زمااااااااااااااااااااان .. كان في فكٌتيبات فلاش و مجلات ماجد ..

زمااااااااااااااااااااان .. كان في فكٌتيبات فلاش و مجلات ماجد .. لعبة كنت باحب ألعبها جداً جداً .. كانوا بيحطّوا لك مربع .. و مرسوم فيه شوية خطوط كده .. و تحت المربع جملة : أكمل علي حسب إبداعك . . و بعدين في العدد اللي بعده ( من فلاش أو مجلة ماجد ) .. كانوا بينشروا أفضل الإبداعات اللي بعتها المشتركين . و الله العظيم و أنا باكتب البوست دلوقتي .. فاكر منظري و أنا عندي 8 سنين و مبحلق في مجلة ماجد .. و باتخيل .. باتخيل … يا تري يا هل تري .. ممكن أبدع إيه من الخطوط دي ؟! . … لما باتكلم في أى موضوع له علاقة بال (adhd ) .. و إنه نعمة من الله سبحانه و تعالي .. خصوصاً لو فاهم يعني إيه ( إبداع ) .. باكتشف إن ناس كتير فعلاً مش بتشوفه كده .. و بتبقي مركّزة بس علي المٌعاناة الضخمة نتيجة ( تشتت الإنتباه , تشتت الذاكرة , الهايبرة , … ) .. . لحد ما بابدأ أشرح لهم اللعبة اللي باتكلم عنها دي .. . تعالي نلعب .. و أشرح لك . هات ورقة جرنان ( لو إنت عجوز زيي و عندك جرايد 🤣 ) .. لو ماعندكش .. هات ورقة مليانة من كتاب .. مليانة بالكامل .. يادوب فيها فراغات في الهوامش بس .. . و هات ورقة تانية .. فاضية بالكاااااااامل .. . و حٌطّهم جنب بعض .. و بص عليهم كويس .. و حاول ترسم .. تتخيل إنك حترسم أى حاجة .. أى رسمة .. أى منظر .. . أنهي ورقة حتساعدك أكتر ؟! اللي مليانة ورق و تفاصيل و مافيش فيها فراغات إطلاقاً .. ولّا الفاضية البيضاء ؟! … و أنا فثانوي عام .. شفت فيلم ( نيمو ) و اللي بتلعب فيه عبلة كامل دور ( دوري ) بشكل عبقري .. السمكة اللي بتنسي .. بعد شوية ثواني بسيطة .. بتنسي .. و بتنسي إنها بتنسي .. 🥹 إستغربت .. لأن بيئتي كانت لسة محدودة جداً .. و كنت مفكّر إن كل الناس كده ! .. و إن معني ال ( مٌذاكرة ) زي ما أنا كنت باعملها .. هو إني كل أسبوع لما أفتح الكتاب .. يبقي كإني باشوف المعلومات بالكامل تقريباً لأول مرة !! . و إن طبيعي جداً إني لو رايح أمتحن في مادة .. لازم أكون قرأتها بالكامل من الجلدة للجلدة قبل الإمتحان ب كام ساعة !! و إن أى معلومة ذاكرتها من 3 أيام مثلاً .. كإني ماقرأتهاش أساساً .. . هو مش كل الناس كده ؟! … لما كبرت .. و فهمت إن الموضوع ده درجات .. و إن كل ما بتكبر .. و البيئة بتاعتك بتكبر .. و كمية ال( مٌدخلات ) لعقلك بتكتر .. بتكتشف إن ده فعلاً مش طبيعي بالنسبة لناس كتير .. و إن كل يومين .. لو إنشغلت بشيء جديد في اليومين دول .. أغلب ذكرياتك عن الحاجات اللي كنت متوغل في أعماقها .. بتختفي تقريباً بالكامل .. … عشت مع المعاناة دي سنين .. لحد ما إتعلمت يعني إيه ( adhd ) .. و إزاي أشتغل مع ( ذاكرتي دي ) .. مش ضدها . .. و إفتكرت اللعبة اللي شرحتها فأول البوست . … للتوضيح .. أنا ( و اللي زيي ) مش بنفقد الذاكرة .. يعني دماغنا مش بتتحول صفحة بيضاء بالكامل .. لا .. و لكن .. التشبيه الأمثل هو إن الصفحة المليانة من الجرنان أو الكتاب .. بتتملي أكتر .. و أكتر .. و بيتكتب كلام فكل الفراغات و الهوامش و بين السطور و بين الحروف .. لحد ما مابنقدرش نميّز من اللي مكتوب أى شيء … إطلاقاً .. بالظبط كإنك شايف صفحة بيضا .. . لكن لو إتسألنا في شيء من اللي في الصفحة مثلاً .. بنفضل نحاول نركّز و نفصص الخيوط الكتير اللي دخلت و إتكعبلت فبعضها دي .. لحد ما نبدأ نميز شوية حروف متلخبطين مع شوية حروف تانيين .. و نحاول نرد و نجاوب .. لكن تلاقينا بنجاوب كلام داخل فبعضه .. بنقسم إننا شايفين المعلومات قدام عينينا .. لكن .. لكن مش قادرين نسترجعها لوحدها .. أو نركز علي حاجة واحدة منهم .. كٌلكيعة من خيوط كتيييييييييير داخلين في