من كتر العلم اللى فدماغه .. لسع

من كتر العلم اللى فدماغه .. لسع .

“بوست مدح لصديقى الجاهل الغبى” . … فتانية كلية (هندسة - قسم إتصالات و إلكترونيات) .. دخل لنا دكتور رياضة من أشهر دكاترة الرياضة فى الكلية فأول محاضرة .. للأسف مش متذكر إسمه .. بس فاكر إنه توفاه الله من سنوات قليلة الله يرحمه .. بشبشب حمام .. و كان دايماً بيلبس شريط بمبى على رقبته .. بعد كده عرفنا إنها فلاش ميمورى عشان ماينساهاش .. كان عنده جزء صغير من غرابة الأطوار .. و لكن أحد لم يجرؤ على التقليل من شأنه بسبب غرابة أطواره دى .. و كان من المعتاد إنك تسمع الجملة المشهورة دى عنه .. ” من كتر العلم اللى فدماغه .. لسع ” . … والدى ربنا يحميه و يحفظه (صيدلى ) .. حكالنا أكتر من مرة عن دكاترة الكلية بتوعه زمان .. و كان بيحكى دائماً عن دكتور عالم كان بيديلهم .. مشهور جداً و بيتم الإحتفاء بيه فى العالم كله .. و برضو كان بيحكى عن غرابة أطواره و إن : ” من كتر العلم اللى فدماغه .. لسع ” . … فمسلسل fringe .. العبقرى john noble بيقوم بدور العبقرى برضو : walter bishop .. و بيمثل دور من أروع الأدوار اللى شفتها زمان .. دور إنسان ” من كتر العلم اللى فدماغه .. لسع ” . … ثقافتنا المحلية .. و العالمية برضو .. فيها كلها نفس الصورة دى .. صورة العبقرى المجنون .. إذا كان فى الهند , الصين , اليابان , كوريا , فرنسا , ألمانيا , أمريكا , إنجلترا ” الدول اللى شفت منها أعمال فنية بتتكلم عن العباقرة ” .. كلهم عندهم فكرة إن العبقرى .. مجنون نسبياً . … أحمد خالد توفيق كان أعطى مثال رائع فأكتر من كتاب ليه.. و هو بيضرب مثل عن النقاش مع الغبى الأحمق .. و هو لو إنك حاولت تلاعب بغبغان شطرنج .. و فضلت تحاول بأفضل الخطط إنك تهزمه .. عند مرحلة معينة .. البغبغان حيقلب الرقعة كلها و يصرخ و يرفرف فى الهوا بفرح .. معتقد إنه كدا كسب .. لأن البغبغان بكل بساطة .. لا يفهم أساساً قواعد الشطرنج و لا خططه ولا يفرق معاه حاجة منهم .. فعقلة إن اللى يقلب الرقعة الأول .. يفوز . ده لو كان فى فعقلة مفهوم للفوز أساساً .. … العبقرية كانت دائماً محل تعريف و وصف من كتير من المفكرين .. و ليها توصيفات كتير .. لكن لو فرضنا هنا إن العبقرية هى : ” قدرة العقل على فهم قدر ضخم من المعلومات و ربطها ببعضها البعض ” . أعتقد حيبقى تعريف ناقص جداً .. لابد فوجهة نظرى من أضافة : ” لإخراج و إنتاج إفادة للكون ” . … لأن لو إكتفينا بالجملة الأولى ” الفهم و الربط للمعلومات ” .. لازم هنا نسأل عن : “ماهية المعلومات دى” . … و ده بيقودنى إنى أصنف أى معلومة من المعلومات التافهة الهايفة اللى بقينا بنستهلكها يومياً بكم ضخم من السوشيال ميديا .. على إنها … معلومة . .. و كم ضخم من الناس حالياً موجودين .. لاقت المعلومات اللى من النوعية دى .. فعقولهم مسكن رحب .. و أصبح عقلهم مليان بكم ضخم من المعلومات التافهة .. الهايفة .. و أصبحوا .. عباقرة فيها . … و نتيجة لأن نسبة كبيرة من البشر … عند مرحلة معينة من كم المعلومات الضخم اللى بيدخل عقلهم .. و يفهموه .. بيلسعوا .. ” زى ما شفنا فأول البوست ” .. فأصبح - و لأول مرة فى تاريخ البشرية - فى عدد ضخم من العباقرة اللاسعين .. اللى جوا عقلهم كم ضخم من المعلومات و روابط المعلومات ال ” تافهة الهايفة ” .. … لأول مرة فتاريخ البشرية .. بيكون فى الوسائل السريعة المريحة السهلة للحصول على الكم الضخم من المعلومات التافهة الهايفة بالمنظر ده .. .. و نتيجة لكده .. نسبة العباقرة اللاسعين فى مجالات العلوم التافهة الهايفة … إزدادت بشكل ضخم جداً .. … العباقرة اللاسعين فى مجالات العلوم التافهة الهايفة دول .. على مدار التاريخ كانوا معروفين بأسامى كتير .. و قد يكون أشهرهم بالنسبالى هو : الشخصية الكاريكاتورية ل : جحا . … و فى المعتاد .. يتبعهم جمهور ضخم .. بيبتدى من ( الأقل ذكاء منهم نسبياً ) .. إلى مرحلة ما قبل الجاهل الغبى . و كان يسمى هذا الجمهور ب : البهاليل . … … لذا … لصديقى الجاهل الغبى .. الجاهل بكل العلوم التافهة الهايفة الرائجة حالياً .. و الغبى و غير قادر على فهم أو ربط المعلومات التافهة الهايفة الرائجة حالياً .. إستمر فى جهلك و غبائك بارك الله لك فيهما .. … و الله أعلم .