الدفتر

القيد 16 من 20

قصة مارتين لوثر 9 دقيقة قراءة

سلّمت علي أهلك و أحبابك .. و شتمت مديرك القديم في الشغل .. و طلعت علي المطار ..

الصورة التي نشرها إسلام مع هذا المنشور
701تفاعل 70تعليق 117مشاركة المنشور الأصلي على فيسبوك

سلّمت علي أهلك و أحبابك .. و شتمت مديرك القديم في الشغل .. و طلعت علي المطار .. عدّيت علي السوق الحرة جبت شوكولاتة توبليرون و إتصورت جنبها و حطيتها تاني مكانها 🤣 .. و ركبت أول طيارة طالعة علي ألمانيا .. تبتدي حياة جديدة حيث اليورو .. و الآيفون الرخيص .. و الأديداس الأصلي مش اللي مكتوب عليه ( أبيدوس ) 🤣 .

في السكّة .. الطيارة بتدخل فجوة زمنية .. و تنزلك فألمانيا .. بس سنة 1517 .. بتطلع من المطار .. تلاقي نفسك واقف في طابور .. الناس بترتعش من الساقعة و خايفين .. بتسأل اللي جنبك ( طابور إيه يا عم الفوهرر الله يباركلك ؟! ) .

بيرد عليك ( ده طابور ضرائب اللي بيقروا البوستات الطويلة .. إدفع قبل ما تقرا ) . 🤣

إنت ألماني يا باشا ؟! .. أوروبي عموماً ؟! .. يبقي تدفع ضرائب ..

- عندك 10% ضريبة ال (عٌشر ) .. آه والله هي إسمها كدة ( tithe = tenth يعني ) .. و دي ضريبة لمجرد إنك موجود معانا عالكوكب .. و بتدفع فيها 10% من أى حاجة و كل حاجة عندك .

- دفعت العٌشر ؟! .. حلو .. خد الفاس بتاعك و إطلع علي الأرض بتاعتي اللي هناك دي إقلع ( الزرع يعني 😅 ) .. و إفحت .. و إشتغل ..

بتسأل ليه ؟! .. دي ضريبة الشغل يا فوهرر .. مش إنت موجود معانا عالكوكب ؟! .. يبقي تدفع بإنك تشتغل عندي مجاناً .

- و إنت بتشتغل حد سرق الإيربودز بتاعتك ؟! ..تمام .. انا حاجيب لك حقك بالعدل .. آدي اللي سرقك .. جبته قٌدّامك أهه ..

شفت أنا جامد و عادل إزاي ؟! .. تمام .. روّح بقي ..

لا .. سيب الإيربودز بتاعتك .. أنا خدتها ضريبة خلاص 🤣 .. ضريبة العدل .. مش أنا حكمت بالعدل ؟! .. يبقي لازم آخد ضريبة العدل ..

- آه باقول لك .. و أنا معدّي من جنب بيتك بالليل .. لقيتك مولع نار في الدفّاية و قاعد بتشرب هوت شوكليت جنبها في جو أوروبي رومانسي جميل .. تمام ... هات فلوس ..

ليه ؟!! .. ضريبة الدفا يا باشا !!! ..

مش إنت متدفّي ب نار ؟! .. يبقي إدفع ضريبة يا حاج .

- و آه بالمرّة .. و إنت بتشرب نفس الهوت شوكليت جنب الدفاية في الجو الأوروبي الساقع اللذيذ ده ... سمعتك في فيديو كول مع المٌزّة بتاعتك بترتبوا ميعاد فرحكوا .. و بتقول لها ( إنتي مراتي يا بت ) ... تمام ... هات فلوس ..

ليه ؟!!!!! .. إنت مش حتتجوز ياض إنت ؟! .. يبقي هات ضريبة الجواز ده .

- بس خلّي بالك .. أنا بحبّك و خايف عليك .. عارف جدّك اللي حيستني لحد آخر لحظة قبل فرحك ب يوم .. و بعدين يموت ؟! .. تمام .. حضّر فلوس بقي ..

ليه ؟! .. عشان حيموت طبعاً ... أمّا إنت أمرك عجيب فعلاً ..

الموت له ضريبة .. إنت نسيت ولّا إيه ؟! .

- صدّقني .. أنا عارف إن كل ده مجهود و إرهاق مادي عليك ... أنا مش وحش ولا قاسي ولا ناسي ... أنا قلبي عليك ..

خلاص يا عم .. أنا حاساعدك و أجيب لك شغلانة حلوة ..

