رجاءاً ... زُق الجركن .😅

رجاءاً … زُق الجركن .😅 … في كلية هندسة إسكندرية .. من 17 سنة تقريباً .. و فمحاضرة أحد المواد المُعقدة بتاعتنا .. الدكتور اللي كان بيحب يفكرنا فكل محاضرة إنه سايب أمريكا مخصوص و رجع عشان يدرس لنا إحنا 🤣 .. وقف فجأة و قال قصة .. عمري ما نسيتها لحد النهاردة . … سألنا فجأة : بما إنكوا بذرة مهندسين مبدعين و كريمة المجتمع ( كان بيحب يقول علينا كده 🤣 ) .. تقدروا تقولوا ليا حلول عشان مشكلة توافر المياه في القري الأفريقية الفقيرة ؟! . .. قري أفريقية كتير جداً أكبر مشاكلهم في الحياة هي : المياه . بل إن المياه هناك هي أهم مورد و حروب و معارك بتقوم حوالين السيطرة علي الأبيار لحد النهاردة . . وقف الدكتور شوية .. و بدأ يسمع لحلولنا كلنا .. طبعاً كعادتنا ( مهندسين بقي ) .. بدأنا نفتي .. و نقول حلول زي :

• محطات تحلية لمياه البحر … و طبعاً ده حل فاشل جداً لقري بعيدة عن البحر مئات و آلاف الكيلومترات .
• محطات تجميع لمياه الأمطار … و طبعاً ده برضو هري .. لأن مواسم الجفاف بتقعد عندهم فترات طويلة جداً جداً .
• نعمل حفارات أبيار .. و نبعتها لهم في أماكن تجمّع مياه جوفية تكتشفها الأقمار الصناعية ( كان الموضوع ده تريند أيامها ) … .. .. و حلول كتير تانية كلها من نفس النوعية .. الدكتور قعد يسمعنا كلنا .. و بعدين راح رايح عالسبورة .. و رسم دايرة … بس كده 😁😅.. .. و بدأ يشرح : إن المشكلة دي ( اللي موجودة منذ قديم التاريخ ) .. تم التفكير ف كل الحلول اللي إحنا قلناها دي .. و كل حل من الحلول دي كان بيبقي مصيره لجان و دراسات و أبحاث و إجتماعات و مؤتمرات و فناجين قهوة كتير و باتيهات و كرواسونات بتتاكل في إيفنتات … و النتيجة فالآخر … ولا حاجة . دائرة مُغلقة من الهري المُستمر اللي بيقتله دايماً الإحتياج لل : تمويل . .. لحد ما إتنين مهندسين ولاد حلال من جنوب أفريقيا في بداية التسعينيات .. راحوا مخترعين التانك اللي في الصورة ده . تانك مياه ( جركن يعني ) مدوّر .. بحيث إنك ماتحتجش تشيله .. و لكن تملاه مياه من أقرب بير .. و تفضل تزقّه قدّامك لحد ما ترجع قريتك . و عرضوه للبيع في القري دي . … و النتيجة ( و نشكر عمو شات جي بي تي هنا في إنه جاب ليا الإحصائيات بسهولة 🤣 ) :
• خمسة و ستين ألف وحدة إتباعت في ستة و خمسين دولة .
• تقريباً 2 مليار لتر مياه إتنقل .
• توفير 80% في وقت و مجهود نقل المياه . .. و ملايين من الدولارت أرباح .. و لما كانوا بيحبوا يطلبوا معونات و مساعدات مادية من متبرعين مثلاً … كان بيبقي واضح بشكل مباشر الفلوس دي حتتصرف في إيه . … ليه بقي إفتكرت القصة دي بالذات النهاردة الصبح دلوقتي بعد ما شربت مج القهوة بالزعفران المُعتاد 🤣 . … لأن كمية البوستات اللي شايفها قٌدامي عن :
• بلطجي تم تصويره بيرتكب جريمة و مستنيين لما يتقبض عليه إن شاء الله .
