كام مليار دولار ... يصلحوا حال الدولة ؟!

لو بكرة الصٌبح .. قررنا نكسّر كل الحصّالات اللي موجودة في بلد مٌعينة فقيرة و عالم تالت و حالتها صعبة .. و جمّعنا كل المليارات قٌدّامنا .

السؤال الأول : حاتصرفهم إزاي ؟!

السؤال التاني : إنت قرأت الأجزاء اللي فاتت حتي الآن 😅؟!

السؤال ده ( تصرف كل المليارات اللي محوشها إزاي عشان تبني دولة قوية الفيفا تخاف منها 🤣 ) .. كان أحد الأسئلة المحورية اللي خلّتني أتتبع تاريخ تايوان .. ف أعيد كتابته بتلخيص شديييييييد جداً هنا .

القصة الأساسية اللي بنحكيها هي لسة قصة ( كوريا الجنوبية ) ..

و حكينا إزاي أول 30 سنة تقريباً في حياة كوريا الجنوبية حصلوا بالتفصيل ( 1950 ل 1980 ) تقريباً ..

لكن عشان تفهم إيه اللي حصل في حياة كوريا الجنوبية .. حولها ل حوت من حيتان التكنولوجيا في عالمنا الحالي ..

لازم تفهم قصة تايوان الأول ..

في الجزء اللي فات .. شرحنا إزاي إن ( تشيانج كاي شيك ) راح و هو لسة صغنن يتدرّب في الإتحاد السوفييتي علي العلوم العسكرية ..

و رجع .. جاهز إنه يكون رئيس الجناح العسكري و قائد جيوش ( عبد الوارث عسر .. أقصد صان يات سين 😅 ) ..

و أصبحت دلوقتي الصين فيها حزبين أساسيين :

الحزب الوطني بقيادة ( عبد الوارث عسر ) و قائد جيوشه ( تشاينج كاي شيك ).

و الحزب الشيوعي .

و الإتنين شغّالين مع بعض زي الفل .. و هدفهم هو : توحيد الصين حرة مٌستقلة .

لكن .. زي ما شرحت في البوست اللي فات .. ( تشيانج ) كان كاره الفكر الشيوعي و غير مؤمن بيه إطلاقاً .. لكن كان لسة ماصارحش نفسه و اللي حواليه بالكراهية دي .. و مخبيها ف قلبه .

لحد ما في يوم من الأيام .. بيلاقي ( ميي لينج بنت سوونج ) عملتله فولو .. و ريأكت لاف علي بوستات صور قديمة له .

طبعاً هو ماصدقش نفسه ..

ليه ؟!

لأن سنة 1927 ( ميي لينج بنت جماعة سوونج ) كانت إنفلونسر جامدة فحت .. أقصد بنت من بتوع بابي و مامي .. من مشاهير المٌجتمع الصيني اللي كانت بتقضي الصيف كله في الساحل الشرير و تنزّل صورها في أكاونتات الإنستاجرام بتاعت المشاهير .

دخل لها علي الخاص قال لها ( الريأكت اللي عملتيه ده بالغلط ؟! ) ..

قالت له ( تعالي كلّم بابا و هات جاتوه معاك ) ..

راح كلّم أبوها .. قال له : يابني إحنا بنشتري ظابط .. أقصد راجل .

و كتب قايمة و شكراً ..

كده أصبح ( تشيانج كاي شيك = شكري سرحان ) .. مسنود مٌباشرة من أباطرة قطاع البنوك و المال و بشوات الصين ..

قطاع البنوك و المال و البشوات .. اللي هٌما كانوا إزاي في وضعهم المادي الجامد فحت ده في الوقت ده ؟!!!

الله ينوّر عليك .. عن طريق العلاقات الإقتصادية و التٌجارية مع أمريكا و بريطانيا .

لو تلاحظ هنا ( و لازم تلاحظ ) .. ده كان نفس الحال في كل دول العالم الأخري .. ( أيام الحرب العالمية الأولي و التانية ) ..