بكرة تاخد محصول الحبوب بتاعك .. و تيجي عندي المطحنة بتاعتي .. إدفع للناس حق أٌجرة تشغيل المطحنة بتاعتي .. و إطحن حبوبك .. و بيع يا عم و شبرق علي نفسك .

- بتقول إيه ؟! .. بتقول إنك عايز تستخدم المطحنة بتاعتك اللي في بيتك ؟! .. إنت مجنون ؟؟! ... ده غير قانوني .. و أقاضيك و أحبسك و إنت واقف مكانك هنا ..

إنت مش مسموح لك تستخدم غير مطحنتي أنا بس .. و تدفع ليا مقابل ده .

إنت مش مسموح لك تستخدم غير مخبزي أنا بس .. و تدفع ليا مقابل ده .

إنت مش مسموح لك تستخدم غير ( حاجتي أنا بس ) .. و تدفع ليا مقابل ده .

- المهم .. و إنت رايح في السكّة للمطحنة .. حضّر معاك شوية فلوس ..

ليه ؟!

عشان تدفع ضريبة الطريق ( الكارتة ) يابني ؟! .. إنت مش مذاكر ليه ؟!

- المهم .. عايزك تخلّص كل مشاويرك و قصصك دي في يومين تلاتة .. و تدفع كل اللي فوق ده .. عشان بعد كده حاتطلع تحارب مع باقي شباب ألمانيا ..

تحارب ليه ؟!

لأني أنا اللي باقول كده طبعاً .. أنا اللورد .. و طالما قلت لك تحارب و تموت عشاني .. يبقي تحارب و تموت عشاني طبعاً ..

دي ضريبة الجيش ..

إنت مٌتعب ليه ؟!

اللي فات ده كله .. حقيقي جداً جداً جداً .. و موثّق تاريخياً ..

ده فعلاً هو جزء بسيط من ( نظام الضرائب ) في ألمانيا خصوصاً .. و أوروبا عموماً .. وقت حياة ( مارتين لوثر ) .

ال ( لورد ) .. كان فأى وقت بيلاقي ألف سبب .. عشان يمد إيده جوة بنطلونك .. و ياخد الفلوس اللي في جيبك ..

و هنا لازم تسأل سؤالين مهمين جداً جداً جداً :

الأولاني : إفرض إنت كنت حاطط الفلوس في جيب القميص .. و جيب البنطلون كان فاضي 🙂؟! .

و التاني :

هو ال ( لورد ) ده .. مين اللي خلاه ( لورد ) ولامؤاخذة ؟! ..

كنت شرحت زماااااااااااااااااااااااااااان إن تاريخ أوروبا بإختصار شديد فحت أوي .. هو عبارة عن :

500 سنة إمبراطورية رومانية مٌسيطرة علي كل حاجة ..

بتنهار و بتدخل أوروبا 300 سنة من عصور الظلام ( dark ages ) ..

و بعد كده الفايكنج بينزلوا من أعالي أوروبا .. و يفضلوا يفرتكوا في أوروبا لمدة 300 سنة تانيين تقريباً ..

و بعدين لأن الفايكنج كانوا ( بتوع ضرب بس ) .. ماكنش عندهم مرجعية فكرية أو عقائدية قوية زي المسيحية .. بيزهقوا من الضرب .. و يدوبوا فكرياً و عقائدياً جوة أوروبا .. و بيعتنقوا المسيحية و يستنوا يشوفوا حد جديد يحكمهم 🤣.

في الفترة دي تقريباً بقي : ( 900 ل 1100 ) .. أوروبا أصبحت عبارة قري و إقطاعيات .. كل إقطاعية منهم بيحكمها ( فتوة ) ..

يعني حد قوي .. جمّع حواليه شوية فتوّات أقوية .. و عملوا جيش صغنن علي قدّهم كده ..

و وعدوا الفلاحين الضعفاء اللي حواليهم إن :

إحنا حنحميكم من أى فايكنج إبن ستين في سبعين يفكر ييجي يسرق و ي8تصب و يرن الجرس و يطلع يجري ...

و في المقابل .. إنتوا ( يا فلاحين ) .. حتأكلونا .. و تشربونا .. و تطيعونا و تسمعوا الكلام .. و مش عايزين دوشة كتير بقي عشان نعرف نركز في حمايتكم من الفايكنج الوحشين اللي ماسكين فؤوس و لابسين قرون في دماغهم دول 😅 .

و بعدين يروح جاي ال ( فتوّة ) ده .. مجمّع من أهل الخير تبرعات .. و باني بيها ( كنيسة ) فوسط أرضه .. و يعين فيها ( رجل دين ) شكله طيب و إبن حلال و الناس بتحبه .

