهم .. … … لأول وهلة .. عنصر المفاجأة بالنسبة ليا كان صادم و فعال .. ببساطة لما ظهرت ليا الفيديوهات دي بمجرد إنشاء الأكاونت .. فضلت واقف عليها ثواني مش فاهم .. و بعدين ( و مانكرش ده ) الفضول لعب لعبته القذرة معايا .. الفضول دفعني أضغط علي الكومنتات .. و أشوف هو مين الكائن ده .. و بعدين ضغطت علي جملة بالأزرق ( اللي هو الهايبرلينك اللي بتظهر بيه التعليقات الأكثر إنتشاراً حالياً - Blue comment ) .. و بعد دقيقة تقريباً من إستهلاكي للمحتوي المقرف اللي فهمت منه مين هو الشخص ده و قصته إيه .. عملت سكرول .. و سكرول تاني .. و تالت .. و … و كانت النتيجة هي Infestation = إنتشار العدوي .. بقيت كل ما أفتح التيكتوك ده .. يطلع قدامي محتوي من نفس النوعية .. مرة تانية هنا ماقصدش ( محتوي جنسي أو إباحي ) … لا .. أقصد تكرار لنفس مقاطع الصوت بتاعت الكائنات العشوائية دي .. و فيديوهات لتريندات عليهم … و تريقة .. و قرف . … … طبعاً بعد يومين قررت إن كده كفاية .. و دخلت علي الإعدادات .. و منها علي ( content preferences = تفضيلات المحتوي ) و عملت إعادة إعداد كاملة .. عن طريق إني باغير اللغة اللي عايز أشوف محتوي بيها ( مسحت كل ما له علاقة بالعربي ) .. و بعدين بدأ تيكتوك يظهر ليا عدد من الفيديوهات العشوائية .. و منتظر يشوف رد فعلي عليها .. و بحساسية شديدة جداً كان أى فيديو يظهر قدامي قريب أو بعيد من الهري المقرف ده .. كنت باسكرول بأسرع ما يمكن .. … بعد يومين تانيين من مراقبة تيكتوك ليا .. و لنوع المحتوي اللي باقف عليه و أعمل عليه (لاف ) .. أو لايك .. عاد ليا تيكتوك نضيف 95% من المحتوي اللي بيظهر ليا منه هو فيديوهات قطط و أطفال و نجارة و أدوات و عدد و غيرهم .. … … … زماااااااااااااااااااااااااااااااااااان أوي … و أنا طفل صغير .. عمري ما أنسي لقاء ل ( صفوت الشريف ) وزير الإعلام لسنين طويلة في عهد حسني مبارك .. و اللي لما سأله صحفي ما ( رأيك إيه في اللي بيقولوا إن التيليفزيون المصري بييجي عليه محتوي مش مناسب لقيم العائلة و أخلاق مجتمعنا المسلم ؟! ) . رد عليه صفوت الشريف : التيليفزيون ليه زرار .. اللي مش عاجبه اللي عليه … يطفيه . … … … الفيروسات لما بتدخل الجسم .. مابتشتغلش مباشرة .. لا .. بتقعد فترة .. و أحياناً فترة طويلة جداً .. لحد ما بتتمكن من وضعها .. و بعدين بتبدأ تهاجم الإنسان .. الفيروسات بتدخل علي مستقبلات في الخلايا علي مقاسها بالظبط .. سبحان الله .. له حكمة في خلق الفيروسات بالشكل ده .. … الفيروسات الفكرية .. نفس الطريقة .. عقلك في مستقبلات علي مقاس الفيروسات الفكرية دي بالظبط .. عقلك عنده فضول عايز يعرف أكتر .. عقلك عنده فضول بيثيره الفضايح و الأخبار العجيبة و الفوضي و الهري ده كله .. عقلك مابيرفضش بشكل تلقائي الغريب و المثير .. … و لكن بعد فترة .. لو فضلت تستهلك فيروسات فكرية كتير بالمنظر ده .. عقلك بيكون تم السيطرة عليه .. و أصبح فريسة سائغة و سهلة جداً .. و مرتع بتعيش فيه الفيروسات دي .. … … مناعتك الطبيعية بتقوي أو بتضعف علي حسب أفعالك .. … … و زي ما جسم أنهكته الفيروسات الجسدية بيكون أضعف من إنه يقف قدام بلطجي و يطلب حقه .. .. عقل أنهكته الفيروسات العقلية بيكون أضعف من إنه يقف بلطجي و يطلب حقه .. … … خد أكشن .. غير إعدادات المحتوي .. قبل فوات الأوان .