أكتر قصة رومانسية مؤلمة و تبكّي أعتقد عرفتها في حياتي هي :

تيييت .. تت .. تت تيييييت .. تتيتييييييييييت .. تييييييييييييييييييييييييت🤣

زمااااااااااااااااااااااااااان .. سنة 1825 .. كان في رسّام عنده 34 سنة .. أشهر رسّام بورتريهات فأمريكا في الوقت ده ..

لدرجة إنه كان بينطلب بالإسم عشان يرسم علية القوم و الرؤساء و الأغنياء .

و كان ساكن مع مراته .. حبيبة قلبه .. حبه الأوحد و الوحيد .. في حتة إسمها ( كونيكتيكت - حاول تنطق الإسم عشر مرّات ورا بعض بسرعة 😅) ..

و بعدين إنطلب عشان يرسم بورتريه لأحد أشهر الشخصيات السياسية و العسكرية فأمريكا في الوقت ده ( الماركيز دي لا فاييت - ماركيز دي كانت رٌتبته مش إسمه ) ..

لكن ما علينا من إسمه و رُتبته .. الماركيز ده كان ساكن طبعاً في العاصمة واشنطن .

علي بٌعد 5 ساعات سواقة تقريباً علي جوجل مابس .. لكن أيامها ماكنش في جوجل مابس .. ولا سواقة أساساً .. المسافة كانت : 500 كيلومتر ..

المهم .. بيروح فعلاً .. و بيبدأ يشتغل في الرسمة .. و بعدين بيلاقي ساعي البريد داخل عليه و هو بيرسم و يقول له :

" الجواب ده جايلك من بيتكم .. مراتك تعبانة " ..

ال( رسّام ) ده ( اللي لو تلاحظ لسة ماقولتش لك إسمه ) .. بيبص حواليه .. و يبص للماركيز اللي قاعد بيترسم قٌدّامه .. و يسأل عمو ساعي البريد اللي جاي علي حصانه : ( أيون طيب أعمل إيه يعني دلوقتي أنا ؟! )

ساعي البريد بيقول له : ولا أى بلح .. إنت مافيش فإيدك حاجة تعملها .. تحب تبعت لها فويس نوت ؟!

تاني يوم مباشرة .. لسة بيسمّي الله و حيبدأ يزيّت الفرشة عشان يكمّل الرسمة ..

بييجي له ساعي بريد تاني علي حصان تاني .. و معاه جواب جديد :

( البقاء لله .. مراتك .. ماتت ) .

الرسّام ده .. بيحدف الرسمة بتاعته و يرمي الإقلام و يطلع عالحصان و يطلع جري .. عشان يقطع مسافة 500 كيلو تقريباً .. دي تاخدلها بتاع 10 ل 15 يوم بالحصان ..

و علي ما بيوصل .. بيلاقي الناس خلّصت كل حاجة خلاص ..

و مراته إندفنت ..

و أثناء ما هو بيعيّط و بيتألّم .. بيلاقي اللي بيخبّط علي ضهره و يقول له :

" إنت ماكنش فإيدك حاجة يابني .. إحنا لسة سنة 1825 .. يعني لسة ماعندناش ماسنجر ولا واتس ولا إس إم إس ..

حتي التيليفون الأرضي يابني لسة قدامهم ولا 80 سنة علي ما يخترعوه ..

ماتلومش نفسك يابني ..

ماتلومش نفسك يا .... مورس "

القصة اللي فاتت دي بالمناسبة حقيقية 100% ( ما عدا آخر جملة طبعاً 🙂) ..

و القصة دي هي قصة : ( صامويل مورس ) ..

الرسّام الفنان ..

اللي هو لا كان مٌهندس ولا فيزيائي ولا عالم ولا أى حاجة إطلاقاً ..

و لكنه هو اللي إخترع ( شفرة مورس - Morse code ) اللي إتبني فوقها كل عالم الإتصالات بالكامل ..

مٌتخيل ؟!..

متخيل عالم كااااااااااااااااامل من رسايل ال( others ) .. و ( عينيكي فيها حزن ) .. إتبني و موجود .. لأن الراجل الطيب ده ( مورس ) .. حلف إنه ماحدش يتألم نفس ألمه ؟!

عالم كامل .. إختصر زمن رسالة ( مراتك عيانة ) من 10 أيام .. ل دقائق أو ثواني حتي ..

و أول خطوة في العالم ده كان : التيليجراف .

إنت عارف أساساً ( تيليجراف ) يعني إيه ؟! ..

