و إنت واقف عالشط ماسك مضرب الراكت و لسّة حتضرب الكورة اللي جاية عليك بكل سرعتها دي …

و إنت واقف عالشط ماسك مضرب الراكت و لسّة حتضرب الكورة اللي جاية عليك بكل سرعتها دي .. و بعدين فجأة .... بطرف عينك لمحتها ..

مش الكورة .. لا ..

و لكن بنّوتة حلوة رقيقة ك منديل طرب يٌحيط ب صوباع كٌفتة ..

رشيقة تنحني مع النسيم .. ك عود فجل ينحني برشاقة و إنت بتاخد صوباع الكٌفتة من فوقه .

سمراء الشعر .. ك نفس سمار شعر الجدي اللي إندبح و إتعمل منه صوباع الكٌفتة ..

و كأن الزمن توقّف في اللحظة دي .. و جه سألك ( الزمن هو اللي بيسأل يعني ) :

" ألّا باقول لك يا زميلي .. إتعلمت تكتب الشعر الرومانسي المٌلتهب ده فأنهي معهد لغة ؟! "

دي أحد أكبر ال " خدع " اللي ناس كتير بتعيش مصدقاها للأسف ..

إن ال ( شعر ) قائم علي اللغة ..

و ده مش حقيقي إطلاااااااااااااقاً ..

الشعر قائم علي الخيال أولاً .. و بعدين تقدر تستخدم أى لغة عشان توصف الخيال ده ..

و علي حسب مهارتك في إستخدام اللغة دي .. و كم المٌفردات و التراكيب اللفظية اللي تعرفها من اللغة دي ... علي حسب جمال و حلاوة و طعامة أبيات الشعر اللي إنت حتشعرها ولامؤاخذة .

نفس التشبيهات الرومانسية المٌلتهبة اللي أنا إستخدمتها مثلاً فوق دي .. تقدر تكتبها بالألمانية الرقيقة جداً .. أو الروسية المٌعبّرة للغاية ..

أو تستخدم لغة عنيفة مثلاً زي الفرنساوي ..

و حيبقي إسمك : كتبت شعر .. يٌلهب مشاعر العذراوات علي شواطئ جمصة و مراسي ..

و هو ده بالظبط اللي عمله ( جيمس كلارك ماكسويل ) 🤣 .. لما فكّر في شغل فاراداي .

الراجل تخيّل حاجة مٌعيّنة .. و بعدين إستخدم اللغة اللي كانت مٌتاحة له في الوقت ده .. عشان يوصف التخيّل بتاعه .. و كتب 20 ( بيت شعر = مٌعادلة ) يوصفوا مشاعره بالظبط ..

أحد أكبر أنواع الظلم اللي أعتقد أمثالي إتعرّضوا لها في الكلية و الدراسة الأكاديمية .. هي إننا درسنا ال ( ريمكس ) 🤣.. بتاع المٌعادلات دي .

مادرسناش اللحن الأصلي .. القصة الأصلية .. اللغة الأصلية اللي إتكتبت بيها ( أبيات الشعر ) دي .. و الطريقة اللي فكّر بيها ماكسويل .

بالظبط كإن حد سألك ( تعرف فيلم تايتانيك ؟ ) .. ف تقول له ( أيوة أعرفه كويس ) .. و تكون مثلاً بتتكلّم علي نسخة مٌعدلة من إنتاج ميلودي تتحدّي الملل 🤣🤣.

ماكسويل .. كتب مٌعادلاته بال ( كواترنيونات = Quaternions ) ..

عٌمرك سمعت عنها قبل كده ؟!!!

إحنا لما درسنا مٌعادلات ماكسويل في الكلية .. درسناها خبط لزق فحت ردم شحط محط .. فنفس ذات التيرم اللي فجأة لقينا نفسنا بندرس حاجة في الرياضة إسمها ( تفاضل مٌتجهات = Vector Calculus ) .

و شغل ماكسويل ده كان في مادة .. و شغل ( تفاضل المٌتجهات ) ده كان في مادة تانية و دكتور تاني خالص بيدرّسها ..

