بوست ريفليكشن عالواقع عجيب شوية

بوست ريفليكشن عالواقع عجيب شوية … .. “بسطها لعناصرها الأولية و خد عنصر و كامل ” … جملة معروفة و مألوفة جداً لأى حد دخل هندسة .. و أحياناً كتير تنفع فلسفة حياة .. .. فاكر من بتاع كام سنة كنت باقرا كتاب عن string theory .. و فمقدمة الكتاب قصة تسلسل أسئلة بسيطة جداً بيقودك لهدف الكلام اللى جوة .. (أستاذ فيزياء بيشرح لطالب صغنن .. فالطالب يسأل مما يتكون الكون ؟ .. فالأستاذ يجاوب من كواكب … فالطالب يسأل .. مم تتكون الكواكب .. فالأستاذ يجاوب من عناصر و كده … و يفضل ماشى معاه لحاااااد .. مما تتكون الإلكترونات ؟ … و عند المرحلة دى الأستاذ كان بيجيب جاز .. و يبدأ الكتاب يغنى :) . .. نفس طريقة تسلسل الأسئلة بتخلينى فمعظم الأحيان اللى باتعرض فيها لمسئلة معينة : عقلية , دينية , رياضية , تكنولوجية أو حتى عاطشفية .. بتعطيش الشين :) … إنى أبسط المسئلة نفسها لعناصرها الأولية .. و أبدأ أسأل و أبحث إزاى العناصر الأولية دى بتتفاعل مع العناصر الأولية المكونة للحياة نفسها (أو على الأقل الجزء اللى بيدركه عقلى من الحياة ) . .. بالاقى إن بنسبة كبيرة المسئلة ذاتها أصبحت جزء صغير جداً جداً .. و إن مهما بلغت درجة تعقيدها نتيجة لأنى ممكن أكون قريب جداً منها .. إنها لما بتشوفها من بعيد كجزء من الصورة الكبيرة الكاملة .. بيكون القرار اللى المفروض يتاخد واضح جداً . .. نتيجة بسيطة لده مثلاً .. إنى كل ما أقرر إنى أكتب إستنتاج معين أو نتيجة مرحلية معينة لتجربة خضتها عالفيس مثلاً … بمجرد ما باضغط على مؤشر بدء الكتابة .. و أبدأ أحاول أرتب أفكارى بشكل قابل للإستيعاب من أياً كان اللى حيقرا … ألاقى إنى بامشى على نفس التسلسل السابق .. و بالتالى باحس إن الموضوع أتفه بكتير جداً من إنى أعرضه كمسئلة قابلة للنشر .. كأنى مثلاً باكتب عن معضلة هل أشرب بن غامق سادة النهاردة و لا محوج ؟! .. و نتيجة لكده برضو إنى باقيس بنفس المقياس على نواتج البشر التانيين .. و باتعجب أحياناً من شجاعتهم فى نشر أفكار أو آراء معينة !! بدون أى شعور بالذنب .. و باحس إنهم أنانيين جداً .. لأنهم تقريباً مافكروش فهل عائد قرار النشر ده سلبى أم إيجابى على اللى حيتعرض للمنشور أم لا !! … فمسلسل the big bang theory بيتعرضوا لجزء من الموضوع ده بشكل كوميدى و جميل جداً .. لما فأكتر من مرة بيأكد شيلدون أو آمى .. إنهم معندهمش أى مشكلة إطلاقاً إنهم يقضوا أمسية كاملة ساكتين مع بعض أو مع أفراد مختلفين أياً كان العدد .. و مش حيحسوا إنهم مضايقين إطلاقاً .. لأن ببساطة ممكن مايكونش تم طرح أى مسئلة تتطلب النقاش أو تبادل الأفكار أو المعلومات .. و بالتأكيد عقلهم مش بيكون فحالة stasis و إنما بيعالج أى أفكار تانية بشكل داخلى و ده فحد ذاته نشاط ممتع ليهم … (( راجع صورة ال cover )) .. .. طبعاً ده بيتغير بمجرد إرتباطهم ببعض بشكل عاطفى لأن فى الحالة دى نوعية الإرتباط نفسه (عاطفى ) بتحتم عدم عقليته بشكل ما و بالتالى لابد من إتخاذ بعض القرارات اللى ممكن العقل مايبررهاش بشكل مباشر .. و ده بيوضح لما آمى مثلاً بت evolve إجتماعياً و عاطفياً فى العلاقة مع شيلدون أسرع .. لأنها بحكم الطبيعة أنثى .. فى حين إن شيلدون بياخد فترة أطول على ما بيقدر يترجم المشاعر دى مثلاً لمسميات و إعتبارات عقلية يقدر بشكل ما يتعامل معاها بشكل كمى .. و يخرجها بشكل محدود جداً بحدود علاقته بآمى .. والله أعلم