طلاق علاء الدين من ياسمينا .. عشان طلع بيشخر ..

طلاق علاء الدين من ياسمينا .. عشان طلع بيشخر .. و ديزني هي السبب

فيلم علاء الدين “الجديد بتاع ويل سميث ” كان عندي بقاله فترة .. و كل ما أفضي نفسي عشان أتفرج عليه .. تحصل حاجة و إنشغل و ماكملوش .. النهاردة الصبح أخيراً فضيت شوية .. و شغلته عالشاشة أثناء ما باشرب القهوة الصباحية (جربت نوع بن جديد النهاردة من كافيه لوكاس اللى فتح جديد قدام زهران فدمنهور ) .. و بعد أول ظهور ل ( ويل سميث ) و هو قايم بدور الجني … فكرت فعلاً فكذا حاجة أحب أكتبها عن الفرق بينه و بين روبين ويليامز .. و الطفولة و كده .. … و بعدين حصل اللي خلاني أغير رأيي .. و أقرر أكتب البوست ده .. ياسمينا .. حبت علاء الدين .. و إتجوزوا !!! .. … و إفتكرت كم القصص و الأفلام اللى بتدور كلها حوالين نفس الشيء ..

• عبد الحليم .. بيغني حلو .. فتقع فحبه فاتن حمامة ولا مريم فخر الدين .. ولا الإتنين أحياناً .. و يتجوزوا .. و نصقف إحنا .
• جاك ( ليوناردو دي كابريو ) يرسم روز ( كيت وينسليت ) .. و يعلمها تتف من سور السفينة .. و تحبه .. و نعيط إحنا إنهم ماتجوزوش و إنه مات .
• البطل .. يعمل حاجة معينة حلوة .. فتحبه البطلة .. و يتجوزوا .. و نفرح إحنا . … … علي مدار السنين اللي فاتت .. بقينا بنسمع أخبار كتير عن حالات إنفصال ل ( أبطال ) أفلام كتير فحياتنا ..
• إنفصال عمرو دياب
• إنفصال إيلون ماسك
• إنفصال جيف بيزوس
• إنفصال … و حط إسم أى حد ينفع يبقي بطل فيلم تعرفه .. … و نفس الشيء بالنسبة للبنات برضو .. حالات إنفصال لبنات كتير ينفع يكونوا بطلات أفلام . … و بنلاقي إن التعليقات علي الأخبار اللي من النوعية دي .. دايماً بيكون فيها تعليقات من نوعية :
• ” إزاااااي ؟؟؟ ده أنا باحبه أوي ؟ ”
• ” هو مين المجنونة اللى تسيب ده ؟!! ” .. ” أو مين المجنون اللي يسيب دي ؟!! ” ..
• و ما شابه .. … … ماحدش بقي بيكون فعلاً حاسس بكمية عبط التعليقات اللى من النوعية دي .. غير اللي إتجوز ياسمينا بتاعته .. و اللى إتجوزت علاء الدين بتاعها .. الإنسان اللى خد قرار إنه يشارك حياته بكل تفاصيلها مع إنسان تاني .. لمجرد إنه عجبه حاجة واحدة بس في الإنسان ده …
• يعني بذمتك .. هل صوت عبد الحليم الحلو .. و نحنحته في الأغاني سبب كافي إنه يكون شريك حياة مثالي ؟!
• هل تسبيل ياسمينا .. أو إبتسامة فاتن حمامة .. سبب كافي و مقنع إنها تكون شريكة حياة ؟!! .. اللي بيحصل بعد لحظة ال ( توتا توتا و فرغت الحدوتة ) .. هو إن علاء الدين .. و ياسمين .. بيكتشفوا إنهم بشر .. كل واحد فيهم فيه مزايا .. و فيه عيوب .. كتييييييييير .. و بطبيعة الحياة .. و بمرور الوقت .. بنعتاد المزايا .. لكن أبداً مابنعتدش العيوب … بل بنكرهها أكتر .. بتستفذنا أكتر .. مابنستحملهاش أكتر .. و بننسي إن في يوم من الأيام .. كان في أى ميزة .. و بنفضل دايماً نقارن صورة الإنسان اللي عايش معانا اللى فيه مزايا و عيوب .. بصورة البطل المثالي اللى إتبنت فذهننا .. اللي كلها مزايا و مافيهاش عيوب .. و كل مرة بيخسر فيها الإنسان المقارنة دي .. بنحكم عليه أكتر بإنه إتغير عن قصد .. و إنه هو اللي غلط .. و إنه مايستحقش يحصل علي إعجابنا و مشاعرنا .. و بنكرهه . … … … أول مرة فحياتي قررت أكتب فيها رواية .. كانت سنة 2009 .. أيام ما كنت شغال علي ( exztence ) .. و بدأت أفكر في إزاي أكتب أفضل رواية علي مدار التاريخ .. و كل ما كنت أكتب تفصيلة معينة من تفاصيل البناء الروائي .. كنت أحس إن ده غير كافي .. و إن المفروض أزود تفاصيل أكتر .. و معلومات أكتر .. لأن كل حاجة متصلة و مبنية علي بعضها .. لحد ما توصلت إن أى رواية (غير خيالية) عشان أكتبها .. لو فضلت أزود تفاصيل فيها لما لا نهاية .. حاوصل في