إنت غني ؟! .. إذن إنت حيبقي ليك علاقات تجارية مع أمريكا و بريطانيا ..

القاعدة دي لسة ماتغيرتش حتي يومنا هذا بالمناسبة ..

ولا كانت مٌختلفة قبل كده علي مدار التاريخ .

أى فلوس في العالم .. تسعة أعشار منها في التجارة ( ده حديث ضعيف أينعم .. لكنه منطقي 100% علي مدار التاريخ ) ..

مهم أوي تفهم ده و تفكّر فيه .

المهم .. هي أمريكا و بريطانيا كانوا بيتاجروا في إيه في الصين أساساً ؟..

الله ينور عليك .. الشاي و الأعشاب سيادتك ..

آه والله العظيم ..

و لما الإمبراطور الصيني قرر زماااااااااااااان إنه يقول لهم ( حاعلّي السعر ) .. راحوا مدخّلين الأفيون بلاده .. و حرفياً جرّوا سكّة إمبراطورية كاملة للكيف ..

لحد ما أصبح المواطن و المٌحارب الصيني .. عبد ل كيفه ..

( دي مرحلة إسمها حروب الأفيون ) .. من أقذر مراحل التاريخ عموماً ..

ف تتخيل بقي .. الأغنياء البشوات ولاد البشوات سنة 1927 .. كانوا محافظين علي مراكزهم دي إزاي ؟! ..

أكيد مش كلهم كانوا متواطئين .. و أكيد كان فيهم نسبة ضئيلة شريفة ..

لكن الأغلبية ؟!

و دي هي كانت وجهة نظر الحزب الشيوعي ( إن كل البشوات اللي في الصين يبقوا فاسدين ) .

المهم ..

شكري سرحان ( أقصد تشيانج كاي تشيك ) الظابط اللي طالع من أعماق الفقر و القحط .. بيتجوز البت ( ميي لينج ) .. و بتبدأ تقول له ( تؤ تؤ يا تشتش - كانت بتدلّعه - .. إنت لازم تتفرج علي فيديوهات طنط أمينة شلباية و تتعلم إيتيكيت عشان ماتكسفناش في الساحل الشرير ) .

و بالفعل .. بيبدأ ( تش تش ) يتأثّر .. لدرجة إنه بيغير ديانته للمسيحية ( نفس ديانة ميي لينج ) .. و يبدأ يتعلم منها إنجليزي ( هي كانت بتتفرج علي نيتفليكس من غير ترجمة عادي و واخدة كورسات مٌعتمدة ) .

ف لما كان بيقعد بالليل عالقهوة مع باقي الرجالة اللي بيحكموا الصين في الوقت ده ..

كان بيلاقوا الجماعة الشيوعيين بيتريقوا عليه .. و يقولوا له ( يا بتاع ميي لينج ) .. يا اللي المدام إشتراتك ..

و فنفس الوقت .. يرجع البيت بالليل .. يلاقي حماه قاعد بياكل بطّيخ و يقول له ( الجماعة الشيوعيين إصحابك بيعصّوا الصٌبيان عليا في الورشة ) ..

و إزاي إن الشيوعيين عايزين الصٌبيان يبقي لهم نصيب في الورشة .. و شغل نقابات و إعتصامات و دوشة .

ف بيطلع ( تشاينج ) يشرب سيجارة في البلكونة .. بيلاقي رسالة عالواتس من رقم أمريكاني بتقول له ( لو خلّصت علي الجماعة الشيوعيين دول .. حنظبطك و ندّيلك أسلحة و الصين تبقي لك لوحدك ) .

بيعمل لهم ( 👍 ) عالرسالة .. و يبعت فويس يقول ( أنا أساساً مش طايق العيال الشيوعيين دول من أول القصة ) ..