و بعدين يروح مظبّط ( رجل الدين ) ده .. بهدايا .. و إنترنت مجاني .. و بلايستيشن و عربيات آخر موديل .. و كل الرفاهيات اللي ممكن تتخيلها سنة 1100 😅 .

يقوم رجل الدين يطلع في كل خٌطبة و يقول :

يا إخوااااااااااااااااااااني ... إن ال ( لورد ) راجل جامد زوحليقة ... و طاعته من طاعة الإله .. و اللي يزعّل اللورد .. يزعّل الإله .. قولوا آآآآآآآآآمين .

و علي مدار 500 سنة .. بتستمر أغلب أوروبا بالمنظر ده :

لورد : يملك و يحكم و يعمل كل اللي علي مزاجه فشوية الفلاحين اللي تحته .

رجل دين : بيقول إن طاعة اللورد واجب ديني .. و إن حكمه اللي بيورّثه لعياله و أحفاده و أحفاد أحفاده .. ده حكم الإله في الأرض .

و فلاحين : طالع أيمانهم .

و الصورة دي بالمناسبة .. هي نفس الصورة المتكررة في البشرية بالكااااامل علي مدار التاريخ فكل مكان في الكرة الأرضية ..

حتي نفس صورة فيلم ( الزوجة التانية ) لو خدت بالك ..

و طبعاً .. كان دايماً بيطلع حد يحاول يقول ( لااااااااااااااا ) ..

جواز عتريس من فؤادة بااااااااااطل .. باااااااااااااااااااطل ..

و بيحاول يضرب مفك في نظام فاسد مسيطر بقاله مئات السنين ..

و التاريخ مليان بصور الناس اللي طلعت تحاول تعمل كده .. و هما متخزوقين 🤣 .. محروقين أحياء 😅 .. مقتولين .. منفيين .. مفضوحين .. مختفين في ظروف غامضة ...

أو ( زي النكتة المشهورة في روسيا حالياً .. إنك لو حتقول كلام وحش عالنظام .. أسكن في دور أرضي .. لأن كل اللي بيقول كلام وحش عالنظام .. بيلاقوه واقع من بلكونة دور عالي أو شبّاك 🤣 ) .

و فعلاً ..

تاريخ أوروبا خلال 1500 سنة .. مليان بقصص كتييييييييييييييير ( أنصحك تعمل سيرش سريع عنهم ) ..

عن ناس حاولت تعارض نظام اللورد .. أو نظام الكنيسة الكاثوليكية .. و تم التنكيل بيهم ليكونوا عبرة لمن تسوّل له نفسه من الفلاحين ..

و ده اللي كان درسه بشكل كافي ( مارتين لوثر ) ..

و كان عارف كويس جداً .. إن قطر ستّة إلا تلت .. مستنّيه .. لو إتكلم عن كل الفساد اللي شافه في روما لما راح يحج هناك ..

لكنه مع ذلك .. كتب 95 مقالة .. بيشرح فيهم بشكل أكاديمي ليه إن سيطرة الكنيسة الكاثوليكية ( مادياً و إقتصادياً ) علي مفاهيم زي ال ( غٌفران , جنة , رحمة , ... ) ده مش بس غلط .. و لكنه حيؤدي لإنهيار الديانة المسيحية بالكامل ..

خصووووووووووووووصاً إن الناس بسبب ( عالم ضرائب ضرائب اللي شرحته فوق ده ) ماكانوش مستحملين .. و كانوا علي آخرهم حرفياً .

المقالات ماكنش مقصود بيها إنها تكون ( منشورات ) تنتشر بشكل فيروسي فوسط الشعب إطلاقاً .. و لكنها كانت لل ( أكاديميين ) .

لكن .. واحد من اللي شغالين في مطبعة .. قرأ الكلام .. و حس إنه موزون .. و عمل شير 🤣 ..

حرفياً بالمناسبة .. هو فعلاً عمل ( شير ) لشوية كلام من المقالات دي .. لأن في الوقت ده كانت الطباعة لسة طالعة جديد ..

و فكل مدينة في أوروبا كانت أشهر سبوبة جديدة هي : إفتح مطبعة ..

و الناس كانت بتدور علي أى حاجة تنطبع يبيعوها و يعملوا منها كونتنت ( عشان يشهروا مطابعهم ) .

و بين يوم و ليلة .. بيفتح مارتين لوثر الفيس بتاعه .. و يلاقي إصحابه كاتبين له علي بوستاته اللي إنتشرت بشكل فيروسي :

" الشهرة عايزة مننا إيه " 🤣 ..

