طبعاً الناس حتكتفي بإنهم يصدقّوا إنه كان مٌجرّد " زلزال " .. صدفة !! ..

طبعاً الناس حتكتفي بإنهم يصدقّوا إنه كان مٌجرّد " زلزال " .. صدفة !! .. مش بفعل فاعل ..

صدفة !! في الوقت ده بالذات .. بحيث إن الناس تنسي اللي حصل في دٌمياط من يومين ..

و طبعاً حتلاقي ألف تفسير إن الموبايلات الأندرويد ( اللي مع عامة الشعب و الغلابة بس ) هي اللي تدّي تنبيه .. لكن الناس اللي معاهم الآيفون الغالي ( التٌفاحة ) ماجالهومش التنبيهات دي .

أصل الناس مش بتقرا و مش بتتعلّم و مش بتتابع ...

في حين إنك لو كنت قرأت و تابعت الأخبار العالمية علي مدار آخر شهر ... و تابعت و شيّرت و عملت لايك علي البوستات اللي باكتبها بقالي سنين ..

كان زمانك دلوقتي أكيد فاهم كويس اللي بيحصل .. و مش محتاج حد يشرح لك ..

كان زمانك أكيد فاهم إن :

" كل السطور اللي فاتت دي مٌجرّد ( هوك = خٌطّاف ) 😅 " ..

و إني بكل سهولة بعد كده أقدر أشد الصنّارة تدريجياً و أقول لك مثلاً :

" و بما إني ليا صولات في العوالم العلمية السرية و جولات في المؤتمرات المخفية ... ف أنا حاقول لك يا غلبان علي الأسرار اللي ماحدش غيري عنده الجٌرأة إنه يقولها لك .. و ماتنساش تعمل شير و لايك و صابسكرايب في آخر الفيديو ( أو البوست بقي ) "

و بعدين .. أبدأ أحقن أى شيء ليا مزاج أحقنه في عقلك .. و حتستمع بيه .

مهما كان اللي حاحقنه في عقلك ده .. حتي لو كان ( مية مخلل موز مخلوط بعصير بصل متساب برّة التلاجة أسبوع في الحر ده ) 🤣.

و قبل ما تنفعل و تغضب و تزعّق إنك مش من النوعية دي .. و إنك مش من الناس اللي بتصدّق نظريات المؤامرة .. و إنك علي درجة عالية من الوعي و الإدراك ..

حاقول لك : مصدقك ..

فعلاً مصدقك ..

لكن السؤال : تتخيل كام % من المٌجتمع .. زيك ؟!

السؤال اللي فات ده .. مهم جداً جداً جداً ..

لأن مهما كانت درجة وعيك عالية و نسبة ذكائك مٌلتهبة ... إلا إن إجابتك علي السؤال اللي فات ده .. حتفرق بشكل ضخم في ( حتعيش حياتك في الدنيا دي إزاي ) .

أحد أكبر الأخطاء اللي بيرتكبها ال ( أذكياء ) .. هي توقعهم إن بقية المٌجتمع فاهمين إنهم ( غير أذكياء ) ..

و ده خطأ فااااااااااااااااااااااااااادح جداً .. جداً .. كلّف أذكياء كتييييييييير حياتهم .

الإنسان ال ذكي - و هنا أنا حافترض تعريف مٌختصر و ناقص جداً للذكاء .. و هو الذكاء العلمي و المنطقي - .. بيكون عنده في عقله عملية دائمة بتحصل طول الوقت إسمها ( introspection = فحص ذاتي ) .

إتخيل كده مثلاً الموبايل بتاعك .. إنه طول الوقت شغّال في الخلفية عدد من البرامج .. هدفهم :

( إزاي يكون الموبايل أسرع ؟! , إزاي يكون الموبايل أكفأ ؟! , هل في فيروسات في الموبايل ؟! , ..... و هكذا ) .

