عمو .. عايز نص كيلو براميلي و ربع زتون و

عمو .. عايز نص كيلو براميلي و ربع زتون و مربي فيتراك تين .. لو سمحت . … آخر مرة أفتكر إني إشتريت حاجة بالمنظر ده ( إني أسأل عمو البقال .. و هو اللي يجيب ليا الحاجات ) كان من أكتر من 12سنة !! .. فاكر أول مرة ( هايبر ماركت ) فتح في دمنهور ( مدينتي ) .. و فاكر إزاي إن فكرة إني أمشي جوة البقالة ( السوبرماركت ) الضخم ده كان متعة و تجربة جديدة .. و إني آخد الحاجة اللي عايزها في ال ( كارت ) .. و أروح علي ال ( كاشيير ) عشان أحاسب .. .. ( فتح الله ) فاتح فرع علي بعد خطوات من بيتي حرفياً .. و لما باحتاج أى شيء .. ببساطة باروح ل ( فتح الله ) .. و دلوقتي لما تمشي في أماكن كتير و أشوف ال ( بقالات ) اللي لسة محتفظة برونقها القديم .. بأقف أتأمل فيها بحنين و ذكريات … البقالات اللي فيها ( عمو ) دي لسة موجودة فأماكن كتير بكل تأكيد .. و محلات الملابس اللي بتسأل عمو علي حاجة و هو يساعدك .. برضو موجودة .. و غيرهم من أنواع الأنشطة التجارية اللي إسمهم (Mom and Bob shops ) .. يعني المحلات اللي بيملكها و يديرها أفراد زي مامتك و باباك كده .. مش منظمات و مؤسسات تجارية ضخمة ( conglomerates ) … … و لكن المنافسة كل سنة بتبقي أصعب بكتير .. بل تكاد تكون مستحيلة فأماكن كتير جداً .. معظم المحلات اللي كانت بتعتبر علامات أساسية فمدينتي ( دمنهور ) مثلاً .. و موجودة من أيام طفولة أبويا نفسه .. دلوقتي بتقفل تباعاً .. حتي الصيدليات .. بقت بتتحول لأسامي سلاسل ضخمة .. و نفس اليُفط و الديكور .. … … برة مصر الموضوع أوضح بكتير جداً .. فدول كتير دلوقتي .. نادراً لما ممكن تلاقي محلات مملوكة و بيديرها أفراد . معظم الأنشطة التجارية مملوكة لمؤسسات ضخمة .. .. بل إن في مصر و الدول المماثلة .. الأنشطة الخدمية كمان ( Service Industries ) بدأت تتحول تدريجياً للشكل المؤسسي ده .. و بدل ما كنت بتجيب سباك معين تعرفه أو حد رشحه لك .. أو كهربائي .. أو صنايعي معين .. دلوقتي بقي في تطبيقات كتير و شركات كتير بتقدم الخدمة بشكل مؤسسي .. أو حتي بتتواجد كوسيط في العلاقة .. زي (uber ) بس للخدمات . … الصورة المؤسسية دي للأنشطة الخدمية موجودة من زمان في دول كتير من اللي سابقينا بمراحل في سباق الرأسمالية .. … … السبب في كل الهري اللي باقوله ده … هو الكلمة اللي فاتت دي .. ال ( رأسمالية ) .. يعني .. إنتصار الرؤية المادية الهادفة للربحية فوق كل إعتبار .. طبيعي جداً إن المؤسسة الضخمة حتعرف تجيب السلع بسعر أرخص .. و تعرضه بسعر أرخص لك في الهايبر .. و تقدمه بشكل أشيك و أكثر تنوعاً .. مافيش منافسة منطقية إطلاقاً .. .. و لكن ده مش بوست عن ال ( رأسمالية ) .. .. و لكنه بوست عن ( التطور الطبيعي للحاجة الساقعة ) .. عن مرحلة ال (أما بعد ) .. عن السنين القادمة .. … أى دعوة لل ( عواطف ) .. و إنك تدعم ال (Mom and Bob shops) عن طريق إنك تشتري منهم .. فدي دعوة غير منطقية .. بل مؤذية لكل الأطراف .. لو من كل 100 شخص .. 