أبوورك بتعد ورايا ... شكراً أبوورك

أبوورك بتعد ورايا … شكراً أبوورك .. … من أربع سنين و شهرين بالعدد .. كنت بادور على فريلانس ديزاينر يعمل شغل (toshkar ) .. جوة و برة مصر .. دخلت على أبوورك كعميل الأول .. و بعدين عشان أفهم اللى عايزه بيتشاف إزاى .. دخلته كمان كفريلانسر .. و فضلت 3 سنين أو أقل شوية تقريباً مابفتحش الأكاونت .. . اللهم إلا كل فترة عشان مايحصلش ديأكتيفيشن .. حتى ماكنتش باهتم أوى بتفاصيله .. و لما بدأت أدرس شوية أدوبى و إتسألت السؤال اللولبى بتاع ( نعمل إيه بعد ما نخلص الكورس ) .. و فتحته فآخر سيشن مرة فكورس .. و عملت لايف ديمو لللى موجودين إزاى ممكن نسيرش عليه و نجيب شغل مثلاً .. على سبيل التجربة .. .. أول شغلانة عملتها عليه ب ( 5 دولار ) بعد سنين من إهماله كانت من السهولة إنها خلتنى أسأل … همممم ليه لا .. تعالى نجرب كمان .. … لو نزلت عندى تحت فى بوستاتى شوية ( كتير ) .. أو عملت سيرش على (أبوورك فى بوستاتى) .. حتلاقى بوست من فترة قريبة نسبياً .. كنت مشير فيه إنى وصلت على أبوورك ل 72 دولار .. و الشغلانات اللى عملتها و عملتها إزاى .. … و بعدين لما وصلت ل 1000 دولار عملت بوست تانى .. و شيرت فيه برضو .. … فى ناس بالمناسبة تنانين مجنحة على أبوورك و وصلوا لأرقام ما شاء الله لا قوة إلا بالله تخلى ال 5000 دولار دول يعتبروا بقشيش مثلاً .. و من مصر برضو .. … بالتأكيد مش أنا أفضل من يتحدث عن إزاى تنجح كفريلانسر مثلاً أو تنجح على منصة زى أبوورك … و لكنى متأكد إن على الأقل شخص واحد .. حيشوف البوست ده .. و حيقرر إنه حياخد أكشن .. و يتعلم مهارة ينفع يشتغل بيها أونلاين .. أو يبدأ يحاول يشتغل أونلاين بمهارة عنده بالفعل .. و بعد مدة معينة من الزمن .. حيجيله إيميل مشابه يخليه يفتكر الكلام اللى كاتبه ده .. و يتذكرنى بالخير . … بالمناسبة .. من فترة كبيرة أنا حولت كورساتى التلاتة اللى على يوديمى ( فوتوشوب , أفتر إيفكت , بريميير ) لمجانيين بالكامل … يعنى مش حتحتاج أكواد أو أى حاجة عشان تشوفهم دلوقتى .. تقدر تدخل و تعيش حياتك عليهم مباشرة .. و لو مش عارف هى إيه الكورسات دى .. أو توصلها إزاى .. مش حاكتب لينك .. لا .. حاقولك سيرش على ( udemy eslam osama algwaily ) … حتلاقيهم التلاتة . … و على اليوتيوب برضه ( youtube Eslam Osama Designz ) حتلاقى فيديوهات كتير .. فى منهم تلاتة أو أكتر تقريباً شارح حاجات كتير عن أبوورك تفصييلياً .. و برضه مش حاحط لينكات .. دور بنفسك .. … السبب ليه مش حاحط لينكات ؟ … عشان مش حتوصل ل 1 دولار حتى فأى حاجة أونلاين .. أبوورك أو غيره .. لو مش عارف أو مش عايز تتعب و تعمل سيرش بنفسك . … و الله أعلم