تكلفة هجرتي زمان .. خمسة مليون .. مية أربعة و

تكلفة هجرتي زمان .. خمسة مليون .. مية أربعة و تمانين ألف .. … من زماااااااااان كان قصة سمعتها في TED talk مش متذكره إطلاقاً .. الراجل اللى بيتكلم إبتدي كلامه بيها و قال : ” أول ما وصلت لسن 15 سنة .. جات ليا الفرصة إني أشتغل فمكان معين مقابل أجر زهيد .. مجرد 5 دولار في الساعة .. و ده كان أول شغل ليا .. و قبل كده كنت باقضي كل وقت الأجازة بتاعي في لعب الفيديو جيمز و سوبر ماريو . و بعد أول يومين شغل .. حسيت إن الشغل جه علي وقت لعبي .. و إني مش عايز أروح الشغل و عايز أفضل قاعد في البيت النهاردة ألعب . و لكن أمي جات ليا و قالتلي .. إنت زمان كنت بتقعد في البيت و تلعب ماريو مجاناً .. دلوقتي الوضع إختلف .. إنت عندك البديل .. إنك تشتغل .. و لكنك إنت اللى قررت إنك تقعد تلعب في البيت .. دلوقتي لعبك في البيت مبقاش مجاني .. إنت بإختيارك إنك تلعب و ماتشتغلش .. أصبحت كأنك بتدفع 5 دولار مقابل كل ساعة تلعب فيها ماريو ” . … القصة دي فاكر إني سمعتها سنة 2009 .. و أثرت فيا جداً .. مش لأني كنت شايف إني بالعب فيديو جيمز كتير 😁😁 .. و لكن لأني كنت في قمة فشلي الدراسي في الكلية ..و شلت سنة تالتة للمرة التانية .. و كنت متأكد إني خلاص .. مهما حاولت حتي إني أطلع من الأوائل في السنة الأخيرة اللى فاضلة ليا .. مستحيل يكون التقدير الكلي برضه يكون هو الشيء اللى يميزني .. و يساعدني مثلاً إن الCV بتاعي هو اللى يميزني بين باقي السيفيهات التانية . … ده كان في المرحلة اللى قررت فيها إني أطنش كل ما له علاقة رسمية بالكلية بتاعتي .. و أعتبر نفسي حر بالكامل إني أدرس زي ما أنا عايز .. و ده كان علي قد ما هو مريح لأعصابي في الوقت ده .. علي قد ما كان متعب .. لأني فجأة أصبحت مسئول بالكامل عن ال24 ساعة اللى في اليوم بتوعي .. ال24 ساعة اللى كانت الكلية مستولية عليهم بالكامل لمدة 5 سنين من حياتي .. و قبل الكلية كانت الدراسة المصرية العادية .. ال24 ساعة اللى كانوا بيضيعوا بين مواصلات من و إلي الكلية .. و محاضرات كتيييير كنت بنام فيهم أكتر ما بنام في بيتنا … و الساعات اللى كانت بتفضل ليا في البيت .. كنت باقضيها فقلق و رعب و خوف من مصيري اللي كنت شايف إنه فإيد الكلية . … ال24 ساعة دول .. إستردتهم بالكامل .. فلحظة .. لما قررت إني أطنش كل ما هو أكاديمي مصري .. و كان عليا إني أقرر .. أعمل إيه بيهم .. … أول حاجة عملتها أنا فاكر .. إني قررت أتحكم فكل حاجة كنت باصرف فيها وقت أنا مش متحكم فيه . بمعني .. إني رحت فاتح أكاونت الفيسبوك بتاعي في الوقت ده .. و قررت إني مش حاينفع أقفله لأني فعلاً شايف إني أقدر أستفيد منه .. لكن أقدر أخليه يشتغل ليا .. لحسابي .. مش أنا اللى أشتغل لحسابه .. … اللى عملته هو إني مسحت كل إشتراكاتي علي كل الصفحات و الجروبات اللي كنت مشترك عليها … واحدة واحدة .. و عملت أنفولو لكل الأصدقاء .. بالكامل .. و أنفريند لبعضهم ( كان لسة عدد أصدقائي في الوقت ده علي الفيس حاجة و تسعين واحد تقريباً .. فاكر كويس ) . … رجعت أكاونت الفيس بتاعي كأنه لسة معمول طازة .. و عملت نفس الشيء فتويتر .. و يوتيوب . … التلات حاجات اللى كنت باقضي عليهم معظم وقت ” فراغي و ترفيهي ” علي الكمبيوتر .. قررت إني أحولهم لتلات حاجات يخلوني أتعلم و أزود معلوماتي فمجالات كتييير .. … و بدأت أعمل لايك و فولو و سابسكرايب لكل حاجة و أى حد شايف إنه ممكن يضيف ليا حاجة فعلاً مفيدة .. و بدأت أهاجر بعقلي بالكامل لعالم ماقدرتش أهاجر