عن ال ( فونسة ) أتحدث 🤣 .

المٌصطلح ده .. أحد أوائل الكلمات اللي بتتعلمها سراً في سكاشن مادة الرسم الهندسي في إعدادي هندسة ..

عارف إنت الصورة الكاريكاتورية الدائمة ل طالب كلية الهندسة .. إنه ماشي طول الوقت شايل مسطرة حرف T .. كإنه مثلاً لو حاول يدخل الكلية من غيرها بيغتالوه علي البوابة ؟! ..

دي صورة هزلية للغاية 🤣 ..

في الحقيقة إنك بعد ما بتفرح بنفسك لما تشتري المسطرة لأول مرة .. و تتمشّي بيها فوسط الناس و قٌدّام المكتبات و في المواصلات لمدة يوم واحد تقريباً ..

بتتخنق منها بعد كده و بتدور علي أى طريقة تمشي من غيرها ..

و بعد أسبوع تقريباً من دخولك كلية هندسة .. بتكتشف إنك مش عايز تشيل معاك غير قلم رصاص خشب قديم .. متّاكل و متعضعض من راسه .. و لو إنت غني .. بيكون قلم سنون روترنج .. و برضو متعضعض من راسه 🤣 .

إنت بتشيل المسطرة الحرف T فقط في الأيام اللي عندك فيها سكاشن رسم هندسي ..

اللي بتضطر إنك ترسم شكل أو تصميم هندسي معين علي لوحة كانسون مقاس ( 50 في 70 ) ..

و أحياناً بيكون مطلوب منك تسلّم لوح رسمتها في بيتكم أثناء ما أهلك فخورين بإبنهم المهندس العبقري اللي بيعمل زي الأفلام و المسلسلات و بيقلّب كباية الشاي بالمسطرة الحرف T 🤣 .

و فأحيان تانية .. بيكون مطلوب منك ترسم الرسمة بالكامل في السيكشن ..

اللي مدته تقريباً بتكون ساعتين ل تلات ساعات ..

و المدة دي .. إطلاااااااااااااااااااقاً مش دايماً كفاية ..

إنت بتحتاج ترسم رسمة بتتطلّب حسابات كتير و حل مسائل هندسة مستوية ( و أحياناً فراغية ) و شغل براجل و مناقل و مثلثات ..

و فجأة .. بتكتشف إن مدة السيكشن خلصت .. و المٌعيد ماشي بيصحح و يدّي درجات .. إنت فأمسّ الحاجة لها ..

و ما لم تكون إنت بنّوتة جميلة رقيقة رُهيفة .. و المٌعيد شاب في عنفوان شبابه أفلج عريض المنكبين بيدور علي عروسة ..

فرصتك في إنك تفوز بالدرجات بتكون متوقفة فقط علي رسمتك في اللوحة 🤣🤣 .

فبالتالي ..

بتتعلم ( تفونس ) 🤣🤣🤣

الفونسة ( جاية من فانوس ) .. و دي معناها إنك في البيت بالليل .. و بعد ما الكل ينام عشان ماحدش يشوف إنت حتعمل إيه 🤣 .

بتجيب التصميم اللي إنت عارف إنك المفروض ترسمه في السيكشن تاني يوم ..

و بتجيب فرخ اللوحة الكانسون الفاضي ..

و بتحط فانوس ( إضاءة قوية ) تحت التصميم بحيث إنه يشف علي اللوحة الفاضية ..

و بتمشي ب خط رٌفيع خالص خالص خالص .. و ترسم خطوط باهتاااااااااه .. ماتشوفهاش إلا لو عارف مكانها و عارف إنها موجودة .. ( شٌغل رأفت الهجان و الحبر السري ) ..

و تقفل اللوحة و تروح تاني يوم السيكشن .. تفتحها بكل براءة .. و تبدأ تعمل زي أى طفل صٌغنن في حضانة بيتعلم الكتابة ..

