أنا مهندس ( كهرمان 😅) و إتصالات

أنا مهندس ( كهرمان 😅) و إتصالات .. لك أن تتخيل إن دي معلومة عرفتها صٌدفة في يوم من الأيام الكتيييييير اللي قضّيتها نايم لوحدي فوق سطح مبني إعدادي فكلية هندسة .. قبل ما يبنوه و يمنعوا إننا نطلع فوقه .. لسبب مٌعين مش حاذكره دلوقتي .. بس دٌفعتي غالباً ممكن يفتكروه 😅 .. .. للدقّة .. أنا ماعرفتش المعلومة .. و لكن السؤال فجأة نط في ذهني فجأة كآلاف الأسئلة اللي بتتنطط فعقلي طول الوقت .. و السؤال هو : يعني إيه كهرباء ؟! . مٌش باسأل عن ( الوظيفة أو المعني الفيزيائي ) .. لا .. دي حاجات شرحتها زماااااااااااااااااان سنة 2014 علي ما أتذكّر .. و لكن كنت باسأل عن ال ( إسم ) نفسه .. يعني .. مين اللي شاف حاجات بتتحرّك .. أو طاقة معينة .. و راح مسمّيها ( كهرباء ) ؟!! .. إشمعني الإسم ده ؟! .. ليه مٌش ( حمادة ) مثلاً ؟! .. و كانت تبقي عدّادات حمادة بالكارت .. لمبة بتشتغل بالحمادة .. … ببساطة .. فاكر زماااااااااااان في إبتدائي لمّا كنت بتمسك المسطرة البلاستيك و تحكّها في شعرك كتير .. و بعدين تحركّها فوق شوية ورق متقطّعين عالتختة .. تقوم تجذبهم زي المغناطيس و يتحرّكوا .. يقوم صاحبك يغتت عليك و ينفخ فيهم فيطيروا .. تقوم إنت متعصّب عليه و تزقّه .. تقوم المٌدرّسة مذنبّاكم إنتوا الإتنين و توقفكوا رافعين إيديكوا لفوق عشان تكمّل هي شرح في هدوء ؟ … أهو نفس اللي إنت كنت بتعمله ده .. كان بيعمله البشر من آلاف السنين زماااااااااان .. بس بدل المسطرة البلاستيك .. كانوا بيعملوه بال ( كهرمان = اللي هو العقيق = اللي بالإنجليزي إسمه amber = … و باللاتيني إسمه ؟! … electrum = .. و باليوناني إسمه : elektron ) . ترجمت ؟! .. ببساطة .. الحجر النفيس ده .. كان لمّا بيحتك في فراء الحيوانات و الشعر .. كان بيوّلد نفس الظاهرة اللي إحنا دلوقتي عارفينها بإسم ( كهرباء إستاتيكية ) .. ف الناس سمّوا الطاقة دي بإسم ( ظاهرة الكهرمان .. أو باللاتيني .. electrum phenomenon ) . … و اللفظ بالعربي تحوّل ( تقريباً بسبب واحد كان عنده دور برد و مخنف 🤣 ) .. من كهرمان ل كهرباء . … ليه بقي كل القصّة العجيبة دي ؟! لأن دي والله العظيم هي أول خطوة ( حقيقية ) فإنك تفهم فعلاً الكاميرا الديجيتال شغّالة إزاي .. … فرق كبييييييييييييييييييييييييييييييييير .. بين إنك تعرف الحاجة .. و إنك تفهمها . و اللغة .. لها التأثير الأضخم في الفرق ده .. .. يعني .. أى مهندس ( كهرباء ) دارس أساسيات شغله .. يقدر يقول لك بكل بساطة إن : الكاميرا الرقمية بتعتمد في بناءها علي حسّاس رقمي بيحوّل الضوء لإشارات كهربائية عن طريق تخزين الإشارات دي في مصفوفة من المٌكثفّات 😅🤣 .. . فهمت حاجة ؟! . حتي لو عرفت وظيفة و تركيب كل كلمة في التعريف اللي فوق ده .. إنت لسّة بتحس إن الموضوع بعييييييد .. بعييييييييد أوي عنّك .. ليه ؟! . لأن الرابط بين الحاجات اللي عرفتها دي .. و بين ( جذرك ) المعرفي الأساسي .. مفصول .. مش موجود . … جذرك المعرفي الأساسي .. ده اللي إنت بتقدر تستخدمه عشان تفكّر بشكل إبداعي .. و ده اللي موجود عند كل البشر .. تلاقي إنسان مثلاً عمره ما درس شيء من الفيزياء أو العلوم عموماً .. لكنه بيبدع في تركيب حاجة ميكانيكية .. أو بيعرف ( يفن أو يبدع ) في صنعة ما .. فقط بإستخدام حدسه و