هي كيميا ؟! .. ما نلم من بعضينا و نعمل إحنا كمان شركة ضخمة زي LG كده ..

هي كيميا ؟! .. ما نلم من بعضينا و نعمل إحنا كمان شركة ضخمة زي LG كده .. و نجيب برضو (حازم إمام ) في الإعلان بتاعها .. إيه الصعب يعني ؟!

ده كان أحد تعليقات الأصدقاء مازحاً .. و إحنا بنتناقش .. هل البوست اللي فات ( بتاع اللاعيبة بتطلّع الفانلات برة الشورت ليه ) .. إنتشر ل ملايين المشاهدات بسبب إن الناس إهتمّت ب تاريخ صناعة المطاط و الصناعات الكيميائية ..

ولّا بسبب إن الناس إهتمّت ب فانلّات اللاعيبة و شورتاتهم 🤣🤣 .

و سبب تعليق الصديق ده .. هو إني إندمجت في شرح جزء كبير من قصص و تاريخ الصناعات الكيميائية في العالم الحديث .. و علاقتها المباشرة ب قوة الدول دي إقتصادياً و سياسياً .. و درجة وعي شعوب الدول دي .. مقارنة ب درجة وعي شعوب الدول الضعيفة في الصناعات دي .

و المثال اللي إستخدمته .. هو ( حازم إمام ) ..

و إن فكل ماتش تقريباً .. بيظهر الإعلان بتاعه ل شركة ( LG ) .. و مع ذلك .. الأغلبية من الناس إتعلّمت ماتسألش ..

هما مين ( LG ) دول بالظبط ؟! .

زمااااااااااااااااااااااااااااااااااااااااان .. سنة 2014 .. أول سلسلة بوستات كتبتها ضمن أول حملة دعائية ل ( تٌشكر ) .. كانت سلسلة بوستات بتشرح تاريخ : سامسونج .

و كنت ناوي أكتب أيامها سلسلة تانية تشرح تاريخ ( LG ) .. و لكن كالمعتاد كنت كسّلت و أجّلت الموضوع ل حين ما ييجي وقته ..

و بعدين لما بدأت من سنة تقريباً كتابة تاريخ ( كوريا و اليابان و الصين ) .. و إزاي و إمتي و ليه طلع حاجة إسمها ( مسلسلات الدراما الكوري .. و ثقافة ال كي بوب ) ..

كنت ناوي إني عند مرحلة مٌعينة حاكتب عن LG .. و برضو كسّلت و أجّلت .

طيب .. ليه كنت ( باكسّل ) ؟! .. إيه الصعب يعني في إني أكتب نفس القصة اللي حتلاقيها بكل سهولة لو عملت سيرش علي جوجل ؟!

راجل طيب و إبن حلال .. عمل شركة بتبيع كريمات وش ( آه والله العظيم ) .. و بعدين هوب عمل شيفت كارير ( مش كارير شيفت .. لا .. إحنا بنتكلم مصري أصيل هنا 🤣 ) .. و بقي بيبيع رداوي و تيليفزيونات .. و ربنا كرمه و بقي ملياردير ..

بس خلاص ..

فين الصعب بقي ؟!

الطريقة دي في حكاية قصص الإمبراطوريات الضخمة اللي زي LG .. بتستفذّني جداً جداً .. ( بالظبط زي ما إنت تم إستفذاذك عشان كتبت إستفذاذ بالذال دلوقتي 🤣 ) .

طيب .. بتستفذّني ليه بقي ؟!

لأنها مقوّرة .. مٌجرّد قشرة من أسامي و تواريخ و نسيج قصصي رخيص .. مافيهوش أى شرح إطلاقاً لأسباب أو حقائق تساعدك تفهم الإستفادة الحقيقية ..

و ده للأسف بتشوفه في أغلب محتوي ال ( بوب ساينس ) علي الإنترنت ..

إنه بيبقي مٌحتوي بيدّي وهم المعرفة .. و لكنه لا يٌسمن ولا يٌغني من جوع إطلاقاً ..

عشان تفهم قصة LG .. لازم في الأول تفهم شكل كوريا ك دولة مٌحتلّة من اليابان .. من 1910 ل 1945 ..

دولة ضعيفة جداً .. عندها في تاريخها كم ضخم من الكبرياء و الموروثات الثقافية .. لكنها في الحقيقة كانت طول الوقت ضعيفة بين إمبراطوريات الصين و اليابان .

