الصورة دي من سنتين تقريباً .. في مطار القاهرة و أنا رايح دٌبي ..

الصورة دي من سنتين تقريباً .. في مطار القاهرة و أنا رايح دٌبي .. و شٌفت الراجل الطيّب ده مستعجل للغاية و بيمد بسرعة تقريباً متأخر علي طيارته .. فقررت أتنّح و أرزّل عليه 🤣😅 و طلبت منه آخد صورة معاه .. و الراجل ماعترضش خالص والله و كان لطيف جداً .. بس الله أعلم كان بيقول إيه في سرّه بقي و أنا قاعد باحاول أظبط الزاوية و الإضاءة اللي تبيّن وسامتي الطاغية في السيلفي 🤣🤣 ... لكن هو اللي غلطان برضو .. ليه يروح المطار متأخّر 🤣 .

دي كانت المرة الوحيدة في حياتي اللي طلبت فيها إني أتصور مع حد ( معروف أو مشهور ) ..

بالرغم من إني إتكرر كتير في المطار بالذات و إيفنتات و سفريات مختلفة .. إني أخبط في حد معين .. أو أقوّم حد معين من علي كرسي عشان صديق ليا كان قاعد عليه .. أو أكون قاعد و أطلب من الشخص اللي فضهري يوطّي صوته شوية ..

و بعدين ألاقي أحد الأصدقاء المٌحيطين بينظر ليا نظرة ذهول .. اللي هو إنت إزاي تتعامل كده مع الأستاذ أو الأستاذة !!!!! ..

و يطلع ال( حد المٌعين ) ده سوبر ميجا ستار مثلاً 🤣🤣 .. و أنا والله ولا أعرف ..

و السبب بسيط .. إني فعلاً ماشُفتش أى حاجة لها علاقة بالتيليفزيون العربي أو المصري تماااااااااماً لمدة 12 سنة تقريباً كاملين ( 2004 ل 2016 ) ..

اللي هو أنا ما زال في عقلي قسماً بالله الأستاذ أحمد السقا يٌعتبر مواهب شابة جديدة 🤣😁

لكن عشان كنت شٌفت ( جزيرة غمام ) السنة اللي قبل الصورة دي .. و كتبت بوست طويل عنه أيامها .. ف فعلاً حبّيت إني أتصور مع أستاذ : أحمد أمين .

و بما إن الراجل عشرة ثواني كتيييير عشناها مع بعض خلال السيلفي ده .. فأنا متأكد إنه مش حيزعل لو إستخدمت الموقف ده ك بداية البوست عشان أشرح بالظبط اللي عايز أشرحه 🤣.. و هو :

هل بتتحكّم في معلوماتك .. ولّا معلوماتك بتتحكّم فيك ؟!

البوست ده هو الجزء التالت في سلسلة ( سيليكون ) .. اللي هو يٌعتبر الجزء السادس في سلسلة ( تايوان ) .. اللي هي إحنا بدأناها بعد الجزء التاسع مباشرة في سلسلة ( كوريا و LG ) 🤣 .

التسلسل منطقي جداً بالمناسبة .. و حتفهم أكتر سببه خلال البوست ده إن شاء الله .

الرحلة دي كلها عبارة عن تتبّع لتاريخ العلوم و الفيزياء و الهندسة .. من أول الموبايل السامسونج الفولد 7 اللي إنت بتقرا عليه البوست ده غالباً ( يا غني ) أو التيليفزيون ال LG بتاع إعلان أستاذ حازم إمام .. و بنرجع في الزمن لحد ما نشوف تاريخ سامسونج و LG من البداية خالص .. و تاريخ كوريا الجنوبية بالكامل معاهم .. و بعدين بنشوف تاريخ تايوان ( اللي فيها حالياً مصنع العالم لكل ما له علاقة بالشرائح الإلكترونية ) .

و عشان نفهم إيه هو موضوع الشرائح الإلكترونية ده .. كان لازم نرجع لبداية علم الكهربا ذات نفسه ..

