يعني إيه ( جنة الدنيا .. جحيم ) ؟

يعني إيه ( جنة الدنيا .. جحيم ) ؟ .. زمااااااااااااان .. زمان أوي .. أيام الأبيض و إسود .. كان في مسلسل جامد إسمه ( the twilight zone - منطقة الشفق ) .. كان بينزل من سنة 59 لسنة 64 .. المسلسل كان حلقات منفصلة , و فيه حاجات كتير جامدة ممكن أتكلم عنهم في بوستات منفصلة بعد كده .. ( أنا نفسي ماشفتوش كله لسة ) . .. لكن حلقة من حلقاته إسمها ( A nice place to visit - مكان لطيف تزوره ) .. فوجهة نظري من أحلي الحلقات اللي ممكن تشوفها و تفكر فيها . … الحلقة بتبتدي بإنك بتشوف ( روكي ) حرامي بيسرق محل مجوهرات .. بيهجم عليه الشرطة .. بيطلع يجري منهم .. بيقتلوه .. و بعدين بيصحي يلاقي راجل عجوز تخين شبه ( سانتا كلوز - بابا نويل ) .. بيقول له أهلاً بيك في العالم اللي كل أحلامك و أمانيك فيه .. حتتحقق . … ( روكي ) بيقلّق منه الأول .. و يفضل شاكك .. يا تري إنت عايز مني إيه يا تختوخ إنت ؟! .. و بيطلب فلوس .. يلاقي الراجل بيديله فلوس .. كتير أوي .. أكتر من اللي كان يحلم بيها .. روكي بيطلب حريم و ستات … بيلاقي أحلي ستات يتخيلهم قدامه بيقولوا له ( هيت لك ) . بيطلب أكل .. بيلاقي أكل .. … روكي بيتنطط من الفرحة حرفياً و بيبدأ يعيش كل أحلامه و أمانيه زي ما كان بيتخيلهم بالظبط .. و أكتر .. بيلعب قمار كل يوم .. و بيكسب كل يوم .. بيراهن علي كل شيء .. و بيكسب كل مرة .. … و بعدين .. تدريجياً .. بيبدأ يحس إن في حاجة مش مظبوطة .. .. تدريجياً بيبدأ يتضايق إنه بيكسب كل مرة في القمار .. تدريجياً بيبدأ يزهق من النسوان و الحريم اللي متاحين بكل شكل و لون و طريقة يتمناها .. تدريجياً بيبدأ يزهق من الأكل و المردغة و النعيم و الدرمغة .. … تدريجياً .. روكي بيزهق لحد ما بيوصل بيه المرحلة إنه ينفجر .. ينفجر و يشتكي للراجل العجوز التختوخ اللي شبه سانتا كلوز ده .. الراجل بيسأله .. تحب تعمل إيه يخليك مش زهقان ؟! .. روكي بيقول له .. أى شيء .. أى حاجة .. الراجل بيقول له .. تحب تسرق بنك مثلاً ؟! .. روكي بيرد عليه بكل شوق .. ( أيوة .. بس أرجوك قول لي إني ممكن أتقفش ) .. الراجل بيرد عليه و يقول له .. ( أكيد .. ممكن يترتب الموضوع إنك تتقفش ) .. روكي بينهار و هو مصدوم و بيشرح .. أنا مش عايز الموضوع مترتب .. إنت مش فاهم .. .. و بيبدأ يقول له .. أنا مكاني مش هنا .. أنا مش مستمتع هنا في الجنة دي .. أنا عايز أروح الناحية التانية .. أنا عايز أروح الجحيم .. .. الراجل العجوز التختوخ اللي شبه سانتا كلوز بيرد عليه : الجنة ؟!!! .. مين قال لك إنك في الجنة ؟! .. إنت في المكان التاني بالفعل .. إنت .. في الجحيم .. .. و بعدين بيضحك ضحكة شريرة متقطعة طويلة . .. و بتنتهي الحلقة بقراءة الحكم السماوي علي ( روكي ) .. إنه يعيش مُخلد في كل النعيم اللي كان بيحلم بيه و يتمناه .. للأبد . … … الفكرة اللي في الحلقة دي مش أول مرة يتم تناولها بشكل أدبي أو قصصي أكيد .. بل إن منذ قديم الأزل .. و في روايات و كتابات كتير جداً تناولت نفس الفكرة . و يمكن من أيام الإلياذة و الأوديسا نفسهم .. الفكرة دي كانت موجودة بشكل أو بآخر في الملاحم دي .. … الفكرة هي : جنة الدنيا .. في الدنيا … جحيم . .. الإنسان لو أُتيح له كل ما يتمناه في الدنيا .. بدون تعب و معاناة .. يُعاني أشد المعاناة .. و ينتهي بيه الأمر للهلاك المطبق . … … كل الألعاب الإلكترونية حالياً و الفيديو جيمز بالكامل .. شرط أساسي في بناءهم .. إنهم يحطوا الفكرة دي فإعتبارهم من البداية و فكل خطوة أثناء بناء اللعبة ذاتها .. و هي إن اللعبة ماتكونش سهلة لدرجة إن اللي يلعبها يزهق و يمل من سهولتها .. و ماتكونش صعبة لدرجة إن اللي يعلبها يتخنق و ييأس .. .. لااااااااااازم تبقي صعوبة اللعبة في النص .. بين السهولة المملة .. أو الصعوبة اللي تصيب باليأس . … … … طيب … أما هي المعاناة حلوة و لذيذة و مهمة بالشكل ده … أنا طالع أيماني و تعبان و مخنوق ليه من حياتي المتعبة دي ؟! .. باشتغل و باتعب و مش مستمتع ولا حاجة ؟! .. عايش فمكان مليان مشاكل .. و مش مستمتع ولا بلح ولا أى شيء ؟ .. ليه ؟! .. … الإجابة .. إطلااااااااااقاً مش إنك تاخد أجازات زيادة .. أو إن مرتبك يبقي أعلي شويتين تلاتة أربعة .. أو إنك فجأة تورث 10 مليون دولار مثلاً .. … الإجابة عمرها ما كانت بإنك تاخد حاجة من الدنيا دي .. لا فلوس .. و لا بنون .. ولا جاه و سلطان . كل الحاجات دي عبارة عن مسكنات .. حاجات بس بتأجل إنك تحس بالحقيقة .. … الإجابة هي : العبودية لله وحده .. لا شريك له .. … ** عند النقطة دي في البوست .. فضلت قاعد نص ساعة باصص في السقف بافكر أختصر أفكاري إزاي في النقطة دي .. لأن كلمة ( العبودية لله ) .. دي مشروح فيها مراجع و مراجع .. و بعدين قررت أنهي البوست ده بتساؤل يوضح مقصدي . … 1- بتفكر فجسمك و بتاخد أفعال لجمسك كام مرة في اليوم ( دخول حمام / أكل و شرب / لبس و مسكن / … ) ؟! 2- بتفكر في اللي حوالين و بتاخد أفعال لهم كام مرة في اليوم ( شغل / علاقات / خروجات / مقارنات / … ) ؟! . .. 3- بتفكر في ( خلقك ) .. و ( خالقك ) .. و بتاخد أفعال لها علاقة بده .. كام مرة في اليوم ؟! . … … بتقضي أكبر قدر من وقتك و مجهودك و أفكارك و حياتك .. لمين ؟! .. نفسك و جسمك ؟! .. غيرك و مديرك و بشر حواليك ؟! .. .. بتعبد مين ؟! . … فكر في إجابة السؤال ده .. حيقودك لإجابة السؤال اللي فأول البوست .. … و الله أعلم .