عايزك تتخيل شكل طبقات شعب كوريا المٌختلفة .. من أول الفقييييير فقر مٌدقع لدرجة إنه ماعندوش رفاهية إنه يشوف نفسه ك إنسان يستحق حرية ضد إحتلال ياباني .. و أصبح راضي بحياة عبودية كاملة تحت إحتلال اليابان ..

المهم إنه يلاقي أكل ..

ل طبقة وريثة عز آباء عن أجداد .. طبقة أرستقراطية إتربّت علي إن كرامتها أغلي من أى شيء .. حتي لو حيموتوا من الجوع .

الإختلاف الطبقي ده ما زال موجود حتي يومنا هذا في أعماق وجدان الشخصية الكورية .. و ده اللي بيشكّل أغلب إتجاهات إنتاجهم الدرامي لو متابع ( أنا قعدت فترة أتفرج علي مسلسلات كوري بس في حياتي .. بسبب إني شفت مسلسل إسمه Winter Sonata زمان سنة 2009 .. و فضلت أعيّط أسبوع بسببه 🤣 ) .

المهم ..

إن من أعماق الطبقات الأرستقراطية اللي كانت بتعاني بالشكل الأكبر عاطفياً و عقلياً بسبب إحتلال اليابان .. بيعيش ( كوو إين هوي ) اللي إتولد سنة 1907 .. و بيشوف إزاي إن :

الأخلاق لوحدها مش كفاية .. العواطف لوحدها مش كفاية .. المبادئ لوحدها مش كفاية .. الشعارات مش كفاية ..

إنت محتاج قوة .. و إلا .. فأى لحظة المٌحتل الياباني يحب يمارس قوته عليك .. حيقدر بكل سهولة .

طيب .. إيه هي القوة اللي تقدر تسعي لها في ظل إحتلال زي ده ؟!

بالظبط .. الفلوس .

و ده اللي ( كوو ) إتعلمه من أبوه .. أبوه كان جزء أساسي من حياته هو تهريب فلوس للمقاتلين الكوريين المنفيين اللي كانوا بيحاربوا الإحتلال الياباني .

ف لما وصل 24 سنة .. ( كوو ) قرر يبتدي يتاجر في الرز .

إشمعني ال( رز ) بالذات ؟! ..

عنداً في اليابان .. الرز بالنسبة لليابان .. زي العيش و الفول و الفلافل و الكشري بالنسبة لنا في مصر هنا .. محصول إستراتيجي سيادي بنفس أهمية مزارع شجر الكشري فمصر بالظبط .

و طبعاً كما تتوقع .. فشل .. و بعدين فشل تاني .. و تالت .. و عاشر ..

بس الفكرة هنا ماكنتش إنه ( عايز يسيطر علي تجارة الرز ) . .

ال ( رز ) كان مٌجرد وسيلة .

الغاية كانت ال ( لوجيستيكس = Logistics ) ..

أى حد إشتغل في التجارة بأى صورة من صورها .. يفهم كويس جداً جداً إن أسهل حاجة هي ال ( بٌضاعة ) .. لكن أصعب و أهم حاجة هي ال ( لوجيستكس ) .. يعني :

مخازن , طرق , شحن , توزيع , ....

و ده اللي تقدر تشوفه حتي يومنا هذا بالمناسبة ... و تفهم منه بكل وضوح ال ( مٌبتدئ ) ال ( هاوي ) اللي قاعد يصرف فلوس علي إعلانات كورساته اللي بيوعد تكسّبك ملايين .. و أول ما تسمع له .. تلاقيه بيتكلم عن ال :

( بضاعة = winning product ) ..

ف تفهم مباشرة إنه هاوي جرّب سبوبة و مشت معاه برة .. و لكنه مش فاهم إن السبّوبة أول ما تقف ( و لازم حييجي وقت و تقف ) .. غالباً حيلبس في الحيط .

و الفرق بينه و بين اللي جرّب مرة و إتنين و عشرة .. و فهم إن التجارة هي ال ( مخازن , طرق , شحن , توزيع , إستيراد , علاقات , تصدير , .... ) .

ف يقدر بكل سهولة فأى وقت إنه يبيع النهاردة رز و يفشل .. ف يغير و يبيع بكرة إخرام جاهزة و يكسب .

و ده بالظبط اللي ( كوو ) عمله ..

لا .. ماتاجرش في ال( إخرام الجاهزة ) .. و لكن ال (فحم ) .