و الأكيد ...

الأكيييييييييييييييييييد جداً ..

إن مارتين لوثر لو كان طلع قبل إختراع الطباعة ..

كان زمانه في الشلاّحات من زماااااااان .. بدون ما كان حد يسمع عنه حاجة ..

أو ... كان زمان نظام اللوردات مشّي عيال بصوت عالي و ميكروفونات في كل قرية يشرحوا .. إزاي إن مارتين لوثر ده كان حد مش كويس .. و بيلعب فمناخيره كتير مثلاً .. و دي كانت حتبقي هي سٌمعته حتي يومنا هذا .

لكن برضو ده ماكانش كافي لسة إن دول كاملة ( زي بريطانيا ) يتغير إتجاهها الديني ..

القصة المشهورة هي :

إتجاه بريطانيا الديني ... بيتغير بالكامل بعد كدة .. بسبب :

إن الملك كان عايز يطلّق .. بس الكنيسة الكاثوليكية مابتسمحش بالطلاق ..

فالملك مش بس بيطلع من ( ملّته ) ..

لا ..

إمبراطورية كاملة بتطلع من ال (ملّة ) .. بسبب واحدة ست 🤣🤣🤣 .

و لكن لهذا تكملة في وقت آخر ..

و الله أعلم .

تمّ القيد 16

ردود إسلام في التعليقات

ما كتبه إسلام تحت هذا المنشور، مع التعليق الذي ردّ عليه.

  1. Yasmin Nimsay 1 تفاعل

    ورغم كده تلاقي الكنيسة البريطانية دلوقتي واحدة من الكنائس القليلة اللي مش بتعترف بالطلاق، وعشان كده كان في أزمة لما تشارلز اتجوز كاميلا وهي مطلقة، ولما هاري اتجوز ميجان، وقبلها لنفس السبب اليزابيث حكمت البلد لأن عمها فضل إنه يتنازل عن الحكم ويتجوز اللي بيحبها عشان guess what مطلقة برضه! ويقال إن ده كان كمان سبب موت ديانا.

    إسلام أسامه الجويلي 2 تفاعل

    Yasmin Nimsay كنت قرأت زماااااااااااااااااان إن التاريخ يٌمكن أن يٌقرأ من وجهات نظر مختلفة .. و كل منهم يشرح جزء مختلف جداً .

    فيما أكتب حالياً .. باكتب من وجهة نظر ( إقتصادية , علمية , سياسية ) ..

    و لكن حقاً أتمني لو فضيت في يوم من الأيام .. و كتبت من وجهة نظر ( العلاقات الإنسانية و الزواج و الطلاق ) .. حينها .. أعتقد إني حاحتاج أعيد كتابة كل المراحل دي

  2. Mohamed Zakaria 5 تفاعل

    مجربتش تكتب بشكل جاد ؟ محتواك قيم جدا بس السخريه بتنتقص منه

    محمد سعيد 4 تفاعل

    Mohamed Zakaria بالعكس انا شايف إن ده اللي بيميز كتابته اساساً القصص دي موجودة ومكتوبة كتير جداً اللي بيخليني اقرا من اسلام هو السخرية تقريباً

    Mohamed Zakaria

    وجهات نظر

    إسلام أسامه الجويلي 9 تفاعل

    Mohamed Zakaria زمااااااااااااااااااااااااااااااااااااااااااااااااااااااااااااااااااااااااااااان .. كانت كتاباتي أكثر بالعربية الفصحي .. و جادة للغاية .. و لكن .. لكل مقام مقال .

    و الفيسبوك ( في وجهة نظري ) .. ليس مقام الكتابات الجادة إطلاقاً ..

    كما أن .. بعض الحكايات .. تفرض الكوميديا فرضاً .. حتي لو حاولنا سردها بكل جدية ممكنة .

    و الله أعلم .

من تعليقات القرّاء

70 تعليقاً على فيسبوك، كما تظهر هناك للعامة.

