أجيال ماتعلمتش تفصص الكوكو علي الرز بنفسها

أجيال ماتعلمتش تفصص الكوكو علي الرز بنفسها .

أنا إطلاقاً مش من عشاق السي فود . يعني لو جعان ميت من الجوع .. و عديت جنب زفير في القلعة , أو قدورة , أو أبو راوية .. أو غيرهم من أباطرة السي فود في إسكندرية .. برضو حاتردد قبل ما أفكر أدخل آكل جوة . و أحيان كتير كنت في القلعة في إسكندرية , و أبقي فعلاً باتضور جوعاً .. و أضرب مشوار لحد سان ستيفانو أو جرين بلازا عشان آكل من عند بيتزا كوين . أنا من مدمنين البيتزا … و ماعنديش مشكلة آكل بيتزا 7 أيام في الأسبوع . … باحس إن السي فود محتاج مجهود زيادة عن اللزوم عشان آكله .. مش سهل .. الجمبري محتاج مجهود عشان أقشره .. فبالتالي معظم الوقت اللي باضطر آكل فيه جمبري في عزومات مثلاً أو سفريات أو ما شابه .. باكله بقشره ( آه والله العظيم ) . و الحاجات التانية زي الكابوريا .. دي كابوس بالنسبة ليا في أكلها أو التعامل معاها , أو الإستاكوزا مثلاً .. دي حتفضل بالنسبة ليا لغز عن ليه هي من أغلي الأكلات … أنا لو حاختار .. حادفع 4 أضعاف تمن وجبة إستاكوزا .. مقابل بيتزا تشيكن رانش لارج .. و صوص كاتشب حار . … أنا باستلطف السمك أكتر .. بس مش بدرجة البيتزا أكيد . بس برضو بيحتاج مجهود .. عشان أتعامل مع الشوك و ما شابه .. و حتي لو حاكله فيليه .. أو تونة أو سالمون في مطعم غالي و محضره بشكل جاهز عالأكل مباشرة .. برضو باحس إني مش مستمتع أو متمزج زي البيتزا . … البيتزا بالنسبة ليا حتفضل دايماً هي الأكل الأمثل و الأطعم و الأجمل .. حاجة كده مش محتاج مجهود عشان تتعامل معاها .. مافيش فيها عضم أو بذر أو قشر .. و حتي مافيش فيها ترتيب معين لازم تاكله بيها .. يعني مش محتاج تفكر بين معلقة رز و معلقة خضار و معلقة طبيخ و هري كتير .. لا .. هي سلايس بيتزا .. حتمسكها بإيدك .. و إيدك التانية حتبقي فاضية تمسك بيها موبايلك أو كتابك أو ماوس الكمبيوتر . … … بس أنا واعي بكل ده .. مافيش مرة مثلاً كلت سمكة بشوكها .. حتي الجمبري لما باكله بقشره و ألاقي اللي حواليا مستغربين مني .. باوريهم إن ده الطبيعي في مجتمعات كتير في العالم .. بل إن الغريب في المجتمعات دي هو إنك تقشر الجمبري قبل أكله . و لكن باتفادي الإستاكوزا أو الكابوريا قدر الإمكان .. و لو حصل و تواجدت في مكان مجبر فيه إني آكل إستاكوزا ( لوبستر يعني ) أو كابوريا .. باستني حد يقشر لي 😅 . … عشان كده باستغرب جداً من الناس اللي بياكلوا السمك بشوكه .. و بعدين الشوك يقف في زورهم .. و يسبب لهم إختناق و مشاكل ضخمة . أو ينزل بطونهم .. و يسبب لهم عسر هضم و مشاكل كتير . . باستغرب من الناس اللي ماتعرفش إنها المفروض تفصص السمك قبل أكله . أو تخلي الفراخ من عضمها قبل أكلها .. كتير باشوف ناس بتاكل فراخ بعضمها .. و بعدين تعاني من جروح كتير بسبب العضم الناشف ده .. بل إن كتير منهم بيوصل لحالات إختناق تسبب الموت . . كتير شفت ناس كسرت سنانها بسبب أكل لحوم بعضمها .. و دلوقتي ماشيين حوالينا بدون سنان و شكلهم مشوه . . ماتقوليش إنك ماشفتش الناس دول قبل كده .. الناس دي ماليين السوشيال ميديا قدامك و حواليك طول الوقت .. ناس جعانة و بتاكل .. لكن ماتعلموش يفصلوا اللحم عن العضم .. ماتعلموش يفصلوا السمك عن الشوك .. ماتعلموش يفصصوا الفراخ .. . و الأهم .. ماتعلموش يفصلوا الإنتاج عن اللي بينتجه .. … … يعني : إنسان كتب رواية أو قصة جميلة جداً .. مليانة حكم و عبر و قيم و دروس .. تلاقي له جمهور ضخم قرر إنه يستهلك و ياكل كل إنتاج الإنسان ده .. بل و يستهلك الإنسان ده شخصياً .. بدون ما يفصل منه أى شيء .. يعني لو الإنسان ده ليه آراء تانية غلط .. جمهوره برضو يعتنقها .. لو الإنسان ده ليه معتقدات مبنية علي جهل معين … جمهوره يعتقد نفس المعتقدات بالكامل .. بدون ما يفصلوا أى شيء . . و بنفس السبب .. لو كان في إنسان عالم و أفاد ناس كتير و علم ناس كتير جداً .. و لكن عرفوا عنه غلطة أو نقص .. مابيفصلوش علمه عن نقصه .. و لكن بيرموا كل إنتاجه و علمه في الزبالة .. لأنهم مش قادرين يفصلوا .. مش عارفين يفصلوا الكويس عن السيء . … … أنا لولا إن في القرآن الكريم تكريم لأكل البحر ( وهو الذي سخر البحر لتأكلوا منه لحما طريا وتستخرجوا منه حلية تلبسونها وترى الفلك مواخر فيه ولتبتغوا من فضله ولعلكم تشكرون ) لولا التكريم ده .. كنت حاقول إني ( باكره ) أكل البحر بالكامل .. و خصوصاً الإستاكوزا و الكابوريا و الجمبري ..

