" ولا يا مايكل .. عايزك ياض تمنتجني ..

" ولا يا مايكل .. عايزك ياض تمنتجني .. و تحطني بالذكاء الإصطناعي في المشهد الساخن ال+18 بتاع فيلم ( 12 راجل متضايقين ) " ..

رد عليه مايكل .. فاراداي 😅 .. بهدوء و بلكنة بريطانية شعبية سرسجية رصينة :

" يا عم لا يا عم .. حرام .. و بعدين أنا لسة ماسك الشغلانة أول إمبارح .. سيبني أقلّب رزقي بالحلال يا جدع .. و بعدين صاحب السايبر لو شافني بامنتج لك مجاناً حيرميني برة .. و مين غيره حيشغّل عيّل يتيم فقير لسة عنده 14 سنة زيي ؟! "

المشهد السابق ده .. بالرغم من هزليته 🤣 .. إلا إنه بالفعل بيحمل تقريباً أغلب المعلومات اللي يهمني جداً جداً إنك تعرفها عن :

مايكل فاراداي ..

و الأهم ... العالم اللي عاش فيه ( مايكل فاراداي ) ..

فاراداي .. اللي سنة 1821 إكتشف علوم الكهرباء و الموجات الكهرومغناطيسية و المواتير و الدينامو و المٌحركات .. اللي إحنا لسة عايشين بيها و بنستخدمها حتي يومنا هذا ..

و اللي هو تقدر تتخيله بالظبط زي الطفل ال14 سنة في المشهد السابق ده .

إزاي ؟! ... خليني أشرح :

أغلب الكٌتب اللي قرأتها عن تاريخ ( مايكل فاراداي ) .. بتحكي في كام سطر عن إنه كان :

فقير جاهل من أعماق حواري و عشوائيات لندن .. و بعد ما أبوه مات و هو عنده 14 سنة .. عشان يلاقي ياكل .. راح يشتغل صبي تجليد كٌتب ولامؤاخذة ( Bookbinder apprentice ) ..

و إنه عشان صاحب ورشة تجليد الكٌتب دي كان طيب و إبن حلال .. كان بيسمح له إنه يقرا الكٌتب اللي هو بيجلّدها ..

و بالتالي .. و علي مدار 7 سنين بيقضيهم فاراداي في الورشة .. بيقرا كل ورقة بتقع تحت إيده .. لكن كتاب مٌعين هو اللي بيعلّق في دماغه ..

كتاب عن ال ( كيميا ) .. بتاع واحد إسمه ( جين مارسيه ) .

و بس كده خلاص .. إنتهت القصة .. و إن ده هو السبب إن فاراداي إهتم بالكيميا .. و يلا بينا عالجزء التاني اللي بيحكي حياته في المعمل .

لكن ..

ثانية واحدة ؟!

هو إزاي أساساً عيّل مراهق إتعلم يقرا و يكتب بالعافية في ورشة تجليد كتب .. يفهم كتاب في الكيميا ؟!

إنزل لف في أى شارع أو حارة .. و إتفرج عالمراهقين بيعملوا إيه ولامؤاخذة 🤣🤣 .. شٌفت حد منهم ماسك كتاب كيميا ؟!!

و بعدين سؤال كمان ..

هو أساساً .. ليه في ورشة تجليد كٌتب في أعماق حواري لندن ؟؟!!!! ..

يعني .. أنا أفهم قهوة بلدي .. محل فرارجي .. محل شاورما سوري ..

لكن ورشة تجليد كٌتب ؟!!!

السؤالين دول إجابتهم واحدة تقريباً .. و إجابتهم ... مهمة جداً جداً جداً ..

و إجابتهم دي .. أحد أهم مكونات حياة فاراداي بالكامل .. و اللي فضل فاكرها حتي قبل ما يموت .. و هو بيرفض ترقيته ل ( سير - Sir ) .. مٌتخيل ؟!

إجابتهم هي :

العلوم و الذكاء .. مش حكر علي الأغنيا ولاد الناس بتوع بابي و مامي .

ببساطة ..

لو تفتكر من سنة تقريباً لما كتبت بوستات ( عصر النهضة بالحلمنتيشي ) ..

و كتبت عن أحد أهم اللحظات الفارقة في التاريخ بين تاريخ أوروبا .. و تاريخ الشرق الأوسط .. و هي : إختراع الطباعة .

شرحت إن : لما تم إختراع الطباعة في سنة 1500 تقريباً .. الطباعة مانتشرتش لأن الناس كانوا عايزين يقروا الكتب الصعبة المجعلصة اللي لغتها تقنية جداً أو لاتينية جداً أو معقربة جداً ..