في حين إن الإنسان اللي ( مش ذكي ) .. مابيكونش عنده العملية دي بشكل تلقائي إطلاقاً .. بل بياخد وقت و مجهود علي ما يعملها .. و بيحتاج إن حد يساعده عشان يعملها .

فبالتالي .. الإنسان اللي ( مش ذكي ) .. بيعيش أغلب حياته بدون ما يتسائل إطلاااااااااقاً ( هو أنا ذكي فعلاً ؟! مش يمكن أنا حمار بس مفكّر إني ذكي ؟! طيب أعرف الفرق إزاي ؟! طيب أنا عايش ولا مش عايش ؟! ولّا هو عمرو دياب كان بيغنيها إزاي ؟! ) .

و الغلطة الفادحة زي ما شرحت .. هي إن الإنسان ال ( ذكي ) .. بيكون متخيل إن كل الناس عندهم هما كمان ( فحص ذاتي = introspection ) شغّال بشكل تلقائي ..

و نتيجة ل كده .. إنه ( الإنسان الذكي ) بيكون بالنسبة للأغلبية من البشر ( العاديين في ذكائهم ) ... غريب ..

غريب في كلامه ..

غريب في تفكيره ..

غريب في إهتماماته ..

في حين إن ..

لما بيظهر إنسان تالت ( فاهم ) .. فاهم كويس جداً أغلبية الناس بتفكّر إزاي ..

فاهم إن أغلبية الناس .. مش حيعيدوا و يزيدوا في البحث و التساؤل و التفكير ..

فاهم إن أغلبية الناس ..

عايزين اللي يحسسهم إنهم ( أذكياء ) .. عن طريق إرضاء غرورهم ..

مش ( يحسسهم إنهم أغبياء ) .. عن طريق إظهار ضعفهم و جهلهم ..

لما بيظهر الإنسان ده ... بيقدر يسيطر علي أغلبية المٌجتمع بكل سهولة و يٌسر و سلاسة .

إرضاء الغرور ده .. بيحصل إزاي مثلاً ؟!

في طرق كتير .. منهم مثلاً 4 خطوات معروفين زي :

1- دوّر علي بذرة شك بدأت تنبّت أساساً في عقل الإنسان ده .

زي : ( في نظرية مؤامرة ) .

2- إدّيله سؤال موجّه .

زي ( إستخدمت أنهي آداة و إنت بتقتل المجني عليه ؟! ... أو .. كاب فيردي إستخدمت أنهي سلاح بالظبط عشان تنفذ هجوم الزلزال المٌدمّر ده علي مصر ؟! ) .

اللي هو : مين أساساً قال إنك قتلت المجني عليه ؟!

أو : مين أساساً قال إن كاب فيردي كانت بتلعب فنفس مجموعة مصر عشان تحاول تهاجمها بسلاح الزلزال المٌدمّر ؟!

3- إعزل الإنسان ده عن فئة بيتم إحتقارها .

زي ( الناس الوحشين الأغبياء هما اللي مش عاملين ليا متابعة و بيشيروا كل صوري و يمدحوا وسامتي و مش مفعّلين الجرس ) ..

لكن إنت ؟! .. لااااااا .. إنت حلو و جميل و ذكي .. مش زي الناس الوحشة خالص .

4- إدي للإنسان ده عدو يعضعض فيه .

الإنسان بطبعه محتاج عدو .. ربنا خلقنا كده .. و خلق لنا عدو واحد أساسي ( الشيطان ) .

لكن .. الشيطان مش متشاف .. مش ملموس .. محتاج إنك تؤمن بوجوده .. و الإيمان حاجة صعبة ..

فبالتالي .. إدي للإنسان اللي إنت بتلعب في أساساته ده .. عدو ملموس واضح يقدر يضربه .. و يعضّه .

لو عملت ال4 خطوات اللي فوق دول بإختصار ...