بالله عليك إتعلّم تضّايق من نفسك لما تتسأل أسئلة زي دي .. ف ترد بالرد الغلط ( اللي هو : تيليجراف اللي هو البتاع اللي كان بيستخدمه رأفت الهيجان في المسلسل عشان يبعت رسايل و .... ) .

أنا أقصد الكلمة نفسها جات منين ؟! .. و ليه ؟!

زماااااااااااااااااااان .. في وقت الحاج مورس ده .. كانت طريقة التواصل علي مسافات بعيدة بسرعة ( و بالذات أوقات الحروب ) هي :

إطلع علي جبل و إنت معاك سبّورة .. و زميلك يقف علي الجبل البعيد اللي شايفك هناك و هو معاه تيليسكوب ( التيليسكوب تم إختراعه سنة 1600 تقريباً ) ..

المهم .. إكتب إنت ال ( جراف = منظر أو شكل يعني ) علي السبّورة ..

و زميلك يشوفه من بعيد ( مسافة بعيدة يعني = تيلي tele ) .. و شكراً .. إنتوا كدة بتتواصلوا .

التكنولوجيا العميقة دي كان إسمها ( سيمافورات = semaphores ) .. لأنها ماكنتش بتعتمد علي سبّورة يعني .. و لكن علي أشكال خشب ضخمة ..

المهم .. الكونجرس الأمريكي في الوقت ده بقي ( 1837 ) قرر يعمل زي مسابقة .. يطلب فيها حل من الناس اللي دماغها بتشتغل .. عشان يتعمل ( شبكة ضخمة ) من السيمافورات أو التيليجرافات دي .. عشان يسهّل التواصل الأساسي و الإستراتيجي بين الولايات ( اللي كانت لسة مش متحدة أوي أيامها 😅 ) .

ف بيلاقوا باب الكونجرس بيتفتح عليهم .. و يدخل لهم مورس و هو عنده (46 سنة بقي في الوقت ده ) .. و معاه تلميذه ( إسمه vail ) اللي كان بيدرّس له كورس رسم ..

و بيقول لهم : الحل عندي .. أنا حاعمل لكم تيليجراف بالكهربا .

إيه اللي كان حصل بقي بالظبط في ال12 سنة دول ( بين 1825 لما مرات مورس ماتت و 1837 ) ؟

علي مدار 7 سنين بعد ما ماتت .. و ( مورس ) الندم كان معشش فدماغه ..

يسأل نفسه :

طيب ؟! .. هل الحمام الزاجل مثلاً كان حيبقي أسرع في إني أعرف إنها تعبانة ؟! .. و لكن إزاي ؟! .. الحمام الزاجل نظام صعب جداً جداً ..

طيب ؟! .. نظام بريد أسرع مثلاً من خلال أحصنة أسرع ؟!

طيب ؟! كنت أرسم الماركيز عالفوتوشوب مثلاً و أبعت له الصورة أونلاين بدل ما أسافر له لحد عنده ؟!

مهم جداً إنك تتخيل ال7 سنين الأولانيين دول .. من تساؤلات مستمرة بينه و بين نفسه .. تفكير في كل شيء ممكن و غير ممكن .. ألم و معاناة ..

لأن .. دي هي مرحلة تجهيز التٌربة في عقله ..

ف لما بيقابل زميل له علي سفينة سنة 1832 .. و يسمع الزميل ده بيتكلم عن الإختراع الجديد التريند في أوروبا ( الكهرومغناطيسية ) .. و إزاي إنهم قدروا يحولوا الكهربا ل حركة ..

البذرة دي بتدخل عقل ( مورس ) و تزرّع فجأة و بسرعة جداً جداً جداً ..

كام واحد تتخيل قبل مورس سمع عن موضوع إن ( الكهرومغناطيسية ) معناها إن الحركة تنتج بسبب كهربا من بطاريات كيميائية ؟!

و لكن ..

هل كانت التٌربة العقلية في عقلهم جاهزة ؟! .. هل كانوا إتألموا بسبب إحتياج و تفكير ل سنين و سنين ؟!

المهم ...

مورس سمع عن الموضوع ده .. و فجأة عقله بدأ يسأل .. هل أقدر إذن إني أبعت ( حركة ) خلال أسلاك كهربا تمتد ل أميال و أميال ؟!

و الإجابة كانت : أيون .. تقدر ..

فالسؤال اللي بعدها مباشرة إذن : هل أقدر إني ( أترجم ) الحركة دي .. ل رسالة مفهومة ؟!

و علي مدار 5 سنين .. من 1832 ل 1837 ... مورس كان حوّل الفكرة دي ل ( بروتوتايب = مثال عملي بسيط ) .. و بيلف بيه في محاضراته و عروضه .. بيورّي الناس إيه اللي ممكن يتعمل ..

