بعد ما ربنا يكرمك و تحوّش أول 100 جنيه بعد كام سنة شغل ..

بعد ما ربنا يكرمك و تحوّش أول 100 جنيه بعد كام سنة شغل .. حيبقي عندك قرار مهم جداً محتاج إنك تفكّر فيه .. و هو :

تستثمرهم فإيه ؟! .. ولّا تحط فلوسك فأنهي بنك ؟!

الموضوع فعلاً مرهق جداً .. خصووووصاً إنك أول ما حتتشهر و سٌمعتك تتعرف إنك معاك 100 جنيه .. حتلاقي كذا حد من إصحابك اللي شغالين في البنوك المٌختلفة بيتصلوا بيك .. و يعرضوا عليك عروض أشكال و ألوان ..

حتلاقي بنك يعرض عليك فوائد 100% سنوياً !!!! .. متخيل ؟! ..

يعني تحط النهاردة ال100 جنيه عندهم .. و السنة الجاية تاخدها منهم 200 جنيه !! ..

و لحظة ما خلاص حتمضي و تبعت عربية تحمّل الفلوس .. حتلاقي بنك تاني جنبهم علي نفس الرصيف بيكلمك .. و يقول لك : ماتستعجلش ..

و حيعرضوا عليك نفس ال100% فوائد .. بس نصف سنوي !!

يعني إيه معلش موضوع نصف سنوي ده ؟! ..

حتلاقي واحد شكله نضيف أوي .. و لابس بدلة شيك .. يقول لك بلهجة رسمية :

ياسطا لما الفوائد ال ( 100% ) دي بتتحسب سنوي .. يبقي إنت كل سنة حتاخد الفائدة علي فلوسك مرة واحدة .. و تاخد فعلاً علي ال100 جنيه .. 100 جنيه زيهم ..

لكن .. في البنك بتاعنا إحنا حنجيلك بعد 6 شهور .. و ندّي لك أول 50% .. فبالتالي حتاخد علي ال100 جنيه .. 50 جنيه فوقهم .. و كده فلوسك اللي في البنك بقت 150 جنيه ..

و بعدين .. بعد 6 شهور تانيين .. حندّي لك ال50% التانيين .. و لكن حندّيها لك علي كل فلوسك .. يعني علي ال ( 150 جنيه ) .. فبالتالي حتاخد 75 جنيه ..

يعني بعد سنة .. فلوسك حتبقي 225 جنيه .. بدل ال (200 جنيه ) اللي كنت حتاخدها من البنك الأولاني .

حتفرح إنت و تشتم البنك الأولاني .. و تطلع جري علي البنك اللي جنبهم علي نفس الرصيف .. و لكن و إنت خلاص طالع تمضي .. حتلاقي بنك تالت جنبهم علي نفس ذات الرصيف بيتصّل بيك و يقول لك بلهجة رسمية جداً :

" ياسطا إنت بيتعمل عليك نمرة " ..

و يشرح لك إنهم ( البنك التالت دول يعني ) .. حيدّوا لك نفس ال100% .. و لكنهم حيدّوها لك كل شهر بقي .. متقسّمة ( 8.33 % ) .. اللي هي ( 100% مقسومة علي 12 ) ..

إنت فاهم ده معناه إيه ؟!

معناه ياسطا إنك كل شهر فلوسك حتزيد .. و حتاخد نسبة الفائدة علي فلوسك اللي بتزيد دي كل شهر .. و النسبة حتفضل تتراكم فوق بعضها ..

و لو حسبتها بالورقة و القلم .. حيطلع إنك فآخر السنة حتاخد ( 261 جنيه ) .. بدل ال ( 200 ) اللي كنت حتاخدهم فأول بنك ... و بدل ال ( 225 ) اللي كنت حتاخدهم في تاني بنك .

لكن إنت إتعلمت بقي ..

و مادخلتش البنك التالت ده ..

و وقفت علي الرصيف ... و بصّيت بعينيك لبعيد .. لبعيييييييييييييييييد أوي ..

و لقيت إن في بنك رابع .. و خامس .. و سادس .. و بنوك علي إمتداد نظرك .

البنك الرابع بيقولوا إنهم حيدّوا لك الفائدة التراكمية دي كل يوم .. مش كل شهر زي اللي قبلهم .

و البنك الخامس بيقولوا إنهم حيدّوا لك الفائدة التراكمية دي كل ساعة ..

و البنك السادس حيدّوا لك الفائدة التراكمية دي كل دقيقة ..

و اللي بعدهم كل لحظة ..

و اللي بعدهم ... و اللي بعدهم .. و اللي بعدهم ...