و إنت لوحدك تتفاجئ مع نفسك بقي .. إن سٌبحان الله يا أخي .. الرياضة اللي عليك في التيرم ده .. بتخدّم علي شغل مادة الموجات الكهرومغناطيسية .. و إنت تحمد ربّك و تبوس إيدك شعر و دقن .. و أدخل إمتحن بالمعادلات اللي المفروض تكون حافظها ..

إنت مش عارف تحفظ ليه ؟!!

أنا كنت حاتجنن .. فاكر كويس جداً أفكاري أيامها ..

يا جدعان الله يبارك لكم .. مين اللي صحي من النوم فجأة .. و قرر إنه يخترع معادلات بالمنظر ده ( المعادلات الأربعة بتوع ماكسويل ) ؟!!! .

فين المنطق ؟! .. فين التسلسل بتاع القصة ؟! .. إيه السبب ؟!

و علم التفاضل و التكامل ده بالكامل ... إمتي أساساً الناس قرروا فجأة يعملوا منه موسم تاني و يسمّوه ( تفاضل مٌتجهات ) ؟!!

هل الموسم الأول كان نجح أساساً للدرجة دي ؟!

ماكسويل ... ماكنش يعرف حاجة إسمها ( تفاضل مٌتجهات - Vector Calculus ) .. لأن ماكنش في حاجة علي أيامه أساساً إسمها كده ..

ماكسويل كان كل قصته هي ( لو فاكر من البوست اللي فات ) :

إزاي أوصف حركة دوران دوامات في الفراغ .. بينهم رولمان بلي ؟!!

أو .. عشان أبسّط لك التخيّل ده أكتر ..

نفس كورة التنس اللي فأول البوست دي .. فاكرها ؟!

لو إنت بقي قررت إنك عايز تضربها ب ( قوة مٌعينة .. و زاوية معينة .. و إنحناء مضرب مٌعين ) .. عشان تتحرّك في مسار مٌعين .. بقوة معينة .. و تنزل في صينية الكٌفتة اللي قٌدّام البنوتة اللي عينك جات عليها .. ف هي تاخد بالها منك .. و تدّيلك صباع كٌفتة .

تعمل ده إزاي ؟! 🤣🤣 .

الرياضة في الوقت اللي ماكسويل كان قاعد بيفكّر في الموضوع ده .. كان آخرها هي موضوع ال (كواترنيونات ) دي ..

إسم الناس إخترعوه عشان يوصفوا عملية دراسة حركة الجسيمات في الفراغ ..

و تسلسل إختراع ال( كوارترنيونات ) دي .. منطقي للغاية ..

لو تفتكر كنت كتبت بوست قصير جداً من فترة ( اللي هو سيليكون 2 ) ..

و شرحت لك فيه تسلسل الرياضة من أيام عمو جاليليو .. ل حد عمو ( ديكارت ) بتاع الإحداثيات الكارتيزية سنة 1642 ..

و اللي هو أساساً كان جندي .. مش عالم رياضيات ..

و لكنه قرر يتخيل ميدان المعركة ك ( ورقة رسم بياني .. س و ص = X Y ) .. عشان يعرف يلعب مع إصحابه أسهل لما يقول لهم ( باصوا ليا الكورة هناك عند خط ال18 .. ف يبقي معروف مكان خط ال18 ده فين ) ..

ف كان التطور الطبيعي للحاجة الساقعة هي :

طيب ما تيجي نتخيل الإرتفاع كمان .. و نبقي بندرس ( س , ص , ع ) ..

و بعدين شوية عيال دحّيحة قاعدين جنب الملعب .. منهم واحد إسمه ( ويليام روان هاميلتون ) قرر يدرس حركة الكورة في الفراغ بقي .. و يعرف لما تتشاط في الجو .. بتدور إزاي ؟! .. و لو في كور كتير .. نعمل إيه ؟! ..

النظام ده اللي بيدرس ( أربع متغيرات لكل جسم في الفراغ = أربعة يعني كواترو بالأسباني و الفرنساوي ) .. هو اللي أصبح إسمه ( نظام الرٌباعيات = كواترونيونات ) .

و عمو ماكسويل .. مسك نظام الكواترنيونات ده بقي ... علي نظام ال( فلاكسيونات = Fluxions ) اللي إخترعه عمو نيوتن ..

