الدفتر

القيد 6 من 20

عيلة ميديتشي 8 دقيقة قراءة

- كابوزيا ..

الصورة التي نشرها إسلام مع هذا المنشور
82تفاعل 21تعليق 16مشاركة المنشور الأصلي على فيسبوك

= إسرد ..

- أنا عايز إعترافات في عُرف معرفتنا , لو عرفت تعرفهم يعترفوا بالمعروف حاعترفلك بالعرفان , ماعرفتش تعرف عرفني .

= أنا مش حاعرفك إنت أنا حاعرفهم هما .

= القصة و محتواها و الحكاية منا اللي حكاها ..

الإتحاد دريان إن دايرتكم في الدرا دايرة منشطات , فلو الحدوتة دي مظبوطة و الدايرة ملطوطة بالمستويات اللي موجودة يبقي إحنا في حتة ملتوتة .. و توتة توتة خلصت الحدوتة 🤣🤣 ..

مشهد مدته 20 ثانية تقريباً .. شٌفته إمبارح في بوست .. شد إنتباهي جداً .

أول مرة أشوف الممثل ده ( عبد الرحمن حسن ) .. و اللي بيقوم ب دور ( سعيد كابوزيا 🤣) .. و أعتقد فعلاً إنه عنده مستقبل مشابه جداً جداً لمستقبل اللمبي بعد فيلم ( الناظر صلاح الدين ) ..

أنا ماعرفش مدي الحرية الإبداعية اللي خدها الممثل في تكوين الشخصية دي .. و لكن كل من إشترك في تكوين الشخصية دي .. و علي رأسهم المؤلف ( مهاب طارق ) طبعاً .. فوجهة نظري .. أبدعوا .. بجدارة .

و السؤال هو : ليه ؟!

ليه طريقة الحوار دي جذابة و مؤثرة بالمنظر ده ؟! ..

ليه لما ( سعيد كابوزيا ) بعد كده .. و في ( مونولوج سرد ) تسلسل أحداث مُعين .. لما بدأ ب جملة :

وصلت للولا طراباشأ مسئول الزخانئ

🤣🤣🤣 ..

أنا وقفّت المسلسل و فضلت أضحك تقريباً لمدة 5 دقائق ..

إيه اللي ضحّكني ؟!

و ليه في حاجات بتضحّك غيري و أنا مابضحكش عليها ؟! .. و العكس ؟! ..

و ليه مثلاً لحد يومنا هذا .. مابطيقش صوت أم كلثوم خصوصاً ؟!! .. أو أغلب الموسيقي الشرقية عموماً ؟!

أو زمااااااااان مثلاً .. أيام ما كان فاروق حسني هو وزير الثقافة المصري .. و نزلت كمية تريقة و سٌخرية علي لوح كان راسمها و إتعرضت في معارض .. و طلع بعد كده ناس كتير سألوا حاجات زي :

تفهموا إيه إنتوا في السريالية ؟! .. أو النوع ده من الرسم ؟!

ده كان أحد الأسباب زمان في 2009 و 2010 .. إني نزّلت و إتفرجت علي عدد كبير فعلاً من كورسات عن تاريخ الفنون .. و ليه لوحات بيكاسو مثلاً بيتم تقديرها أوي كده ؟! ..

و هل فعلاً لوحات ( فاروق حسني ) السريالية كان فيها فن عالي و ذوق لم يرتقي له علمي و معلوماتي حينها ؟؟!

الإبداع عموماً ... إيه هو ؟!

لوحة زي الموناليزا مثلاً ..

حالياً .. هي بتٌعتبر أشهر إنتاج فني في العالم لمدة آخر 50 سنة تقريباً ..

ليه ؟!

الموناليزا .. كانت تقريباً من آخر الأعمال اللي إشتغل عليها ( ليوناردو دافنشي ) ..

هل هي أجمل حاجة عملها دافنشي ؟! أكثر أعماله قيمة ؟! .. أهمهم ؟! ..

طب حتي بالنسبة له هو شخصياً .. هو كان يتوقع إن أشهر حاجة الناس حتعرفه بيها بعد كده في المستقبل .. هو الموناليزا ؟!

يعني مثلاً أنا شخصياً .. بعد 500 سنة مثلاً .. يا تري الناس حتمسك رسمة من رسومات المانجا اللي رسمتها سنة 2010 في مشروع إتنسي و مات بقاله 15 سنة .. و تقول يااااااااااااه .. شوف العبقرية يا جدع ؟! 🤣🤣

خليني أكمل الحكاية إذن من بداية ليوناردو دافنشي ..

