الدفتر

القيد 1 من 20

عيلة ميديتشي 7 دقيقة قراءة

فمكالمة النهاردة في ( ASP ) ناقشت تسلسل أفكار غاية في الأهمية ..

الصورة التي نشرها إسلام مع هذا المنشور
55تفاعل 4تعليق 13مشاركة المنشور الأصلي على فيسبوك

فمكالمة النهاردة في ( ASP ) ناقشت تسلسل أفكار غاية في الأهمية .. و أشكر جداً جداً ( مودّة ) علي تسلسل أسئلتها اللي قادني إني أشرح الأفكار دي .

السؤال الأول كان :

عن " التوهان " :

- في الدراسة و روتين الكلية .. كان الواحد حاسس بالضغط جداً .. و بيستمتع بأي وقت فاضي يتوفر له ..

لكن في الأجازة .. الواحد بيحس بالزهق , و الخنقة , و الإكتئاب , و إنه مش عارف يعمل إيه ..

و بعد الدراسة ما خلصت .. إحساس التوهان ده أصبح مستمر .. بين آلاف الأفكار و الإتجاهات الممكنة .. و فنفس الوقت .. إنعدام الروتين اللي بيؤدي إن الواحد مش قادر يلتزم أو يجبر نفسه علي الإلتزام بأى شيء .

ليه ؟!

و الإجابة كانت :

- لأن مفهوم ال " حرية " هو أحد أكثر المفاهيم المٌختلة في الحياة حالياً .. و اللي تم تغيير معانيه كتير جداً .. لدرجة إن الناس بتقوله .. و مابتفهمش معناه .

و نتيجة كده .. إن أغلب الناس بتقضّي سنين طويلة من حياتها في البحث عن شيء هما مش عارفين معناه الحقيقي .. و ده هو اللي بيؤدي لل " توهان " .

فالسؤال التالي كان :

- طيب .. هو مش المفروض إن الإنسان يسعي للحرية دي عشان يقدر يبدع ؟!

يعني يسعي للحرية من قيود الروتين و الإلتزامات ... و ده اللي أغلب " فلاسفة البيزنس الكاجوال " بيقولوه ...

زي ( تيم فيريس .. صاحب الكتاب المشهور فحت : إشتغل 4 ساعات بس في الأسبوع ) .. و ( garry v - صاحب الكتاب المشهور فحت : Crush it ) .. و غيرهم من أمثالهم .. اللي كل كلامهم عن :

تعالي إتعلم إزاي تعمل ( شغلانة علي جنب - Side hustle ) تديلك ( Passive income - يعني سبوبة تربح و تشتغل و إنت نايم ) .

و الإجابة كانت :

إحنا محتاجين نحكي القصة إذن من الأول .. قصة ال : إبداع ( الغربي ) ... مش الإبداع الحر و الحقيقي

أغلب فكر و فهم العامة حالياً و خلال آخر 100 سنة تقريباً عن الإبداع .. مقترن ب مصطلح إسمه " عصر النهضة " ..

و اللي هو الفترة تقريباً من ( 1300 ميلادياً ل 1600 ميلادياً ) في أوروبا .

و منين ما تسأل حد منهم عن ( يعني إيه الإبداع بالنسبة لك ؟! ) ..

عقله بشكل مباشر بيبدأ يفكر في ( دافنشي , مايكل أنجلو , جاليليو , فرانسيس بيكون , ميكيافيلي , .... و طبعاً دانتي .. و وحيد حامد العصر ده 🤣 .. شيكسبير ) .

و أغلب المناهج الدراسية العالمية العامة - يعني غير المتخصصة ( مش العربية و المحلية فقط ) .. فعلاً بتركز علي الفترة دي في التاريخ .. ك نقطة البداية للعلوم و الفنون كلها تقريباً ..

أنا شخصياً .. فضلت سنين طويلة علي مدار بدايات شبابي .. تركيزي كله علي شخصية زي :

ليوناردو دافنشي .. الفنان المهندس الفيلسوف الموسيقي الجامع ( Generalist ) ..

و أغلب الناس اللي زيي .. ال ( ADHD ) .. و اللي إتعرضوا ل بيئة شجعت حبهم للقراءة و العلوم زيي .. برضو بيطلعوا طول الوقت شايفين إن دافنشي هو بابا و ماما و أنور وجدي 🤣 ..

لأننا بالنسبة لنا مجال واحد لا يكفي .. عينينا دايماً زايغة 🤣🤣 علي أى حاجة تلاعب فضولنا .

لكن .. نتيجة الضوء الضخم جداً اللي متسلط علي أسامي رواد عصر النهضة دول ..

عينيك مش بتشوف أسامي تانية ..

زي ( عائلة ميديتشي ) ..

