الإحصائيات بتقول علي الأقل ( خمسين ألف بنت و إمرأة ) ..

الإحصائيات بتقول علي الأقل ( خمسين ألف بنت و إمرأة ) .. و لكن علي الأغلب العدد وصل ل ( 200,000 ) .. من نساء آسيا .. تم إستعبادهم جنسياً و الإعتداء عليهم بشكل ممنهج و مستمر من الجيش الياباني خلال فترة الحرب العالمية التانية ..

و أغلب العدد ده كان من : كوريا .

الإعتداء الجنسي أحد أكثر الأسلحة المشهورة في تاريخ اليابان .. حتي في فترة حروبها الداخلية .. و بينهم و بين بعض .. مدي التوحّش و التنكيل بالنساء في الحروب و النزاعات اللي مدوّن في تاريخهم .. من أفظع ما يٌمكن إنك تقراه في تاريخ العالم أجمع .

و ده سبب أساسي جداً و مباشر لشكل الثقافة اليابانية المٌعاصرة و كيفية تعاملها مع الأنثي جنسياً .. من أكثر صورها براءة ( في الأنيمي و المانجا الكيوت الجميلة ) .. لحد أكثرها تطرّفاً ..

و من أهم أسباب حياة اليابان المٌعاصرة و مشاكلها مع الجنس و المرأة عموماً .. و إنها من أقل مٌعدلات الإنجاب علي مستوي العالم .. و إن اليابان من أقل الدول علي مستوي العالم بالكامل في السعادة الجنسية .

لكن البوست ده مش عن اليابان .. أنا كتبت بوستات كتير عنهم ..

البوست ده هو الجزء التاني في قصة ( LG ) ..

و سبب الإفتتاحية المؤلمة دي للبوست .. هو إنك تفهم سبب التحوّل المباشر العجيب من إن (كوو ) مؤسس LG .. فجأة يقرر يبيع ( مستحضرات تجميل ) .. بعد ما كان بيتاجر في الفحم !! .

كوريا خلال فترة الإحتلال الياباني لها لمدة 35 سنة .. إتعلمت تكره الجمال في نساءها و بناتها ..

المٌعتاد إن العيلة اللي كانت يتولد فيها بنت .. إن البنت يتقص لها شعرها زي الولاد دايماً .. و طول الوقت يفضل وشها متلطّخ بالتراب و الهباب ..

ممنوع منعاً بااااااااتاً إنها تبان جميلة ..

و إلا ... كان بيتم أخذها قسراً عشان تخدم في المعسكرات اليابانية .. و يتم الإعتداء عليها بشكل ممنهج .

فبالتالي ..

بمجرد ما اليابان إنضربت بالنووي .. و بعدها بأسبوع طلعت من كوريا ..

بعد سنة بالظبط تقريباً .. ( كوو ) بيلاحظ الفٌرصة ..

شعب كااااااااااامل .. فجأة النساء فيه عايزين يشعروا بجمالهم بعد سنين و سنين من الحرمان من ده ..

ف بدأ يفكّر .. إن العربية اللي بتنقل طن فحم .. عشان يكسب فيه 100 جنيه مثلاً ..

ممكن ينقل بيها طن مٌستحضرات تجميل .. و يكسب فيه مليون جنيه ..

( لحد النهاردة بالمناسبة أحد أكثر التجارات المٌربحة في عالمنا .. هو تجارة مٌستحضرات التجميل دي ... و لكن ممكن أشرح تفاصيلها الحالية في بوست آخر إن شاء الله ) .

المهم .. أخو ( كوو ) الصغنن كان عنده واحد صاحبه كيميائي يعرف يعمل تركيبة كريم وش سهلة و بسيطة ..