و لكن .. الطباعة علي مدار 300 سنة حرفياً إنتشرت بسبب رئيسي و أساسي جداً هو : التفاهة 🤣 .

آه والله العظيم .

الموضوع منطقي و إحصائي بحت .

الغالبية من الناس .. ماتقدرش تفهم اللي يفهموه الأقلية ..

من كل 100 شخص .. حتلاقي 10 بالكتير مستوي ذكائهم عالي جداً .. لكن الباقيين ؟! ..

ال 90 الباقيين عايزين يعيشوا حياتهم عادي خالص .. يشتغلوا .. يرجعوا يتفرجوا علي حاجة تافهة .. و يناموا .. و شكراً .

الباقيين دول ( الأغلبية ) هما المٌحرك الإقتصادي و المالي الرئيسي في التاريخ و الحضارات و الشعوب .

و السلعة الرائجة للأغلبية دول هي : الساهل التافه المثير .

فبالتالي .. الطباعة إنتشرت خلال أول 100 سنة في حياتها ( 1500 ل 1600 ) بسبب :

إن الأغلبية عايزين يقروا :

1- المقالات و المنشورات الحرّاقة اللي فيها ( مارتن لوثر ) بيقصف جبهة الكنيسة الكاثوليكية في الوقت ده ..

و بيكشف فسادها المادي و الأخلاقي .. و دي كانت هي الفضيحة و التريند اللي الناس بتجري وراه .

2- الإنجيل اللوثري : و اللي كتبه مارتن لوثر ب لغة ألمانية حلمنتيشية عامية مفهومة للعامة من الشعب .. بدل اللغة اللاتينية المٌعقدة اللي ماكنش حد بيفهمها غير قلة قليلة جداً من الكهنة و الرهبان .. مش كل الرهبان كمان .

3- القصص الرومانسية ال+18 اللي إنتشرت بفظاعة زي ما بيحصل دايماً في كل التاريخ .. و أصبحت بيتم تداولها بين العامة بنفس النهم اللي كانوا بيتداولوا بيه أشعار الهجاء الحسي أو الأشعار ال+18 في تاريخ العرب .. أو بنفس ذات معدلات الإنتشار بتاعت الأفلام ال+18 اللي كانت تٌعتبر أحد أهم أسباب تطور صناعة الميديا و الإنترنت في بداية التسعينيات ( قسماً بالله ) .

** لازم هنا أوضّح عشان قادر أتوقع بعض التعليقات الذكية جداً :

أنا بكل تأكيد مش باقول إن يلا بقي كلنا نشجع ال+18 ..

و لكن ..

لازم تفهم العامة بيفكروا إزاي .. و تنزل لمستواهم .. ماتفضلش تشتكي إنهم ( غوغاء عامة أغبياء ) ... لا ... اللي يقول كده هو اللي ( غبي ) .

المهم ..

كتاب الكيميا اللي بيقراه بقي ( مايكل فاراداي ) .. كان من النوعية دي ..

كتاب مغضوب عليه من ال( نٌخبة ) .. و شايفينه إنه ( بوب ساينس ) .. و إن العلوم مش المفروض تتكتب بالشكل ال( هٌزء ) ده ..

لأن الكتاب كان مكتوب ل ( ستّات البيوت ) ..🤣

حرفياً كان ( إزاي يا ست البيت تعملي تجربة كيميائية فمطبخك بأقل و أسهل المقادير .. و إكتبي ورايا يا ست الكل ) 🤣🤣🤣

ولا بقي شغل معادلات كيميائية أو رياضية أو أي بتنجان من ده ..

و لكن .. لغة بسيطة و سهلة جداً جداً ..

و الكتاب ده .. و غيره من آلاف الكتب ( السهلة البسيطة ال .. حلمنتيشية ) اللي كانت تٌعتبر هي تسلية العامة و الغوغاء و البٌسطاء .. هو اللي ساعد إن يبقي نشاط مٌربح إن أى حد معاه شوية فلوس ... يروح يفتح مطبعة في حارة فقيرة .

فاراداي بيقرا الكتاب ... و حاجة فعقله تنوّر ..

نفس الحاجة اللي سهل و ممكن إنها تنوّر فدماغ أى إنسان .. لو فقط دخلت له من الباب المناسب ..

نفس الحاجة اللي نوّرت في دماغ ( ليوناردو دافنشي ) و جيله .. لمّا لقي حد يصرف عليه و يهتم بإنتاجه الفنّي و الإبداعي ..

