هممم .. شوية كلام مع التريند

هممم .. شوية كلام مع التريند .. ماذا لو الفيس قفل “من وجهة نظر بيزنس مش إجتماعياً” ؟! … إفتراضيات

ححاول هنا أفكر من منطلق أعم شوية من مجرد إن أحد أصدقائك المتنورين قفلوا حسابهم على الفيس و بدأ يكلمك عن رقيه الفكرى المفاجئ و إنه أصبح يحتسي القهوة و هو بيتابع quora على أنغام فيروز . و إنه بعد عن العالم الإجتماعى الوهمى اللى على الفيس و إزاى ده خلاه يحس إنه عنده 24 ساعة فجأة و إنه ممكن يروح جيم و يبقى إنسان جديد .. و يبطل السجاير بالمرة . … خلينى أتخيل … ماذا لو فجأة .. لسبب ما ( تقنياً صعب .. بس مش مستحيل) .. الفيس قفل فى العالم أجمع . … 1- أعتقد أول المتأثرين و المتحركين حتبقى براندات كبيرة “مش ضخمة” .. شركات و بيزنس حجمه الكبير معتمد بنسبة ضخمة على الفيسبوك و جروباته و صفحاته .. أنا شخصياً حاكون فى الجزء ده .. جزء كبير من شغلنا فى الإيكوميرس معتمد على الفيسبوك . محاولة إنى أنقل العميل من الفيس لموقع غير الفيس .. نسب نجاحها ضئيلة جداً .. خصوصاً فديموجرافيات ( قطاعات إجتماعية و إقتصادية) فقيرة مادياً و تكنولوجياً .. و بالنسبة لها الإنترنت هو الفيسبوك . حاجة زى كده حتضطرنى إنى أنقل كل عملياتى اللى كنت باعملها عن طريق الفيس .. لعمليات تتم عن طريق رقم تيليفون العميل ” زى الواتس مثلاً - بفرض إن توقف الفيس مش حيوقف الواتس” .. أو تيليجرام .. لو الفيس و الواتس قفلوا سوا . .. السبب مرة تانية هو إن العميل من الديموجرافيات الفقيرة مادياً و تقنياً لا يمتلك مهارة أو وقت أو رفاهية إنه يدخل موقع متخصص للشراء .. ولا حتى (أمازون أو سوق ) … … 2- البراندات الضخمة اللى ليها إسم قوى خارج الفيس حتكسب أكتر .. لأنها تمتلك بالفعل التواجد فى الديموجرافيات دى .. و عندها القدرة على الوصول لها عن طريق منافذ تانية .. زى الإعلانات فى التيليفزيون و الشارع . … 3- النقل لتويتر مش حيكون مباشر أو سلس فوجهة نظري … بس لو تويتر نفسهم ماحاولوش يستوعبوا بسرعة الفجوة اللى حتحصل .. حيتأخروا كتير فى جلب الفئات اللى حتنقسم بين مواقع سوشيال تانية ” مش بشهرة الفيس طبعاً ” .. بس أكيد حتحاول تكسب أكتر عدد من الناس . … 4- ماعتقدش إننا حنرجع لعالم الفورامز ( المنتديات و أيام دي في دى فور أراب) … لأن الويب 2.0 غير ده بلا عودة خلاص .. ( الويب 2.0 هو إنك صفحة الويب اللى إنت فاتحها عناصرها تتحدث و تتفاعل معاها بدون ما تضطر تريفريش الصفحة كلها ) .. لكن بكل تأكيد الناس حتدور على نفس الجرعة من التفاعل و الكومنتات و ما شابه فأى موقع بيقدم الخدمة دى جواه بشكل native .. مش عن طريق الapi بتاع الفيس . … 5- أتخيل إن جوجل أو أمازون أو مايكروسوفت ( التلاتة الكبار التانيين ) .. حيحاول حد منهم إنه يملا الفراغ ده مباشرة بشكل ما .. حيبقى صعب إنه يعمل ده بدون ما يكون عنده داتا عن العملاء تحسس العملاء إنهم فبيتهم .. فأتخيل إن مايكروسوفت و جوجل حيكون ليهم فرصة أكبر من أمازون فى ده . (إنت عالفيس عشان الداتا بتاعتك و بتاعت العالم اللى إنت بتتابعه عليه .. مش عشان التيكنولوجى بتاعت الفيس عجباك ) … 6- بشكل كبير أنا رابط فذهنى الفيس بإنستاجرام .. فلما باتخيل العالم بدون فيس .. باتخيله بدون إنستاجرام كمان .. فبالتالى نفس الكلام بشكل كبير بينطبق على إنستاجرام .