همممم ..... مجرد إنطباعات

همممم … مجرد إنطباعات

” تضاد يبين المعنى و يوكده و يوضحه ” .. الجملة الأثيرة اللى كانت بتعتبر الإجابة النموذجية اللى يعرف معناها كويس أى طالب مر بمرحلة ثانوى عام .. عدد قليل جداً جداً من الأفلام اللى لما باتفرج عليها مابشغلش حاجة تانية جنبها زى لعبة أو شغل أو كتاب أو أحياناً فيلم تانى مثلاً .. و قلما لما بيتكرر فيلمين من النوعية دى فيومين ورا بعض .. إمبارح إتفرجت على “mr church” النهاردة إتفرجت على “captain fantastic” .. باولو كويلو بيقول فكتاب من كتبه ” the pilgrimage على ما أتذكر” : يحصل بعض الناس على الحكمة من خلال سفره فجميع أنحاء العالم .. بينما يحصل عليها البعض الآخر و هو جالس بجانب سرير طفله الصغير يهدهده . … فيلم (mr church) “فوجهة نظرى” عبارة عن تجربة مليانة بالهدوء و الثبات و الروتين و الإستقرار اللى بيتجسدوا فبطل الفيلم .. كأنه بطل أسطورى فتعامله مع الحياة بأريحية و روتين جميل .. هدوء و ثبات و روتين و إستقرار كتير ما كنت بأرنو ليهم ففترات كتير من حياتى .. … على العكس (captain fantastic) “فوجهة نظرى” عبارة عن تجربة باتمنى فعلاً إنى أحققها .. تجربة الإنفصال الكامل عن كل ما هو زائف و متخلف و غبى فى التكوين المجتمعى الحالى .. و إنى أبنى على نضافة من الأساس .. مغامرة باعيشها كل يوم مع كل فكرة مع كل موقف باتعرضله فحياتى .. إنى أضرب بكل ما هو زائف و متخلف و غبى بعرض الحائط .. ولا أتأقلم و أتعايش و أتعامل ؟ … أعتقد والله أعلم إن الفيلمين و الفكرتين عبارة عن وجهين لعملة واحدة .. البطلين فى الفيلمين كل منهم يمتلك عدد ضخم من المهارات اللى غيرهم يمكن أقصى طموحه هو إنه يمتلك مهارة واحدة منهم .. و البطلين فى الفيلمين ماعندهمش أى رغبة أو إحتياج إنهم يثبتوا مهاراتهم دى عن طريق منافسة أى حد لأن ببساطة .. مافيش داعى لكدة .. و البطلين فى الفيلمين عايشين مع كم ضخم من الأسئلة المتجددة فدماغهم .. و لكنهم بيحافظوا على الكم الضخم ده بيغلى جوه غلاية مغلقة بإحكام و بتطلع الطاقة اللى بتحركهم بشكل مدروس دايماً .. … أعتقد والله أعلم إن ال(key point) فى الفكرتين هى الحركة الدائمة بشكل واعى .. مش بشكل غير واعى .. و إن الحركة بشكل غير واعى = ثبات = تعفن و موت . و إن المجتمع فكلا الفكرتين بيتحرك بشكل غير واعى .. (بغض النظر عن مسبب الحركة دى ) .. و ما قد يبدو ثابت بالنسبة لمتحرك بشكل غير واعى ما هو إلا متحرك بشكل واعى . … والله أعلم