16 نقطة .. بعد ما خلصت حالاً حلقة جو روجان

16 نقطة .. بعد ما خلصت حالاً حلقة جو روجان ( النباطشي ) مع د . زاهي حواس .. … 1- في ناس كتير أوي بتستني جنازة عشان تشبع فيها لطم .. و أحيان كتير مابيستنوش لحد ما يتأكدوا إن الميت مات بالفعل عشان يبدأوا لطم في الجنازة .. لا .. هما مابيصدقوا يلاقوا حاجة تتماشي مع ال ( Bias - إنحياز ) اللي عندهم .. و بعدين يبدأوا ( يزيطوا في الزيطة ) … أنا مابحبش الناس دي .. إطلاقاً .. و 99% من الهايب و التريند و الناس اللي زايطة في موضوع الحلقة دي حتي الآن .. من الناس دول . . 2- أنا إتفرجت علي أغلب حلقات بودكاست جو روجان علي مدار ال5 سنين اللي فاتوا .. فبالتالي .. عندي معرفة كافية بأسلوبه و طريقته تخليني أقدر أفتي شوية . . 3- جو روجان مش عالم .. جو روجان مش محاور محترف ( إطلاقاً بالمناسبة ) .. و الأهم هو إن .. جو روجان ( زئبقي جداً .. يعني مالوش مسكة .. يعني بيعرف يلعب علي جميع الأطراف و الحبال ) … و ركز في الحتة الأخيرة دي .. حاشرحها كمان شوية . . 4- جو روجان كوميديان .. ده هو الوصف اللي هو بيحب يوصف نفسه بيه .. و شغلته غير موضوع البودكاست ده .. هو إنه كان بيلعب فنون قتالية .. و بعدين بقي بيعلق علي ماتشات فنون قتالية ( MMA ) .. زي ممدوح فرج كده 🤣 .. و عنده نادي ستاند أب كوميدي بتاعه .. بيطلع يقول نكت و سكيتشات فيه . . 5- جو روجان عبقريته الحقيقية هي إنه ( نباطشي محترف ) .. عارف إنت ال ( نباطشي ) .. اللي هو الدور العبقري اللي قام بيه ماجد الكدواني في فيلم الفرح ؟! .. بالظبط .. جو روجان عشان تفهمه .. إتخيل ماجد الكدواني في فيلم الفرح .. بيعرف يزيييييييييط .. و يحب يزيييييييييط .. و يلمع الزبون .. و يعلي الدوشة .. عشان النٌقطة تنزل ترف علي خشبة المسرح و الجماهير تتمزج . . 6- مثلاً .. من سنة تقريباً .. إستضاف ( تيرانس هوارد ) .. ده هو الممثل المشهور اللي قام ب دور صديق أيرون مان في أول فيلم أيرون مان .. المهم .. عمك تيرانس ده صحي من النوم في يوم .. و طلع بشوية كلام جميل أوي زي : الرياضة و الحساب اللي بندرسهم كلها كدب و مؤامرة عشان يلعبوا في دماغ البشر .. و إن الحساب الحقيقي سري و ماحدش يعرفه .. و إن ( 1 في 1 بتساوي 2 .. مش 1 🤣 ) .. و كلام كتير أوي كله هري من النوعية دي .. . 7- المهم .. جو روجان فحلقات قبل حلقة تيرانس هوارد دي .. كان قعد يعليه و يديله التحية ( بالظبط زي ماجد الكدواني ) .. لحد ما جه معاد حلقة تيرانس .. و عمل معاه أجدع فقرة علي المسرح .. و تيرانس مسك الحديدة ( المايكروفون ) .. و فضل يهري بشكل مستمر لمدة 4 ساعات .. هري منقطع النظير . . 8- الحلقة عملت مشاهدات خرافية .. و بالمناسبة .. أكل عيش جو روجان هو المشاهدات دي .. ( و البودكاست بتاعه سبوتيفاي إشتراته من سنين ب مليار دولار .. و ده كان تريند عظيم أيامها ) .. ف أحد أصدقاء جو روجان .. عالم رياضيات و فيزياء مخضرم ( عالم بحق و حقيقي ) إسمه ( إيريك واينستين ) .. إستفزه الهري اللي حصل ده .. و طلع مع جو و مع تيرانس في حلقة بعدها .. و علي مدار 4 ساعات .. العالم ( إيريك ) .. بيقعّد قدامه ( تيرانس و جو ) .. و بيشطفهم و يحميهم و يليفهم و يعلمهم الأدب بالأدب .. و من غير قلة أدب . .. اللي هو ما مفاده .. لما تحب تصيع بالرياضة و الحساب .. روح صيع علي اللي مايفهمش و يخاف .. إنما حتيجي لواحد كان بينافس علي رئاسة أكبر جامعات أمريكا في المجالات دي .. يبقي إنت حيتعلم عليك حرفياً . . 