هو فى حاجات كتير ... أوى .. تتقال بالنسبة للموضوع

هو فى حاجات كتير … أوى .. تتقال بالنسبة للموضوع ده الصراحة .. بس خلينى أحاول ألخص : 1- كل مرة بتفتح فيها (يوتيوبك , فيسك , تيليفزيونك , … ) و تشوف فيها فيديو لواحد من الأيقونات دول (مغنى , رقاصة , لعيب كورة … ) … سيادتك بتساعد إنه يتشهر أكتر .. و بالتالى ياخد فلوس أكتر .

2- ده مش معناه إنك (كإنسان عادى يعنى ) .. المسؤول الوحيد عن إن مصر هى البيئة الأكثر تنمية للرقاصات .. بس صدقنى .. إنت (كإنسان عادى يعنى ) .. المسؤول الأكبر .

3- أفضل طريقة للتعامل مع (الفيرال فيديو الجديد , الصورة اللى كسرت الدنيا , الخبر اللى صعق الشعب , … ) هى إنك ولا كأنك شفت حاجة .. و scroll down على بقيت نيوز فيدك عادى جداً .. تدريجياً .. العصافير دى كلها حتطير لما تلاقيك مابتبصش عليها .

4- لما بتحب إنك تشغل إبنك اللى عنده 3 سنين .. بتقوله بص المصاصة .. لما بتحب تشغل إبنك اللى عنده 7 سنين … بتقوله بص اللعبة دى … لما بتحب تشغل إبنك اللى عنده 13 سنة … بتقوله بص العجلة دى … لما بتحب تشغل إبنك اللى عنده 18 سنة … بتقوله بص الموبايل الجامد دة … لما بتحب تشغل إبنك اللى عنده 24 سنة … بتقوله بص العروسة دى … لما بتحب تشغل إبنك اللى عنده 28 سنة … بتقوله بص الفلوس الكاش دى و إتصرف إنت … ملاحظ إيه ؟ .. ماتتشغلش بالرخيص … حيجيلك الغالى .