تجربة علمية صغيرة ممكن تقوم بيها في المنزل

تجربة علمية صغيرة ممكن تقوم بيها في المنزل .

1- إعمل فولدر علي الجهاز بتاعك أو موبايلك .. و سميه بإسم ال ” تريند ” المنتشر في أى وقت ( تحرش , مثلية , عادل إمام , مصر فكاس العالم … ) أياً كان هو إيه .. .. 2- حتقسم الفولدر ده ل (4 ) فولدرات تايين من جوة :

• الأول حتسميه : وجهة نظري و رأيي الخاص .
• التاني حتسميه : أتفق .
• التالت حتسميه : أختلف .. و اللي بيقول الكلام ده عيل إبن ستين فسبعين مثلاً ( إشتم في الإسم أيون لو حابب ) .
• الرابع حتسميه : مش فاهم .. و الواد ده شكله بيتفلسف . .. 3- إختار أى تريند يعجبك .. و قبل أى شيء .. سجل وجهة نظرك الخاصة ( إكتبها بقي أو سجلها فيديو أو صوت ) .. و حطها في الفولدر الأولاني . .. 4- كل ما تشوف أى بوست أو كلام مكتوب عن التريند ده .. خده سكرين شوت .. و حطه في الفولدر الخاص بيه .. لو كنت متفق معاه .. يبقي في ( أتفق ) .. لو كنت مختلف معاه .. يبقي في ( ده عيل إبن ستين فسبعين ) .. ” مش لازم تشتم لو إنت مؤدب :) ” . … 5- و عدي أسبوع أو 10 أيام علي الحال ده … لحد ما تتملي ال(4) فولدرات نسبياً . … 6- الخطوة السادسة دي أهم خطوة .. بعد إنتهاء التريند ( او فأواخره لما يبدأ يشطب و تلاقي الناس بدأت تتكلم عن تريند جديد ) .. إفتح الفولدر الأولاني ( بتاع وجهة نظرك الخاصة أو رأيك الخاص ) … و إكتب ( وجهة نظرك و رأيك ) مرة تانية .. بعد ما قعدت تقسم وجهات نظر و آراء الناس علي مدار ال10 أيام اللي فاتوا . … … 7- كده يبقي إنت عندك :
• وجهة نظرك قبل التريند .
• وجهة نظرك اللي كونتها فكل الدوشة بتاعت التريند دي .
• بوستات إنت متفق معاها .
• بوستات إنت مختلف معاها و اللي كاتبها عيل إبن ستين فسبعين .
• بوستات إنت ولا فاهم منها أى شيء و اللي كاتبها واد شكله بيتفلسف . … … 8- قارن . أيون .. قارن بين وجهة نظرك قبل بقي … و وجهة نظرك بعد . .. و بلغني .. إتغير فيها أى شيء ؟ زاد عليها أى شيء ؟ إتعلمت عن الموضوع نفسه .. أى شيء جديد ؟ .. ولا كل اللي إنت عملته هو حرق بنزين و مجهود علي إنك تزعق بعلو صوتك عشان تسمع نفس الكلام اللي فدماغك في الآخر ؟ .. .. غالباً … و بنسبة ضخمة جداً .. وجهة نظرك بعد … هي نفسها حتطلع وجهة نظرك قبل .. و مش حتكون طلعت بشيء من الدوشة دي كلها .. غير بإنك إتخانقت مع شوية أسامي مختلفة علي السوشيال ميديا .. و نتيجة ده .. أغلب الظن بتكون ؟! … … … بتكون إن الترنيد الجاي … غالباً حيبقي نفس الشكل بالظبط … بس عدد الناس اللي إنت بتتابعهم و بيقولوا نفس الكلام اللي فدماغك .. زاد .. .. بس بين الحين و الآخر حيظهر قدامك بوستين تلاتة تشتم فيهم … عشان إحصائيات ال ( engagement و ال interaction ) ماتقلش … .. .. الموضوع شايفه جداً كإن ناس كتير أصبحت راكبة ال ” دويخات ” بتاعت دريم بارك .. ال ( carousels ) يعني .. و موهومة إنها بتسوق و بتصول و تجول .. .. و نقطع تذاكر أكتر .. و صاحب الملاهي هو اللي بيكسب .. .. و الله أعلم .