  1. Karma Stark 18 تفاعل

    ويحك ولم التشويق إذااا طب هحرقهالك الملك يبقا هنرى الثامن النسونجى *بصوت هادريس*

    امير سيوة

    Karma Stark هنرى الخامس

    Karma Stark

    امير سيوة أعتقد هنرى الثامن جوز كاثرين كل ما يحب يخلص من واحده يطلع بعذر .. خلص على نسوانه كلهم واللى مبتوافقش تتراجع وتبعد كان بيطيرها بتلفيق جريمة ز.نا واعد.امها

  2. Ahmed Elhaweet 4 تفاعل

    طيب ما أنا أعرف حاجة زي كدة ، بس مش في اوروبا، ومش في العصر اللي انت تكلمت عنه، ولكن في ٢٠٢٥ ، لو فالح وشاطر قوللي فين.🤪🤪🤪🤪

  3. Safaa Hosny 3 تفاعل

    احنا بقي لسة عايشين في الحقبة دي الزمن وقف بينا بنتمني الزمن يرجع بينا لايام الملك الفاسد عايزين نعيش الفساد الجميل

    اسكندارينو اصيليانو

    Safaa Hosny عشان للاسف الظلمة اجبروا اكثرنا نختار بين الوحش يا الاوحش وكأن ملناش حق في الحلو ابدا حسبنا الله ونعم الوكيل

  4. Mohamed Fouad 2 تفاعل

    طيب دي ألمانيا زمان في دول تانية عارفينها لسة بتعمل زي اللورد كدة و تمد ايديها جوة البنطلون تاخد اي حاجة

  5. Saad Negm EL Zanaty 2 تفاعل

    أقسم بالله انا عمرى 63 عام و قرأت قصص و كتب و روايات و شعر و مقالات بالملايين ابوخ و اتفه و ارذل من هذا المقالما فرأت اتقى الله فى الناس فى تقل دمك

    أحمد سلامة

    Saad Negm EL Zanaty أحسنت، ناهيك عن كلامه كذب

كل التعليقات المحفوظة (70)
  1. Adham Fadl 1 تفاعل

    انا حبيت المقالات دى اوى مستنى الى جاى يا قائد

  2. Faten Melhem 1 تفاعل

    فناان فناان🔥

  3. Yasmin Nimsay 1 تفاعل

    ورغم كده تلاقي الكنيسة البريطانية دلوقتي واحدة من الكنائس القليلة اللي مش بتعترف بالطلاق، وعشان كده كان في أزمة لما تشارلز اتجوز كاميلا وهي مطلقة، ولما هاري اتجوز ميجان، وقبلها لنفس السبب اليزابيث حكمت البلد لأن عمها فضل إنه يتنازل عن الحكم ويتجوز اللي بيحبها عشان guess what مطلقة برضه! ويقال إن ده كان كمان سبب موت ديانا.

    إسلام أسامه الجويلي 2 تفاعل

    Yasmin Nimsay كنت قرأت زماااااااااااااااااان إن التاريخ يٌمكن أن يٌقرأ من وجهات نظر مختلفة .. و كل منهم يشرح جزء مختلف جداً .

    فيما أكتب حالياً .. باكتب من وجهة نظر ( إقتصادية , علمية , سياسية ) ..

    و لكن حقاً أتمني لو فضيت في يوم من الأيام .. و كتبت من وجهة نظر ( العلاقات الإنسانية و الزواج و الطلاق ) .. حينها .. أعتقد إني حاحتاج أعيد كتابة كل المراحل دي

  4. محمد صلاح الدين 9 تفاعل

    يعني الحريم طلعوا دين ام بريطانيا برضه

  5. Mohamed Zakaria 5 تفاعل

    مجربتش تكتب بشكل جاد ؟ محتواك قيم جدا بس السخريه بتنتقص منه

    محمد سعيد 4 تفاعل

    Mohamed Zakaria بالعكس انا شايف إن ده اللي بيميز كتابته اساساً القصص دي موجودة ومكتوبة كتير جداً اللي بيخليني اقرا من اسلام هو السخرية تقريباً

    Mohamed Zakaria

    وجهات نظر

    إسلام أسامه الجويلي 9 تفاعل

    Mohamed Zakaria زمااااااااااااااااااااااااااااااااااااااااااااااااااااااااااااااااااااااااااااان .. كانت كتاباتي أكثر بالعربية الفصحي .. و جادة للغاية .. و لكن .. لكل مقام مقال .

    و الفيسبوك ( في وجهة نظري ) .. ليس مقام الكتابات الجادة إطلاقاً ..

    كما أن .. بعض الحكايات .. تفرض الكوميديا فرضاً .. حتي لو حاولنا سردها بكل جدية ممكنة .

    و الله أعلم .

