هذا المكان و صاحبه يرحب بالتنظير .. نظّر براحتك

هذا المكان و صاحبه يرحب بالتنظير .. نظّر براحتك .

لسبب ما النهاردة إضطريت إني أقف لمدة 40 دقيقة كاملين عند جامع التوبة فدمنهور فآخر شارع عرابي … من الساعة 1.50 .. لللساعة 2.30 ظهراً . و اللي من دمنهور .. عارف إن دي هي فترة الذروة في المكان ده .. قمة الزحمة و الفوضي و تخبط الناس فبعضها . … علي مدار الأسبوعين اللي فاتوا .. وقفنا الشغل من المكتب ( اللي علي بعد شارع من المكان ده بالظبط - قدام بي تك .. فأرض الميري ) .. و خلينا كل الشغل من البيت تماشياً مع الصح واللي المفروض يتعمل بسبب الكورونا . … و علي مدار الأسبوعين اللي فاتوا .. شفت بوستات كتييييييييير أصحابها بيطلبوا من الناس إنها تقعد فبيتها قدر الإمكان .. و تستحمل لمدة أسبوعين تلاتة بالكتير .. … و شفت بوستات تانية كتيييييييييير جداً برضه … أصحابها بيلقوا اللوم علي أصحاب البوستات السابقة .. و بيتهموهم بال ( تنظير ) .. و إن غالبية الناس اللي مالية الشوارع دي .. ناس ماعندهاش رفاهية القعدة في البيت لمدة أسبوعين .. و إنها لازم تنزل تجري علي أكل عيشها .. و إنهم مش شغالين فستارت أب و بيشربوا سحلب من عند ستار باكس .. و إن بلاش ننظر علي خلق الله !! . … … سؤالي هو : ليه ؟! … ما له التنظير ؟! … ما له إن حد راكب مرسيدس يمشي من جنب ناس غلابة مش لاقيين اللقمة .. و يقول لهم بكل أنزحة من ورا زجاج عربيته المفيمة ( روحوا البيت لمدة أسبوعين ) . … أنا باتكلم بجد دلوقتي .. ليه أصبح في عداء ضخم بالمنظر ده لأى حد بيحاول إنه يوضح وجهة نظر فمصلحة الجميع علي حساب البعض . أو حتي علي حساب الأغلبية .. … ليه حد ينصب نفسه متحدث رسمي بإسم الغلابة .. و يطلب من الناس إنها تسكت و ماتتكلمش .. عشان ال ” غلابة ” ماعندهومش رفاهية إنهم يسمعوا !! … … يا سيدي الفاضل ( الكاره للتنظير ) .. الأستاذ اللي ( بينظر ) فوجهة نظرك .. ممكن جداً يكون فعلاً بسبب الرفاهيات المتاحة بالنسبة له .. شايف شيء فمصلحة الجميع … و إنه يكون بسبب إنه عنده رفاهية المعيشة .. درس من العلوم المتقدمة .. اللي يخليه يصلح إنه ياخد قرار فمصلحة الجميع ” من الغلابة ” . … يا سيدي الفاضل ( الكاره للتنظير ) .. أى حد جعان و مضغوط و متوتر بسبب قلقه علي لقمة عيشه … أغلب الظن ماعندوش رفاهية التفكير فمصلحته الشخصية .. فما بالك بمصلحة مجتمعه في المستقبل . التفكير فحاجات كتير .. أحياناً فعلاً بيتطلب إنك تكون شبعان .. دفيان .. متطمن … مرفه .. … للأسف .. في الحياة الدنيا .. الرفاهية دي مش متاحة للجميع .. للأسف .. في الحياة الدنيا .. حيفضل في ناس بتنتهي غلابة .. و بيطحنهم فقرهم و ظروفهم المجتمعية .. للأسف .. في الحياة الدنيا .. دايماً بيكون في ناس ماعندهومش رفاهية إشباع جسمهم و غرائزه الأساسية ( مأكل , ملبس , مشرب , زواج ) .. … … الدين .. هو أحد أكتر الأشياء اللي عندها القدرة علي معالجة نفوس البشر .. بحيث إنهم حتي لو مش مرفهين جسديا .. ترتقي روحهم و يرتقي عقلهم للتفكير بشكل مستقل عن جسمهم . … و لكن بدون بنية دينية تحتية قوية لل ” غلابة ” اللي حضرتك بتتكلم بصوتهم . و بدون أى خطة واضحة توفر بيها إستقرار و أمان ليهم عند سيادتك . بطلبك إن ( الناس اللي بتنظر ) .. تبطل ( تنظير ) … فسيادتك بتطلب إن أى صوت فيه رسالة بتوضح مصلحة الناس ال ” غلابة فوجهة نظرك ” دول .. يسكت .. .. و تكون النتيجة هلاك الناس الغلابة دول .. و هلاكنا .. و هلاك سيادتك كمان . … … يا سيدي الفاضل .. علي مدار التاريخ الحديث .. معظم الأمم بتاعت العالم التالت .. كانت بتختار أحد أبناءها النابغين .. و تديله رفاهية (المأكل و الملبس و المشرب و الزواج أحياناً كمان ) .. و تسفره بعثات لأوروبا و الدول المتقدمة من الفرنجة .. عشان يرجع ( ينظر ) علي أهله .. و ينصحهم .. … كون إنه إتحول لمريض بال( ماترياليزم ) .. و ركب المرسيدس المفيمة .. و لبس البدلة الأرماني … ده ماينفيش إنه ما زال إتعلم شيء ما كان غير متوفر لأهله الغلابة … إتعلم شيء ما .. من مصلحة أهله .. إنهم يتغاضوا النظر عن إنه أصبح ( محدث نعمة ) … و يسمعوا كلامه و يفقهوه .. و يفكروا فيه . … … … إمتي ؟ إمتي أصبحت النصيحة .. و الأمر بالمعروف .. و النهي عن المنكر .. تهمة ؟! تهمة إسمها : تنظير . … و الله أعلم .