و أثناء ما إنت قاعد بتحاول تحسب .. يا تري يا هل تري .. إيه أعلي قيمة ممكن فلوسك توصل لها بعد سنة .. لو فضلت ماشي علي الرصيف ده لحد آخره ..

حتسمع سوّاق التوكتوك اللي راكن صف تاني و مستنّيك تقرر بيقول لك :

ياسطا .. ياسطاااااااااااااااااا .. إنت ماتعرفش حد من جماعة الحاج برنوللي ؟!

التسلسل السابق ده .. هو بالظبط اللي عمله ( جيكوب الأولاني إبن الحاج بيرنوللي = Jacob I Bernoulli )

و اللي إكتشف إن .. مهما مشيت الرصيف ده لحد آخره ..

و إن حتي لو لقيت بنك حيقسّم لك النسبة التراكمية ال100% علي كل فيمتوثانية علي مدار السنة ..

إن فلوسك اللي حتاخدها آخر السنة .. عمرها ما حتزيد عن رقم معين ..

الرقم ده هو : ( 271 جنيه ) ..

و إن مهما إتشقلبت أو حاولت تعض قفاك .. عمرك ما حتوصل حتي ل ( 272 جنيه ) ...

آخرك دائماً و أبداً حيفضل تحت ال ( 272 ) ..

طيب ليه ؟! ... و مين هو ( جيكوب بيرنوللي ) ؟! .. و إشمعني بالظبط الرقم ده ؟! ..

و السؤال الأهم هو : مين سوّاق التوكتوك ده ؟! 🤣

البوست ده .. هو الجزء التاني إذاً في قصة ( الرياضة بالتفصيل .. بالحلمنتيشي ) .. اللي هي قصة وليدة ل ( قصة سيليكون .. بالحلمنتيشي ) .. و اللي الهدف منها هو إنك عند مرحلة معينة .. يبقي عندك نفس العلم الرياضي اللي يمكنك من إنك تفهم كل سحر و متعة عوالم الموجات الكهرومغناطيسية .. و معادلاتها .. زي ما اللي إخترعوها كانوا فاهمينها .

في الجزء اللي فات .. وقفنا لحد أول لحظة في ولادة علم ال ( لوغاريتمات ) ..

و شرحنا إن الموضوع كان مٌجرد راجل ملول و كسول و بيزهق بسرعة إسمه ( جون نابيير ) .. كان بيدور علي طريقة يسهّل و ينجز بيها عملية ضرب ( 315315 في 57322 ) 😅 .

و شرحنا إن الهدف من ده فعلاً كان تسهيل و تسريع العمليات الحسابية المعقربة دي ( ضرب 5 أرقام في 5 أرقام ) .. خصوصاً للبحارة و الملاحين في المحيطات .

و إن جون نابيير لما إكتشف العلم ده .. سمّاه ( الحسابات اللي ليها معني ) ..

الحسابات يعني ( أريثماتيك ) باللاتيني ..

و معني يعني ( لوجو ) باللاتيني ..

و بالتالي ... سمّي العلم ( لوجاريثمات ) .

و شرحنا مثال بسيييييييييط جداً .. إزاي حوّلنا عملية ضرب صعبة زي ( 16 في 64 ) .. ل عملية جمع بسيطة جداً هي ( 4 + 6 ) ..

جون نابيير بعد ما إكتشف الإكتشاف العبقري ده ..

راح مسمّي الله .. و ظبط المنبّه إنه يرن بعد 15 سنة 🙂 ..

و قعد 15 سنة يحسب كل عمليات الضرب المعقربة اللي ممكن أى حد يحتاجها للزوايا بين ( 0 .. لحد 90 درجة ) .. لحد 5 خانات بعد العلامة العشرية .

يعني مثلاً ( 32.54218 .. مضروبة في 67.51493 ) ..

و حوّلهم بالكامل لعمليات جمع بسيييييييييييطة خالص ( زي ما شرحنا في المثال اللي فوق ) ..

و كتب كل الكلام ده في كتاب من 90 صفحة 😃 ..

الكتاب ده ... كان هو بالظبط زي الآلة الحاسبة بالنسبة لجيلي لما كنت في المدرسة ..

يعني .. أنا مثلاً عمري خلال سنوات إبتدائي و إعدادي و ثانوي و الكلية .. ما إضطريت أضرب 5 أرقام في 5 أرقام بإيديا .. ولا حتي عمري حسّيت إن الموضوع ده صعب أو فيه مشكلة ..

ببساطة .. أنا و أمثالي .. كنا بنضرب إيدنا في جيبنا .. نطلّع الآلة الحاسبة الكاسيو .. و شكراً .. خلال ثواني نعرف النتيجة .