• عيال كانوا بيطاردوا بنت ب عربيتها لحد ما عملت حادثة .
• ناس بتبيع شرفها ( حرفياً و مجازياً ) رجال و نساء .. مٌقابل فلوس علي تيك توك و البرامج الشبيهة . .. و غيرها من البوستات المشابهة .. .. و باشوف ردود الناس و تفاعلاتها في التعليقات .. ما بين :
• ناس فرحانة ب جهود الشرطة في القبض علي الناس دي .
• ناس زعلانة إن في ناس بيتقبض عليها لمجرد إنها بتبيع شرفها أو أخلاقها أونلاين … و شايفين إن الحرية معناها إنك تبقي حر حتي في بيع شرفك أو أخلاقك .
• و ناس كتيييييييييييييييييييير أوي في النص كل تعليقاتهم بتبتدي ب كلمة واحدة هي : ( المفروض ) . ..
• المفروض يعملوا كذا , المفروض يقبضوا علي كذا , المفروض يلغوا كذا , المفروض يزودوا كذا , … المفروض يفعلوا كذا . … مين بقي اللي ال ( مفروض ) يفعل ده ؟! .. الإجابة دايماً بالنسبة للناس دول هي : النظام , الدولة , هما , المسئولين , … اللي هو أى حد تاني غيري ( انا ك فرد يعني ) . … الطريقة دي في التفكير .. هي نفس الطريقة اللي كتير مننا ( ك طلبة هندسة ) فكرنا بيها لما قلنا حلول زي :
• محطات تحلية , حفارات أبيار , أقمار صناعية , … . حاجات و حلول كتير جداً .. و لكنها كلها مش في إيدينا إحنا .. و لكن في إيدين مؤسسات و منظومات تانية كبيرة بعيدة غيرنا . . و دي مش طريقة تفكير صح .. إطلاقاً .. . لأنك بالمنظر ده بتشيل عن نفسك خااااااااااالص المسئولية .. و بتبرر لنفسك ده بإنك ( لا تملك الموارد ولا القدرة ) .. مقارنة بال ( منظومات الكبيرة دي ) . . و للأسف .. حتلاقي إنك في أغلب أمور حياتك .. بتفكر بنفس الطريقة :
• المفروض يجيبوا حد ينضف الشارع من الزبالة دي .
• المفروض يهتموا بالتعليم عشان مستقبل العيال .
• المفروض يهتموا بالتربية عشان البلطجة اللي ملت الشوارع .
• المفروض يهتموا بالأغذية عشان الواحد كرشه دلدل قُدامه .
• المفروض يهتموا بالأمن عشان الواحد يبقي ماشي متطمّن علي نفسه و أهله . … في حين إن كل حاجة من الحاجات اللي فوق دي .. مسئوليتك إنت . إنت اللي عليك إنك لما تشوف زبالة تشيلها ( حتي لو مش إنت اللي راميها ) .. حديث ( إماطة الأذي ) .. ماكنش مذكور فيه إنك إنت اللي تكون رميت الأذي في الطريق 🤣 . . إنت اللي عليك مسئولية تعليم نفسك و عيالك . إنت اللي عليك مسئولية تربية عيالك ( مش تسيبهم للمدرسة أو إصحابهم أو النادي أو الناني ) . إنت اللي عليك مسئولية الإهتمام بكرشك و صحتك و صحة عيالك و تغذيتهم . . و برضو إنت اللي عليك مسئولية تدريب نفسك و أهلك علي حماية نفسهم و إنك تكون قادر علي تأمينهم .. علي الأقل قُدّام عيل شمّام ماشي ب إبرة خياطة ف .. إحم .. مشّيها بُقّه 🤣 . … بكل تأكيد مشكلة المياه في أفريقيا ماتحلتش حل دائم دلوقتي .. و بكل تأكيد ما