كان بقالى كتير .. أوى .. مافتحتش الرسايل بتاعت صراحة

كان بقالى كتير .. أوى .. مافتحتش الرسايل بتاعت صراحة الصراحة .. تقريباً عقلى كان بيعمل defragmentation سريع و إفتكر يفتح يشوف … هممم .. حاعمل زى الناس بقى و أرد علي رسايل صراحة عالفيس :( :( :( : https://korionx.sarahah.com/

1- أنا فعلاً للأسف قلما لما باتابع بشكل دورى رسايل الفيس و الواتس .. فما بالك بصراحة ؟!! … للتأكد من إنى حاشوف الرسالة و أرد .. عليكى بالموبايل مباشرة أو الإيميل :D :D . 2- إفادة الناس ولا الفلوس ؟! هو ليه مش الإتنين مع بعض ؟!! .. شخصياً اتمنى إنى أقدر إنى أشتغل ال 24 ساعة من غير مقابل .. بس للأسف أحياناً باضطر آكل و أشرب :( … السؤال ده أخويا أحمد الجويلى إتسأله كتير .. أوى .. و ممكن يكون ردوده فى الموضوع ده أعمق من ردودى .. لكن ححاول ألخص كام جملة سريعاً .

• أى منتج من منتجاتى مستقل عنى (زى كورساتى أو برامجى أو ما شابه ) .. ينفع يتم إستهلاكه بشكل مستقل عن وقتى .. فهو متاح دائماً مجاناً لأى حد محتاجه غير قادر (أو غير راغب ) فى دفع مقابل ليه فأى وقت .
• أى شىء ليه علاقة بوقتى .. باتعامل معاه بشكل مختلف شوية .. بس ده برضو مايمنعش إن خدماتى تحت أمر أى حد فأى وقت قدر إمكانى و إستطاعتى .. مجاناً إن أمكن إن شاء الله .
• أما عن إذا كان السؤال يعنى إن أولوياتى هى جمع الفلوس أكثر من إفادة قليلة القيمة .. فده - بصراحة - قلق باعيش معاه بشكل يومى من أول مرة إضطريت أقبض فيها مقابل خدمة بأديها . حتى لو مرتب من شركة .. مين اللى يحدد إن المرتب ده هو اللى بيساوى قيمة الحاجة اللى قدمتها .. مش أكتر أو أقل ؟!! الموضوع ده مقلق و مؤرق جداً .. قصص كتير - من بتوع التنمية البشرية زى بتاعت الراجل أبو شاكوش صغنن عالسفينة - بتتكلم عن حاجات مشابهه … لكن مازال السؤال .. مين اللى يحدد إيه بيساوى كام ؟! إذن : متى لاحظت/ى إن ما أقدمه من (خدمات/منتجات/شغلانات/… ) أكبر أو أقل من القيمة المقدمة فى مقابله .. حاكون فى غاية الشكر لو نبهتنى لده .. بكل صراحة والله . … والله أعلم .