حدث منذ قليل

حدث منذ قليل وقفت عربية ملاكى من اللى شغالين تاكسى عادى السواق تقريباً 50 سنة ركبت لقيته مستنى و مش راضى يطلع و باصص على حد معين أنا - خير يا حاج ؟ هو - الواد شكله حيطلع بانجو هو كمان أنا - واد مين يا حاج ؟ هو - اللى هناك داهوان أنا - ماله ؟ هو - قال حيفك 5 جنى عشان يحاسب .. بس شكله حيفلسع أنا ركزت مع الواد .. بتاع 16 سنة بيجرى ورا أكل عيشه .. فك ال5 جنيه و حاسب السواق هو - أصل كله بقى كده دلوقتى أنا - أستغفر الله العظيم هو - بتستغفر الله ليه يا باشا ؟ أنا - عشان ده حرام هو - لا يا باشا .. ده بقى عادى .. أصلهم بيشوفوا إنها حاجة صغيرة أنا - ما هو اللى بيستحل الحرام الصغير .. بيستحل الحرام الكبير هو (بعد سكوت دقيقتين تقريباً ) - داعش ولا إخوان يا باشا ؟ أنا - ليه ؟ هو - أبداً عشان هى دى لغوتهم .. قال الله و قال الرسول .. أنا - لا ده و لا ده و لا باشوف تيليفزيون من الأساس ..أنا بتاع كمبيوترات و حاجات إلكترونية كده .. مابفتيش غير فده هو - بس ده علم يا باشا .. لكن اللى إحنا بنتكلم فيه ده دنيا أنا - ما هو عشان ده علم .. فيه 1+1=2 .. بافتى فيه .. بس السياسة مش كده هو - عشان دى آراء أنا - بالظبط .. و عايز تعيش مستريح .. فكر من دماغك .. ماتسلمش دماغك لا لشيخ .. ولا لتيليفزيون .. بس فكر إنت بدماغك هو - عندك حق يا باشا .. أنا مابسمعش غير لإتنين بس من الشيوخ .. و حتضحك عليا لو قلتلك إن واحد منهم هو “إسلام البحيرى” . أنا “لوهلة ماخدتش بالى من الإسم .. لأنى فعلاً عمرى ما شفته .. و كل معلوماتى عنه من اللى قريته فأخبار متفرقة ” فسألته - ده مين ده يا حاج ؟ هو - ده (شيخ) بس بينقل لنا الإسلام الصح .. عشان اللى وصلنا ده متحرف فيه كتير أنا - إشمعنى ؟ هو - يعنى تعرف مثلاً إن مافيش حاجة إسمها حد الردة ؟ أنا - ؟؟؟؟؟؟؟؟؟؟؟؟؟ هو - طلعلى آيه واحدة من القرآن بتقول إن فى حد ردة أنا - ؟؟؟؟؟؟؟؟؟؟؟؟؟؟؟؟؟؟؟؟ هو - يا باشا الدين ده إختيار .. مش إجبار . و بدأ يدى أمثلة كتير … و كنت أنا كمان وصلت مشوارى .. فعشان أنجز .. أنا - يا حاج هو - نعم أنا - عندك عيال ؟ هو - آه أنا - كام ؟ هو - إتنين أنا - على سبيل المثال .. سميهم هانى و عصام .. هانى إبن حلال و يتحط عالجرح يطيب .. و عصام لعبى و فلاتى .. بس الإتنين صحاب جداً و متعلقين ببعض أوى .. لو عصام بدأ يلعب بديله .. و هانى مش حيتأثر بيه ؟ هو - حيتأثر أنا - حتعمل إنت إيه ؟ هو - حادغدغ دماغ عصام عشان مايبوظش هانى أنا - سلامو عليكم يا حاج هو - و عليكم السلام