له بجسمي في الوقت ده . و أصبح كل ما هو محيط بيا و بعقلي طول الوقت حاجات زي : TED,wired magazine , nature, science, techcrunch, lifehacker, npr, npr technology, … … و إختفي من االعالم بتاعي أى حاجة ليها علاقة ب ( ثقافة البوب بتاعت مصر ,ثقافة البوب بتاعت الوطن العربي , أى أخبار سياسة أو إعلام محلية , معظم أخبار أصدقائي و أقراني , … ) . … … خلال أسابيع بسيطة .. إتحولت شاشات الكمبيوتر عندي بإستخدام برامج ( rainmeter ,rainlender , pokki … ) لنافذات باشوف منها اللى بيحصل في العالم “اللى إخترت إني أعيش فيه ” .. في اللحة اللى بيحصل فيها ده . … و كتبت أيامها الكتير و الكتير عن البرامج دي و غيرها .. و صورت الديسكتوب بتاعي و كان أصدقائي بيستغربوا من منظره .. و أحد أصدقائي كان دايماً بيشبهه بكابينة الطيارة .. … و أعتقد دلوقتي إن التشبيه ده كان حقيقي جداً … هو كان فعلاً كابينة طيارة … لعقلي . … … ال Ted talk اللي في الصورة ده بتاع (جوزيف جوردون ليفيت ) .. ده ممثل أمريكي مشهور .. جداً .. بيتكلم فيه عن الموضوع ده بالظبط .. شفته يوم ما نزل .. من أسبوع .. و كنت ناوي أكتب البوست ده فنفس اليوم .. بس فعلاً كنت مشغول طول الأسبوع و مافضتش أكتبه غير دلوقتي .. لينك التوك بتاعه ده حيكون فأول كومنت . … … التوك بتاعه ده بيشرح حاجة بسيطة جداً .. و لكنها مهمة جداً جداً … جداً .. ألا و هي : رجاء .. رجاااااء .. عامل وقتك و إنتباهك .. بالظبط زي ما بتعامل فلوسك .. زي ما بتدفع فلوسك فحاجات إنت قررتها بنفسك ( حتي لو غلط ) .. بس بتبقي متحمل مسئولية إنك إشتريتها .. و بتدور دايماً إزاى تستثمر فلوسك دي عشان تزودها .. فتقدر تشتري بيها حاجات أكتر و أهم بالنسبة لك . .. وقتك و إنتباهك هما كمان ثروات محدودة .. و لو ماخدتش بالك إنت بتصرفهم فين .. و مع مين .. و فإيه .. ناس كتير حواليك حيفضلوا ياخدوهم منك .. و يستثمروهم فمصلحتهم هما .. و حتكتشف بعد فترة طويلة إنك كان فإيدك كنز .. و لكنك ضيعته .. … … بعد ال10 سنين دول (2009-2019 ) .. أحب أسئلك .. إيه نوع الإفادة ( حتي لو كان إستمتاع ) اللى عاد عليك من :

• أخبار الكورة من سنة 2009 ل 2019 ؟
• أخبار الممثلين و المغنيين من 2009 ل 2019 ؟
• مشاهدة أفلام و ثقافة مصري بتزود درجة غباءك و ماتعلمكش لغة و بتحس إنك بتحتقر نفسك بعد ما تشوفهم ؟
• تقضية وقت علي قهوة و كافيه لمجرد إنك تدفع وقت و فلوس كمان ؟ -تقضية وقت في ندب حظ و شكوي من إنك عايش فمصر و نفسك تهاجر ؟ .. و إنك لما تهاجر حتدغدغ الدنيا نجاح ؟
• تقضية وقت فأى حاجة من الحاجات اللى إنت عارف كويس إنها لا تسمن ولا تغني من جوع ؟ . … … مش معني كلامي إطلاقاً إني باقول إني رائع و إن حياتي هي الحياة اللى إنك المفروض تسعي إنك تعيش زيها .. و إنك لازم تتابع كل أخبار التكنولوجيا و اللغات و كل ده .. إطلاقاً .. و لكن خلاصة كلامي ببساطة : إني أتحمل مسئولية كل دقيقة عدت عليا خلال آخر 10 سنين من حياتي .. و عارف كويس إستثمرت كل دقيقة فإيه .. و منها الإستثمارات اللى نجحت و عادت عليا بعوائد ضخمة فجوانب كتير .. و منها بكل تأكيد إستثمارات غير ناجحة كتير .. و لكني سعيد .. إني واعي إن إنتباهي باصرفه بمزاجي .. للي يستحقه من وجهة نظري . … … لو فرضنا إن الدقيقة الواحدة = دولار واحد الساعة = 60 دولار. اليوم = 60*24 = 1440 دولار الشهر = 1440 * 30 = 43200 دولار السنة = 43200 * 12 = 518400 دولار العشر سنين = خمسة مليون .. مية أربعة و تمانين ألف … دولار . … و الله أعلم .