زال في حروب عالمياه .. معاناة بسبب فقر المياه .. سيطرة علي أبيار كتير من عصابات و مرتزقة … و لكن .. . و لكن علي الأقل بين ما قبل تانك المياه المدور .. و ما بعده .. في إنسان علي الأقل لقي شوية مياه أكتر بشكل أسهل و أفضل . . و لو كان فضل كل الناس مستنيين و بيقولوا : ( المفروض , و حد يشوف حد يا جماعة , و يمصمصوا شفايفهم و هما بيتفرجوا علي الوضع القائم ) .. ماكنش الإنسان ده لقي شوية المياه دول . … أنا عمري ما نسيت القصة دي .. و تقريباً .. 90% من الحاجات اللي باكتبها بتكون كلها متأثرة بالقصة دي .. أنا مابكلمش في بوستاتي ( منظمات أو هيئات أو مؤسسات ) .. أنا في كل بوستاتي .. باكلم نفسي أولاً .. ثم الفرد ثانياً . يعني .. لو الحاجة اللي حاكتبها .. غالباً ماينفعش تطبيقها من الفرد نفسه لوحده .. مابكتبهاش .. . يعني : من غير ما يستني صاحبه ييجي معاه الجيم 🤣 عشان يشجعه .. من غير ما يستني جاره يشيل قٌدامه الناحية التانية عشان يونسه .. من غير ما يستني أهله يخترعوا آلة زمن و يصلحوا أخطاء في تربيته من زمان 🤣 . … الحلول الجزئية البسيطة المباشرة .. أحيان كتير جداً .. أهم ملايين المرّات من إنتظار الحل الكامل النهائي . … طيب .. يعني تعمل إيه برضو ؟! . … زق الجركن 🤣. … البوست اللي بتقراه دلوقتي ده لو ظهر قٌدامك .. إحتمال ضخم جداً مايظهرش قٌدام حد تاني .. من غير ما إنت تزقّه ( تشيره ) . . و إطلاقاً مش باقول لك شيّر البوست ده بالذات .. أقول لك ؟! .. خده كوبي بيست .. مش حازعل و ولا بازعل والله لما حد بيعمل كده .. . و لكن … شيّر أى شيء مفيد .. أى شيء مفيد مهما كان بالنسبة لك بسيط . لو لقيت في كلامي فايدة .. شيّره ( أو خده كوبي بيست زي ما قلت 🤣 ) .. أو لو لقيت في كلام الملايين اللي أفضل مني فكل مجالات الحياة ( شغل , دراسة , دين , …) شيّر كلامهم ده . . لو كان الشيء الوحيد اللي تقدر تعمله في الحياة ( بشكل مباشر ) هو إنك تعمل شير لحاجة مفيدة علي بروفايلك علي السوشيال ميديا ( فيس , إنستا , … ) .. إعمل ده . … عقول الناس بتتكوّن من اللي شايفاه .. و معلش .. سؤالي غتت شوية .. بوست الولد اللي كان عامل بنت ده .. شفته كام مرة ظهر قٌدامك ؟! .. إستفدت منه إيه ؟؟! . … لو تعرف حد محتاج شغل .. زُق الجركن .. و شيّر مهاراته و خبرته .. لعل غيرك يعرف ياخد أكشن . لو تعرف حد بيعرف يشتغل حاجة حتي لو إنت مش محتاجها .. زُق الجركن .. و شيّر عنه .. لعل غيرك محتاجه . . علي الأقل .. إفتح يوتيوب مثلاً .. إكتب بحث عن أى شيء ممكن يكون فيه فائدة .. و مش لازم تشوفه إنت .. و لكن .. زُق الجركن .. و شيّر الفيديو ده عندك . … زُق الجركن .. و الله أعلم .. شوية الميّه اللي حتزقهم دول .. حيرووا بذرة فأنهي أرض . … الله أعلم .