ده البوست الخامس في السلسلة بتاعت ( عصر النهضة ) ..

و في البوست اللي فات أنا عارف إني عملت ( flash forward ) للحظة محاكمة جاليليو .. و ماشرحتش تهمته ولا إيه اللي حيحصل ..

بس الصبر حلو .. مسيرنا نشرح مرحلة جاليليو بكل التفصيل إن شاء الله ..

إحنا ماشيين بالترتيب .. و في حكاوي كتير .. أوي .. في الفترة دي من التاريخ .

فالأول .. و عشان تبقي عارف اللي بنتكلم عنه .. ( ليوناردو ) ده إبن حرام 😅

أنا آسف في اللفظ يعني ..

و لكن هو فعلاً أبوه و أمه ماكانوش متجوزين شرعاً ..

و بالتالي .. هو مش نسبه مش لأبوه ..

أٌمال إيه ( دافنشي ) ده ؟!

ده نسبة للبلد اللي هو إتولد فيها .. إسمها ( فينشي - Vinci ) .. و ( دا ) دي بالإيطالي .. زي ( ال ) بالعربي عندنا ..

يعني هو إسمه ( ليوناردو ال فنشي ) ..

طيب .. ليه إخترت إني أركز عليه هو بالذات في الجزء ده من الحكاية ؟!

أولاً : لأنه هو أشهر أسامي اللي صرف عليهم ( لورينزو دي ميديتشي ) ..

و ثانياً : لأنه من أكتر الناس اللي بيعبروا عن الفكرة اللي باتكلم عنها .. و هي : البحث عن الإبداع و معناه .

زي ما شرحت في بوست الجزء الرابع ..

إن عيلة ميديتشي دلوقتي هما اللي بيحكموا ( فلورنس ) بالفعل لكن مش بالإسم ..

عندهم فلوس و سلطة .. لكن ماعندهمش ( أصل و تاريخ ) ..

و سنة 1469 .. لورينزو دي ميديتشي .. بيحتفل ب عيد ميلاده ال 20 .. و بيمسك هو و أخوه ( جوليانو ) البنك بتاع العيلة .. بعد ما أبوهم ( بييرو دي ميديتشي ) بيموت .

لورينزو ده .. كان الإستثمار الأهم ل أبوه ( بييرو ) .. و جده ( كوسيمو 🤣 ) ..

من صُغره .. جابوا له شوية أساتذة شكّلوا دماغه و تفكيره إنها ماتبقاش بتاعت ( بيزنس ) بس .. أو حتي سياسة و نفوذ ..

و لكن ..

إعلام و صحافة 🤣😅 .

أسامي أساتذته مثلاً ناس زي ( مارسيليو فيشينو , أنجيلو بوليزيانو , كريستوفورو لاندينو , جينتايل بيتشي , بيكو ديلا ميراندولا , ... )

الناس دي كلهم فلاسفة و شٌعراء و أدباء و بتوع تاريخ و دين ..

بعييييييد جداً عن العسكرية و الإقتصاد و السياسة ..

فبالتالي .. لورينزو أول ما مسك الحكم .. كان فاهم كويس جداً جداً ..

إن الفلوس زي الخيارة 🤣 .. يوم فإيدك .. و يوم .. إحم .. فإيد غيرك ..

و إن الحكم و السٌلطة و النفوذ و الكرسي مش بيدوم ل حد ..

لكن ..

التاريخ و الأصل .. دائماً و أبداً .. للي بيكتبهم ..

و اللي بيكتب قصة أحلي ..

دائماً و أبداً .. هو اللي بيكسب .. و يفضل .. و يعيش .. و بيرجع ياخد الفلوس و السٌلطة تاني بكل سهولة ..

لأن الناس .. بتحب القصة الحلوة .. و بتصدقها .. حتي لو كدب .

و اللي الناس بتفتكره بعد سنين و بعد كده .. مش اللي حصل و الحق ..

و لكن القصة الحلوة اللي إتعملت مسلسل بموسيقي تصويرية لطيفة و إتعرض ف رمضان 🤣

ف بالتالي .. لورينزو أول ما مسك الحكم ..

راح عامل مسابقات بقي .. حاجات زي :

أحسن حد يرسم رسمة معينة .. له جايزة ..