إحساسه . .. لو حاولت تعلّم الشخص ده .. بالأسلوب التعليمي المنهجي المٌعتاد خلال آخر 200 سنة .. بإنك تحفظّه شوية تعريفات .. و تمشّيه علي طرق ممهدة في كتب ملونة .. إنت مش بتعلّمه .. و لكن بتؤهلّه .. حيطلع موظف .. مش مٌبدع .. حيعرف يستخدم .. مش حيتعلّم يبدع بنفسه .. يكتشف بنفسه .. .. لكن لو عرفت تبني فوق جذره المعرفي الأساسي .. و توصّل كل معلومة جديدة يعرفها بالجذر ده .. حتشوف إمكانياته الإبداعية الحقيقية . … عشان كده .. أحد أهم المواضيع اللي كنت إتكلمت عنها من فترة .. هو أهمية تعلّم العلوم باللغة الأم للفرد … مش باللغة الأجنبية .. . و إن أحد أهم ( مبادئ تعلّم أى علم ) .. هو علم ( الإيتيمولوجي ) للعلم ده .. يعني الحاجات اللي في العلم ده .. إتسمّت بالأسامي بتاعتها دي ليه .. … و سبب إني بدأت القصّة دي كلها من عند ( الكهرمان ) . هو إن ده هو البداية الحقيقية فعلاً .. إن الإنسان شاف ظاهرة مٌعينة ( اللي هي لما بتحك كهرمان في فرو ) .. مافهمش منها حاجة خالص .. و سمّاها بإسم الحجر المرتبط بيها .. و علي مدار آلاف و مئات السنين .. الطاقة و التأثير الناتج ده .. الناس حاولوا يستخدموه في حاجات مٌختلفة .. و عشان تعرف تستخدم حاجة .. لازم تتعلّم تعيد إنتاجها .. و تخزّنها .. . و هي دي فكرة ال (مٌكثف ) .. برطمان زجاج .. فيه سائل .. و عمود معدن .. و وظيفته هي ( إنه يحبس شحنة الطاقة الإستاتيكية ) .. بحيث إنك تحك العمود المعدني ده .. و تسيب البرطمان كام ساعة .. و ترجع .. تلاقيه لسة بيـ ( كهرم 🤣 = كهرب ) .. … و إتخيّل بقي دلوقتي .. مربع ضخم .. فيه 100 مٌكثف مثلاً .. محطوطين علي هيئة ( 10 * 10 ) .. و بعدين كل مٌكثف منهم .. متوصل ب مادة مٌعينة .. لو إتعرضت للضوء .. بتطلّع شحنة ( كهرما ) .. .. البوست اللي جاي حاشرح فيه ده تفصيلياً إن شاء الله ( اللي هي المواد اللي بتتفاعل مع الضوء و بتطلّع شحنة كهربائية .. أساس كل ما له علاقة بالطاقة الشمسية عموماً ) . .. المهم .. كل برطمان كده .. حيخزّن شحنة ( كهرما ) .. علي حسب كمية الضوء اللي هو إتعرّض لها .. صح ؟! . .. بس كده خلاص .. عبّي بقي ال 100 برطمان دول في صندوق .. و وصلهم ب حاجة تقدر تقرا و تترجم مقدار الشحنة اللي إتشحنها كل برطمان .. و ألف ألف مبروك .. إنت عملت ( حسّاس كاميرا رقمي ) 😅 .. … البوست القادم برضو إن شاء الله حاشرح فيه بقي .. إزاي تعمل شاشة في البيت تعرض عليها الصورة اللي إنت خزنتها فبرطمانات دي 😅 . … رجاءاً .. رجااااااااااااااااااااااءاااااااااا … إسأل .. .. الأسئلة مش بفلوس والله العظيم .. إسأل حتي لو مش حتعرف الإجابة .. . لمّا سألت نفسي السؤال بتاع ( كهرباء = كهرمان ) ده .. كان سنة 2005 .. كان لسّة مافيش فيسبوك فمصر .. و النت كان شغل منتديات و ياهو .. و السعي للإجابة علي أسئلة زي دي .. كان تأجير ساعات في سايبر .. و شغل بحث في مكتبات علي قديمه .. .. بس ثواني .. هو إنت عارف إنت نفسك سمّوك بإسمك ليه ؟! 🤣😅 .. .. أنا أمي كانت عايزة تسمّيني شريف .. و أبويا كان عايز يسمّيني أدهم ( و فضلت علي مدار فترة مراهقتي باتمني إني كان يبقي إسمي أدهم .. عشان كنت عاشق لأدهم صبري ) .. . جدي رحمة الله عليه .. هو اللي سمّاني إسلام .. و أشكره علي ده .. و أدعو الله أن يجعل لي حظاً من إسمي . … و الله أعلم .