عودة للبوستات الطويلة إذن ... في هذا الفالانطاين .. جرب

عودة للبوستات الطويلة إذن … في هذا الفالانطاين .. جرب تصالح نفسك و تصارحها بحبك ( تصارح نفسك يعني ) .. خليني أشرح :

طول عمري مؤمن إن الحب الحقيقي ( دماغي لوحدها كملت “بيعيش يا حبيبي” آسف ) .. المهم .. الحب الحقيقي .. هو اللي بييجي بعد سنين عشرة و تعب و خناقات و مشاكل و حياة كاملة بقرفها و متعتها و تفاصيلها . مش النظرة اللي بين زميلين في الجامعة مثلاً لسة مايعرفوش عن بعض غير إسمهم الثلاثي و رقم الجلوس . أو الكلمتين اللى بيقولهم زميلين في الشغل كل يوم و هما متزوقين و حاطين بيرفيوم . و بالتأكيد مش الإيموجي أو االرسالة أو الواتسآب أو اللايك علي الإنستاجرام مثلاً . … الحب الحقيقي فوجهة نظري .. هو اللى بييجي بعد ما بتتقال كلمة ( و عاشوا فتبات و نبات .. و خلفوا صبيان و بنات ) .. و بييجي قرف الصبيان و البنات و مسئولياتهم .. و روي النبات ده .. و مصاريف التبات ده . … أى شيء تاني غير كده .. ما هو إلا تصرفات و مهارات أتقنها الإنسان البدائي الأول .. عشان يقدر يقنع الإنسان البدائي التاني . .إنه يدخل الكهف معاه و يحاربوا الديناصورات مع بعض ( كانوا إنقرضوا لما البشر جم .. عارف ) .. ما علينا . … المهم إن عند المرحلة دي .. لو ماكنتش فاهم الحب كويس فوجهة نظري .. و فاهم الفرق بين الحب الحقيقي .. و بين شغل الأفلام الرومانسي الكوميدي ده … حتعيش فتعاسة الإنسان اللى مقتنع إنه شبابه ضاع .. و إنه عمره ما حيكون سعيد سعادة أنور وجدي و ليلي مراد . … الحب الحقيقي ده بيتطلب إنك تكون فاهم كويس جداً .. جداً .. جداً .. إيه اللي عليك .. مش اللي ليك و اللي عليك … لا .. اللي عليك بس .. تبص للي عليك و بس .. و مالكش دعوة باللي ليك .. مش قصتك ده .. مش إختصاصك .. … يعني مثلاً .. كقاعدة أساسية لو بنتخيل أى فيلم رومانسي كوميدي .. بتكون البطلة دايماً بتتكلم إنها عايزة البطل يقعد يسمع لها .. و يهتم بيها .. و يدادي فيها .. و يحسسها إنها ( ذا أونلي جيرل إن ذا وورلد ) بصوت ريهانا . … ده شيء الرجل غير قادر علي عمله لمدة ال24 ساعة إطلاقاً .. و لو كان بيعمل ده فأول العلاقة و هو مهتم و حابب و شغوف .. فبالتأكيد مش حيكون حابب و مهتم و شغوف بنفس الشكل بعد ما البطلة تخلف 3 أطفال و هي رابطة شعرها بفوطة المطبخ و ماسكة مقشة … و بعد ما عرف كل شيء ممكن و مش ممكن عنها و عن تاريخ حياتها و تفاصيلها .. و سمع نفس القصص هي هي 7 أو 8 مرات .. علي الأقل . … زائد إن ربنا خلق الإنسان بيعتاد .. أى شيء .. مهما كان .. بمعني إنك دلوقتي صديقي الذكر .. لو إتجوزت الكراش اللي بتكراش عليها (أياً كانت هي مين من فنانات هوليوود و بوليووود ) … أعدك إن بعد كام شهر .. حتبدأ تعتادها و تكراش علي فنانة تانية ماكنتش أساساً شايفها قبل كده . … فحتبدأ تفاصيل الحياة .. العادية جداً .. ال ( مفروض إنها سعيدة جداً ) .. تصيبك بالتعاسة و الإكتئاب . و تبدأ تدخل فيما يسمي ( أزمة منتصف العمر) .. (الكلام ده للرجالة و الستات سواء ) .. و تلاقي نفسك غصب عنك مركز علي كل ما هو بيضايقك فحياتك .. و غير مدرك أو واعي إطلاقاً لكل النعم اللى إنت عايش فيها . … … ما لم .. ما لم تبدأ تفكر كويس جداً .. في السؤال التالي .. هل إنت عمرك إتعلمت فنفسك إزاي تحب … صح ؟ … بمعني : …

• هل بتعرف تفضي نفسك بشكل دوري عشان تعمل شيء معين مش علي مزاجك .. و مش مستمتع بيه .. بس عارف إنه مفيد علي المدي البعيد ( زي التمرين أو دراسة مجال ما فأوله مثلاً ) ؟ ده بالظبط زي إنك تعرف تفضي نفسك بشكل دوري و مستمر عشان شريك حياتك .. حتي لو مش مستمتع بده .. أو علي غير مزاجك الحالي .. و تعمل معاه شيء ما أو نشاط ما عشانه هو ( حتي و لو كان مجرد سماع قصصه و حكاياته للمرة الألف .. لمجرد إنه بيستمتع بإنه يقولها ) .
• يُقال إن جزء كبير من سبب إن المرأة بشكل بدائي بيجذبها جسد الرجل الرياضي مفتول العضلات .. هو إن العضلات دي بترسل رسالة مباشرة بإن الرجل ده عنده القدرة علي عمل نشاط معين .. بشكل متكرر .. و ملتزم بيه بإنضباط .. و بالتالي حيبقي عنده القدرة علي بذل نفس الإنضباط في علاقته مع المرأة و الإلتزام معاها . …
• هل بتعرف تفصل بين تفاصيل يومك و شغلك أو دراستك … و تقطع لنفسك كام ساعة تكون مستمتع فيهم بالحياة و حياتك بدون ما تسمح لأى قلق ( دراسة أو شغل أو حياة ) إنه يعكر مزاجك ؟ نفس الموضوع ده بتحتاجه فعلاقتك بزوجتك .. و إنك ترجع آخر اليوم .. و مهما حصل في اليوم بتاعك من مشاكل هي مالهاش علاقة بيه .. تسيبه برة باب الشقة .. و تقابلها بدون ما تشيلها قرف اليوم بالكامل . … و أمثلة تانية كتييييير علي كده .. … ناس كتير … جداً … بتقضي طول عمرها فعلاقة سيئة جداً مع نفسها .. علاقة abusive مع نفسها … علاقة مستنية تهرب منها فأول علاقة جديدة تقابلها مع نفس جديدة .. و بعد كذا علاقة مع كذا نفس غريبة .. بتفهم بعد فترة طويلة .. إنهم كانوا محتاجين يفهموا إزاي تكون علاقتهم مع نفسهم صحية الأول .. إزاي يفهموا معني الحب من ال ( إلتزام , تضحية , discipline , تحمل , … ) مع نفسهم .. قبل مام يدخلوا فعلاقة مع نفس غريبة . و إن مافيش أى وسيلة لعلاقة حقيقية سليمة .. مع نفس غير نفسك .. فيها حب حقيقي .. إلا لما تكون في الأول حبيت نفسك صح .. و إديت لها اللى ليها .. قبل ما تسألها علي اللى عليها . … و الله أعلم .