ف بيمشي بالقلم علي خطوط مرسومة بالفعل قبل كده ..

و تخلّص الرسمة اللي المفروض تخلص ( بحساباتها بإكتشافاتها بسلطاتها ب بابا غنوجها ) في ساعة بالكتير .. بدل ما كان المفروض تاخد معاك 3 ساعات .

و بالتالي .. تقدر تحصل علي فٌرصة في الدرجات قريبة جداً من اللي بتحصل عليها البنت الجميلة الرقيقة الرٌهيفة .. من المٌعيد الأفلج عريض المنكبين الباحث عن عروسة 🤣 .

طبعاً المٌعيدين كانوا بيبقوا عارفين كويس عن الخدعة اللي قديمة من أيام ما كان أمنحتب بيفونس خطط هرم خوفو 🤣 ..

ف كانوا بيمشوا يدققوا جداً النظر في اللوح و يتأكدوا إنها فاضية ..

و طبعاً ده ماكانش بيمنع الطلبة إنهم يبتدعوا طرق أصيع في الفونسة ..

و منهم .. طريقتي الخاصة 😆 ... و اللي دلوقتي أقدر أكشف عنها بعد مرور 20 سنة تقريباً خلاص ..

و اللي عملتها عدد صغير من المرّات والله العظيم بس عشان ك طالب بيسافر من دمنهور لإسكندرية كان بيضيع منّي 5 ساعات يومياً مواصلات علي الأقل .

و هي إني ماكنتش بافونس الخطوط اللي في الرسمة .. و لكن كنت بافونس الأماكن اللي حارشق فيها إبرة البرجل .

و بالتالي .. حتّي لو إتلخبطت في حسابات أو عملتها غلط .. ده كان بيوفر عليا وقت ضخم جداً جداً ..

و طبعاً .. ماحدش كان بياخد باله من أماكن الأخرام الصٌغننة دي .. غير اللي خرمها الليلة اللي قبلها 😎😎

أمّا عن السبب بقي في ليه إفتكرت السر الحربي ده بعد مرور 20 سنة ..

ف ده لأن أحد الأسئلة اللي جات ليا في الماسنجر .. كان بيسألني عن سبب إني قاعد باشرح حاجات كتييييييييييييييييييييير " هو " شايف إنها مالهاش لازمة .. قبل ما أبدأ أشرح ( Binary logic - منطق ثنائي ) اللي بيقوم عليه ال ( جبر الثنائي - Binary algebra ) ..

اللي هي لٌغة كل ما هو ( رقمي - Digital ) حالياً ..

يعني البنية التحتية لكل عوالم البرمجة و الإلكترونيات .

و أول حاجة جات في بالي في الرد علي السؤال ده .. هو موضوع ال ( فونسة ) .

لمّا بافتكر أغلب اللي إتعلمته بشكل أكاديمي علي مدار سنين حياتي ( إبتدائي و إعدادي و ثانوي و كلية ) ..

بافتكر إني نادراً .. نادراً جداً .. لما كان مطلوب منّي إني ( أكتشف ) شيء ما ..

لكن .. 99,99999% من اللي درسته كان :

بامشي علي خٌطي الآخرين .

في كل المواد و المجالات ( العلمية و الأدبية ) ..

ماحدّش طلب مني ك طالب .. إني أبص للفراغ .. و أتسائل .. و أتخيل .. و أكتشف .. و أغلط .. و أتسائل .. و أتخيل .. و أكتشف .. و أغلط .. لحد ما أكتشف حاجة مش فاهمها .. ف أفضل أدور فيها .. لحد ما أكتشف حاجة جديدة خااااااالص .. و هكذا و هكذا .

ال نظام التعليمي المٌعتاد .. بيخلي موضوع ال( سعي للإكتشاف ) ده .. مش بيشوفه أى طالب أكاديمي .. إلا بعد ما يوصل لمرحلة الدكتوراة ..