( flux معناها بالعربي : تدفّق ) .. و ده الإسم اللي إخترعه عمو نيوتن عشان يوصف حركة السوائل و الموائع ..

و اللي هو بعد كده أصبحنا إحنا نعرفه بإسم الشهرة ( تفاضل و تكامل ) ..

و فضل يحاول ماكسويل يكتب أبيات الشعر اللي توصف خياله المٌلتهب .. لحد ما طلّع ال 20 معادلة الأساسيين بتوعه ..

و بعدين مات 🤣🤣

ماكسويل مات صغنن عنده 48 سنة ( سنة 1879 ) .. و مات من غير ما يعرف أى حاجة عن مدي تأثير إكتشافاته و مٌعادلاته دي ..

و ال20 ( مٌعادلة = بيت شعر ) اللي هو طلّعهم كانوا مٌعقدين جداً بسبب موضوع الكواترنيونات ده .. لدرجة إن أغلب الأكاديميين كانوا بيهربوا من دراستها ..

مين بقي اللي سمع أبيات الشعر دي .. و حس إنها لو إتعمل لها ريمكس .. حتجيب مع الناس و تكسّر الدٌنيا و تبقي الأغنية اللي شغالة ليل نهار في التكاتك ؟!

عمو ( أوليفر هيفيسايد ) ..

قصة ( هيفيسايد ) مش نادرة إطلاقاً .. و لكن لو إنت من أمثالي اللي بيتتبعوا قصص الناس بتوع الرياضة بالذات .. حتلاقيها بتتكرر كتير ..

اللي هي :

واحد دماغه نضيفة .. الزمن جه عليه و حس إن القعدة عالشط مع باقي البشر بقت مٌملّة .. و إنه أصبح مش عارف يندمج وسط شلّة البشر .. ولا قادر علي ده .

ف بينعزل تدريجياً في عالمه الخاص .. و يمسك موبايله و يسكرول .. و كل ما يتجاهل اللي مشغول بيه الآخرين .. كل ما بيكتشف عالم ضخم و رائع الآخرين مش واخدين بالهم منه .

هيفيسايد .. بعد ما جات له حٌمّي إنطرش بسببها للأسف 😅 .. و ساب المدرسة و هو عنده 16 سنة .. بيروح يشتغل الشغلانة الجديدة اللي ماحدش كان لسة فاهمها أوي ( صنايعي تيليجراف ) ..

ف بيبدأ يغوص في عالم الأسلاك اللي ماشيه فيها كهربا .. و ليه الكهربا بتتصرف بالمنظر ده ..

و بيفتح البوستات بتاعت ماكسويل .. و يشوف أبيات الشعر المٌعقدة اللي هو كان كاتبها ..

و يبدأ يلعب ..

مرة تانية .. لو لاحظت هنا التيمة المٌتكررة ..

إنسان وحيد جداً .. شايف حاجة رائعة جداً .. ف بيحاول يوصفها ب لغة مفهومة للي حواليه ..

و أثناء ما هو بيعمل ده .. بيكتشف إنه يقدر يوصف نفس الصورة اللي ماكسويل كان شايفها ..

مش صورة ( ال بنوتة حلوة اللي قدامها صينية كٌفتة 🤣) ..

و لكن صورة ( الدوامات الكتير اللي بتعبّر عن قوة تأثير المغناطيس .. و الكهربا اللي بتعدّي بينهم ) ..

عن طريق أربع معادلات فقط ( أربع أبيات شعر ) ..

أربع معادلات مكتوبين ب لغة جديدة تماماً .. لغة ماكنتش موجودة قبل كده .. لغة من إختراع ( هيفيسايد ) و هي : ( تفاضل المٌتجهات = Vector Calculus ) .

و لأن اللغة الجديدة دي .. سهّلت إن الناس تغنّي ( أغاني كتييييييييييييير = معادلات كتيييييييييييييييير ) كانت موجودة و لكنها كانت صعبة جداً ( لأنها كانت بالكواترنيونات ) ..

ف فجأة .. الناس ( الأكاديميين ) .. إهتموا باللغة دي .. و إستخدموها ..