الآخر إني باكتب الحياة نفسها .. بكل ما فيها من تفاصيل .. … أى رواية في الدنيا .. ما هي إلا جزء صغير جداً جداً جداً جداً من الحياة .. بيتخيله الكاتب و يركز عليه .. و يتجاهل كل الجوانب و التفاصيل التانية للحياة .. لكن إحنا كبشر مانقدرش نتجاهل الجوانب و التفاصيل دي فحياتنا العادية .. .. يعني فرواية زي عنتر و عبلة مثلاً .. فين تفاصيل حياة عبلة اليومية .. و أهلها .. و أكلها و شربها .. و تعبها و صحتها .. و دخولها الحمام مثلاً .. و نومها و صحيانها .. و كل ده … ببساطة .. مش موجودة في الرواية .. لأنها مابتخدمش هدف الرواية .. الهدف اللي متحدد من الأساس إنه يكون (حب عنتر و عبلة ) . .. و ييجي بعد كده مرحلة الفيلم .. اللى بيتم حذف حاجات كتيييييير جداً من الرواية .. عشان ينفع ينتهي الفيلم فوقت قليل و الناس تصقف .. … … المشكلة بقي هي إننا في الجيل بتاعنا ده .. و اللي قبله .. و اللي قبله .. إتربينا علي الأفلام و المسلسلات بشكل كبير .. لدرجة إننا بقينا إحنا كمان بنتجاهل التفاصيل المهمة في الحياة .. و نركز علي التفاصيل الصغيرة اللى مهمة بالنسبة للقصة بس .. .. و أصبحنا فصراع دائم .. و كل ياسمين بتدور علي علاء الدين في اللى حواليها .. و كل علاء الدين .. بيدور علي ياسمين في اللي حواليه .. و حتي لو لقاها .. أو وهم نفسه إنه لقاها .. بيتخض و يتفاجئ لما يكتشف إن الحياة مش مجرد فيلم أو أغنية .. و إن في تفاصيل تانية و حياة .. بعد لحظة ( توتة توتة فرغت الحدوتة ) .. … و إن مش دايماً في شرير في الفيلم .. أو ساحر .. نقتله .. و بعد كده خلاص مافيش تعب ولا مشاكل ولا معاناة .. لا .. التعب و المشاكل و المعاناة موجودين طول العمر .. و مابيموتوش .. و مابينتهوش .. و لكن المفروض نتعلم نتعايش معاهم .. نتعلم من بدرى إنهم موجودين دايماً .. و إننا نقدر نكون سعداء لو فهمنا ده و إتعلمنا دورنا الأساسي في الحياة و قدراتنا الحقيقية … و مسئولياتنا .. … … و لكن زي السكر اللي في المشروبات الغازية .. و زي الشوكولاتة .. الحب و الرومانسية السهلة … سلعة رائجة جداً .. و حتفضل دايماً رائجة جداً .. و لكنها زي السكر .. و زي الشوكولاتة .. بتسبب الإدمان .. و بتسبب ضرر فظيع .. و حياة دايماً تعيسة .. و لكنها سلعة بتدر ملايين و مليارات الدولارات علي الشركات اللى معتمدة عليها .. زي كوكاكولا و بيبسي .. و والت ديزني .. و ما شابه .. … و بدل ما إن الطبيعي إنك تتعب فمضغ تفاحة كاملة عشان تحصل علي 1 جرام سكر مثلاً .. لا . . دلوقتي ممكن تدفع مبلغ ضئيل .. و تحصل علي 70 جرام سكر فصفيحة معدنية .. مباشرة .. ( كانزاية يعني ) .. .. برضو .. بدل ما إن الطبيعي إنك تتعب فحياة كاملة عشان تحصل علي مقدار معين من السعادة اللى بتشوفها علي الشاشة .. لا .. دلوقتي ممكن تدفع مبلغ ضئيل .. و تحصل علي كم عالي جداً من السعادة دي .. علي الشاشة .. … و زي ما سكر ال(كانزاية) دي بيسببلك أمراض و زيادة وزن .. و إدمان … و الأهم .. إنه بيخليك ماتستمتعش أبداً بمضغ تفاحة .. او تحس بالسكر فيها .. .. برضو جرعة رومانسية زائفة زي بتاعت علاء الدين و ياسمينا .. لو ماكنش عندك وعي كافي .. حتوصلك إنك ماتحسش بالرومانسية الحقيقية فحياتك .. … … الوعي الكافي ده جزء منه : إن كفاءة المغني إنه يغني .. ماتخليهوش شريك حياة مثالي .. قوة المصارع في المصارعة .. ماتخليهوش شريك حياة مثالي .. جمال الممثلة في الصورة ..ماتخليهوش شريك حياة مثالي .. فلوس التاجر في البنك ..ماتخليهوش شريك حياة مثالي .. علم العالم في الكلية ..ماتخليهوش شريك حياة مثالي .. شياكة الشيك فهدومه ..ماتخليهوش شريك حياة مثالي .. … و إن أى إنسان .. ممكن يتميز فشيء ما جداً جداً .. و ده مالوش علاقة بكونه شريك حياة مثالي أو لا .. … و الله أعلم .