زٌرار .. تضغط عليه

زٌرار .. تضغط عليه .. تصحّي الشخصية اللي تتمنّاها جواك ( Awaken your potential) . .. دي هي الرؤية الكاملة ل ( Zalfol - زالفول ) .. ال ( End Goal = هدف نهائي ) اللي لما أوصل له إن شاء الله .. حاعتبر إني نجحت فعلاً . .. حتي الآن بفضل الله ( بدون أى تسويق أو دعاية إطلاقاً غير بعض البوستات اللي كتبتها هنا .. و فأقل من شهر ) .. عدد المستخدمين ل زالفول تخطوا 2000 مستخدم .. منهم زيادة عن 30% بفضل الله بيستخدموه ب شكل يومي .. و 10% تقريباً علي الخطة المدفوعة . . و علي مدار ال شهر اللي فات ده .. طول الوقت كنت باعمل إحصائيات للنسب دي .. و باحاول أشوف إحتياجات المٌستخدمين و بناقشهم فيها . و أحد أوضح النتائج من الإحصائيات دي كانت : إن نسبة كبيرة من المٌستخدمين بيحاولوا يستخدموا ( زالفول - zalfol) عشان يتعلموا مجالات جديدة .. أو يتعلموا مهارات متقدمة في مجالاتهم الأساسية . . الطبيب اللي عايز يتعلم برمجة . المهندس اللي عايز يتعلم طب 🤣 . أو الطبيب و المهندس اللي عايزين يتعلموا تسويق ( بما إن في خناقات كتير طالعة تريند في المجال ده حالياً 🤣🤣 ) . . و ده خلّاني قضّيت أول يوم في أجازتي اللي كنت مسافر فيها من أسبوع .. مش باعمل شيء غير إني بافكّر : هو الإنسان بيتعلّم إزاي ؟! . أو السؤال ب شكل أدق : هو الإنسان .. لمفروض يتعلّم إزاي ؟! . … السؤال ده خد منّي يوم كامل تفكير .. و في الآخر إكتشفت إني كنت باسأل السؤال الغلط تماماً .. .. لأن .. قبل ما الإنسان بيتعلّم شيء ما أو مجال ما .. في حاجة لازم تحصل الأول .. و هي : لازم الإنسان يحتاج ( يحب , يهتم ) إنه يتعلّم الشيء أو المجال ده . … يعني : قبل ما تعلّم إنسان إزاي يجاوب علي سؤال زي ( تحسب إزاي كثافة جسم من مادة مٌعينة ) مثلاً … لازم الأول تخلّيه يحتاج يسأل السؤال ده .. و في الحالة دي بس .. لما الإنسان بنفسه هو اللي حيحتاج يسأل .. لما حيتعلّم الإجابة … حيعرف إنه يستخدمها .. مش بس حيستخدمها عشان يجاوب في إمتحان و يجيب درجات مالهاش أى قيمة حقيقية في الحياة .. و لكن حيستخدمها بإبداع . و ده هو المهم . … و ده اللي قادني للسؤال التالي : الإحتياج ( الحب , الإهتمام ) لتعلّم مجال .. ده بيحصل إزاي ؟ إمتي أنا شخصياً مثلاً إهتمّيت بمجال زي ( بناء التطبيقات ) ده ؟! .. فبالتالي قضّيت وقت و مجهود و فحت و ردم كتييييييييير أوي .. لحد ما إتعلمت كل اللي أعرفه فيه حالياً ؟ . إمتي أنا إهتميت بأى مجال تاني من المجالات المٌختلفة اللي أقدر نسبياً أفتي فيها ( بيزنس , هندسة إتصالات و إلكترونيات , رياضيات و خوارزميات , … أو حتي أى جيم من الجيمز الكتير اللي بالعبها ) ؟! . . الإجابة ببساطة : ( لمسّت في شبكة الأعصاب= it linked ) . . يعني إيه ؟! . لو و أنا ماشي جنبك في الشارع و باتكلّم بصوت عالي و قلت : ” اللي حصل مع شينّاي سوبر كينجز ده مش حيعدي بسهولة !!! .. و ماحدش يقدر يتريق بالشكل ده علي التاميليين !! ” . إنت حتنتبه ؟! .. حيفرق معاك حاجة ؟! .. ولا أى بتنجان .. ليه ؟! لأن بنسبة كبيرة جداً إنت أساساً ماتعرفش أى حاجة عن رياضة الكريكيت ( أشهر رياضة في الهند ) .. ولا أسامي الفرق المشهورة فيها .. و لا القصص و الدراما و الحكايات اللي بتحصل فيها . . يعني .. شبكة الموصلات العصبية بتاعتك .. أفكارك و ذهنك و مشاعرك .. كلها مافيش فيها أى حاجة موصلة علي ال ( كريكيت ) إطلاقاً .. ف مهما آجي أنا جنبك .. و أفضل أشرح لك قواعد و قوانين اللعبة .. و لا إنت حيفرق معاك أى شيء .. و ولا حتتعلم .. و حتكرهني و تكره اللعبة و تكره الهند زيادة عن ما إنت بتكرهها أساساً 🤣 . … لكن .. لو و أنا ماشي جنبك في الشارع بقي .. و باتكلّم بنفس الصوت العالي .. قلت : ” لااااااااا يا عم .. ده لسة كابتن حسام حسن من المنتخب مكلمني حالاً … و بلغني إنه مستني - و رحت قايل إسم أخوك مثلاً أو أعز إصحابك الثلاثي - و إنه مش حيلعب كاس العالم غير و الراجل ده معاهم 🤣 ” . ساعتها إنت حتهتم جداً .. و تركّز للغاية .. و تتسائل .. و تنفعل .. و … و شبكة الموصلات العصبية في عقلك بالكامل .. حتستحضر كل ما له علاقة ب كرة القدم و قوانينها المٌعقدة و المتشعبة جداً .. و حتلاقي نفسك بتفتكر تاريخ أندية و أسامي لاعيبة و قصص و حكايات و كم كبير جداً من ال معلومات اللي ليه علاقة بالمجال ده . . و ده لأنّي ( لمسّت في شبكة الموصلات العصبية بتاعتك - linked ) . و لو ناقشتك حينها في أى شيء في المجال ده .. حتكون جاهز إنك تتعلم , و بعدين تسأل , و تتسائل , و تتعلم تاني .. لحد ما توصل لمرحلة متقدمة جداً جداً جداً .. تكون جاهز فيها إنك تجاوب . … الأسلوب ده في التعليم .. كان أحد أهم الحاجات اللي إعتمدت عليها أثناء السنين اللي درّست فيها و كنت باشرح كورسات . و اللي حضر معايا أى كورس ليا .. يفتكر كويس إني كنت باكرر جٌملة معينة كتير جداً .. و هي : ” أنا مش هنا عشان أعلمك إزاي تجاوب , لأن ده دور الإنترنت دلوقتي خلاص .. و لكن أنا هنا عشان أعلمك إزاي تسأل ” it’s not my role to teach you how to answer, it’s my role to teach you how to ask . . و شرحت كتير إنك لو إتعلمت ( إزاي تسأل ) .. تقدر بعد كده تكمل و تشرخ في المجال براحتك … لأن الحصول علي الإجابات حالياً أسهل ما يكون . … و ده هنا قادني للسؤال التالي : إيه بقي هي الحاجة اللي مٌشتركة بين أكبر عدد من البشر .. ف ينفع إنها تٌستخدم ك رابط مباشر و واضح لأى مجال جديد أى إنسان عايز يتعلمه ؟! . و الإجابة كانت واضحة وضوح الشمس .. خصوصاً إن الفيسبوك عندي علي مدار الأسبوعين اللي فاتوا كان عبارة عن ناس مشهورين في مجالات ( بيزنس , ماركتنج , أكاديميين ) بتتخانق مع بعضها و تشتم بعضها 🙂 . . الإجابة كانت : الدراما . … لما أقول لك مثلاً إن نيوتن لبّس لايبنتز خوازيق . أو إن لايبنتز كان بيحسبن علي نيوتن و بيدعي عليه في الرايحة و الجاية .. و بيكتب بوستات علي الفيسبوك يفضحه فيها … و بيقول إنه كان ماسك عليه سكرين شوتس 🤣 . . أو لما أقول لك إن ( لاينوس ترافولد ) .. الراجل اللي بني و إخترع نظام لينيكس لوحده .. الراجل اللي بيٌعتبر أحد عباقرة عالمنا الحالي .. ليه فيديو مشهور جداً في أحد محاضراته .. عمل حركة صايعة بصوباعه الوسطاني و شتم ( إنفيديا ) 🤣 شتيمة أبيحة .. الشركة اللي مسئولة عن أغلب صناعة الهاردوير اللي قائم عليها كل ما له علاقة بالذكاء الإصطناعي حالياً .. . إنت بكل تأكيد ممكن ماتكونش عارف مين هو نيوتن .. أو لايبنتز .. أو لاينوس ترافولد .. . لكن .. إنت أكيد عارف الشتايم