10 تعاطفوا و إشتروا من عمو البقال .. فال 90 الباقيين مش حيتعاطفوا .. و حيرجحوا مصلحتهم المادية بكل تأكيد .. و حيشتروا من الهايبر .. ده منطقي … ليه أفيد عمو البقال مادياً .. و أخسر أنا مادياًَ … هو اللي المفروض يفكر في نشاط مختلف … صح ؟ .. و بالتالي .. ضرر ال10% اللي حيتعاطفوا مع عمو البقال و يشتروا منه .. إنهم حيخلوه دايماً شايف إن في أمل .. و حيخلوه يتردد مدة أطول إنه ( يقفل ) .. أو ( يغير ) نشاطه .. و بالتالي .. تأجيل القرار اللي يؤدي لربحية مادية أسرع بالنسبة له . … دي رؤية طبيعية جداً.. و مستحيل تقدر تقنع ال90% إن من مصلحتهم الجماعية إنهم يساعدوا عمو البقال .. و إنهم لو فعلاً ساعدوه يستمر في ربحيته .. إن ده بيديهم فرصة في المستقبل إن حد منهم هما كمان يكون ( عمو بقال ) .. و يكسب .. و يكون في منافسة في السوق .. ضد المؤسسة الضخمة المحتكرة . … و لكن من رابع المستحيلات إنك تقدر تقنع جماعة بده .. المصلحة الفردية دايماً بتكسب .. و بتخسر المصحلة الجماعية .. و بتكون النتيجة هي خسارة الفرد في الآخر .. دي قاعدة أساسية في الإقتصاد و علم النفس و الرياضة .. ( ضمن فرع الرياضة الرائع ال Game theory ) . … و بسبب القاعدة الأصيلة دي .. ( أمازون ) دايماً بتكسب .. و تحولت للغول الضخم اللي هي عليه حالياً . … … و عن السنين القادمة .. ( لو مدينا الخط الحالي علي إستقامته ) .. حتلاقي مؤسسات ضخمة جداً .. بدأت تبلع مؤسسات ضخمة أصغر منها .. و هكذا .. لنفس السبب اللي قلته فوق .. .. يعني .. أمازون حاولت تشتري ( فليبكارت = flipkart ) في 2018 .. ( فليبكارت ) ده كان زي أمازون كده .. بس في الهند .. و فشلت .. لأن (وولمارت = wallmart ) هما اللي إشتروه 🤣 .. .. و زي ما إحنا عارفين .. أمازون إستحوذت علي ( سوق ) فمصر من كام سنة .. .. و لو فضلت أكتب أمثلة كتير تانية عن باقي المجالات .. البوست حيطول جداً جداً جداً .. … … في تخيلات كتير جداً إتكلم عنها ناس أعلم مني و أذكي بمراحل .. عن العالم خلال السنين القليلة القادمين حيبقي عامل إزاي نتيجة كل الهري ده .. .. أنا مش حاكتب التخيلات دي .. و لكن البوست ده يمكن مجرد فضفضة إفتكرتها إمبارح أول ما فوقت .. بعد ما عينيا غفلت للحظات أثناء ما أنا سايق العربية علي الطريق السريع 😅😅 بالظبط زي الصورة بتاعت البوست ده .. فوقت فجأة لقيتني كنت نمت فعلاً و راسي نزلت لتحت 😅 و العربية ماشية علي 90 .. ماوقفتش .. و رجلي علي البنزين .. و الطريق قدامي مفتوح .. .. الحمد لله .. اللهم لك الحمد و الشكر عدد لا يُحصي من المرات .. .. كمية الأدرينالين اللي إتفرزت فجمسي و عقلي بمجرد ما خدت بالي و فوقت .. كانت كافية إني أكهرب أى حد يلمسني تقريباً بعدها 🤣😁 .. لكن لقيت عقلي كله تفكيره إتوجه بشكل تلقائي تجاه الأفكار اللي في البوست ده … إحنا بكل تأكيد ماشيين .. بسرعة .. جداً .. و الطريق مفتوح .. و فاضي .. أنا ماعرفش نهاية الطريق فيها إيه … لكن عارف إننا بنغفل و ننعس كتير .. جداً .. و إن حاجات أحياناً كده بتصحينا و تخلينا نفوق نبص قدامنا .. .. ربنا يستر و يكون لسة في وقت قبل ما نلبس فحيط أو فسور أو فأى حاجة فوشنا .. … و الله أعلم .