هو في شيء معين أنا متأكد منه جداً جداً

هو في شيء معين أنا متأكد منه جداً جداً .. إن الموقف اللي فيه لعيب الكورة المشهور أوي أوي ده و إحتفاله بالكريسماس كل سنة .. و تعزيته في الست إليزابيث .. و صوت صرصور الحقل في اللي بيحصل دلوقتي .. هو نفس موقف المذيع الكوميدي اللي راح الجيم و عمل عضلات .. المشهور فحت خالص برضو ده .. و اللي هاج و ماج لما نيتفليكس عملت مسلسل كيلوباترا بطلته سمرا .. و طلع علي CNN يجادل و يحاور .. و برضو صوت صرصور الحقل في اللي بيحصل دلوقتي .. و غيرهم من مواقف كل حد مشهور فحت جداً اوي خالص .. و بيستغل أى تريند يمشي عالموضة و ينفع يتم إستغلاله .. لكن في مواقف معينة بيعمل فيها من سويسرا و عالحياد .. .. اللي متأكد منه هو : إن كل إنسان علي وجه الكرة الأرضية دي منذ بدء الخليقة .. إتعرض .. و بيتعرض .. و حيتعرض .. لإختيار مشابه .. .. علي قدر ما ربنا أنعم عليك و أكرمك من نعم الدنيا .. علي قدر ما حيتم إختبارك بالنعم دي .. بالكامل . .. يعني : لما تسأل نفسك : هو لعيب الكورة اللي عنده ملايين المتابعين ده مش قادر يشير بوست علي الأقل ؟!! .. لازم تسأل نفسك إنت كمان .. إيه نوع الإختبار و الإختيار اللي إنت بتتعرض له و لسة مش قادر تختار ؟! . … بالنسبة للعيب الكورة المشهور .. بوست زي اللي إنت نفسك فيه .. معناه إنه يدفع كل ما ( توهم ) إنه حصل عليه خلال حياته بالكامل .. اللي حصل عليه خلال حياته و إنت حسدته .. الفلوس الكتير اللي بتقعد تعدها عليه مع كل أخبار تجديد عقد .. الفلوس الكتير أوي اللي بتقعد تحسبها عليه مع كل إعلان بيطلع فيه .. كل مليم حسدته عليه .. و كل لحظة شهرة .. و كل متابع علي إنستاجرام .. كل ده .. دلوقتي بقي محطوط في كفة .. قدام إرادته و شجاعته .. … و أكاد أُقسم .. إن كل إنسان في الحياة ربنا رزقه بنعمة .. حتتحط له في كفة .. و يتعرض عليه إختيار في الحياة دي .. … إنت متخيل إنك لو مكانه حتختار بسهولة .. لكن لو بتفكر بالشكل ده .. يبقي إنت متوهم للأسف … الإختيار سهل فقط .. لو إنت فاهم مدي صعوبته و خطورته .. سيدنا عمر بن الخطاب .. و سيدنا أبو بكر .. كانوا بيبكوا خوفاً من إنهم يتحطوا في إختيار و يختاروا غلط .. .. الثقة اللي عندك دي .. لأنك مفكر إنك علي البر .. و اللي عالبر عوام .. لكن إنت مش عالبر إطلاقاً .. إنت في قدر من الإختبارات و الإختيارات .. علي قدك بالظبط . … بص لحياتك كويس جداً .. شوف إختياراتك إنت .. إنت ممكن جداً تكون كل ما تمتلكه من فلوس مجرد مرتبك آخر الشهر .. و عدد متابعينك و عدد الناس اللي تعرفك مايعديش 30 بني آدم بالكتير .. لكن مع كل آذان صلاة فجر بيأذن .. و تفضل إنك تكمل نوم .. إنت بتختار غلط . مع كل لحظة بتسكرول فيها عالفيس أو إنستاجرام .. و تختار تضيع وقتك أو تعصي مثلاً .. إنت بتختار . مع كل مرة كان قدامك إنك تختار صواب .. و إخترت شمال .. و كنت مفكر ( إنك مش فارق مع حد .. و إن كل اللي حواليك بيختاروا شمال ) .. إنت إخترت غلط . … … إتعلمت زمان دعاء ( اللهم إستخدمنا ولا تستبدلنا ) .. و إتشرح ليا معناه من أكتر من مُعلم أشكر الله إنه رزقني بيهم .. .. و كل مرة كنت بادعي الدعاء ده .. كنت بادعي معاه : اللهم أرني الحق حقاً .. و أرزقني إتباعه .. و أرني الباطل باطلاً .. و أرزقني إجتنابه .. .. لأن رؤية الحق و معرفته مش كفاية .. إتباعه نفسه بيحتاج عزيمة ربنا يرزقنا إياها .. و نفس الشيء في تجنب الباطل . … … موقف لعيب الكورة المشهور , و المذيع المشهور .. و غيرهم .. بالنسبة ليا شيء أتعظ منه .. و يخليني أراجع نفسي .. .. ربنا رزق كل واحد منهم ثروة و شهرة .. كتير بيحسدوهم عليهم في الدنيا .. لكن مع الشهرة الضخمة دي .. إختيارات و إختبارات كتير بتكون في العلن زي ما حاصل حالياً .. .. ربنا ساترنا بفضل الله .. و ساتر إختياراتنا و إختباراتنا .. و لكننا بيتم إختبارنا .. كل لحظة .. و حيتم إختبارنا فكل شيء ربنا أنعم علينا بيه في الدنيا .. إدراكك لده مع كل مليم يدخل حسابك .. مهم جداً .. إدراكك لده مع كل حد جديد يتابعك .. مهم جداً جداً .. إدراكك لده مع كل نعمة تدركها و تحمد ربنا عليها .. مهم جداً جداً جداً .. .. مرة تانية :

اللهم إستخدمنا ولا تستبدلنا .. اللهم أرنا الحق حقاً و أرزقنا إتباعه .. و أرنا الباطل باطلاً و أرزقنا إجتنابه .