مين ( عائلة ميديتشي ) دول ؟!

دول هما اللي كانوا بيأكلوا و يشربوا دافنشي 🙂 .

ببساطة .. كل ( مُبدع ) من مبدعين عصر النهضة دول .. ماكنش موظف ..

ماكنش عنده جهاز بصمة لازم يروح الصبح بدري عشان يحط صوباعه فيه ولامؤاخذة ..

ماكنش عليه أقساط و جمعيات لازم يسددها .

و لكنه كان ( عنده داعم - Sponsor🤣🤣🤣 ) .

و آسف علي إستخدام الإيموجي ده 🤣 هنا .. بس كلمة ( داعم ) بقت كلمة قليلة الأدب دلوقتي بسبب التيكتوك 🤣

مين بقي هما ال ( داعمين ) دول ؟!

دول هما ال ( فلوس و السلطة ) .. إما سلطة دينية أو سياسية أو عسكرية .

ال ( ميديتشي ) دول مثلاً .. دول كانوا ( البنك ) .. أكبر و أشهر و أخطر مؤسسة مالية و إقتصادية في أوروبا و العالم الغربي لمدة 300 سنة تقريباً ( من 1400 ل 1700 ) .

و دول اللي كانوا الرُعاة الأساسيين ل ( دافنشي , مايكل أنجلو , و كتير تانيين غيرهم ) .

في مثلاً برضو السٌلطة الدينية ( الفاتيكان ) .. و اللي كانت متغلغلة حتي النخاع في السلطة السياسية ..

و ده سبب المقولة الشهيرة في الثورة الفرنسية بتاعت ( إشنقوا آخر إقطاعي بأمعاء آخر قسيس ) .

ف كان القساوسة الكٌبار ( الباباوات ) .. لهم سلطة و نفوذ ضخم جداً .. و برضو بيرعوا مٌبدعين ..

زي رافاييل .. اللي كان بيرعاه البابا يوليوس التاني .. و غيره كتير .

طيب .. و فين المشكلة هنا ؟! ..

ناس معاها فلوس و سُلطة .. و حبوا يروقوا علي نفسهم و يشبرقوا علي الفنانين و المٌبدعين .. إنت زعلان ليه ؟!

لأنك تبقي ( آسف في اللفظ .. أحمق ) .. لو تفكيرك وقف عند النقطة دي ..

لأنك لازم تسأل :

هو إزاي أصبح في عائلات و أفراد معاهم فلوس و سٌلطة بالكثرة دي و الوفرة دي .. لدرجة إنهم بكل أريحية و بساطة بقوا يصرفوا و يبقششوا من جيبهم و يشتروا ( أسد و حوت و باقي هدايا التيكتوك للإنفلونسرز دول 🤣🤣 ) .

و ليه ؟!!!!!

عشان تجاوب علي الأسئلة دي لازم تفهم ( بالتلخيص المٌخل جداً ) هو قبل عصر النهضة .. أوروبا كانت عاملة إيه ؟!

خلينا نبتدي من نقطة سهلة :

الإمبراطورية الرومانية .. فاكرها دي ؟! .. اللي هي سبارتاكوس .. و جلادياتور و الأفلام الحلوة دي 😅 ..

الإمبراطورية الرومانية دي إنهارت سنة 500 ميلادياً تقريباً ..

و من بعدها .. و لمدة 500 سنة تانيين .. أوروبا كانت في فترة إسمها :

عصور الظلام - Dark ages .

حصل فيها إيه ببساطة ؟! ..

كان اللي يصحي من النوم الصبح .. ياخد سيفه و يعلن الشارع بتاعهم مملكة .. و لو عالضهر كده الدوشة صحّت حد أجمد منه .. كان بياخد منه الحكم 🤣 .

ف علي سنة 800 تقريباً .. و بعد ما إتهرتأت أوروبا خالص .. و الطاعون كان منتشر فيها إنتشار موضة الشعر الكيرلي في الأندر إيدج حالياً ..

الفايكنج ( اللي هما بلطجية السويد و النرويح و كده ) .. راحوا نازلين علي أوروبا بالكامل ..

و علي مدار 200 سنة ( لحد 1000 ميلادياً ) .. بلطجية الفايكنج كانوا مثبتين أوروبا برقبة إزازة ..

لدرجة إن ناس منهم وصلوا عندنا هنا في العالم الإسلامي أيامها 😅 ..

بس الفايكنج دول كانوا بلطجية .. واخدينها بالدراع .. ضرب بس مافيش شتيمة 🤣 .

و بعد 200 سنة من البلطجة دي .. زهقوا 🤣🤣

آه والله .. تقدر تفهمها إنهم ( زهقوا ) ..