و بعدين جاليليو جاليليي بيتولد مٌحاط بقصص الفنانين دول .. ف بتنور في دماغه هو كمان .. و يعمل التيليسكوب سنة 1609 اللي بيبيعه ل عٌمدة فينيسيا .. و يشرح له إنه يخليه يقدر يشوف الأعداء من بعيييييييييد ...

و بعدين ياخد الفلوس و يصرف علي أبحاثه .. اللي بينشرها بعد كده ( عن إن الأرض بتدور حوالين الشمس ) فالكنيسة تضايق و تحبسه في البيت لحد ما يموت بحسرته يا عيني .

لكن الكٌتب اللي هو نشرها ( عنداً في الكنيسة ) بتسافر لحد ( يوهانس كيبلر ) فألمانيا اللي دماغه بتنور هو كمان .. و بالرغم من إنه عبقري في الرياضيات ( كانت لسة هندسة اللي شرحها إقليدس و جبر اللي شرحه الخوارزمي بس أيامها ) .. إلا إنه كان مفلّس ..

ف بيروح يشتغل في بلاط الإمبراطور الروماني ك ( واحد بيحسب أماكن النجوم ) عشان يقول لهم يزرعوا إيه إمتي ..

و أثناء ما هو هناك .. بيطلع حسابات مدارات الكواكب ( البيضاوية ) .. و ينشر بوستاته دي .

اللي بتسافر لحد ( رينيه ديكارت ) في فرنسا ( كان جٌندي مٌرتزقة بالمناسبة ) .. اللي بيقرا كلام كيبلر .. و بيخترع موضوع ( الإحداثيات الكارتيزية ) ال ( س ) و ال ( ص ) .. اللي درسناها أول مرة في إبتدائي 🤣 ..

و إختراعه للإحداثيات دي كان وسيلة منه إنه يقرا ميدان المعركة بسهولة أكتر و كفاءة أكتر ..

( كان في لعبة بنلعبها زمااااااااااااان إسمها بحار .. هي نفس القصة لو تعرفها )

شغل ( ديكارت ) ده بيسافر ل هولندا .. ف يقراه ( كريستيان هويجنز ) .. اللي بيلاحظ إن كده إحنا نقدر نحسب المسافات ( بالإحداثيات الكارتيزية ) لكن لسة ماحدش لعب في الوقت !! ..

ف بيخترع الساعة البندول ( اللي فكل أفلام توم و جيري 🤣 ) ..

و يبقي كده نقدر نتحرك في أماكن مفتوحة زي المحيطات و البحار .. و نحسب مكاننا و وقتنا .. ف نعرف نسوق البانانا فين و إزاي .

ف علي سنة 1642 .. و أثناء ما بيغنوا ( حلقاتك برجلاتك ) فسبوع الواد الصغير اللي لسة مولود .. و بيسألوا أبوه ( حتسمّيه إيه يابا الحاج ) .. ف يقول :

حاسمّيه ( إسحاق ) .. ( إسحاق حبيب أبوه و دلّوعة أمه .. نيوتن )

و بعدين بيقرروا إنهم يختصروا الإسم ل ( إسحاق نيوتن ) 🤣 عشان يبقي ساهل و هما بيندهوا عليه .

بيكون الناس خلاص فهموا إن :

اللي فاهم ( حساب و هندسة ) .. كان بيبقي حد جامد زوحليقة و بيكسب أى حرب ..

ف علي سنة 1660 .. الدولة بتتدخّل هنا ( بريطانيا ) و بتبني ( المٌجتمع الملكي - Royal Society) .. اللي وظيفته هي دراسة كل الحاجات العجيبة اللي بتكسّب الناس الحروب دي .

بيكون نيوتن في الوقت ده عنده 18 سنة .. و بيروح يحنكش هناك لحد ما بيلتحق ك ( زمييل ) بيه في 1672 ... و فآخر القصة بيكون الرئيس بتاعه عموماً ..

طبعاً فرنسا شافت بريطانيا عملوا ( مٌجتمع ملكي ) .. ف قالوا ( هو إحنا أقل ولا إحنا أقل ؟! ) .. و راحوا عاملين ( الأكاديمية الفرنساوية للعلوم - French Academy of Sciences ) سنة 1666 ...

بس سنة 1646 .. بيكون إتولد الواد الجامد أوي ( كنت كتبت عنه كذا بوست تفصيلياً زمان لو تفتكر ) ( جوتفريد ويلهيلم لايبنتز ) فألمانيا ..