أحسن حد ينحت تمثال معين .. له جايزة ..

أحسن حد يكتب .. يألف .. يغني .. يعزف .. له جايزة ..

يعني ( Florence Got talent , و Florence Idol و مسابقات المخترع الصغير و المواهب .. فبرنامج بنحبك يا فلورنس 🤣🤣 , ... )

أصبحت هي حديث الساعة و كل ساعة في فلورنس .

و زي أى حاجة في الحياة .. طالما في فلوس .. يبقي هي دي اللي الناس حتجري عليها و تعيش عشانها ..

ف فلورنس إتملت مدارس و أكاديميات كتير .. هدفها إنها تطلّع إبنك أحسن لاعب كرة قدم 🤣 .. أقصد أحسن رسّام .. أحسن نحّات .. أحسن حاجة تضمن له مستقبله ..

و السوشيال ميديا في فلورنس .. بقت مليانة ناس بتتكلم عن إزاي تحترف الرسم في 3 أيام .. إزاي تتعلم النحت في المنزل ل ربّات البيوت و تجيب دخل إضافي 🤣 .

حتي خٌطبة الجٌمعة في فلورنس .. أقصد قٌدّاس الأحد 🤣.. كانت عن ( إن الله جميل يحب الجمال ) .. و إزاي إن الجمال و الإبداع صفات روح الإنسان الأساسية .. و ربنا يخلي لنا الناس الطيبين اللي مهتمين ب مستقبل الإبداع زي ( لورينزو دي ميديتشي ) .. قولوا آآآآآآآمين ..

و في العالم ده ..

بيكتشف أبو الواد ليوناردو إن إبنه اللي جه غلطة ده .. بيعرف يرسم و عنده موهبة 🤣 ..

ف بياخد أول ميكروباص من بلدهم ( فينشي ) .. و يطلع عالبندر ( فلورنس ) .. و يدور علي مدرسة داخلي تاخد الواد و تربيه و تعلمه .. و أهو برضو يوفر فلوس أكله و باقة النت بتاعته ..

و من يومها .. بيبقي إسم الواد ده في المدرسة و المنطقة و البلد ..

الواد ليوناردو الفنشي ..

و فنفس الوقت و الزمن ده .. و فنفس البلد .. بيطلع أكتر من موهبة تانية .. عيال لعّيبة برضو .. كلهم بعد كده بيكونوا أسامي إحترفوا و وصلوا للعالمية و أساميهم إتكتبت علي تيشيرتات ..

زي ..

مايكل أنجلو ..

بوتيتشيللي ..

دوناتيللو ..

رافاييلو ..

ميكيافيلي ..

متخيل العبقرية ؟! ..

لا بلاش .. عايزك تتخيل حاجة تانية ..

عايزك تتخيل لو لورينزو دي ميديتشي كان بتاع كورة .. و مٌشجع وفي جداً مثلاً للإتحاد ..

و من صٌغره مثلاً كان بيتعلم تحت إيد الزعامة عادل شكل 🤣🤣 ..

متخيل ساعتها كان زماننا قاعدين بنشير فيديوهات ل دافنشي و هو بيغزّل اللعيبة زي رونالدينيو مثلاً ..

و بدل الموناليزا .. كان زماننا بنشوف أهدافه في كاس العالم 🤣 .

يعني مثلاً في البوست القادم .. لك أن تتخيل إن ( ليوناردو دافنشي ) أحد أشهر عباقرة التاريخ في الفنون و الهندسة .. و ( ميكيافيللي ) أحد أشهر عباقرة التاريخ في السياسة و الإجتماع و علم النفس .

الإتنين بيعملوا مع بعض دويتو .. و بيدخلوا في مشروع واحد مع بعض ..

آه والله .. متخيل ؟! ..

تفاصيل المرحلة دي ..

و شباب دافنشي و إنتاجه و حياته ..

و باقي الحكاية ..

في البوستات القادمة إن شاء الله ..

و الله أعلم .

تمّ القيد 6

ردود إسلام في التعليقات

ما كتبه إسلام تحت هذا المنشور، مع التعليق الذي ردّ عليه.

  1. Emad Elmarghany 1 تفاعل

    عبدالرحمن في كل دور بيعرف يعمل ليه لزمه دور طبازة في الكبير قوي ده ترند مش هينتهي

    إسلام أسامه الجويلي 1 تفاعل

    Emad Elmarghany أنا شفت حلقات بسيطة من الكبير قوي ..