الموضوع كان بأمانة ضربة معلّم .. حاجة كدة علي مستوي عبد الغفور البرعي 🤣 ... ( فحم .. عبد الغفور البرعي .. المعلم سردينة .. شيشة .. خدت بالك من العلاقة ؟! 🤣 )

لو تفتكر ...

سنة 1945 .. 6 أغسطس بالظبط .. أمريكا ضربت هيروشيما بالنووي ..

و بعدها ب 3 أيام ( 9 أغسطس ) .. ضربت ناجازاكي ..

و بعد ده بأسبوع بالظبط .. ( 15 أغسطس ) .. اليابان ( اللي حتلاعب البرازيل النهاردة إن شاء الله 😅 ) ... طلعت من كوريا .

يروح عمّك ( كوو ) عامل إيه ؟! ..

بالظبط كده الله ينور عليك ... راح طالع مباشرة علي أحد أكبر مصدري الفحم في العالم ( أمريكا ) .. و قال لها :

أنا بقي حافتح لك سوق في كوريا اللي لسة متحررة طازة من اليابان .. و حنبدأ بقي ناخد شاور و نبتدي نصنّع و ننتج و نشوف دٌنيتنا .. و حنحتاج فحم كتير أوي ..

و لأن ( كوو ) كان بالفعل معاه علي موبايله ( سنة 1945 ) أرقام كل الناس اللي لها علاقة ب ( لوجيستيكس ) التجارة .. كان بس محتاج شوية فلوس عشان يجيب أول شحنة فحم ..

ف مين بقي يدّيله الفلوس دي ؟! ..

بالظبط كده الله ينور عليك .. نسايبه .. قرايب مراته ..

راجل طيب و إبن حلال هو كمان إسمه ( هاه مان يونج ) .. قال له :

بص يابا الحاج (كوو ) .. أنا حادّيك الفلوس اللي إنت عايزها .. بس تاخد الواد إبني ( هاه يون جو ) .. و تودّكه معاك و تعلمه التجارة .

و ده .. اللي بيحصل سنة 1945 .. و بيبني ما سيٌعرف بعد كده حتي يومنا الحالي بإسم ال :

تشايبول .

تشايبول دي كلمة في كوريا معناها :

إمبراطوريات البيزنس الضخمة اللي هي عبارة عن عائلات في بعضشيها و ماحدش من برة يدخل فيها

هنا لازم تسأل سؤال مهم جداً جداً .. و هو :

هي كوريا يعني ماكنش فيها فحم يكفّي الشيش اللي فيها ولامؤاخذة ؟! ..

إيه اللي يخلّي الناس تروح تشتري فحم من برّة ..

أقول لك إنك ماخدتش بالك إن المٌحتل لما بيسيب بلد .. مش بيسيبها زي ما دخلها ..

فاكر لما كلمتك عن الإختلافات الطبقية بين الشعب فوق ؟!

عايزك كمان تلقي نظرة علي الخريطة لو قدرت ... و تشوف هي كوريا مكانها فين بالظبط بين الصين و اليابان .

الصين اللي كانت بدأت تتشيّع ( شيوعية يعني ) .. و لو متابع كنت شرحت ده زماااااااااااااااان في بوستات إزاي الشيوعية طلعت من ألمانيا أيام ماركس راحت الصين .

و بالتالي .. كل شمال كوريا كان بالفعل مليان مصانع .. و غني جداً جداً .. و جغرافياً كان عندهم كل حاجة عما عايزينها لأن الصين علي حدودهم ..

و لكن .. العامة من الشعب هما اللي بقوا أغنياء ..

مش ( طبقة الأرستقراطيين المأصّلين اللي شبعانين ) ..

فاهم ؟!

يعني .. في الشمال .. كان عندك طبقة عاملة فقيرة ثقافياً و كانوا شغالين عمالة عن اليابان .. و قريبين جداً من الصين جغرافياً (اللي كانت شيوعية في الوقت ده ) ..

و في الجنوب .. طبقة أرستقراطية جداً .. مأصّلين بقالهم قرون و أغنياء ثقافياً جداً .. و لكنهم فقراء جداً جغرافياً ..

الشمال .. شبع بعد جوع فجأة ..

و الجنوب .. جاع بعد شبع لقرون ..

و المٌحتل الياباني كان مدوّر الضرب في الناحيتين لمدة 35 سنة ..

تتخيل بقي .. لما المٌحتل ده يمشي فجأة ..

إيه اللي يحصل ؟!

التكملة البوست الجاي بقي ... كفاية كده حتي الآن .. و إلا البوست حيبقي طويل و الناس مابتحبش كده 🤣 .

و الله أعلم .