و فواحدة من المحاضرات دي .. تلميذ له إسممه ( ألفريد فييل ) .. بيشوف الموضوع ده .. و يقول له :

إنت محتاجني .. و محتاج أبويا كمان ..

( ألفريد فييل ) كان ميكانيكي عبقري .. ليه ؟! .. لأنه حرفياً مولود في ورشة حدادة ..

أبوه كان صاحب أكبر ورش حدادة في نيوجيرسي ..

ف ( ألفريد فييل ) بيقول ل ( مورس ) .. إنت المثال العملي بتاعك اللي عامله بشوية خشب و بيشتغل بالعافية ده .. محتاج إني أبنيهولك كما ينبغي .. شغل حدادة فاخر من الآخر ..

و الموضوع ده عشان الناس تنبهر بيه .. ماينفعش يتعمل عالضيّق .. إنت محتاج تورّي الناس الموضوع علي كبييييييييييير .. و يبقي في أسلاك طوييييلة .. و الناس تشوف تواصل فعلاً علي مسافات بعيييييييييدة .

فإحنا حناخد من أبويا الغني قرض 2000 دولار .. و نعمل الموضوع ده صح .. بس بشرط إني أبقي شريك ..

و قد كان ..

الفكرة الأساسية اللي كانت عندهم في الوقت ده هي :

إحنا حنرقّم اللغة ولامؤاخذة 🤣 ..

يعني ..

حنكتب لكل كلمة في الإنجليزي رقم .. و بدل ما نبعت لحد رسالة نقول له فيها ( عينيكي فيها حزن ) .. لا .. إحنا حنسمّي ( عينيكي= 17 .. فيها = 5 .. حزن = 179 ) .. و بعدين نركّب الشاكوش المغناطيسي في آخر السلك .. و الفيشة فأول السلك ..

و بالتالي .. أى شاب مراهق عايز يبعت رسالة في الأذرز .. يروح فاصل الفيشة و موصلها 17 مرة الأول .. و بعدين يستني شوية .. و بعدين 5 مرات .. و بعدين يستني شوية .. و بعدين 179 مرة .. و بعدين يستني .. لحد ما البنت اللي في الناحية التانية تروح فاصلة الشاكوش من ناحيتها .. و موصله مكانه فيشة ..

و هو يفصل الفيشة من ناحيته .. و يوصل مكانها شاكوش ..

ف هي تبدأ تشيل الفيشة و تحطها مرتين ورا بعض مثلاً .. و اللي هو يبقي معناه ( بلوك ) 🤣 .

طبعاً لما حبّوا يعملوا الموضوع ده .. إتفحتوا و إتردموا في مدي التعقيد ..

و أنهي كلمة حتبقي أنهي رقم ؟! ..

و إفرض إنهم فعلاً عملوا كل الكلمات دي .. ماذا لو الشاب المراهق ال GenZ قرر يبعت كلمة جديدة من إختراعه ؟! نرقمها إمتي و إزاي بقي ؟

لحد ما في يوم من ذات الأيام .. ( ألفريد فييل ) كان بيتمشي في شارع المطابع اللي جنب بيتهم .. و شاف الطابعة ال ( Printing Press ) اللي هي كنت كتبت عنها زماااااااان ..

و إزاي إن الموضوع عبارة عن حروف .. تدهنها ورنيش .. و تضغط ( press ) الورقة عليها .. و شكراً .. إنت كدة طبعت .

و بعدين لقي إن نتيجة الموضوع ده .. بيحصل تآكل للحروف اللي بيتم إستخدامها بكثرة زيادة عن غيرها ..

ف البذرة زرّعت في تٌربة عقله ..

و لقي إن :

إحنا مش محتاجين نشفّر كل الحروف زي بعضها ..

إحنا نشفّر الحروف اللي بتتكرر أكتر .. ب شفرة أقصر .. و هكذا ..

و حرفياً بدأ يعد و يشوف إيه اللي بيتكرر أكتر ..

لقي إن ال ( E ) مثلاً .. أكتر حرف بيتكرر .. ف قرر إنه يبقي (دقّة شاكوش قصيرة واحدة = نقطة = تت ) .

و اللي بعده كان ال ( T ) .. ف قرر إنه يبقي ( دقة طويلة = شرطة = تييت ) .

في حين إن ال ( Q ) مثلاً كانت نادرة الإستخدام شوية .. ف تبقي ( تييت تييت تت تييت = --.- ) ..

و ال ( Z ) نادرة برضو تبقي ( تييت تييت تت تت = --.. )

و بالفعل ..

النظام ده .. بينفع و يشتغل و يقول أحلي ألو كمان ..