  6. Alaa Humaida 2 تفاعل

    🤦‍♀️😍

  7. Zeinab Hamdy Moustafa 1 تفاعل

    بسبب آن بولين اللي بعد كده رماها وقتلها واتجوز غيرها برضو

  8. Sabrah Abbass 1 تفاعل

    بوست رائع

  9. Designermoh Arts

    عثثثثثل

  10. Karim Saleh

    اول مره احس ان المقال مخاصر و خلص بسرعه كده

  11. Wael El Menshawy

    عاوز اقولك ان نظام الضرائب الموجود حاليا في اوروبا متغيرش كتير عن زمان !! بتدفع ضرايب علي البنزين والاكل واي ورق للزواج والطلاق والحياة والمو٪؜ت بتدفع عليه فلوس برضه

    أحمد سلامة 1 تفاعل

    Wael El Menshawy حضرتك عايش فى أوروبا؟

    Wael El Menshawy

    أحمد سلامة من ٢٠ سنة

    أحمد سلامة

    Wael El Menshawy ممكن تقولى فين الضرائب اللى على الأكل والبنزين وخلافه، العادى انه بيحط لك السعر وخلاص

    Wael El Menshawy

    أحمد سلامة لو حضرتك بصيت علي كل حاجة بتشتريها في السوبر ماركت هتلاقي ضريبة علي اللبن - البامبرز علي العيش البنزين حسب الدولة اللي أنتي عايش فيها ضريبة بتتراوح من ١٨-٢٢ ٪؜ يبان لك انه بيحطك لك السعر النهائي بس السعر دا شامل ضرايب جديدة . دا حتي ضرايب علي استخدام التليفزيون اللي في بيتك أنت متخيل

    أحمد سلامة

    Wael El Menshawy دى ضريبة المبيعات ودى موجودة فى كل دول العالم عادى جداً، أنا فى ألمانيا من ٣٦ سنة، لكن انتم حسستونى انى لسة ماجتش هنا خالص

    Wael El Menshawy

    أحمد سلامة في الكام سنة دوول حضرتك شفت كان ضريبة جديدة تم إضافتهم عندك مكنتش موجودة قبل كدا

    أحمد سلامة 1 تفاعل

    Wael El Menshawy حضرتك شكلك مانزلتش مصر من زمان قوى

    Wael El Menshawy 1 تفاعل

    أحمد سلامة فعلا بقالي فترة كبيرة

    أحمد سلامة 2 تفاعل

    Wael El Menshawy طيب انزل وحتتفاجئ، من اول شهادة الميلاد وحتى شهادة الوفاة مروراً برسوم الزواج ومايتطلبه من شهادات صحية وخلافة، ده بغض النظر عن الاسعار العادية

  12. خوله عمر الامين

    لنفس السبب سبحان الله إيران تشيعت لان الامبراطور طلق مراته على المذهب السني ومحدش رجعها غير مفتي شيعي 😴

  13. Karma Stark 18 تفاعل

    ويحك ولم التشويق إذااا طب هحرقهالك الملك يبقا هنرى الثامن النسونجى *بصوت هادريس*

    امير سيوة

    Karma Stark هنرى الخامس

    Karma Stark

    امير سيوة أعتقد هنرى الثامن جوز كاثرين كل ما يحب يخلص من واحده يطلع بعذر .. خلص على نسوانه كلهم واللى مبتوافقش تتراجع وتبعد كان بيطيرها بتلفيق جريمة ز.نا واعد.امها

  14. Eman Negm

    تحفه

  15. Mona ElTanahy

    تم

  16. Abdelhalim Behairy

    جميل

  17. مس ايمان القديم

    تم رائع جدا

  18. Gamal Abdallah

    ممتاز

  19. El Excellency

    كدة نخش ع الملكة آن

  20. أمير محمود 1 تفاعل

    اسلوبك منمق و مزج الوقائع التاريخية مع الخيال في قالب ساخر و إطار الفانتازيا ...رائع ...و مميز

  21. ابو احمد للطب البديل

    تم

  22. أحمد سلامة 2 تفاعل

    سؤال بسيط هل انت رحت ألمانيا وعشت فيها؟

  23. Mohamed Fouad 2 تفاعل

    طيب دي ألمانيا زمان في دول تانية عارفينها لسة بتعمل زي اللورد كدة و تمد ايديها جوة البنطلون تاخد اي حاجة

  24. Safaa Hosny 3 تفاعل

    احنا بقي لسة عايشين في الحقبة دي الزمن وقف بينا بنتمني الزمن يرجع بينا لايام الملك الفاسد عايزين نعيش الفساد الجميل

    اسكندارينو اصيليانو

    Safaa Hosny عشان للاسف الظلمة اجبروا اكثرنا نختار بين الوحش يا الاوحش وكأن ملناش حق في الحلو ابدا حسبنا الله ونعم الوكيل

  25. Saad Negm EL Zanaty 2 تفاعل

    أقسم بالله انا عمرى 63 عام و قرأت قصص و كتب و روايات و شعر و مقالات بالملايين ابوخ و اتفه و ارذل من هذا المقالما فرأت اتقى الله فى الناس فى تقل دمك

    أحمد سلامة

    Saad Negm EL Zanaty أحسنت، ناهيك عن كلامه كذب

  26. Muhammad Kamal Eldemerdash 1 تفاعل

    هو انتوا بتطيقوا تكتبوا كل ده ازاي أنا مش قادر أقرأ كل المكتوب ده !!!!