و ده هو اللي عملناه في البوست اللي فات .. و اللي إنتهي بإن :

مايكل فاراداي .. الشاب المٌتدين جداً .. الجاهل اللي مادخلش مدارس .. اللي كان شغّال ( صبي تجليد كٌتب ) .. بيفضل يحنكش لحد ما يقدر يروح يشتغل ك ( صبي ) برضو .. بس في معمل ( هامفري ديفي ) .

الكلام ده بيحصل في علي 1813 تقريباً ..

و زي ما شرحت في البوستين اللي فاتوا .. الموضوع ماكنش صٌدفة إطلاقاً ..

فاراداي كان ( دودة كتب ) أينعم و بيقرا كل حاجة بتيجي تحت إيده في الورشة بتاعت تجليد الكٌتب ..

لكن .. كتاب الكيميا بالحلمنتيشي ( بتاع ربّات البيوت بتاع جين مارسيه) اللي قرأه .. أثّر فيه أكتر من أى حاجة تانية .. و السبب ؟!

السبب هو إن الكيميا علم فطري جداً .. يعني إيه فطري ؟!

يعني عبارة عن ( أسباب .. لمّا تاخد بيها .. و خطوات لما تنفذها ) لازم و لابد حتشوف النتيجة المٌتوقعة .

ده مهم .. مهم جداً جداً جداً ..

لأن .. دي تقريباً أحد أول الحاجات علي الإطلاق في دراسات الذكاء عموماً ( لأى مخلوق .. مش للبشر بس ) .. اللي هو بيتم وضعه في بيئة فيها ( مٌسببات و نتائج ) .. و بيشوفوا هل هو عنده قدرة علي فهم العلاقة بينهم ولا لا .

و أى طريقة دراسة علي الإطلاق .. مهما كانت .. مش بيتم تقديمها للإنسان بالشكل ده ( مٌسببات أصلية .. و نتائج بناءاً علي المٌسببات دي ) .. بتكون نتيجتها إن الإنسان حرفياً بيطلع ( حافظ مش فاهم ) ..

فبالتالي ..

لما بيدخل زبون إسمه ( ويليام دانس - William Dance ) ... و كان مزيكاتي بالمناسبة ( و إسمه دانس 🤣) لفاراداي في الورشة ..

بيروح قايل له إنت شكلك مهتم بالكيميا ياض .. خٌد التذاكر دي لمحاضرات ( هامفري ديفي ) .. و عد الجمايل .

محاضرات ديفي في الوقت ده كانت زي حفلات الستاندأب كوميدي بتاعت دلوقتي تقريباً ..

و ده لأن زي ما شرحت .. ديفي كان عارف إن الأغنيا عشان يدفعوا فلوس و يمولوا معمله و شغله .. لازم يظبطهم ..

ف كان أغلب حفلاته فيها عروض عن غاز ( أكسيد النايتروس = اللي هو غاز الضحك 🤣 ) ..

المهم .. فاراداي بيروح يحضر الحفلات ( المحاضرات ) دي .. و ينبهر .. و يكتب كل حاجة شافها هناك بأحلي خط يقدر عليه .. و يرسم .. ( كإنه دلوقتي مثلاً عملوا فيديو سيشن كاملة مثلاً بموبايله النوكيا 3310 ) ..

و بعد ما رجع .. راح باعت فيديو المحاضرات دي متمنتج بالكاب كات ( يعني عمل كتاب و جلّده تجليد نضيف فحت من اللي كتبه في المحاضرات دي ) .. و راح باعته عالواتس ل هامفري ديفي .. و معاه رسالة بيقول ب لكنة لندنية رصينة :

" ياسطا لو شغّلتني معاك حاظبطك ب شغل زي ده طول الوقت .. و جرّبني بس و مش حاتندم ياسطا .. و حياة عيالك ياسطا "

و زي ما شرحت في البوستين اللي فاتوا ... ديفي طنّش الرسالة و عمل ( seen ) و ماردّش ... لولا إن أحد المساعدين بتوعه إتمسك في كمين .. و بعدين تجربة فرقعت في وشه بعدها بيومين و إتعمي .. ف إحتاج يجيب مساعد جديد .. ف راح باعت رد ل فاراداي و قال له " يلّا بينا " .