ف ( كوو ) راح واخد التركيبة دي .. و لزق عليها صورة ممثلة أمريكية مشهورة في الوقت ده .. و راح منزّل كامبين دعايا بيقول فيها الإعلانات المٌعتادة زي بتاعت دلوقتي بالظبط :

" بدل ما تشتري المٌنتج الأمريكي المستورد الغالي .. عملنا لك تركيبة محلي تدّي نتايج أجمد .. و بسعر أرخص بكتييييييييييييير .. و كله طبيعي و أورجانيك من مزارع كوريا البلد 🤣 "

و بين يوم و ليلة تقريباً إتباعت الكمية كلها ..

البطرمان الإزاز اللي كان بيتكلّف جنيه .. كان بيتباع ب 100 جنيه ..

و حنفية الفلوس بدأت تفتح عالبحري ..

لكن ..

زي ما خدت بالك كده بالظبط لأنك مركّز و ماسرحتش إطلاقاً ..

البطرمانات كانت ( إزاز ) ..

بتتشحن و تتعبّي في عربيات كانت من أسبوعين بتنقل ( فحم و حجارة ولامؤاخذة ) ..

و بتمشي علي طرق بلد لسة طالعة من حرب و إحتلال ..

يعني العربية اللي كانت بتطلع من المصنع معبية 1000 برطمان .. كان بيوصل منهم سليم في الآخر أقل من نصهم ..

طيب نعمل إيه ؟! نعمل إيه ؟!

نعمل برطمانات معدن ؟! .. شكلها وحش و الناس عايزة نفس شكل العبوة الأمريكاني الإزاز الشفّاف .

ف عند اللحظة دي .. بيقرا ( كوو ) بوست علي السوشيال ميديا سنة 1947 .. إن في مادة جديدة طالعة تريند في العالم .. و الناس كلها بتتكلم عنها .. إسمها : بلاستيك .

مادة شفافة .. تعمل منها برطمانات و تحدفها .. ماتتكسرش ..

ف ( كوو ) يقرر يعمل حركة برضو بنفس ( عبد الغفور البرعي ) ستايل ..

و بدل ما يشتري شحنة برطمانات ..

لا ..

راح إشتري مكنة تصنيع البلاستيك ذات نفسها 😅..

حرفياً صرف عليها إستثمار ضخم .. و كل اللي حواليه كانوا بيقولوا عليه مجنون و عبيط و حيفلّسهم ..

لكن ( كوو ) كان إتلدع كذا مرة من إنه رقبته تبقي في إيد حد ..

فاكر لما قلت لك إنه إبتدي ب تجارة الرز ؟! .. و عاش تحت إحتلال اليابان و هو شايف إزاي كان ممنوع يتاجر براحته أو يتصرّف في البضاعة براحته ..

و بعدين تاجر في الفحم .. عن طريق إنه كان بيستورده عن طريق الجيش الأمريكي اللي كان بدأ يدخل مكان الإحتلال الياباني في كوريا ..

( ملحوظة سريعة لو تفتكر كنت كتبت عنها تفصيلياً زمان .. تقسيم كوريا .. ك كوريا شمالية و كوريا جنوبية .. حصل في خيمة جيش أمريكي بين إتنين ظباط جيش .. عن طريق إنهم رسموا خط بالقلم الرصاص حرفياً علي الخريطة بشكل هما شافوه ( حلو كده و ستريت و جميل ) .. بدون أى معايير أو أسباب جغرافية أو إقليمية أو أيديولوجية إطلاااااااااااااااااقاً .. و لكن عشان فقط يكسروا قوة الشيوعية في الوقت ده ... و اللي كان جزء كوريا الشمالي بدأ يعتنقها ) .

المهم ..

( كوو ) قرر إنه مش حيبقي تحت رحمة أمريكا و كل ما يحتاج برطمانات يطلب منهم .. لا ..

هو جاب المكنة نفسها ...

و اللحظة دي .. اللحظة دي بالذات .. تقدر تعتبرها هي لحظة ولادة إمبراطورية ( LG ) الحقيقية ..

ليه ؟!

لأن بمجرد ما المكنة جات .. و بدأت تشتغل .. و تجارة برطمانات كريم الوش و مٌستحضرات التجميل بقت منجم دهب ..

( كوو ) بدأ يفكّر ..