    و لكن فكرة مثيرة للخيال لو أحمد مكي ( بمعلوماتي إنه بيحب الراب العربي ) إشترك مع عبد الرحمن بشخصيته دي .. في عمل مليان بالقدرة اللغوية الرائعة دي .

  2. Ibrahim Yasser 1 تفاعل

    البوست قصير اوي مستمتع جدا بطريقتك ومتحمس اعرف اكثر عن الحقبه دي من التاريخ

    إسلام أسامه الجويلي 1 تفاعل

    Ibrahim Yasser والله أثلجت صدري بموضوع ( البوست قصير أوي ) ده .

    هو قصير جداً بالنسبة ليا فعلاً ..

    و شخصياً .. أتمني لو ينفع أكتب كل قصة عصر النهضة في مقال طويييييييييل واحد ..

    و لكن .. للأسف في الوقت الحالي .. القدرة العامة علي إستهلاك المحتوي المكتوب .. مختلة جداً ..

    في وقت لاحق إن شاء الله ... ممكن أجمع السلسلة كلها ك كٌتيب صغنن أعتقد

    Ibrahim Yasser 1 تفاعل

    Eslam Osama El-Gwaily ممكن الناس تفتكر اني بسخر بس انا بتكلم بجد البوست فعلا من كثر ما انا مستمتع به حسيت أنه قصير أكثر من الطبيعي وفعلا فكرة كتيب صغير هتكون فكره ممتازه ومرجع يسهل الرجوع إليه ياريت تبقي تعمل كده ومتحمس جدآ جدآ للفكرة دي 😊😊

  3. Hossam Khalaf 1 تفاعل

    هو أنا اتأكدت أكتر إن التاريخ بيعيد نفسه بصيغ (جمع صيغة😂) تاني بس إللي يقرأ و يتأمل و يتفكر! بالمناسبة شفت لقاء للممثل عبد الرحمن ف قهوة إبراهيم فايق (برنامج رياضي أصلا 😂 بس عشان إدارة mbc و شاهد ما علينا ) بس هو قال إنه هو بنفسه إللي بيعمل الكلام ده بالسجع والقافية وإنه مألفه بنظام معين عشان مينساش وقت التصوير ف النهاية.. تحياتي لمقالاتك (مش بوستات) إللي بتفتح الدماغ ❤️

    إسلام أسامه الجويلي

    Hossam Khalaf إن التاريخ بيعيد نفسه : ف دي ملاحظة مشهورة جداً .. و لكن لها تفسير منطقي للغاية معتمد علي علم النفس و الإجتماع .

    يعني .. إن التاريخ يعيد نفسه ده .. نتيجة .. ل سبب واضح .. هو إن نفس الإنسان ماتغيرتش منذ خلق آدم عليه السلام .. إلي قيام الساعة .

    إسلام أسامه الجويلي

    أما إن : عبد الرحمن .. هو اللي قام ببناء أغلب تفاصيل و حوار الشخصية دي ب نفسه .. ف ده شيء يخليني أنبهر بيه أكتر الصراحة

  4. Nabil Abdelgawad 1 تفاعل

    فيما يخص عبد الرحمن فكان عامل دور طبازه في الكبير و كان رائع بجد كابوزيا مع كل الاحترام فيه ممثل عمل دور شبهه في مسلسل بتاع شيكو و كريم عبد العزيز و كان احسن من كده بكتير بتاع جملة الحبل علي الجرار عبد الرحمن ممثل كويس و له مستقبل باذن الله بس يلاقي الفرصه الصح

    إسلام أسامه الجويلي 1 تفاعل

    Nabil Abdelgawad تقريباً شفت فيديو أو إتنين للممثل اللي تقصده .. و لكن الفرق هنا بين الشخصيتين هو :

    الإبداع اللغوي .

    السجع و الجناس و الكنايات و الإستعارات المكنية و كل المحسنات اللفظية و البلاغية اللي في شخصية كابوزيا .. فرق ضخم بينها و بين شخص بيتكلم كلام يبدو فيه إنه بلطجي و بس .

  5. Mohamed Sallam 1 تفاعل

    جاليليو فين يا حج اسماعيل ياحج اسماعيل .... الو .....

    إسلام أسامه الجويلي 1 تفاعل

    Mohamed Sallam جاليليو تقريباً ده آخر مرحلة في قصة عصر النهضة بالنسبة ليا ..