9- و علي مدار الحلقة اللي كان جو و تيرانس بيتشطفوا فيها من إيريك .. جو قاعد بيحاول يزيط .. كل ما إيريك يمسك فرضية هري قالها تيرانس .. و يشرح له إن يابن الحلال اللي بتقوله ده هري عشان ( 1 و 2 و 3 ) .. جو يزيط و يقاطع و يقول ( أيون بس مش يمكن برضو العلماء مأخدوش بالهم 🤣 ) . . اللي هو أنا عايز أزيط لمجرد الزيطة … ليه ؟! .. لأن العلم الحقيقي .. ممل جداً جداً جداً جداً جداً .. . 10- العلم الحقيقي .. ممل فحت .. ممل أوي .. اللي هو أنهي بذمتك أكثر إثارة ؟.. إني أقعد أشرح لك لمدة 5 سنين نظريات و منطق و علوم ؟ … ولا نفتح مع بعض فيلم إنديانا جونز و نقعد نتخيل إننا بنحارب مومياء هايجة بتدور علي عريس ؟! . . 11- د زاهي حواس .. أنا لا أعلم عنه أى شيء إطلاقاً قبل الحلقة دي .. يمكن اللي عارفني من زمان أكيد أخد باله .. إني باتكلم عن حاجات كتير أوي .. و لكني تقريباً عمري ما إتكلمت علي فراعنة و آثار و مصريات و الكلام ده .. مش شغلتي .. مش كاري .. مش حتتي .. مابفتيش فيها . . 12- لكن .. الشخص اللي سمعته دلوقتي لمدة ساعتين كاملين .. شخص بيتكلم بالعلم و المنطق فقط .. ماعندوش إستعداد و لو بإتنين جنيه و نص .. إنه يزيط أو يهري أو يعلّي مع نباطشي زي ( جو روجان ) . . 13 - و فنفس الوقت .. د زاهي حواس .. واضح جداً جداً إنه فيه أحد أكبر الخواص اللي عرفتها و شفتها في علماء كتير فعلاً قضوا عمرهم كله في مجال واحد .. و الخاصية دي هي : التخصص الزيادة عن اللزوم . . يعني .. حتي بعض الأمور اللي ممكن تتعلق بمجاله .. و لكنها بعيدة شوية صغننين عن عمق المجال بتاعه .. بتكون خارج نطاق إهتمامه بالكامل .. . يعني .. لما جو روجان سأله علي حاجة زي ( جوبيكلي تيبي - Göbeklitepe ) .. و دي من أشهر التريندات في الآثار في العالم خلال آخر 5 سنين .. و إتعمل عنها مسلسلات في تركيا .. زاهي حواس رد عليه الرد المؤلم ( أنا باتكلم عن مصر .. ماليش دعوة بتركيا 🤣 ) . .. 14 - الرد ده مؤلم بالنسبة ل جو روجان جداً .. اللي هو يا عم أنا مش عارف أعلي و أزيط معاك في المصريات و الأهرامات .. طب تعالي نزيط برة مصر شوية .. لكن زاهي حواس فعلاً .. ماكنش جاي يزيط إطلاقاً … الراجل جاي و هو واضح جداً هو عايز يعمل إيه .. ( أنا عالم قضيت 60 سنة تقريباً باشتغل في حاجة معينة .. و جاي دلوقتي أفتي فيها .. و باخد كل كبريائي و قيمتي منها .. و ماعنديش إستعداد أقول أى شيء أو أتكلم في أى شيء برة المنهج حرفياً .. و إلا درجاتي تنقص ) . … 15- أنا هنا مش حاتكلم عن هل ده أسلوب صح أم خطأ .. لأن مرة تانية .. ( الآثار ) مش مجالي .. لكن .. أؤكد إن الناحية التانية .. جو روجان و جمهوره .. هما قمة الخطأ في حاجات كتير جداً .. أهمها هو السعي و الجري ورا الوهم و ال ( زيطة ) .. … 16- جمهور ( جو روجان ) هما جمهور ( جوردان بيترسون ) .. هما جمهور ( أندرو تيت ) .. هما جمهور ( تيرانس هوارد ) .. هما جمهور الفاست فود و بلبن .. .. اللي هو أنا مش عايز أكلة عادية .. آكلها لمدة سنين .. و أروح جيم أتمرن .. و أعمل عضلات عادية .. لا .. .. أنا عايز أكلة مليانة توابل سرية و خطيرة ماحدش عرفها قبل كده .. آكلها و أروح أعمل تمارين خطيرة ماحدش عرف عنها من آلاف السنين .. و أكتشف أثناء ما باعملها أسرار الإقتصاد اللي النخبة مخبيينه عننا … و أطلع كائن أسطوري عايش فوسط كائنات فضائية و سلاحف متنكرة ( lizard shapeshifters 🤣 ) .. و لما أفشل فكل ده و أكتشف إني كنت عايش فوهم .. أتفرج علي حلقة ل جوردان بيترسون أو أندرو هيوبرمان … عشان يدوني حقنتين ( canned wisdom = علم نفس و حكمة معلبة ) .. … … … ف رجاءاً .. قبل ما تزيط في الزيطة .. إسمع الحلقة بالكامل .. . و الله أعلم .