و لكني مدرك تمام الإدراك بفايدته الصحية و أهميته .. و عشان كده لما باحتاج أكله أو باضطر أكله .. بابذل المجهود اللازم في إني أتفادي ضرر القشر الصلب . . و بنفس الطريقة .. كتب كتير صعبة جداً في إنك تفهمها .. كتب كتير محتاجة مجهود جبار عشان تقدر تطلع بإستفادة منها .. بابذل المجهود في إني أطلع الإستفادة دي .. و بعدين أحاول أتأكد إني قادر علي فصل الكويس اللي فيها عن السيء .. . لكن إني أتعامل كالبهائم ( أو أضل سبيلا ) مع الحاجة اللي باستهلكها .. و أتجاهل حاجة قمة في الأهمية .. لأني مش فاهم تتاكل إزاي .. أو آكل شيء فيه 1% مفيد .. و 99% ضار .. و آكله بالكامل .. لأني مش فاهم أفصل إزاي بين المفيد و الضار .. يبقي في الحالة دي أنا أسوء من الخنازير . … … التريندات اللي بتنتشر كل فترة .. أحد مزاياها هي إنها بتوريني آراء و أفكار ناس كتير من اللي بتابعهم و إستفدت جداً من جزء كبير من إنتاجهم . . و أحياناً كتير بالاقي إن آراء و أفكار الناس دي مش متسقة أو مش بتوافق معتقدات أساسية عندي .. أو أجزاء ثابتة في شريعتي . . قبل ما أرفض الشخص بالكامل .. أو أعمل له بلوك .. أو أشك في اللي إستفدت منه من إنتاجه قبل كده .. بافكر .. و أسأل نفسي .. هل الرأى أو الفكرة الغلط فوجهة نظري دي عند الشخص ده .. ممكن نفصلها عن الحاجات الكويسة اللي إستفدت منه بسببها ولا لا … و باسأل نفسي سؤال أهم : هل بقالي كتير مأكلتش سي فود و محتاج آكله قريب .. ولا أطلب بيتزا ؟!