الكتاب اللي كتبه جون نابيير ... عمل نفس الموضوع ده بالظبط لكل البحارة و الملاحين في زمنه ..

عايزك تركّز جداً جداً في النقطة دي الله يبارك لك ..

سنة 1614 .. فجأة .. أصبح أى حد بريطاني بيعرف يقرا و يكتب .. عنده الإمكانية الكاملة إنه يقود أسطول بحري كااااااااااااامل .. بدقة كاملة .. و يقول لهم يروحوا فين و يتحركوا إزاي بالظبط ..

مرة تانية .. ركّز في الجٌملة اللي فاتت دي ..

سنة 1614 .. بعد إختراع الطباعة ب 150 سنة تقريباً في أوروبا .. و أيام ما كانت لسة الطباعة متحرّمة في الإمبراطورية الإسلامية ..

أصبح سهل إن ينطبع كٌتيّب جيب حرفياً .. يخلّي عندك قدرة ( الآلة الحاسبة .. و جوجل مابس ) في جيبك .

الكٌتيّب ده ( علم اللوغاريتمات ) .. حيدخل الإمبراطورية الإسلامية لأول مرة سنة 1750 تقريباً بالمناسبة ..

يعني الإمبراطورية الإسلامية بدأت تحاول تجري في السباق ده .. بعد ما بريطانيا خصوصاً و أوروبا عموماً كانوا بدأوا يجروا فيه .. ب 150 سنة ..

و خلال ال150 سنة دول .. حاجات كتيييييييييييييييير تانية حصلت .. غير مجرد موضوع اللوغاريتمات ده .

تخيّل دلوقتي بقي شكل العالم ..

أوروبا فيها طباعة ..

و بعدين فجأة الناس إكتشفوا إن العمليات الحسابية اللي كانت بتاخد شهور حرفياً عشان تتعمل .. دلوقتي ممكن تتعمل في دقايق ( لو إنت بتملك كتاب جون نابيير ) ..

و بعدين فنفس ذات الوقت تقريباً .. عندك فيلسوف مشهور إسمه ( لايبنتز ) بيبدأ يخترع علم التفاضل و التكامل ( زي ما شرحت عنه قبل كده زمان ) لأنه أساساً كان بيدوّر علي لغة توصف منطق التغيّر .

و نيوتن كان بدأ يتشهر ك عالم جامد زوحليقة .. بيكتب معادلات جبرية توصف بدقّة الحركة و السرعة ..

كل اللي فات ده .. إنت غالباً بتدرسه في المدارس بشكّل مٌجرد ( abstract ) جداً جداً ..

الهندسة المستوية ( اللي من أيام إقليدس ) ..

و الجبر ( اللي من أيام الخوارزمي ) ..

لكن زي ما شرحت لك في البوست اللي فات .. فجأة بتلاقي إنك محتاج تدرس ( لوغاريتمات ) .. و إنت أساساً ماكنتش عارف الكلمة جات منين و إزاي و ليه .

فبتتقفل من الرياضة و عقلك بيتكوّن فيه عقدة ..

لأن مافيش وقت .. أو لأن المدرّس اللي بيشرح لك هو كمان غالباً ماكنش يعرف ..

دي طريقة التدريس لل ( موظفين و العمّال ) .. اللي هي ( إنت مش محتاج تعرف المكنة إتعملت إزاي و ليه ... يكفي فقط إنك تعرف تشتغل عليها إزاي ) .

لكن ..

الأغنياء ولاد الأغنياء ..

اللي كان عندهم رفاهية و حرية التفكير ..

دول هما اللي كانوا بيلاقوا الفٌرصة إن الرياضة تتشرح لهم بمزاج .. و علي رواقة .. أوي .

و من أشهر العيال الأغنيا ولاد الأغنيا دول .. هما : عيلة بيرنوللي .

أنا شخصياً فاكر كويس جداً في الكلية .. كنت أنا في قسم كهربا و صديقي في قسم ميكانيكا .. و صديقنا التالت في مدني ..

و كل واحد فينا بيشتم في بيرنوللي بسبب معادلاته .. و إحنا مفكّرين إنه شخص واحد و راح إحترف فكل الأقسام المختلفة دي ...

و إتضح بعد كده إن كل واحد فينا كان بيشتم في بيرنوللي مٌختلف 🤣😅 .

بيرنوللي دول .. كانوا عيلة كاملة .. 3 أجيال كاملين من سيطرة كاملة علي علوم الرياضيات و الفيزياء و الهندسة في أوروبا ..

عيلة فيها الأخ كان عدو لأخوه .. و هو هو نفس الأخ ده .. كان عدو لإبنه بعد كده .. و لكنه كان عبقري الصراحة ..

