kyser soze'

kyser soze’ … قيصر سوزيه … ده إسم شخصية ففيلم the usual suspects … أنا شفت الفيلم من زمان بس دلوقتى و أنا نازل فى النيوز فيد لقيت بوست عن ( شخص ما بيشغل منصب ما عمل مداخلة هاتفية فبرنامج ما و قال تعليق ما ) فإفتكرت فجأة الحوار بتاع الممثل العبقرى كيفن سبايسى مع المحقق .. لما قاله ” أكبر خدعة عملها الشيطان فى البنى آدمين .. هى إنه أقنعهم إنه .. مافيش شيطان” . . على مدار البشرية .. مافيش إنسان كان شر 100% .. يعنى حتى أبو جهل مثلاً .. إعترف إنه يعلم إن الرسول صلى الله عليه و سلم كان على حق .. بس مصالحه و عنده كانوا فسكة تانية .. هتلر .. كان عنده إيمان بإنه بيخدم هدف أكبر منه .. فرعون .. كان فعلاً مفكر إنه حامى حمى أراضى النيل .. و غروره ده واضح جداً فى الآيات اللى بتشرح قصته .. . التراث الغربى (الفولكلور الغربى ) عندهم قصة مشهورة .. ذكرها باولو كويلو فكتاب من كتبه (the devil and miss prym) على ما أتذكر .. بتحكى عن أيهاب .. البلطجى اللى كان بينيم قرى و مدن من العصر .. و العابد اللى كان دايماً فصومعته .. و إزاى إن بعد ما أيهاب طلب من العابد إنه يبات معاه فبيته ليلة .. و نتيجة حوار معين .. أيهاب قلب 180 درجة و حب إنه ينشر الفكر الجديد ده فى الناس اللى حواليه و … إقرا القصة لو عايز .. . الفكرة بتاعت القصة مكررة بتغييرات كتير فقصص كتير جداً .. يعنى عشان أسهلها عليك .. هى نفس قصة despicable me .. . الفكرة هنا هى طبيعة النفس البشرية اللى فأحيان كتير بتحن لفطرتها .. و بتوصل بالإنسان إنه ممكن يغير من حياته بالكامل مقابل إحساسه بال serenity أو الصفاء النفسى أو إنه بيعمل حاجة كويسة يعنى .. . و هنا ييجى الشيطان . أعوذ بالله منه .. لأن الشيطان خبير بالنفس البشرية نتيجة معايشته ليها منذ بدء خليقة سيدنا آدم عليه السلام .. بيكون مدرك إن عند مرحلة معينة .. طمع الإنسان و رغبته فى السلطة أو المال أو الشهوة .. بتشبع .. و عند المرحلة دى الإنسان فجأة بيحس بإحساس ال ( طب إيه ؟) .. هو أنا باعمل كده ليه ؟ .. و فطرته لأجزاء من الثانية بتصحى ضميره . . فالشيطان هنا لازم يقنع الإنسان إن إستنى .. إنت لو قفلت مصنع الخمرا بتاعك عارف حتقفل كام بيت ؟!! … ده إنت فاتح بيوت ناس كتير و بتصرف عليهم .. إنت عارف لو قفلت قناة الرقص بتاعتك كام بيت حيتخرب ؟ طب بص .. إبنى جامع .. ده الحسنات يذهبن السيئات يا جدع .. و بعدين ده إنت دلوقتى أنسب واحد إنه يعالج المشاكل اللى عملها .. مش إنت اللى بوظتها .. يبقى مين غيرك يقدر يصلحها ؟ .. و يدخل الإنسان فدايرة مغلقة .. الخروج منها أسهل ما يكون أحياناً .. مجرد ما تدرك فعلاً قدرات و تأثير الشيطان عليك .. لكن مرة تانية .. أكبر خدعة عملها الشيطان فى الإنسان .. هى إنه أقنعه إنه مش موجود .. .. مش فاكر بقى أنا إفتكرت الكلام ده كله ليه لما شفت الخبر فى النيوز فيد .