بس السبب بالتفصيل هو (إنهم كانوا قوة عضلية فقط .. و مافيش فكر مُنظم ) ..

ف بعد 200 سنة تقريباً .. خلاص .. إستوطنوا في البلاد اللي غزوها بالدراع .. و لكن ماعرفوش يغزوها بالعقل ..

ماكنش عندهم سردية فكرية أو عقيدة مثلاً .. تقدر إنها تنافس السردية المسيحية و العقيدة المسيحية اللي كانت مستوطنة في العقل الأوروبي ..

و حصل بالظبط نفس اللي حصل في العالم الإسلامي مع التتار ..

اللي هو بعد ما هدأت المعارك ..

التتار أصبحوا مسلمين .. و إعتنقوا عقيدة البلاد اللي غزوها ..

الفايكنج برضو .. إعتنقوا المسيحية .. فكراً و عقيدة .. و أصبحوا مواطنين أوروبيين عاديين خالص .

طيب .. و بعدين ؟! ..

أنا حاجرّب المرة دي إني أفصل البوست علي أكتر من جزء ..

أنا كتبت الباقي بالفعل .. و لكن البوستات الطويلة فعلاً بتسبب مشاكل لناس كتير 🤣

ف بالتالي .. خليني أقول لك .. إن في الجزء التالي .. حنشرح :

إيه التسلسل اللي أدّي إن أوروبا تطلع من عصر درمغة الفايكنج .. لعصر البنوك .. و النهضة .. و دافنشي .. و غيرهم .

حنشرح .. إن عائلات من أيام عصر النهضة ( زي ميديتشي ) لسة موجودين حتي الآن .. و موجودين فين .

حنشرح .. إن ( ولاد العم البُعدا اللي مايتسموش ) .. كانوا موجودين بقوة خلال الفترات دي .. و إن رواية زي ( تاجر البندقية ) ل شكسبير مثلاً .. كانت بتشرح وجودهم ب دقة كبيرة .

حنشرح .. تأثير فترة الحروب الصليبية .. و صلاح الدين .. و ريتشارد قلب الأسد .. و فيرجينيا المٌزة 🤣 .

و الله أعلم حاقدر أخلص كل الباقي في بوست واحد ولا لا 😅

** للي عايز يفهم هو إيه موضوع ( ASP ) ده .. حاسيب لينك للبوست اللي شرحت فيه البرنامج في أول تعليق ... و فورم جوجل في تاني تعليق ..

تمّ القيد 1

ردود إسلام في التعليقات

ما كتبه إسلام تحت هذا المنشور، مع التعليق الذي ردّ عليه.

  1. إسلام أسامه الجويلي 1 تفاعل

    البوست اللي بيشرح موضوع ال (ASP ) :

    https://www.facebook.com/photo/?fbid=10162621220194716&set=a.399950004715

  2. إسلام أسامه الجويلي 1 تفاعل

    لينك فورم ال (ASP ) :

    https://forms.gle/94RukBf74PCjkXcQ7

    forms.gle

تعليقات القرّاء

4 تعليقاً على فيسبوك، كما تظهر هناك للعامة.

كل التعليقات المحفوظة (4)
  1. إسلام أسامه الجويلي 1 تفاعل

    البوست اللي بيشرح موضوع ال (ASP ) :

    https://www.facebook.com/photo/?fbid=10162621220194716&set=a.399950004715

  2. إسلام أسامه الجويلي 1 تفاعل

    لينك فورم ال (ASP ) :

    https://forms.gle/94RukBf74PCjkXcQ7

    forms.gle

  3. شروق توفيق

    أنا لسه متذكرة أنه البوست بدأ بسؤال عن التوهان 😭 بس سؤالي هي الناس الطبيعية لتختار أشياء كمواضيع اهتمام ، يعني ال adhd حرفيا اي موضوع جديد يحس فيه توافق مع طبيعة حبه للمعرفة ، أو المواضيع المعينة اللي مهتم بيها ، : يلا نغير نظام حياتنا و نهتم بده كمان . و هل الاختلاف العصبي ممكن يسبب فهم مختلف ، أن نفس المعلومة كل شخص يفهمها بشكل مختلف ؟

  4. شروق توفيق

    و بردو هي الناس بتفهم عادي الأشياء من غير تاريخها و ال adhd بس هو اللي مهتم يعرف كيف بدأ الخلق ؟ قصدي مثلا لو احنا بتذاكر رياضيات ف الدكتور بتشرح المعادلة بتتحل ازاى و الناس فاهمة و بتحل ، ليه محدش بيسأل مثلا ف نص المحاضرة احنا اخترعنا المعادلة دي ليه ؟ و حاجات شبه كده و لا ده تضييع وقت 😆