الأبيحة 🤣 . … الحقيقة هي إن الموضوع مش بال( تفاهة أو بساطة ) اللي باحاول إني أكتب بيها ل تسهيل و تبسيط الفكرة . . بل .. إنك لو رجعت في بوستاتي علي مدار السنين اللي فاتت .. حتلاقيني كاتب بوستات كتير جداً عن إن : نظام التعليم الحقيقي اللي بيولّد مٌبدعين .. هو نظام التعليم القديم .. ال ( تلمذة - apprenticeship ) . . و اللي كان فيه .. بيروح الطفل يعيش حياة كاملة في الورشة مع الأستاذ .. مش بيقعد في فصل .. مش يتحط قدامه منهج و درجات .. لا .. حياة كاملة بيعيشها الطفل ( التلميذ - disciple ) .. بيتشرّب فيها كل جوانب الحياة مع الأستاذ . يشوف زعله , خناقاته , فرحته , فخره , ألمه , … . و عقل الطفل بشكل فطري فاهم المشاعر دي كلها .. ( دي هي شبكة الموصلات العصبية الأساسية الفطرية عند الإنسان ) .. و بيبدأ يربط في شبكة الموصلات العصبية دي .. كل الحاجات العجيبة اللي في المجال و بتحصل في الورشة . . ف الطفل مش بيكون فاهم بالضرورة يعني إيه ( bug ) .. لكن .. بيبدأ يتعلم إن لما الشاشة تطلع سطور حمرا كتير .. و كلمة ( error ) .. و يلاقي المعلّم بدأ يشد فشعره و يضرب الحيطة بالبوكس .. بيفهم إن ( bug ) دي حاجة وحشة . . تدريجياً بيبدأ ذهنه يكون ( مٌستقبلات = أسئلة ) .. ف لما المعلّم يبدأ يشرح له في قعدة صفا مع كباية شاي .. إن ( bug ) دي معناها مشكلة .. و لازم يتعلم يتعامل معاها إزاي .. و خطوات الحل إيه .. . ذهن التلميذ بيستقبل الإجابة دي بشكل مختلف تمااااااااااااااااااااااااااااااااااااماً .. عن لو كان تم تغذيته بالإجابة مباشرة قبل ما عقله يكون السؤال . … … و عند المرحلة دي من أسبوع .. كان أول يوم في أجازتي خٌلص .. 24 ساعة صاحي و سواقة و بهدلة … و كنت لسة مانمتش .. زي دلوقتي كده 🥹🥲 .. .. و بدل ما أدخل أنام .. عقلي كان غرقان في الدوبامين ( زي ما بيحصل لما بابقي بافكّر في بناء أى شيء ) .. … ف قمت ( آه والله العظيم ) .. و رحت عامل كٌباية شاي تقيل دوبل بالفليّة .. ( مش قهوة ) .. لأن القهوة بتهايبرنا بسرعة لفووق أوي .. و ت ( كراشنا ) بسرعة برضو لتحت أوي .. لكن الشاي هو اللي ينفع يخلينا صاحيين 8 ساعات مستقرين شوية … . و بدأت في بناء الحاجة اللي هي حالياً موجودة بالفعل بحمد الله .. و شغّالة و حيّة علي ( زالفول ) .. بنيت ال ( disciple mode = نظام التلمذة ) . … و كل خلية في عقلي بتقول لي أكمل البوست ده لحد ما يبقي طويييييييييييييييييييييييييل أوي .. و أشرح كل اللي تم بناءه .. . لكن كل خلية في جسمي ( و عقلي برضو ) .. بتشتمني و فاضل شوية و تعمل ليا حركات أبيحة زي اللي عملها ( لاينوس ترافولد ) ل إنفيديا 🤣 .. لأني علي مدار الأسبوع اللي فات بالكامل .. تقريباً مانمتش في أى يوم أكتر من 3 ساعات مٌتفرقين علي بعض .. . و السبب .. كان إتمام ال ( disciple mode ) .. و هو حالياً جاهز ب 3 مجالات أساسيين : 1- software development 2- personal finance and investment , و المجال التالت ( عشان الناس اللي قاعدين بيتخانقوا فيه 🤣 ) .. ال ( ماركتنج ) .. … و لما أصحي إن شاء الله بقي ( و يا رب أعرف أنام شوية ) .. حاكمّل شرح . . إلي هذا الحين .. تقدر تدخل و تجرب و تعيش حياتك بنفسك في ( زالفول ) . و الأهم : تسأل 😁 . و الله أعلم .