    و عشان كده الفلاش فوروارد بتاع لحظة محاكمته بالنسبة ليا كان لحظة محورية .

    لأن في اللحظة دي .. عيلة ميديتشي بتختار الحفاظ علي السلطة و رضاء السلطة .. و بيحرق جزء كبير من علم و إنتاج قرنين من الزمان تقريباً لإرضاء الكنيسة .

    ف لما نوصل للجزء ده في القصة إن شاء الله .. لازم نشرح بشكل وافي أعتقد كل ما سبق .. لإبراز قيمة اللحظة دي .

    و الله أعلم .

  6. Tito Otit 1 تفاعل

    خد بالك انت كدة ممكن تبقي بلاك ليست في دول الخليج تمة

    إسلام أسامه الجويلي 3 تفاعل

    Tito Otit يا حاج أنا باتكلم علي فلورنس 🤣

    أى تشابه ممكن حد يفهمه .. ف هو لأن النفس البشرية واحدة منذ خلقها الله

    يعني اللي حصل في فلورنس .. هو نفس اللي حصل في عهد ثمود .. هو نفس اللي حصل في الإمبراطورية الرومانية ... هو نفس اللي حصل في الدولة المملوكية و العثمانية .. هو نفس اللي حصل و بيحصل ف مركز طرشوخ الليف 🤣

    الإنسان واحد .. مهما إختلفت لغته أو زمنه .

    و الله أعلم .

    Tito Otit 1 تفاعل

    Eslam Osama El-Gwaily الناس اليومين دول علي عليهم حاجات يا جدع انا اساسا قصدي علي خليج " بنما"😂😂😂

تعليقات القرّاء

21 تعليقاً على فيسبوك، كما تظهر هناك للعامة.

كل التعليقات المحفوظة (21)
  1. Emad Elmarghany 1 تفاعل

    عبدالرحمن في كل دور بيعرف يعمل ليه لزمه دور طبازة في الكبير قوي ده ترند مش هينتهي

    إسلام أسامه الجويلي 1 تفاعل

    Emad Elmarghany أنا شفت حلقات بسيطة من الكبير قوي ..

    و لكن فكرة مثيرة للخيال لو أحمد مكي ( بمعلوماتي إنه بيحب الراب العربي ) إشترك مع عبد الرحمن بشخصيته دي .. في عمل مليان بالقدرة اللغوية الرائعة دي .

  2. Ibrahim Yasser 1 تفاعل

    البوست قصير اوي مستمتع جدا بطريقتك ومتحمس اعرف اكثر عن الحقبه دي من التاريخ

    إسلام أسامه الجويلي 1 تفاعل

    Ibrahim Yasser والله أثلجت صدري بموضوع ( البوست قصير أوي ) ده .

    هو قصير جداً بالنسبة ليا فعلاً ..

    و شخصياً .. أتمني لو ينفع أكتب كل قصة عصر النهضة في مقال طويييييييييل واحد ..

    و لكن .. للأسف في الوقت الحالي .. القدرة العامة علي إستهلاك المحتوي المكتوب .. مختلة جداً ..

    في وقت لاحق إن شاء الله ... ممكن أجمع السلسلة كلها ك كٌتيب صغنن أعتقد

    Ibrahim Yasser 1 تفاعل

    Eslam Osama El-Gwaily ممكن الناس تفتكر اني بسخر بس انا بتكلم بجد البوست فعلا من كثر ما انا مستمتع به حسيت أنه قصير أكثر من الطبيعي وفعلا فكرة كتيب صغير هتكون فكره ممتازه ومرجع يسهل الرجوع إليه ياريت تبقي تعمل كده ومتحمس جدآ جدآ للفكرة دي 😊😊

  3. Magdy Rizk 1 تفاعل

    عرض شيق....استمر

  4. Hossam Khalaf 1 تفاعل

    هو أنا اتأكدت أكتر إن التاريخ بيعيد نفسه بصيغ (جمع صيغة😂) تاني بس إللي يقرأ و يتأمل و يتفكر! بالمناسبة شفت لقاء للممثل عبد الرحمن ف قهوة إبراهيم فايق (برنامج رياضي أصلا 😂 بس عشان إدارة mbc و شاهد ما علينا ) بس هو قال إنه هو بنفسه إللي بيعمل الكلام ده بالسجع والقافية وإنه مألفه بنظام معين عشان مينساش وقت التصوير ف النهاية.. تحياتي لمقالاتك (مش بوستات) إللي بتفتح الدماغ ❤️

    إسلام أسامه الجويلي

    Hossam Khalaf إن التاريخ بيعيد نفسه : ف دي ملاحظة مشهورة جداً .. و لكن لها تفسير منطقي للغاية معتمد علي علم النفس و الإجتماع .