  27. Kesmat Om Kesmat Mohamed

    سؤال مالهوش دعوه بفحوي المقال ..هو هتلر كان في ١٥١٧🙄🙄🤔

  28. Ashraf Hamada

    حرب طروادة اللى الناس بتحب القصه بتاعتها محد لاحظ أن مدينه كامله دمرت وأطفال ماتوا ورجال قتلوا وارامل كترت وخرقت المدينه كله بسبب عيل متن. وواحدة لا مواخذة شرشر

  29. Ahmed Elhaweet 4 تفاعل

    طيب ما أنا أعرف حاجة زي كدة ، بس مش في اوروبا، ومش في العصر اللي انت تكلمت عنه، ولكن في ٢٠٢٥ ، لو فالح وشاطر قوللي فين.🤪🤪🤪🤪

  30. Ahmed Ramadan

    البوست طويل جداً

  31. مجدي ابو نقايه 1 تفاعل

    Ahmed Elhaweet بس ده مش في أوروبا ده فى ماسرياسرجلال ال

  32. Soso Salem

    امتعنا الحوار اكمل

  33. منال فتوح

    أمال عما بيحاربوا الإسلام ليه ؟؟

  34. Ce Soir

    ياعم الناس بطلت تشترى جرايد جاى تكتب لى جريده ومتخيل انى هتابعك واقراها ؟؟!!😱

  35. Nady Kamel

    ممكن تعمل المقال ده فيديو على ال YouTube

  36. اسكندارينو اصيليانو

    لخصت تاريخ اوروبا بطريقة فكاهية فعلا شر البلية ما يضحك الكلام بالشكل ده بيوصل اسرع ما شاء الله عليك

  37. سمير الخولى 1 تفاعل

    السؤال متى سينتهي. عصر اللوردات فى بلادنا

  38. Amr Menem

    المماليك والعثمانيين كان عندهم نظام اصعب من كده ضرايب علي الاقرغ...زمبؤلك كده علي الاقرع لانه اقرع وضريبة الملح... بس كان بيعملوا حاجة اصعب من كده.. ان كل امير مملوكي يحكم منطقة شهرين يجبي ضرايبها لنفسه..وبعدين يدخل معركة ضد واحد امير تاني ويهرب...يقوم التاني محصل الضراييب من الاول من نفس الفلاحين ياراجل...كان فيه ضريبة اسمها الاتاوة وكان فيه حق استضافة للجنود بتاع الامير وحق العلف بتاع بهايهم نابليون احصي 16 ضريبة رسمية وعشرين ضريبة غير رسمية .. بس ماكانش عندنا. مارتن باشا لوثر

  39. Ehab Mokhtar

    ممل جداً

  40. Enayat Ahmad

    حلو اوي تسلم ايدك كمل

  41. أحمد سلامة

    كده واضح جداً انك بتهبد ولا إنت رحت ألمانيا ولا عشت فيها، انما هو هبد لزيادة عدد المتابعين

  42. Mamdouh Rawi

    لن يفهم المنشور الا من لهم دراية بتاريخ اوروبا والمنشور يجيب عن اسئلة كثيرة في الذهن الباحث عن تفسير تطور أوروبا لذلك احتجت لقراءةالمنشور مرتين. وبما اني كاتب خمسين مقال عن نفس الفترة او حواليها لو عندك وقت تنتقد ما كتبته واشرف بذلك.

  43. عادل حسين 1 تفاعل

    جميل جدا وممتعة ومن الاسقاطات الجامدة واللورد فى الآخر هايجرالة اللى جرى لغيرة إلى الزبلة

  44. Mostafa M Ahmed

    بص حلو واسلوبك حلو بس وحيات الغوالي عندك خلي البوست كلمتين واقلب احنا مفرهدين خلقه والله 😂 تحياتي

  45. Abo Bebo

    ونسيت الفترات اللى عندنا من مماليك واتراك و.....و....