بعضهم . … و لما بتحتاج بقي إنك ترسم في صفحة بالمنظر ده .. مش بتبقي زي اللي محتاج يتخيل شيء مش موجود من الفراغ في صفحة بيضاء بالكامل .. ده صعب جداً بالمناسبة .. و نادر جداً جداً جداً كمان .. ( اللي هو حاجة زي رامانوجان مثلاً .. اللي كان بيتخيل حلول رياضيات مٌعقدة جداً جداً جداً بدون أى تدريب أكاديمي مٌحترف .. و كان بيقول الحلول بتجيله و هو نايم في الحلم 🤣 ) .. .. لا .. إحنا بيكون بالنسبة لنا .. الموضوع زي اللعبة اللي شرحتها فوق .. و لكن بدل خط أو خطين أو تلات خطوط في مربع . بيكون خطوط كتيييييييير بقي .. من مجالات كتير جداً .. كلهم داخلين فبعض بشكل طبيعي .. بدون مجهود مننا إطلاقاً .. . طبيعي جداً إني شخصياً لما بافكّر في سٌرعة تقليبي للشاي باللبن جنب طبق البسكوت و أنا شايف الشاي جوة الفتلة مش بيطلع برّاها .. إني أفكر في في نوع الخامة اللي بيتعمل منها فتلة الشاي عشان تحقق أفضل إنتشار للشاي في اللبن .. و إن أرق من كده كانت حتتقطع بسهولة .. أضيق من كده كانت مش حتطلّع كل الشاي اللي المفروض تطلعه .. و إزاي إن ده شبه دور العائلة بشكل ضخم خلال رحلة تربية الطفل .. في إنها تحافظ علي الطفل من إنه يفقد هويته داخل المٌجتمع .. لكن فنفس الوقت ماتقفلش عليه لدرجة إنه مايأثرش في المٌجتمع أو المجتمع يأثر فيه . و إني لو زودت سرعة تقليبي للشاي .. يعني إزدادت عوامل الضغط و عدم الإستقرار المٌجتمعي ( حالات الحروب و الكوارث مثلاً ) .. ف عند مرحلة معينة أكيد كيس فتلة الشاي حيتقطع .. و ده معناه إني ك مجتمع .. معاييري في التربية محتاجة تتغير بشكل واعي مع تغير الظروف الخارجية ( زي دلوقتي ) . و إيه هي الأدوات المٌتاحة لنا عشان نحقق ده .. و … . ده بالنسبة ليا … و لأمثالي .. طبيعي جداً .. و مٌستمر .. و طول الوقت . … طريقة رؤيتنا للحياة دي .. و إننا كل حاجة في دماغنا بتنفد علي كل حاجة تانية .. مفيدة جداً .. أو مدمرة جداً جداً جداً .. مدمرة جداً .. لو ماتعلمتش تستفيد منها .. تدون .. تكتب .. تتعلم الأدوات اللي تساعدك تحول اللي إنت شايفه ده .. لرسومات حقيقية مٌفيدة لغيرك .. . و مفيدة جداً .. لو إتعلمت ده .. و لو إتعلمت إزاي أثناء ما إنت في الحالة دي ( حالة السمكة ) .. تقدر تكتب أو ترسم في الفراغات البسيييييييييطة اللي عقلك بيسمح لك بيها .. . أو اللي هي إسمها ( الذاكرة التنفيذية ) . … زي بالظبط نفس التشبيه .. إنك صفحة الجرنان اللي قدامك .. مافيش فيها غير يادوب مساحات بسيطة جداً جداً جداً .. فاضية .. . عقل الإنسان بيحتاج المساحة الفاضية دي عشان ينفذ المهام المطلوبة منه طول الوقت ( شغل , مذاكرة , حياة إجتماعية عادية , … ) . . الإنسان العادي .. عقله بيسمح له بمساحات فاضية معقولة .. تساعده يفتكر هو المفروض يعمل إيه .. و يعمله إزاي .. . إحنا لا .. المساحات دي عندنا دايماً بتتملي بسرعة جداً جداً .. بدون إرادة مننا . و عشان كده .. لازم تتعلم تشتغل مع عقلك .. مش ضده . … ده هو أساس التقسيمة الأساسية ل ( زالفول - zalfol ) .. إنك و إنت في حالة ( السمكة ) .. مش بتكون محتاج تفكّر .. مش بتعرف أساساً تفكّر .. و بتبقي محتاج بشكل واضح جداً جداً جداً .. تعمل تاسك صغيرة جداً .. محدودة جداً .. و تشوف بعينيك الزمن و هو بيتحرك . … و تبقي متطمّن .. إنك مش محتاج تفتكر التاسك دي قبلها إيه .. أو بعدها إيه .. أو المشروع باقي تفاصيله إيه .. و إن كل ده محفوظ في ذاكرة خارجية عن عقلك .. و إنك لو فأى لحظة .. إنشغلت و حد إتصل عليك يعيّد عليك في 5 دقايق أثناء ما إنت بتكتب بوست طويل زي ده 😅.. حتروح ترد عليه .. . و ترجع و إنت فاكر كويس إنك كنت بتكتب بوست عن … عن … عن … .. ثانية واحدة أقرا و أفتكر 🤣… و الله أعلم