همممممم .. طيب .. لو مصمم تعتبر النهاردة محطة سنوية

همممممم .. طيب .. لو مصمم تعتبر النهاردة محطة سنوية تقف عندها و تاخد صورة … خليني أدلو دلو فيه شوية حاجات من اللى علقت معايا من السنة جنبك ..

1- كتاب ( Measure What Matters: OKRs - John Doerr ) .. تقدر تعتبره قراءه إجبارية .. أياً كان مجالك .. فوجهة نظري الكتاب ده أساسي فكيفية إدارة و تحديد الأهداف و إستراتيجيات تحقيقها.

2- أحد أفضل الحاجات اللى باعتبر إن ربنا أكرمني بيها السنة دي .. علي جميع المستويات ( عقلية و حياتية و دينية ) .. هي إني إتعرفت علي كتب دكتور أحمد خيري العمري .. و قرأت له ( شيفرة بلال , ألواح و دسر , كريسماس في مكة ) .. و بإذن الله جاري العمل علي قراءة باقي أعماله .

3- كالمعتاد أتعرفت علي ناس كتير .. أوي .. و مالقيتش حد منهم مستريح (فعلاً ) لأنه بيعمل اللى هو عايزه .. أو لأنه عمل اللى كان بيتمناه و بيحلم بيه ( لنفسه ) ..
ماحدش فيهم كان قادر يقول إنه وصل لسر السعادة و الراحة اللى في الدنيا .. من إشباع أى نوع من غرائز الدنيا .. بل إن معظمهم إكتشف ده بعد ما بطل يشعر بأى متعة من إشباع الغرائز الدنيوية دي .. و كالمعتاد إتعلمت منهم .. إن أقصر طريق للراحة و السعادة و الإستقرار النفسي ( النسبي ) .. هو بكونهم جزء من منظومة أكبر منهم بتحقق أحلام و أهداف ناس تانيين غير نفسهم .. فقط عندها بيبدأوا يعيدوا إكتشاف حياتهم … بهدوء .

4- كل ما تأملت فيها أكتر .. بالاقي إن السباحة و الحياة فيهم تشابهات كتير :

• لو خفت أوي مش حتسبح و مش حتعيش .. لو ماخفتش بما فيه الكفاية .. حتخطئ فتقدير قدراتك .. و تغرق فأول دوامة .
• لو تنشنت و نشفت نفسك .. حتغرق .. و حتتعب أى حد عايز يطلعك … و لو كنت طري أوي و مرن أوي .. حتفضل عايم يمكن .. بس مش حتفوز فأى سباق .
• لو ركزت علي غيرك .. نفسك حيضيق .. و حتنهج .. و حتقف … و لو ركزت علي نفسك صح .. حتكمل أطول و أسرع ..
• كل ما كانت المية أعمق .. كل ما خوفك في الأول حيكون أعلي .. بس المية حتكون أهدي .. و السباحة فيها حتكون محتاجة نفس أطول و قلب أجمد … في حين إن المية اللى عالشط هي اللى بتبان هايجة و موجها عالي .. بس ضحلة .
• مهما كنت سباح لوحدك .. في بحور مش حتعديها غير بسفينة ..
• تحت المية عالم رائع .. مهما كانت عينيك و نظرك قوي .. مش حتشوفه غير بمعدات مجهزة لده .. ( u don’t know what u don’t know ) .
• السباح الماهر أوي .. هو أقل حد بيطرطش و هو بيسبح … و العكس صحيح .. جداً

---

5- الدعاء بتاع برنامج ال12 خطوة اللي بيمشي عليه أى شخص بيحاول يتخلص من إدمان أى شيء .. دعاء عبقري .. “اللهم امنحني السكينة لأتقبل الأشياء التي لا أستطيع تغييرها، والشجاعة لتغيير الأشياء التي أستطيع تغييرها والحكمة لمعرفة الفرق بينهما.” و جزء ثابت من موروث كل سنة بتعدي عليا للي بعدها .. من ساعة ما قرأته لأول مرة فرواية ( ربع جرام ) .. و أنا في الجيش .

6- أسهل ما يمكن أن تنصح بيه حد .. هو أصعب ما يمكن تنفيذه .. و هو أكثر ما يتم تجاهله أيضاً … و هو أقوي آداة لتحقيق أى شيء نفسك تحققه في الدنيا فوجهة نظري .. و للآخرة و الله أعلم … ألا و هو : الصبر .

كفاية كده .. و الله أعلم .