  46. مها سعيد

    لو لم يشتهر مارتن لوثر ولو ظل نظام الإقطاع قائم لما كان عندك فرصة لكتابة هذا الكلام ونشره، أنت تنشر لأن مارتن نشر. ونظام الإقطاع لم يكن الأوروبيين وحدهم، بل كان النظام السائد في جميع أنحاء العالم، والدول العربية تحت الحكم العثماني عانت منه بدرجات، لكن الأوروبيين كان أول من عدد مثالبه وأول من تخلص منه وأول من وجد بديل وأول من سعى لنشر بديل مصلح في باقي العالم، وقد حا ربهم العالم، كما يحا ربهم الآن عن الحديث عن الديمقراطية! ما أشبه اللية بالبارحة وما قبل البارحة وقبل ما قبل البارحة. لذلك ذكر {أن لعنة الله على الظالمين} الأعراف ٤٤ عسى الله أن يكف بأس الذين ظلموا {والله أشد بأسا وأشد تنكيلا} النساء ٨٤، غصبن عن المجرمين {وَيُحِقُّ اللَّهُ الْحَقَّ بِكَلِمَاتِهِ وَلَوْ كَرِهَ الْمُجْرِمُونَ} [يونس : 82] وليقضي الله على الظالمين الأحياء والأموات أحياء واموات باصنافهم وانواعهم والتابعين لهم أمرا كان مفعولا.

    Loay M Elnile

    مها سعيد الاقطاع من الاسلام هو حلال وليس حرام قال رسول الله من احيا ارضا موات فهى له

    مها سعيد

    Loay M Elnile لو أن الحديث صحيح، وليس مفترى على رسول الله للاستيلاء على ممتلكات الآخرين، {أن لعنة الله على الظالمين} فإن من يحيي الأرض هو من يزرعها، الاقطاعي طبقا لتعرفه لص قاتل، لا يزرع. لذلك التذكير {أن لعنة الله على الظالمين} الأعراف ٤٤ عسى الله أن يكف بأس الذين ظلموا {والله أشد بأسا وأشد تنكيلا} النساء ٨٤، غصبن عن المجرمين {وَيُحِقُّ اللَّهُ الْحَقَّ بِكَلِمَاتِهِ وَلَوْ كَرِهَ الْمُجْرِمُونَ} [يونس : 82] وليقضي الله على الظالمين الأحياء والأموات أحياء واموات باصنافهم وانواعهم والتابعين لهم أمرا كان مفعولا.

    Loay M Elnile

    مها سعيد لا حضرتك اختلط عليكي الامر الاقطاع ليس فيه اعتداء على املاك الاخرين الاقطاع مثلا فيه قطعة ارض صحراء في مكان لا يملكها احد وبدأ رجل في اصلاحها وزرعها فيجوز لولى الامر ان يقطعه هذه الارض هذا معني ارض موات وهذا معنى الاقطاع

    مها سعيد

    Loay M Elnile تعريف الإقطاع معروف طبقا للمفهوم التاريخي والإصلاحي في العلوم السياسية، وهم مجموعة من اللصوص يغيرون على الامنين {أن لعنة الله على الظالمين} ويسلبون حقوقهم ويدفعونهم للعمل بالسخرة لكي يجني السفلة {أن لعنة الله على الظالمين} العائد. ما تصف يسمى وضع يد على أملاك الدولة وهو الآن مجرم بالقانون، يوجد إجراءات قانونية يجب إتباعها لإصلاح الأرض غير المزروعة، وفي حدود علمي، فإن الحكومة تنظم هذه العملية، وتعرض بين حين وآخر مساحات من الأراضي معدة للاستصلاح الزراعي أو العمراني للبيع أو الانتفاع. المزيد من التذكير {أن لعنة الله على الظالمين} الأعراف ٤٤ عسى الله أن يكف بأس الذين ظلموا {والله أشد بأسا وأشد تنكيلا} النساء ٨٤، غصبن عن المجرمين {وَيُحِقُّ اللَّهُ الْحَقَّ بِكَلِمَاتِهِ وَلَوْ كَرِهَ الْمُجْرِمُونَ} [يونس : 82] وليقضي الله على الظالمين الأحياء والأموات أحياء واموات باصنافهم وانواعهم والتابعين لهم أمرا كان مفعولا.

  47. Amira Salahdin

    ما هي قصة الزوجة الثانية والعمدة اللي عاوز يتجوز فاطنة ....لكنكم تحبون تاريخ أوربا غاويين مستورد

  48. Wafaa Sarhan

    فهماك ياليم مكنتش عايزه اضحك من الحزن لاكن البوست جامد زوحليقه

  49. شوكت شكرى

    لذالك انتصر امكن العثمانيين لأنهم اتو بسياسا وضع مختلف اغلبها مائل العداله