و العيلة دي .. كانت من الجبروت فتأثيرها .. إنها إتربّي فوسطها أحد أشهر الأسامي في تاريخ الرياضيات بالكامل .. و هو ( ليونارد أويلر ) .

العيلة دي لوحدها ( زائد أويلر ) .. لو درست تاريخهم بس .. تقريباً إنت كده جاهز تفهم رياضة علي مستوي مقارب ليا ( مهندس إتصالات و إلكترونيات ) .

لكن .. قبل ما أبدأ أشرح لك التاريخ ده سريعاً ..

عايزك معلش تاخد بالك من إنهم ( عيلة ) .. يعني ( إيكوسيستم واحد ) ..

بيئة واحدة .. لغة حوار واحدة .. مصطلحات و طريقة تفكير واحدة ..

ليه ده مهم ؟!

لأن .. أحد أكتر الحاجات اللي باحاول إني أشرحها من خلال السلسلة دي بالكامل هي إن :

العبقرية مش سر .. و العلوم مش كهنوت .

يعني .. لنفترض مثلاً إننا عدنا بالتاريخ ل سنة 1680 ( أيام ما كان جيكوب بيرنوللي الأولاني عنده 26 سنة ) ..

و نفترض إنه كتب قايمة و إتجوز و خلّف .. و جاب طلعت برنوللي ..

هل طلعت ده كان حيبقي بيقضّي وقته علي التيكتوك ؟!

هل طلعت كان حيكتب لي في التعليقات ( إن بوستاتي طويلة و إنه قرر يقضي وقته في قراءة آخر أخبار التريندات أفيد له ؟! ) .

لا ؟! ..

أمال طلعت كان حيعمل إيه ؟!

عيلة بيرنوللي دي ..

التلات أخوات الأولانيين ( الجيل الأولاني ) :

جيكوب ( الكبير ) .. و نيكولاس ( الوسطاني ) .. و يوهان ( الصغنن الدلّوعة ) .

أبوهم كان غني فحت ( تاجر بهارات و توابل .. عطّار يعني ) ..

و التلاتة دول .. بدل ما يقضوا الصيف في الساحل ... لا .. راحوا إشتروا الكتاب الجديد اللي لسة نازل تريند و ماحدش فاهمه .. و كل الشلة و الصٌحاب كانوا نازلين تريقة علي صاحبه ..

الكتاب كان 6 صفحات بس .. و اللي كاتبهم كان واحد إسمه ( لايبنيتز ) ..

و الصفحات كانوا بيشرحوا نظرية جديدة فحت و معقربة للغاية و ماحدش سمع عنها قبل كده إسمها : ( اساسيات التفاضل و التكامل ) .

جيكوب كان الكبير ..

و كان بيحاول يثبت طول الوقت إنه ( الأذكي ) ..

نيكولاس ( الوسطاني ) طنّش الخناقات دي كلها ..

لكن يوهان ( الصغنن ) كان نقره من نقر أخوه الكبير ..

ف جيكوب بيمسك التريند الجديد اللي إسمه ( تفاضل و تكامل ) ده .. و بيحاول يثبت لكل اللي حواليه و المجتمع و الناس إنه ( هو اللي حيعرف يفهمه ) ..

و كان قبل ما التريند ده يظهر علطول ... كان لسة جيكوب ناشر ورقة بيتكلم فيها عن إكتشافه اللي كتبته فأول البوست ..

إنك .. مهما حاولت تقسّم الفائدة التراكمية علي كل لحظات و ثواني السنة كلها .. فلوسك عمرها ما حتزيد فوق النسبة دي ( 2.71 ) ..

و اللي ماكنش يعرفه جيكوب في الوقت ده ..

إن الرقم ده بالذات .. حيتخلّد في التاريخ ..

و حييجي شخص معين بعد كده .. يكتشف إن الرقم ده بالذات .. مفتاح من مفاتيح الحياة اللي إحنا عايشين فيها .. و أحد أسرارها ..

الرقم اللي إحنا لحد النهاردة بنعرفه بإسم ( e ) ... أو بالعربي ( هـ ) ..

ده حصل إزاي ؟! و مين هو الشخص ده ؟! .. و إزاي الرقم ده هو أحد مفاتيح الحياة و أحد أسرارها ؟! ..

و مين باقي أفراد العيلة الكريمة ( برنوللي ) ؟! .. و إزاي الأب سرق إبنه ؟! .

كل ده في الجزء القادم إذن إن شاء الله ..

لأنك لو كنت نسيت .. التوكتوك راكن صف تاني من أول البوست 🤣 .

و الله أعلم