و بالفعل .. بينزل هو و إصحابه علي كل الشيوعيين في شانغهاي .. و بيدبّح فيهم ( حرفياً ) .

دي إسمها ( مذبحة شانغهاي - shanghai massacre ) سنة 1927 .. و بالرغم من القلش الرخيص اللي كتبته فوق ده ..

إلا إن الداوفع بالظبط زي ما كتبتها فعلاً ..

( رغبة في سٌلطة و فلوس أكتر , خوف من تأثير الشيوعيين و سيطرتهم لأنهم أكثر تأثيراً في طبقة الفلاحين خصوصاً , و الأهم .. تأثّره ب مراته و عيلتها و طبقتهم و أفكارهم ) .

و المذبحة بتخلّي الدم للرٌكب حرفياً ..

لكن .. شاب صغنن من الشيوعيين دول بيهرب في الجبال ..

إسمه : ماو زي دونج

بيرجع ( تشيانج ) بقي لبيته .. و يعلّق كهارب و يشغّل صابّات .. و يبدأ يحتفل إن الصين بتاعته ..

مين اللي بيشوف النور و يسمع الدوشة بتاعت الصابّات دي .. و هما أساساً كانوا مستنيين أى سبب عشان يتخانقوا ؟! ..

الله ينور عليك : اليابان 🤣 .

زماااااااااااااااااااااان .. أيام ما شرحت تاريخ اليابان .. شرحت دوافعهم إنهم يدخلوا يهاجموا الصين .. ف مش حاكتب ده تاني ..

المهم إن .. علي 1937 .. اليابان دخلت إحتلّت الصين ..

و علي مدار 8 سنين .. فضلوا يتخانقوا و يحاربوا مين ؟! .. الله ينور عليك .. ( تشيانج ) .

ف لما أمريكا طرقعت الإتنين النووي لليابان سنة 1945 .. اليابان ماكنتش بس مٌحتلة كوريا وقتها .. لا .. دي كانت مٌحتلة كذا حاجة تانيين .. و منهم الصين ..

ف راحت اليابان واخدة عزالها و مروحة ..

لكن بعد إيه ؟! ..

بعد ما خرتأت جيوش الصين لمدة سنين .

في السنين دي بقي .. إيه اللي حصل في الجبل ؟!

الله ينور عليك .. الشاب الشيوعي ( ماو زي دونج ) .. كان داير ليل نهار يجنّد في الفلاحين الفٌقراء .

( عشان تفهم حاجة هنا : القاعدة دي أزلية و مٌستمرة دااااااااااااااائماً .. عايز تكسب أى حرب مهما كانت .. إكسب الفلاحين الفٌقراء في صفّك ) .

عارفهم ؟! .. اللي هو إنت ك إسكندراني بتفضل تتنمّر عليهم في الصيف لما بييجوا يصيفوا عندك دول 🤣

و بالفعل ..

بمجرد ما اليابان طلعت من الصين ..

ماو زي دونج إستغل الفرصة .. و راح طالع ب جيش الفلاحين الفقراء اللي قعد سنين يجمّعهم و يدرّبهم .. و راح طالع عالعاصمة ..

تشيانج بص حواليه .. لقي إن جيوشه ماعندهاش قدرة إطلاقاً يلعبوا وقت إضافي ضد ماو زيدونج .. ده بالعافية إستحمل ال 90 دقيقة ضد اليابان ..

راح أعلن إنسحابه .. و راح لامم اللي في خزاين الصين ( حرفياً بالمناسبة ) من دهب و ثروات .. و نط في البحر و طلع مع شوية من اللي باقي من جيوشه علي ( جزيرة بعيدة في البحر كده إسمها تايوان ) .

ماو زي دونج يسيبه ؟! .. أبداً

طلع وراه .. و حاول ينط في البحر يلحقه .. لكن .. لأن الفلاحين الفٌقرا اللي كانوا أغلب جيش ماو .. ماكانوش بيعرفوا يعوموا ( تقريباً عشان لما كانوا بيروحوا يصيفوا كان بيتم التنمّر عليهم 😅 ) ..

