ماعتقدش إن فى مشكلة إننا نفرح براس السنة الميلادية

ماعتقدش إن فى مشكلة إننا نفرح براس السنة الميلادية .. بل أعتقد إن فى مشكلة إننا مابنفرحش بصباح كل يوم جديد .. بدقة كل ساعة جديدة .. بل بدقة كل ثانية جديدة .. .. الدنيا طابعها الأساسى هو معاناة الإنسان الدائمة اللى بينتج بعدها بعض لحظات من المتعة و السعادة .. بدون المعاناة .. ينتفى الإحساس بالمتعة .. و بدون المتعة .. تفقد المعاناة معناها .. و الإتنين .. بيعرفهم و يحددهم خط الزمن .. .. فكرة البداية و النهاية فى عقل الإنسان .. فكرة من أكثر الأفكار الأساسية فتكوينه .. عقلنا كبشر غير قادر على إستيعاب عدم وجود للبدايات و النهايات .. و بتعتبر ماهية المالانهاية فى الرياضة من أكثر المسائل المحيرة و ممتعة فنفس الوقت ففلسفة الرياضيات . … تحديدنا كبشر لنقطة معينة و إتفاقنا عليها إنها بداية جديدة .. بيساعدنا على قياس مقدار و متجه ( المعاناة و المتعة ) فحياتنا .. و بيساعدنا إننا بناءاً على المعلومات دى .. ناخد قرارات جديدة .. … لكن المستوى الأعلى من الوعى فوجهة نظرى .. هو إننا نكون قادرين على تحديد نقط البداية دى بشكل فردى مستقل عن الوعى المجتمعى .. فوجهة نظرى ده بيدينا برضة قدرة على قياس مقدار و متجه (المعاناة و المتعة ) بشكل فردى مستقل عن الوعى المجتمعى برضه .. و ده فوجهة نظرى أحد أسهل الطرق للسعادة .. .. و الله أعلم .