    يعني .. إن التاريخ يعيد نفسه ده .. نتيجة .. ل سبب واضح .. هو إن نفس الإنسان ماتغيرتش منذ خلق آدم عليه السلام .. إلي قيام الساعة .

    إسلام أسامه الجويلي

    أما إن : عبد الرحمن .. هو اللي قام ببناء أغلب تفاصيل و حوار الشخصية دي ب نفسه .. ف ده شيء يخليني أنبهر بيه أكتر الصراحة

  5. Nabil Abdelgawad 1 تفاعل

    فيما يخص عبد الرحمن فكان عامل دور طبازه في الكبير و كان رائع بجد كابوزيا مع كل الاحترام فيه ممثل عمل دور شبهه في مسلسل بتاع شيكو و كريم عبد العزيز و كان احسن من كده بكتير بتاع جملة الحبل علي الجرار عبد الرحمن ممثل كويس و له مستقبل باذن الله بس يلاقي الفرصه الصح

    إسلام أسامه الجويلي 1 تفاعل

    Nabil Abdelgawad تقريباً شفت فيديو أو إتنين للممثل اللي تقصده .. و لكن الفرق هنا بين الشخصيتين هو :

    الإبداع اللغوي .

    السجع و الجناس و الكنايات و الإستعارات المكنية و كل المحسنات اللفظية و البلاغية اللي في شخصية كابوزيا .. فرق ضخم بينها و بين شخص بيتكلم كلام يبدو فيه إنه بلطجي و بس .

  6. Mohamed Sallam 1 تفاعل

    جاليليو فين يا حج اسماعيل ياحج اسماعيل .... الو .....

    إسلام أسامه الجويلي 1 تفاعل

    Mohamed Sallam جاليليو تقريباً ده آخر مرحلة في قصة عصر النهضة بالنسبة ليا ..

    و عشان كده الفلاش فوروارد بتاع لحظة محاكمته بالنسبة ليا كان لحظة محورية .

    لأن في اللحظة دي .. عيلة ميديتشي بتختار الحفاظ علي السلطة و رضاء السلطة .. و بيحرق جزء كبير من علم و إنتاج قرنين من الزمان تقريباً لإرضاء الكنيسة .

    ف لما نوصل للجزء ده في القصة إن شاء الله .. لازم نشرح بشكل وافي أعتقد كل ما سبق .. لإبراز قيمة اللحظة دي .

    و الله أعلم .

  7. Tito Otit 1 تفاعل

    خد بالك انت كدة ممكن تبقي بلاك ليست في دول الخليج تمة

    إسلام أسامه الجويلي 3 تفاعل

    Tito Otit يا حاج أنا باتكلم علي فلورنس 🤣

    أى تشابه ممكن حد يفهمه .. ف هو لأن النفس البشرية واحدة منذ خلقها الله

    يعني اللي حصل في فلورنس .. هو نفس اللي حصل في عهد ثمود .. هو نفس اللي حصل في الإمبراطورية الرومانية ... هو نفس اللي حصل في الدولة المملوكية و العثمانية .. هو نفس اللي حصل و بيحصل ف مركز طرشوخ الليف 🤣

    الإنسان واحد .. مهما إختلفت لغته أو زمنه .

    و الله أعلم .

    Tito Otit 1 تفاعل

    Eslam Osama El-Gwaily الناس اليومين دول علي عليهم حاجات يا جدع انا اساسا قصدي علي خليج " بنما"😂😂😂

  8. Amr Hossen

    رائع أستمر

  9. Mohamed Ashraf Elkhalegy

    هو ابو ليوناردو كان مستشار لورينزو ولا انا غلطان ؟

  10. Asem Reda

    اسلوبك جاااامد جدا بس انا مش عارف هو في ايه ولا انا فين 😂

  11. ايمن رفعت الشيخ للموازين

    يعني سلاحف النينجا دول رسامين ومعلوفين كمان

  12. خالد سعيد

    سمك لبن تمر هندي ... يعني انت عبقري واحنا مجانين ولا العكس صحيح