و لايبنتز بيكبر .. و يقرا كل اللي فات ده .. و يقرر إن منهج ثانوية عامة بتاع الرياضة ف مصر قليل .. ف بيخترع التفاضل و التكامل .. تقريباً عشان المدرسين الخصوصيين ياخدوا فلوس زيادة 🤣🤣🤣 ..

لكن ( نيوتن ) بيطلع و يقول ( و حياة النعمة دي .. و يمسك التفاحة اللي فوق دماغه ) .. و يقول إنه هو اللي إخترع التفاضل و التكامل الأول .

طبعاً الخناقة بتكبر ..

لكن نيوتن عشان مسنود ب ( المجتمع الملكي ) البريطاني .. بيكسب ..

و لايبنتز بيفضل يلعن و يسب فيه لحد قبل ما يموت تقريباً ..

المهم ..

كل الناس بتموت .. نيوتن مات ( 1727 ) .. و لكن علي 1700 .. و أثناء ما كان لسة بصحته .. كان وصل إنه مسك رئاسة المعهد الملكي .. و حرفياً كان بوب الرياضة الكبير .. و العلوم و الهندسة كمان ..

الراجل كان مابيزهقش ( فعلاً بالمناسبة ) .. نيوتن كان بيقعد لوحده بالأيام .. ولا بيحتاج يفتح فيس ولا إنستاقرام و لا كان بيبعت رسايل في ال (others ) ل الإنفلونسريات بتوع بريطانيا يقول لهم ( عينيكي فيها حزن ) ..

الراجل كان من أشهر الحاجات عنه هي :

" إديني يابا شوية ورق و قلم و حل عن نافوخي الله يبارك لك و عدّي عليا كمان شهر مثلاً " .. و في الشهر ده كان بيكون إخترع مجال علمي جديد تقريباً 🤣 .

ف الناس خلاص .. سابت له الرياضة و الهندسة 🤣..

و علي 1770 تقريباً .. واحد فرنساوي إبن حلال إسمه ( أنطوان لافواسير ) .. كان معاه فلوس كتير فحت ( كان شغال محصل ضرايب ) ..

و بيقفل علي نفسه من الزعل ( عشان فرنسا طلعت من كاس العالم ) ..

و بيبدأ يدرس العلم اللي الكل كان بيهرب منه عشان الكنيسة بتخوفه ( الخيمياء = الكيمياء ) .

تاريخ ال ( كيميا ) في العالم مٌرتبط بشكل ضخم بال ( سحر و الشعوذة و الدين و الكنيسة ) .. ف كان الناس بتخاف إن إسمها يرتبط بيه ..

لكن علي 1770 .. أنطوان لافواسير ( أبو الكيميا الحديثة ) .. بيقرر إنه يقطّع البطاقة .. و بيشتري كل يقدر عليه من موازين و عدد و أنابيب .. و بيعيش بقي .. بيفضل يخترع و يكتشف ..

لدرجة إنه هو اللي بيسمّي ال( أكسجين ) أكسجين .. قسماً بالله ..

يعني تخيل من غيره كل كوافيرات مصر في الحارات و العشوائيات كانوا حيضربوا شعر الستّات إيه 🤣؟!

المهم .. الراجل بيفضل شغال علي حلمه و هدفه ( الكيميا عموماً مش كوافيرات حواري مصر ) .. و يجيب فلوس الضرايب و يصرفها علي شغله ...

لحد ما الثورة الفرنسية بتقوم ( اللي كان فيها الفقر زعلانين من ماري أنطوانيت اللي كانت بتقول لهم لو مش لاقيين عيش كلوا جاتوه 🤣 ) ..

ف لقوه راجل بتاع ضرايب معاه فلوس كتير .. يبقي أكيد فاسد ..

الراجل كان لسة حيقول لهم ( يا جدعان أنا عالم يا جدعان ) .. راحوا راميين دماغه في المقصلة 🤣 ..

و القاضي الفرنساوي رايح قايل و هو بيحكم عليه ( The Republic has no need of scientists. ) ..

أو ما معناه ب لكنة فرنسية رصينة ( الجمهورية بتاعتنا مش محتاجة علماء )

المهم بقي .. إن علي بدايات ال 1800 كل كتابات الكيميا بتاعت المرحوم أبو راس مقطوعة ( أنطوان ) .. بتكون سافرت شرق و غرب ..