و بياخدوا الإختراع المتين ده و يطلعوا عالكونجرس سنة 1837 ..

الكونجرس بينبهر ... و لسة حيديلهم التمويل ب 30000 دولار عشان يبنوا الموضوع فعلاً بقي ..

بينضرب الإقتصاد الأمريكي و البلد تفلّس و يطلع أعضاء الكونجرس يزعقوا :

نعمل إيه إحنا بالإختراعات الجديدة اللي مالهاش لازمة دي ؟!

ندفع فلوس فشوية كلام عبيط و تت و تييييييت ؟!

البلد محتاجة أولويات أهم .. محتاجة حصنة أكتر .. محتاجة سيوف أكتر ..

ولا حنقعد ندوّر علي كل مشعوذ و ساحر و نموّله هو كمان ؟!

و علي مدار 6 سنين تانيين .. و لحد سنة 1843 .. بيكون مورس فلّس .. و أحبط .. و حرفياً باع عفش بيته و بيموت من الجوع .. و صرف اللي وراه و اللي قدامه .. و تلميذه ( ألفريد ) كان راح يشتغل مع أبوه في الوكالة و سابه من الأحلام دي كلها .

لكن مورس .. مابينساش ..

الألم ؟! .. ألم إن مراته كانت تعبانة و ماتت و هو بعيد و مايعرفش ؟!

و دلوقتي أصبح بين إيديه وسيلة إن ده مايحصلش تاني لحد غيره ..

ف بيروح الكونجرس تاني سنة 1843 ..

و فآخر جلسة من جلسات الكونجرس .. بيتوافق علي إقتراحه .. و فعلاً بيدّوله الفلوس ..

و بيكلم تلميذه .. و يبدأ في بناء ال : تيليجراف .

سنة 1844 .. بيتم الإنتهاء من أول خط ..

سنة 1858 و بعد 14 سنة تم فيهم بناء شبكات كاملة في أمريكا .. و شبكات في أوروبا .. تم مد أول خط بين إنجلترا و أمريكا في المحيط الأطلنطي ..

بيفشل و يبوظ و يتحرق لأنه اللي كان مسئول عنه كان ( طبيب دكتور ) ولامؤاخذة 🤣🤣 ..

و ماكنش فاهم هو إيه المشكلة يعني ؟!

ليه لما بنحاول نوصل الفيشة زي ما عمو فاراداي قال .. الشاكوش الناحية التانية مابيتحركش كما ينبغي ؟!

نعمل إيه ؟! نوصل بطاريات زيادة ؟! ..

هات يابني .. و بينزل كارفور و يشتري بطاريات أكتر و يرفع الفولت و يوصل الفيشة ... و ....... بومممممم .. بيتحرق الكابل !!

ف بيروحوا للبرنس الكبير أوي أوي .. اللورد كيلفن ( ويليام ثومسون ) زي ما شرحت في البوستات اللي فاتوا ..

و اللي بيبص عالمشكلة .. و يقول لهم : الموضوع ده محتاج شغل هندسة و رياضة .. مين النقّاش اللي كان ماسك الشغلانة دي قبلي ؟! 🤣🤣 ..

بيعمل إيه ( ثومسون ) بقي بالظبط ؟! و يخليه يقدر فعلاً يبني الكابل بنجاح سنة 1866 .. و يترقّي ل ( لورد كيلفن ) بناءاً علي ده ؟!

و بيكتشف إيه .. يخليه يقول لتلميذه ( ماكسويل ) إنه يفكّه من كل الفيزيائيين التانيين .. و ينصحه يروح يقرا شغل فاراداي بس ؟! ..

و قصص تانية كتيييييييييييير ..

ده اللي في الأجزاء القادمة إن شاء الله عشان محتاج أنزل أخلّص مشاوير كتير دلوقتي 🤣

و الله أعلم .

بدون قلش و هزار :

1- أنا يهمني فعلاً إنك تفهم إن تكنولوجيا ( شفرة مورس ) دي .. أحد أعظم الحاجات اللي إتبني عليها علم الإتصالات و التشفير و كل ده .. اللي بدأها ( رسّام فنّان ) .. مش مهندس .. مش فيزيائي .. مش مٌتخصص .. و لكن إنسان دماغه إشتغلت .

ب قلش و هزار بقي :

الرجالة لمّا تحب .. أفعال لا أقوال 🤣🤣🤣

مورس إتجوز تاني بالمناسبة .. و لكن بعد ما تم بناء كل الكلام ده ..سنة 1848 .. كان عنده 57 سنة وقتها ..

بعد 23 سنة من وفاة مراته .