ف بيتهزم جزء كبير من جيوش ماو في جزيرة في النص بين الصين و بين تايوان ( المسافة بين الصين و تايوان تقريباً تجيلها 150 كيلو في البحر ) .

( و ماكنش في سلاح طيران لسة للصين في الوقت ده )

ف بيرجع ماو علي الصين .. و بيبدأ يشوف بقي حيدير البلد إزاي و يظبطها شيوعية إزاي .. و يحلف إنه مش حايسيب تشيانج و حيطلع يجيبه أول ما يعرف يأجّر يخت .

و فنفس ذات الوقت .. تشيانج قاعد في تايوان .. يبعت رسايل سبام عالواتس و الفيس و تويتر لكل العالم إنه ( أنا لسة رئيس الصين الشرعي .. أنا جامد فحت .. اللي يعوز الصين في حاجة يكلمني أنا .. ماحدش يبعت حاجة للواد ماو زي دونج .. ده سارق الأكاونت ) .

و بمجرد ما الدنيا تبدأ تظبط مع ماو .. و يقرر إنه خلاص جيوشه إتعلمت إزاي تسبح ..

بيأجر بانانا .. و لسة حيطلع علي تايوان ..

يلاقي أمريكا و إنجلترا باعتين له يقولوا له : إرجع .

و إنك لو ضايقت تايوان في حاجة .. حنضايقك إحنا ..

طيب ليه ؟!

ليه أمريكا و إنجلترا فجأة يقرروا إن تايوان تحت حمايتهم ؟!

لأن زي ما شرحت لك .. الصين كانت شيوعية تحت قيادة ماو .. و الإتحاد السوفييتي في الوقت ده ( العدو الأكبر و اللدود ل أمريكا ) كان برضو شيوعي ..

و الحرب الباردة كانت مٌلتهبة جداً في الوقت ده ..

بالمناسبة ( سمّوها باردة ) .. لأنها كانت بعد اللسوعة بتاعت الحرب العالمية الأولي و التانية ..

ف معني الحرب الباردة هي : إحنا زعلانين من بعض أوي .. و مش حنكلم بعض و متخاصمين .. و عاملين بلوكات لبعض كمان ... لكن من غير ضرب عشان العركة لو إبتدت .. أستاذ أمير كرارة محذرنا إننا كلنا حنزعل أوي .

( العالم حرفياً كان كله زعلان من اللي حصل في الحرب العالمية التانية ) .

ف عشان أمريكا تفضل محافظة علي مسمار جحا الرأسمالي ده في المحيط الهادي ..

أعلنت إن ( تايوان ) حتفضل منطقة محظور اللعب فيها لمدة 30 سنة ..

ف تشيانج عند اللحظة دي بيقرر .. إن :

و حياتك يا سٌهير .. أقصد يا ماو .. ل حييجي اليوم اللي حتندم فيه علي كل شتيمة شتمتها ليا و إنت بتطردني من الصين .

و بالفعل ..

ده بيحصل ..

أينعم مش بيحصل في حياة تشيانج و ماو .. لكن في حياة خلفاؤهم ..

لكن بيحصل ..

و حالياً .. أحد أكبر أمنيات الصين في الحياة هي إن : تايوان ترجع لها ..

طيب ليه ؟! .. و ده حصل إزاي ؟!

دي حتة جزيرة صغننة لو جات موجة عالية شوية تقلّقها ..

إشمعني يعني ؟!

ليه حالياً تايوان أحد أقوي الأماكن في الكرة الأرضية بالكامل ؟!

و إيه هي بالظبط إجابة أول سؤال في البوست ( كام مليار دولار .. حتصرفهم إزاي ؟ ) ..

كل الإجابات دي إذن .. في الجزء القادم إن شاء الله .

و الله أعلم .