و إقرا الحااااادثاااااااا .. إقرا الحادثاااااااااا .. شوف الراجل اللي قطعوا دماغه كان بيقول إيييييييه ..

ف بتوصل كتاباته دي لإيطاليا .. و بيقراها راجل طيب إسمه ( أليساندرو فولتا ) اللي كان متسمّي تقريباً علي إسم ( أليساندرو ديلبييرو ) بتاع المنتخب 🤣 .

و ( فولتا ) الطالياني .. بيقرا كلام ( أنطوان ) و يخترع البطارية ( الكيميائية ) .. ف مين بقي بيشوف الموضوع ده ؟!

الله ينور عليك .. الجينيرال الفرنساوي اللي مسك بعد الثورة الفرنسية ( نابوليون بونابارطا ) ..

و يقول ( جحا أولي ب لحم طوره ) .. هاتولي الواد فولطا ده ..

و راح واخده من إيطاليا خلّاه يحترف ففرنسا .. و سماه ال ( كونت فولتا ) 😅

و لكن .. فنفس ذات الوقت ..

كتب ( أنطوان أبو الكيميا ) .. كانت سافرت لإنجلترا برضو ..

و هناك بتدخل فمكتبة ال ( معهد الملكي = Royal Institution ) ده غير ال ( مجتمع الملكي بتاع نيوتن بالمناسبة ) ..

المعهد الملكي ده مؤسسة بيبنيها واحد إسمه ( رامفورد ) ..

هو أساساً جاسوس أمريكي .. لكن راح عاش فبريطانيا ... و قرر إنه يقلد الأستاذ محمود عبد العزيز في رأفت الهيجان .. و بني مؤسسة ضخمة ك ( غطاء لأنشطته ) ..

و الباشمهندس ( كونت رامفورد ) ده أساساً أصبح بعد كده مادة خصبة لكل قصص جيمس بوند و ( كيو ) و الكلام ده في تاريخ بريطانيا بالمناسبة .

المهم ...

في المعهد الملكي ده .. عشان يلاقوا فلوس .. كانوا بيعملوا حفلات و ليالي أنس و فرفشة للطبقة الحاكمة الأرستقراطية بتاعت بريطانيا .. ( نفس شغل رأفت الهيجان بالظبط ) ..

ف جه واحد عنده كاريزما جامدة ف#%# .. إسمه ( هامفري ديفي ) ..

واد كده لما يطلع يتكلم في الفيديوهات بيجيب مشاهدات بالملايين ..

و خلّوه في الحفلات دي يطلع يعمل تجارب قدام المعازيم ..

كان بيجيب البطارية اللي الواد الطالياني فولطا عملها .. و يوصلها ب جراكن سوايل عجيبة كدة .. و يطلع دخان ملون و حاجات الناس تشوفها تصقف ... و يدّوله فلوس ..

خد هو الفلوس دي .. و بني أجمد معمل كيميا شافته إنجلترا في الوقت ده .

و بقي بينتج حاجات كيميائية و سٌمعته إتشهرت جامد أوي ..

لحد ما إتحسد و إنفجرت فوشه تجربة و إتعمي شوية 🤣🤣🤣 ..

طيب .. نقفل المعمل بقي ؟! ..

لاااااا .. إحنا نجيب حد يساعده ..

مين يا ولاد ؟! .. نجيب مين يشتغل مرمطون عن هامفري ديفي يا ولااااد ؟!

بالظبط كده .. في حد كان باعت له ( كتاب متجلّد و متكلّف و شكله حلو ل شوية كلام كيميا واضح إن اللي كاتبه هاوي و مايعرفش يكتب معادلة واحدة حتي ) .. و بيلح عليه إنه بس يرضي يشغله صبي عنده ..

إسمه كان :

مايكل فاراداي 🙂.

و هامفري بيبعت ل فاراداي و يقول له " تعالي " ..

لكن تعالي بكرة بقي مش النهاردة عشان البوست طوّل جداً ..

و غالباً أساساً ماحدش بيعرف يقرا البوستات الطويلة دي كلها ..

مع إنه قسماً بالله إختصار ل 300 سنة من القصص و الحكايات و الكتب اللي باتألم مع كل سطر أعدّيه بدون ما أكتبهم 🥹😅 ..

لكن .. ما علينا ..

إيه اللي بيحصل بعد كده بقي ؟! ..

و إزاي بعد كده هامفري ديفي حيلعن اليوم اللي رد فيه علي رسالة ( فاراداي ) ..

كل هذا و أكثر .. في الأجزاء القادمة إن شاء الله .

و الله أعلم .