فقط لأن الموضوع إستفذنى الصراحة

فقط لأن الموضوع إستفذنى الصراحة ..

• الي بيشربوا القهوة و عارفين إنها مش هتسهرهم (لو ده حقيقى .. فإما إن جيناتك و كبدك مش بيهضمهم بالشكل المظبوط .. أو إنك شربت براميل قهوة لدرجة إنك بنيت مناعة ضدها .. و فكلا الحالتين دى مش حاجة تخليك فخور بأى حاجة ) .

• الي بيلبسوا خفيف و عارفين إنهم هيبردوا .. (و بعدين يمرضوا , و يجيلهم برد , و يفضلوا طول الشتا مناخيرهم سايحة و عايشين بمناديل و مسكنات و أدوية , و يعدوا اللى كانوا لابسين تقيل فى الأساس … برضو مش حاجة تخليك فخور بأى حاجة ) .

• الي بيصرفوا كتير حتي لو مش ضمنين بكره معاهم ولا لا .. ( و بعدين يشحتوا .. أو يحصلهم ظرف طارئ ويكتبوا بوستات تلعن آخر الشهر على الفيس .. أو يستلفوا و يندينوا … برضو مش حاجة تخليك فخور بأى حاجة )

• الي بيسهروا و عارفين إنهم عندهم مشاوير الصبح بدري .. ( و يتصلوا يلغوا لأسباب وهمية .. أو يروحوا مدروخين و نايمين و تحسهم ضاربين مخدرات .. و يبوظوا مصالح أى حد مرتبط بيهم لأن سيادتهم كانوا سهرانين .. برضو مش حاجة تخليك فخور بأى حاجة ) .

• الي بيسيبوا نفسهم يحبوا و عارفين إن الحب بهدلة .. (ماهما مش بيحبوا فمخدات .. دول بيحبوا فبشر من لحم و دم .. فلو بيعملوا كل حاجة من الحاجات اللى فوق .. و اللى تحت دول .. طبيعى حيبهدلوا اللى معاهم و يطلعوا عين أهله .. برضو مش حاجة تخليك فخور بأى حاجة ) ..

• الي بيقولوا الي في دماغهم و عارفين إنهم هيطينوا الدنيا .. ( من أسوأ نوعيات البشر اللى ممكن تعتمد عليها فأى شىء .. لو ليهم حق بيضيعوه فثانية .. و بيبوظوا الدنيا بحجة إن اللى فقلبهم على لسانهم .. دول إسمهم حمقى .. برضو مش حاجة تخليك فخور بأى حاجة ) ..

• الي بيحكوا عن نفسهم حاجات المفروض ماحدش يعرفها .. ( ما هما مش عايشين برضو فجزيرة لوحدهم مع مخدات .. دول بيبقوا عايشين مع بنى آدمين طبيعيين من لحم و دم عندهم خصوصيات .. فجأة تبقى فى العلن عشان الأستاذ/ة طالبة معاها تلعب هولاهوب فى الشارع و تحكى أسرار حياتها .. دول أسمهم برضو حمقى .. برضو مش حاجة تخليك فخور بأى حاجة ) ..

• الي بيعدوا الطريق و يقولوا العربيه الي تاخد بالها مش إحنا .. ( فى البلاد اللى فيها الناس بترقص هولا هوب فى الشارع .. إسمهم jaywalkers .. يعنى قاطعى الطريق .. و دى جريمة .. و بتدخل السجن .. و بتجبر السواق إنه ممكن يحاول يفاديهم فيخبط فشخص تانى برىء كان ماشى عالرصيف مثلاً .. الناس دول حرفياً الله يهديهم .. بدل ما أدعى عليهم إن الله يلعنهم .. لأنى الحمد لله مش باسوق فمصر .. و برضو مش حاجة تخليك فخور بأى حاجة )…

• الي بيغنوا مع أغنية عجبتهم في المواصلات .. (دول حلوين ماشى .. بس لو ماكنتش مهرجانات بس الله يكرمكم .. و يحترم اللى حواليه لو كانوا مش عايزين يشنفوا ودانهم بصوته .. بس برضو مش حاجة تخليك فخور بأى حاجة ) …

= كل الناس دي بيكونوا وصلوا لمرحلة عظيمة في حياتهم ، إنهم أهم حاجه يعيشوا ، فاهمين إن الخروج عن المألوف شيء عظيم ، بيعيشوا لمزاجهم و بمزاجهم ، وصلوا لليفل عالي من الوضعنة و البرنسسة ليفل صعب أي حد يوصله ، ف سلاماً علي من يشبهونا و لا نعلم أين هم === كل الناس دى بيكونوا لسة أطفال .. و أنانيين و نرجسيين .. و بيدمروا الدنيا عشان دماغ سيادتهم المتخلفة .. و محتاجين يتعلموا يكبروا و يفهموا إمتى يرقصوا هولاهوب .. و إمتى يحترموا اللى عايشين حواليهم .. فربنا يهديهم .. برضو بدل ما أدعى عليهم باللعنة .

و الله أعلم .