و إكتشفوا إنهم قادرين يشوفوا الصورة اللي كان بيوصفها عمو ماكسويل ..

ف إتخيل معايا بقي ..

لو أنا كنت كتبت أول كام سطر في البوست ده .. كالتالي :

ال ( بروبريوسيبشن البشري مٌستقل تماماً عن تفاضل المٌتجهات و القياسات الفيزيائية العيارية , حيث بإمكان جهاز الإنسان العصبي إستقبال مؤثرات خارجية و معالجتها بشكل مستقل حتي عن بٌعد الزمن ) ..

كنت حتفهم حاجة ؟!

أول كام سطر ( اللي هو موقف الشط و كورة التنس و الراكت و البنّوتة .. و كل الكلام ده ) ..

هو هو بالظبط اللي أنا كتبته من شوية ده ( موضوع البروبريوسيبشن = Proprioception = اللي هي الطريقة اللي عقل الإنسان و جهازه العصبي بيشوف بيها الحياة و بياخد رد فعل ) .

و لكن .. لأنك ماعندكش أى مرجعية لغوية ولا إصطلاحية إطلاقاً للكلام المجعلص ده ..

ب تكون النتيجة إنك :

أولاً : بتفكّرني أذكي منك ... و ده مش حقيقي .

ثانياً : بتفكّر إنك غبي .. أو غير قادر علي تعلّم العلوم و الإبداع فيها .. و ده برضو مش حقيقي إطلاااااااااااااااااااااقاً ..

و ثالثاً .. و ده الأخطر .. : بتظن بالخطأ إنك إتعلّمت شيء ما .. لأنك سمعت شوية مصطلحات و يمكن تحفظها كمان .. و خلاص كده .. عقلك بيقفل التساؤل في الجزئية دي للأبد .. 🥹🥹🥹

في حين إن الحقيقة هي : إنك بتعيش حياتك كلها غير قادر علي الإبداع في الحاجة دي .. ولا الإستمتاع بيها .. و لا هضمها .

( بتعيش حياتك كلها ب كتلة خرسانية غير قابلة للهضم عايشة في معدتك ) .. و بتفكّر إنك كده أكلتها .

و لكن جسمك و ماحللهاش ولا إستفاد منها بأى شيء إطلاقاً .

أنا كنت حابدأ شرح تاريخ ال ( Frequency Spectrum = طيف تردد الموجات الكهرومغناطيسية ) في البوست ده ..

و لكن ..

و لكن قررت أكتب البوست ده الأول ...

لأن .. الحياة بعد كده .. بتكون كإنك ركبت زوحليقة حرفياً ..

من أول ما عمو ( هاينريك هرتز ) أثبت بشكل معملي وجود الموجات الكهرومغناطيسية دي ..

لحد لمّا إنت بتشوف إنت لاقط شبكة 5G ولّا لأ عشان تتأكد إن الرسالة اللي حتبعتها في الأذرز ( عينيكي فيها حزن ) حتوصل بالكامل ولّا لا 🤣 .

إلي ما أكتب الجزء القادم إن شاء الله ..

عايزك تتخيل حياة كاملة ..

إنت بتسمع .. لكن مش فاهم موسيقي ولا أغاني ولا حتي قادر تفهم إستمتاع الناس بيها حواليك ..

إنت بتشوف .. لكن مش فاهم ألوان .. ولا جمال طبيعة ولا مخلوقات الله سبحانه و تعالي .. و لا حتي قادر تفهم إستمتاع الناس بيها حواليك ..

إنت بتشم .. لكن مش قادر تستمتع ب جمال ريحة صينية كٌفتة طرب 🤣 .

أو مش قادر حتي تتذوقها ..

الحياة .. اللي إنت عايشها بدون ما تفهم هي الرياضة و المٌعادلات بتشتغل إزاي .. و بتوصف إيه ..

و الفيزياء .. تاريخها بدأ منين و وصلنا للحتّة اللي إحنا فيها دي إزاي ..

بالظبط زي حياة الإنسان اللي مش قادر يتذوق صٌباع الكٌفتة ده ..

الموضوع مش صعب إطلاقاً ... جرّب تدوق 🤣

و الله أعلم .