علي مدار 7 سنين بعد كده ... و مرمطة ما بعدها مرمطة ( حرفياً بالمناسبة ) .. فاراداي بيعيش مٌساعد ل هامفري ديفي ..

مرة تانية هنا .. لازم تفهم إن ( هامفري ديفي ) كان نجم مٌجتمع .. و غني و معاه فلوس و علاقات .. و مراته أرستقراطية هي كمان ..

و ماكنتش بتطيق فاراداي 🤣 .. و بتعامله علي إنه خدّام زي أى خدّام ..

لكن فاراداي كان طيب ( ده فعلاً مشروح فأغلب اللي إتكتب عنه ) .. مش طيب بس .. و لكن مٌتدين جداً كمان ..

ف بيفضل شغال صبي ل ديفي .. و تدريجياً بيكبر لحد ما بيترقّي ل ( مٌساعد ) .. و بيتعرف نسبياً بين الناس إنه ( دراع ديفي اللمين ) .

و بعدين .. بتحصل صٌدفة سنة 1820 .. بتغيّر مٌستقبل فاراداي للأبد !! .

لكن .. قبل ما أقول لك علي الصٌدفة دي ...

لو تفتكر من البوست اللي فات .. كنت شرحت لك إن ( أليساندرو فولتا ) الطالياني كان إخترع البطارية علي سنة 1800 تقريباً ..

لكن .. يهمني جداً إنك تتعلّم ( تتربس ) زيي عند الجٌمل اللي زي دي .. و تتعلّم ماتعديهاش بالساهل كده ..

هو إزاي ده حصل يعني ؟! .. و ليه ؟! ..

ما كان ينزل الحاج فولتا ده لأى كارفور .. أو لو كان مٌقاطع ينزل ل فتح الله .. و يشتري بطاريات زي ما هو عايز ..

ليه يعني يتعب نفسه و يخترع بطارية ؟! ..

و بعدين ثانية واحدة هنا ... هي إسمها بطارية ليه ؟! .. آه والله العظيم الموضوع ده مهم جداً ! ... يعني إحنا بنسمّيها ( حجارة ) عشان ينفع تحدفها تفتح بيها دماغ أخوك الكبير زي الحجارة بالظبط ..

لكن ( بطارية ) !! إيه الإسم العجيب ده ؟! .

الكهربا قبل ( عمك فولتا ) ما ينزل الملعب ... كانت كلها ( شحنات إستاتيكية = شحنات ثابتة يعني ) .. اللي هو نفس اللي إنت كنت بتعمله و إنت فإبتدائي لما كنت بتحك المسطرة البلاستيك في شعرك زي المقمّل بالظبط ... و بعدين تقربها من شوية ورق مقطعّين عالتختة .. يروح الورق ينجذب للمسطرة .. ف تفرح إنت و تضحك بصوت عالي .. تروح الميس حادفاك بالطباشيرة .

لكن .. سنة 1791 .. واحد إسمه ( لويجي جالفاني ) إيطالي برضو لو خدت بالك .. كان بيشفّي ضٌفدعة تقريباً عشان يطبخها علي صينية بطاطس .. و بعدين إكتشف إنه لما بيحط المشرط المعدن في حتة في رجل جثة الضٌفدعة الميتة في الصينية .. كانت بتتحرّك !!

ف راح طالع في بلكونة بيتهم و أعلن عن إكتشافه العلمي الجامد فحت ( إنه إكتشف إن الكائنات الحية و الضفادع متخزّن فيها كهربا ولامؤاخذة ) .

*** طبعاً لأنه زعّق جامد في البلكونة .. ف صوته وصل إنجلترا و سمعت الكلام ده بنوتة كان عندها 18 سنة سهرانة بتشيّت عالسنابشات في بلكونتها هي كمان ( إسمها ماري شيللي ) .. راحت داخلة تجري فتحت الوورد و ألّفت روايتها المشهورة ( فرانكشنتاين ) سنة 1816 .***

المهم ..