و كمان مش بيشوفه بشكل كامل .. لأنه بيكون بيسعي إنه ينتهي من الدكتوراة بتاعته ( بما هو مقبول و معروف ) بأسرع وقت ممكن .

اللي هو حتي لو بتحضّر ماجستير .. إنت نادراً ما بيٌقبل منّك إنك تبحث عن شيء جديد .. في شيء جديد .. و لكن لازم تعمل اللي الدكتور المٌشرف بيطلبه منك .

و لكن ..

أغلب المٌجتمع بيتعامل معاك إنك : فاهم بشكل يكفي للإبداع .

إنك : نظرت للوحة الفاضية الفارغة .. و لأنك فاهم حاجات معينة .. بدأت ترسم رسمة غاية في التعقيد ..

في حين إن الحقيقة هي : إنك علي مدار سنين تعليمك بالكامل .. إتعودت تمشي علي الخطوط الباهتة اللي إتحفرت في عقلك .. و ماتعلمتش ترسم غيرها .

لمّا فهمت الموضوع ده ..

إتعلمت إني لما أبحث في أى شيء عشان أتعلمه .. و لما أعيد شرح الشيء ده ..

إني ( مافونسش ) .. و ماعلمّش اللي قٌدّامي إنه ( يفونس ) ..

و ده بيحصل بإني أبذل أكبر قدر من المجهود عشان أشرح شكل اللوحة و هي فاضية ..

شكل الحياة ( علمياً و إجتماعياً و زمنياً و مكانياً ) أيام لايبنز .. قبل ما يكون في ( تفاضل , تكامل , منطق ثنائي , حسابات منطقية عموماً , .... ) .

أو زي لما شرحت حاجات كتير عن عصر النهضة ( و ما زلت ) ..

يعني شكل الحياة ( علمياً و إجتماعياً و زمنياً و مكانياً ) .. أيام دافنشي .. و الميديتشي الأوائل .. قبل ما يكون في حاجة أساساً إسمها ( عصر نهضة ) .. و أتسائل ... ليه تخيلوا كل الفنون دي ..

زمااااااان .. أيام ما كنت باشرح كورسات ( برمجة و تصميم و بيزنس و .. ) كنت باكتب علي السبّورة فووووووووق :

( أنا مش هنا عشان أعلمك إزاي تجاوب , و لكن أنا هنا عشان أعلمك إزاي تسأل ) .

و دلوقتي بقيت بازود علي الجملة دي : و كمان دلوقتي الذكاء الإصطناعي قادر إنه يعلمك إزاي تسأل .. ف أصبح دوري إني أعلمك إزاي : تتخيل .

و ال ( تخيل ) ده .. هو أهم حاجة علي الإطلاق إنك تتعلمها حالياً فوجهة نظري .. ( أهم من أى آداة ذكاء إصطناعي جديدة أو كورس بيزنس ) ..

فبالتالي .... في السلسلة اللي باشرحها حالياً ..

أنا مش باحاول إطلاقاً إني أورّيك خطوط إترسمت من 300 سنة .. و أعلمك تمشي عليها بإيدك زي طفل في حضانة .

و لكن .. باحاول جداً أوريك اللوحة فاضية .. و أوريك شكل السيكشن حواليك .. و الشمس و هي داخلة من شبابيك واسعة .. و دوشة طلبة لسّة بيتعلموا يثبتوا مساطرهم الT بشكل صح علي الديسكات .. و بنت جميلة رقيقة رٌهيفة مش عارفة تلزق لوحتها الفاضية علي الديسك بتاعها ... و مٌعيد عريض المنكبين أفلج مركّز معاها من بعيد 🤣 ..

و أورّيك .. إزاي حد بص للوحة الفاضية دي .. و بدأ يرسم خطوط .. هو أول حد رسمها في الحياة .. أثناء ما كل اللي حواليه قالوا عليه :

مجنون 🙂 .

و الله أعلم .