ثانية واحدة ؟! .. طيب ما أنا ممكن أشكّل البلاستيك زي ما أنا عايز ... و بدل ما أعمل برطمانات .. ممكن أعمل أى حاجة تانية .. .

لعب أطفال ؟! .. علب حاجات مٌختلفة ؟! ..

أو ثانية واحدة ؟! .. ده أنا ممكن أعمل زي ما عملت في موضوع مستحضرات التجميل ده بالظبط ...

إزاي ؟!

لو لاحظت حتي الآن .. ( كوو ) كان عينيه دايماً شايفه المٌستقبل قبل اللي حواليه .. و بيشوف الفرصة قبل ما تيجي ..

شاف إحتياج نساء كوريا للمكياج .. و عمل منه تجارة كسبته دهب ..

و بعدين شاف الشعب الكوري حواليه بدأ يفوق .. و يهتم لأول مرة بالأخبار و الحاجات اللي بتحصل حواليه في العالم ..

حرب عالمية تانية كانت لسة خالصة ... بلد بتتقسّم .. و كل الأخبار دي كانت بتتذاع عن طريق الراديو .. اللي كان تكنولوجيا أمريكية بالكامل و جهاز ضخم بيتم إستيراده و يمتلكه الأغنياء فقط ..

ف عمّك ( كوو ) راح واخد جهاز راديو من دول .. و نزل علي صنايعي كهربا شكله بيفهم في حارتهم .. و قال له ( تعرف تقلّد لي الجهاز ده ياض ؟! ) ..

الصنايعي رد و قال : الجهاز يتقلّد بالساهل يا باشا .. ده شوية أسلاك و معادن .. لكن المشكلة هي في العلبة نفسها .. العلبة دي معدن و مصنعيتها صعبة .

رد عليه ( كوو ) بإبتسامة ذات مغذي .. و قال : ماتشغلش بالك إنت بالعلبة .. إحنا حنعمل العلبة بلاستيك .

و في اللحظة دي .. إتولدت شركة ( Goldstar ) 😆..

شركة متخصصة في تقليد المنتجات الإلكترونية الأمريكية .. و عمل نسخ رخييييييييييييييييييصة منها ... ( واخد بالك إنت إن ده نفس اللي الصين عملته بعد كده ؟! ) ..

أنا نسيت أقول لك إن إسم الشركة اللي كان بيبع مستحضرات التجميل تحتها كان : LAK HUI .. و بتتنطق لاكي = Lucky .. و معناها بالكوري بالظبط زي الكلمة الإنجليزي .. يعني : حظ أو محظوظ .

لكن لما قرر يبدأ ينتج رداوي و حاجات تانية بالبلاستيك .. قرر يعمل شركة جديدة .. و سمّاها ( Goldstar ) ..

و أينعم .. هي نفس الشركة اللي العواجيز أمثالي يفتكروا إعلاناتها اللي كانت بتيجي في التيليفزيون زمااااااااااااااااان .. و اللي إحنا شخصياً إشترينا تيليفزيون ( جولدستار ) سنة 2000 تقريباً .

فأصبح كده في شركتين .. شركة بتبتدي بحرف ال L .. و شركة بتبتدي ب حرف ال G ..

طيب .. إيه اللي جمّع الشامي عالمغربي ؟ .. و خلّي الشركتين بقوا شركة واحدة ؟! .. و فجأة حوّلهم من شركة بتطلّع منتجات تقليد رخيصة .. ل إمبراطورية بقوة و حجم دول كاملة ؟!

ده اللي حاكتبه إذن في الجزء التالت من السلسلة دي إن شاء الله ..

لأن .. فوجهة نظري .. المرحلة اللي جاية دي .. هي أهم مرحلة علي الإطلاق .. و هي اللي ليها علاقة بالموضوع بتاع إمبراطوريات الصناعات الكيميائية عالمياً .. و اللي كنت إبتديته بالبوست بتاع ( اللاعيبة بتطلّع الفانلة من الشورت ليه 🤣 ) ..

و الله أعلم .