الكلام ده مأكلش مع ( فولتا ) و كان منفسن تقريباً من زميله .. ف حاول كذا مرة يعمل زيه .. و يحرّك رجل الضٌفدعة الميتة هو كمان .. ماتحركتش ..

قعد يقتل في ضفادع و يجرّب .. لحد ما الضفادع سبّت له هو و جالفاني 🤣 ..

بس إكتشف في الآخر إن قصة الكهربا مش قصة كائنات حية و ضفادع إطلاقاً ..

و لكن كيميا بحتة .. و مجرد إن لازم معدنين مختلفين .. يتحطوا في سوائل معينة .. بوم .. حيتوصل بينهم كهربا علطول ( نفس الإحساس بتاع الإستاتيكا اللي البشر عارفينه بقالهم آلاف السنين ) .

ظاهرة ال ( إستاتيكا ) دي كانت معروفة للبشر من أيام المصريين القدماء بالمناسبة .. و ده لأن البشر كانوا بيشوفوا البرق من زماااااااان ..

أو لو إنت زيي و بتروح الجيم بالنهار .. عارف كويس جداً إنك لما تتمشّي بالكوتشي علي الكاوتش بتاع الجيم .. و بعدين تيجي تلمس البار الحديد فجأة .. تتلسع بالكهربا الإستاتيكا دي برضو .

أهو فولتا إكتشف بقي بعد ما خلص علي نص ضفادع إيطاليا تقريباً إن القصة مٌجرد كيميا 🤣 ...

و طلع فنفس البلكونة و زعّق عن إكتشافه العلمي الفتّاك ده ..

و بقي بيجيب بطرمانات إزاز .. و يملاها السوائل المٌعينة دي ..و يحط فيها ألواح المعادن المٌعينة دي .. و يطلع منها أسلاك نحاس .. و بعدين قعد قدامها و فكّر :

نسميها إيه نسميها إيه ؟! .. برطمانات كهربا ؟! .. مش حلوة ..

( بطارية بالإنجليزي يعني : Battery ) .. ( ال battering ده بالإنجليزي معناه إنك : تضرب حاجة ضرب متكرر ) .. مضرب البيسبول إسمه ( bat )

و ده السبب ..

إن فولتا كان شايف إن ( برطمان الكهربا ) اللي هو بناه ده .. وظيفته هي إنه : بيضرب الكهربا بشكل متكرر و مستمر ..

بيضرب بيضرب بيضرب . .

و بالتالي .. اللي إتسمّت ( battery ) دي .. إتبني منها كذا نسخة .. و إتبعتت هدية لكذا إسم من الأسامي التقيلة في المجالات العلمية في الوقت ده ..

ف طبعاً أصبح أى حد جامد و واصل عايز واحده عنده في معمله ...

و كانت في وقتها ال ( main attraction = الحاجة الجامدة يعني اللي بنطلعها في نهاية الحفلة عشان الناس تصقف ) .. و هما شايفين برطمان متخزّن جواه كهربا

مهم جداً جداً جداً إنك تفهم الناس كانوا شايفين البرطمان ده إزاي ..

لأن .. الصدفة بقي اللي حكينا إنها غيّرت حياة فاراداي بالكامل ..

إن واحد من الأسامي التقيلة في مجال الفيزياء في الوقت ده ( يعني من الناس اللي كانوا مؤمنين تماماً بكل كلمة قالها نيوتن قبله ب 100 سنة ) ..

واحد دينماركي إسمه : أورستد - Hans Christian Ørsted ..

أثناء ما أورستد كان تقريباً بيشيل البطارية من علي مكتبه .. و بيزيح مج الكابتشينو بإيد و بيجيب البوصلة علي جنب .. لقي إبرة البوصلة إتحركت !! .

الناس كانوا عارفين عن البوصلة من زمااااااااااااااااااااان جداً ..

اللي هي تجربة إبتدائي دي ( إنك تسرق إبرة من صندوق الخياطة بتاع مامتك .. و تحكها في مغناطيس .. و بعدين تحطها في كباية ماية .. تلاقيها بقت بوصلة ) .

