بوست رومانسى

بوست رومانسى .. “اللى هو إشمعنى أنا ” .. أو بمفهوم آخر ” هى جات عليا ؟ ” .. … 1- كنت باتفرج على التيد توك ده : https://www.youtube.com/watch?v=FPhZGD-6kVQ&t=141s و فأوله الباشمهندس كان بيتكلم على مفهوم الجمال بشكل subjective على حد قوله .. يعنى من وجهة نظره .. “عكسها objective بالمناسبة .. اللى هى موضوعية ” … موضوع الفيديو نفسه ممكن اتكلم عنه بعدين بشكل مطول أكتر .. لكن الكلام سرع حركة شوية أفكار فدماغى كانت بتتحرك ببطء يمكن على مدار الفترة اللى فاتت . … 2- صديق عمر كان حط مسألة هندسة بسيطة على الوول بتاعه من يومين .. و بما إن الهندسة المستوية أحد المجالات اللى باعتبر نفسي موهوب فيها .. بكل بساطة و أنا واقف فى الأتوبيس رايح الict .. عملت حساباتها البسيطة فدماغى و طلعت نتيجة خلال 30 ثانية تقريباً .. و كتبت التعليق بالنتيجة و حسيت ب”سعادة” .. إحساس إنى أنجزت شىء أنا عارف إنى أساساً above average فيه .. و على مدار أكتر من 15 سنة بتعامل مع حاجات شبيهه ليه .. و مع ذلك برضو مخى سجل الحدث على إنه شىء جميل … (( مع إن حلى كان غلط )) … .. و بعد ساعة تقريباً هو كان كتب الحل الصح .. و أنا بكل ثقة نفس و غرور كاذب .. كتبت قلتله يراجع نفسه .. … و خلال 24 ساعة ماكانش عندي فيهم فعلاً وقت للجلوس بشكل هادى و التحقق من الحل بتاعى اللى ماكانش حيحتاج منى أكتر من 3 دقايق يمكن … إلا إن عقلى كان مقتنع .. كان رافض التخلى عن إحساس سعادته البسيط ده .. و كان شايف إنى مستحيل أكون غلطان فى الهندسة المستوية . … لحد ما بعد 24 ساعة إمبارح راجعت حلى .. و إكتشفت إنى ببساطة غلط فى إن المثلث التلاتينى الستينى بيكون القاعدة نص الوتر .. مش الإرتفاع .. (معلومة أكتر من بديهية بالنسبة لأى طالب ثانوى عام ) . … 3- أول مرة كنت أعرف مفهوم الرومانسية الحقيقى مش الcommon كنت فإعدادى تقريباً لما قريت لأحمد خالد توفيق فمرة كتب عن إن الرومانسية هى مش المشاعر و الحب … ده جزء صغير من المعنى .. المعنى بيشمل كل ما هو خيالى و حالم و عبارة عن وجهة نظر فنية بتضخم حاجات معينة و تصغر أو تمحى حاجات تانية خالص . … 4- فمؤتمر apply كنت إتكلمت فى الكلمة بتاعتى عن مفهوم العقل عن السعادة و خطأ عملية المقارنة اللى بيجريها بشكل دائم عشان يعرف هو مقارنة باللى حواليه كويس ولا لا .. و بنت بعد المؤتمر كانت فتحت موضوع إن السعادة عبارة عن إيحاء فعقل الإنسان .. و للأسف ماكنش فى وقت إنى أشرح تفصيلياً الفرق بين الحالتين .. الأول عنده وعى تفصيلي و عالى بالعالم بتاعه و متغيراته فبالتالى هو سعيد .. التانى قرر الإنفصال بشكل كامل عن العالم بتاعه و متغيراته و قرر يبقى سعيد .. و لو لى إنى أحكم .. حاحكم إن التانى غلط . … 5- فثانوى عام أحد زملاءنا فدرس الرياضة أثناء ما كان الأستاذ بيعرض مسئلة نهايات معقدة بعض الشىء .. الولد قرر إنه يشيل السين اللى جوة النهاية مع السين اللى تحت فى المقام .. و يسيب الأرقام مع بعضها و يحولها عملية جمع … (و كان سعيد و حاسس إنه صح ) .. الأستاذ رد عليه بشكل كوميدى لحد النهاردة بيخلينى أضحك بهيستيريا ( ده فى الجنة يا حبيبى ) . الولد ماكنش فاهم ليه . … 6- فى الفيديو اللى فوق الراجل قال جملة خطر فوجهة نظرى ” من أجل عدم فقدان الضرورى .. يجب عليك المحافظة على الغير ضرورى ” … 7- الوردة مالهاش أى قيمة فيزيائية أو إقتصادية تذكر … و لكن البنات بتحبها لسبب بسيط .. و هو إنها ملهاش أى قيمة فيزيائية أو إقتصادية تذكر . … سؤالى هو : أ - هل اللى المفروض يتعمل .. إننا نبسط العلم المجرد و نمكيجه عشان يبقى جميل و يحققلنا مفهوم السعادة المبنية على رومانسية الجهل بالخطأ ؟ أم : ب - نتقبل جهلنا و خطأنا .. و نتحلى بالشجاعة لمواجته .. و نتقبل فترة من التألم و الصراعات مع العديد من ( خطوات إختصار النهايات أو حساب المثلثات أو الرياضيات بشكل عام مثلاً ) عشان نوصل لسعادة تتوقف حقيقتها على قدرة شخص آخر على إثبات العكس .. و يكون عندنا القابلية لتقبل ده هو كمان ؟ … كيميائياً عقولنا بتختار (أ) .. ” الفار بيختار الكوكايين كل مرة و بيفضله على الأكل و الشرب ” … و الله أعلم