لكن .. إيه اللي يخلي إبرة البوصلة تتحرك من غير ما حاجة تلمسها علي مكتب ( أورستد ) فجأة ؟!

هل هو مج الكابتشينو الفاضي مثلاً ؟! .. مش منطقي ..

إذن هي البطارية .. صح ؟!

و بالفعل .. أورستد بيفضل يحرك البطارية جنب البوصلة .. بيلاقي إبرة البوصلة بتتحرك ..

بيفرح و يتنطط و بعدين بياخد فيديو سيلفي بسرعة و يبعته علي الجروب شات بينه و بين كل العلماء المشهورين في الوقت ده ..

و بالفعل .. الموضوع بيطلع تريند بسرعة ..

و بيبدأ كل عالم هو كمان يفتح التيكتوك بتاعه .. و يصور نفسه و هو بيحرك بطارية جنب بوصلة مغناطيسية .. فإبرة البوصلة تتحرّك !!! .

لازم هنا معلش تتخطّي كل القلش الرخيص اللي باقلشه في النص ده ..

و تركّز معايا شوية .. لأن الموضوع مهم جداً بالمناسبة ( و ما زال مهم فحت حتي يومنا هذا ) ..

بطارية ( يعني حاجة بتضرب الكهربا في السلك زي كإنك بتضرب كور في سلك بالظبط ) .. إيه السبب إن قوة الضرب دي تتنقل في الهوا و تحرّك إبرة بوصلة ؟!!

لاحظ هنا إن الناس كانوا بالفعل عارفين يعني إيه مغناطيس في الوقت ده..

و كان في قوانين و ملاحظات فيزيائية كتير عن كل شغل ( قوة الجذب .. و قوانين جاليليو .. و تفاحة نيوتن .. و كل الهري ده ) ..

لكن إيه اللي جاب القلعة جنب البحر ؟! ..

إيه اللي يخلي كهربا بتتحرك في أسلاك .. تأثر علي قوة جذب مغناطيسي ؟!!!

علماء العالم بالكامل في الوقت ده .. شافوا اللي حصل .. و إتحركوا بناءاً علي معلوماتهم ..

هما كلهم كانوا تلامذة نيوتن ..

هما كلهم كانوا فاهمين يعني إيه قوة جذب بتجذب الجسم في خط مستقيم ..

هما كلهم كانوا فاهمين يعني إيه معادلات نيوتن اللي بقالها 100 سنة بتفسّر كل حاجة في الكون ( قدام عينيهم في الوقت ) بالكامل ..

فبالتالي ..

قرروا جميعاً إذن إن : خلاص يا جدعان .. الكهربا ليها قوة جذب .. و شكراً و فضوا الليلة بقي و تعالوا نشوف تريند جديد ..

ده فعلاً اللي حصل ..

هامفري ديفي و زميله الجامد فحت اللي جه يزوره يدرس معاه الموضوع ( ويليام هايد ولاستون ) قعدوا يحاولوا يعملوا أى حاجة مفيدة بالموضوع بتاع الكهربا لها قوة جذب دي .. و لكن فشلوا ..

أصل إيه الجديد يعني ؟! .. ما إحنا عندنا مغناطيس طبيعي و معادن بنمغنطها زي ما شفنا آباءنا و أجدادنا علي مدار السنين .. حنتعب نفسنا بموضوع البطارية ده ليه ؟!

و بيزهق ديفي .. و بياخد بعضه ( ولاستون ) و يروح .. و يسيبوا مين ينضّف وراهم المعمل ؟!

الله ينور عليك ... فاراداي ..

فاراداي ماتعلمش في مدارس ..

فاراداي ماقعدش يعيد ورا مُدرسة ماسكة عصاية بتزعق في التلاميذ " قولوا ورايا يا ولاااااااااااااااد .. نيوتن حلو " 🤣 .

فاراداي غالباً لو كان شاف نيوتن في مطار القاهرة قاعد علي كرسي في صالة كبار الزوار .. كان برضو حيقوّمه عشان صديقه هو اللي كان قاعد عالكرسي قبله ... و الكرسي جنب فيشة و كلنا عايزين نشحن موبايلاتنا .. و نيوتن أساساً كان لابس كاب و مغطّي شعره .. أعرف منين إنه كان بطل المسلسل المشهور فحت اللي إتعمل 4 أجزاء 🤣🤣🤣 .

لكن فاراداي كان شايف حاجة تانية !!!

كان شايف فعلاً حركة لسلك بسبب مغناطيس .. لكن ماكنش شايفها في إتجاه مٌستقيم زي ما باقي العلماء كلهم كانوا شايفين ..

هما كلهم ( عقلهم كان بيجبرهم إنهم يشوفوا الحركة ك حركة في خط مستقيم ) .. لأن ده اللي إتزرع و عشش في عقولهم نتيجة 100 سنة من سيطرة نيوتن و معلوماتهم علي عقولهم .

لكن فاراداي .. كان شايف إن الحركة بتحصل علي هيئة ... دايرة ؟!!!!

طيب ليه ؟!

و إزاي ؟!

فاراداي ماكدبش نفسه ولا كدّب عينيه .. و لكن قرر يعمل زي ما إتعلم هو بنفسه ( فاكر إتعلم الكيميا إزاي في ورشة تجليد الكتب ؟! ) ..

و قرر يستخدم ( اللي هو بعد كده أصبح مشهور ب : منهج البحث العلمي التجريبي ) .. اللي بيعتمد علي إنك تعيد ظروف التجربة كل مرة .. و اللي المفروض يحصل إن : نفس النتائج تطلع .

و بدأ بالفعل .. يبني تجربة .. فيها سلك محني بشكل معين .. بحيث إنه يسمح له إنه يتحرك بشكل دوراني من غير ما حاجة توقفه ...

و بيشغل البطارية ..

و .....

و .................

و السلك بيبدأ يدور ... يدور بدون توقف !!!!!

و للمرة الأولي في تاريخ البشرية بالكامل ... الكهربا بتتحول ل حركة ميكانيكية مستمرة ..

السلك أصبح ( مٌتحرك ) ..

( مٌتحرك دي باللاتيني يعني : motor 🙂 = موتور ) .. سمعت الكلمة دي قبل كده ؟!

إنت بتتحرك في الحياة كل لحظة .. و إنت بتشوف حاجات معينة .. و بتترجمها في دماغك بناءاً علي قاموس معلومات إتحفر في عقلك علي مدار عمرك بالكامل ..

معلومات بتحركك في إتجاهها تجري عليها ..

و معلومات بتحركك عكس إتجاهها تهرب منها ..

يا تري .. يا هل تري ..

المعلومات دي .. إنت اللي بتتحكم فيها .. ولّا هي اللي بتتحكم فيك ؟!

و تعرف الفرق بينهم إزاي ؟!

الجزء القادم .. حنسافر 40 سنة بعد لحظة ال ( موتور ) دي إن شاء الله ..

للحظة تخرّج ( ماكسويل ) .. عبقري الحساب و الرياضيات من الجامعة ..

و اللي بيبدأ يفتح بقي كل شغل فاراداي ( اللي كان بقي ستينياتي عجوز ) علي مدار ال40 سنة دول ..

و يبدأ يشوف .. هو يا تري فاراداي كان شايف إيه بالظبط ؟! ..

لأن .. اللي فاراداي شافه ...

و اللي ماكسويل حاول يترجمه ..

هو اللي حيخلّي ( أينشتاين ) .. و اللي كان مابيعتمدش أسامي ولامؤاخذة 🤣🤣🤣... بعدهم ب 100 سنة تقريباً .. و علي مدار حياته كلها .. يعلّق تلات براويز بس في مكتبه ..

هما :

( نيوتن ...... فاراداي ...... ماكسويل ) ..

و الله أعلم .

** أتمني لو الصورة وصلت لأستاذ ( أحمد أمين ) يكون سامحني بعد السنين دي علي تأخيره في المطار بقي 🤣🤣