ألف ألف مبروك .. إنت كده ضمنت لنفسك جيش ضخم من عامة المٌجتمع .. حيهتفوا بوسامتك الطاغية .. و يدافعوا عنك في غيبتك أثناء ما إنت بتبلبط في الساحل .. و يهاجموا و يخوّفوا أى إنسان تسوّل له نفسه إنه ( يعلّمهم ) أى حاجة صح .

كل اللي أنا قلته فوق ده بقي ... هو مقدمة بوست الجزء التالت في حياة ( توماس يونج ) 🤣

و مهما كنت تظن إنه من المهم .. إني ك مهندس كنت المفروض أقعد أعيد و أزيد في أهمية تجربة ( الشق المزدوج ) اللي إنتهينا بيها البوست اللي فات .

و تأثير ده علي تاريخ العلم و الموجات الكهرومغناطيسية عموماً ..

إلا إني أؤكد لك .. إن فهمك للكلام السابق شرحه في البوست ده .. قد يكون أهم .

خليني أشرح لك السبب :

( توماس يونج ) و هو عنده 26 سنة تقريباً .. شاب في عنفوان شبابه .. ذكي جداً جداً .. بيتكلّم 14 لغة .. دكتور .. يعني عريس لٌقطة ..

و بعدين بيقدّم أبحاثه ( اللي ضمنها إن الضوء له طبيعة موجية ) .. و ( تجربة الشق المزدوج ) .. للمعهد الملكي في بريطانيا ..

و بيلاقي أحد أشهر الجرائد في الوقت ده .. إستلمته و طلّعته مسرح ..

جرنان إسمه ( مراجعات إدينبراه =Edinburgh Review ) ..

بدأ ينشر سلسلة من المقالات عن : ( توماس يونج عدو التاريخ ) , ( توماس يونج عدو حضارة بريطانيا ) , ( توماس يونج ريحته وحشة ) , ( توماس يونج عدو الدين ) , ( توماس يونج هو سبب الغلاء في بريطانيا ) , ... و هكذا .

المقالات دي كلها كان معروف كويس جداً مين اللي كاتبها ..

صاحب الجرنان و أحد أشهر السياسيين النائشين في الوقت ده ( هينري برووم ) ..

الجرنان ده ( مراجعات إدينبراه ) .. كان زي أشهر قناة ريفيوهات مطاعم مثلاً دلوقتي .. أو أشهر قناة لإنفلونسر تيكتوك .

و كان بينتشر و يبيع بشكل غير مسبوق ... ف كان البراندات يدّوله فلوس أكتر عشان يعلن لهم .. فيغتني و ينتشر أكتر .. و هكذا و هكذا .

الجرنان ده .. كان أحد مؤسسيه هو ( برووم ) ده ..

و كان الناس بتتفرّج علي القناة .. أقصد بتشتري الجرنان .. عشان تقرا مقالاته ..

أسلوبه كان فتّااااااااااااك ..

كان بيكتب بالحلمنيشي ( لغة الشعب ) .. و لكن بيحبّش الكلام بشوية مصطلحات يحسسوا الشعب إنه ( برووم ) ده بيفهم ..

و هو في الحقيقة كان خرّيج علوم و هو صغنن .. و كان عنده شوية خلفية علمية بسيطة فعلاً ..

لكنه من بدري بدري .. فهم إن العلم ده مش حيأكّل عيش .. و إن السبّوبة الصح .. هي في البرلمان البريطاني .

برووووم ... إستلم ( توماس يونج ) .. و حرفياً بقي ليل نهار يكتب فيه بوستات .. يادوب فيها ريحة العلم بس .. لكن أغلب البوستات و المقالات كانت هدم في شخصية ( توماس يونج ) نفسه .

ف ( توماس ) إتضايق .. و قرر يرد .. قرر ( يقصف جبهة ) بروووم ..

ف يعمل إيه ؟!

توماس راح كاتب كتاااااب كبير ... واضح جداً جداً .. علمي جداً جداً .. مليان معادلات رياضية ... بيشرح بالدليل و البرهان المنطقيين اللي لا يقبلوا أى ضحد أو جدال .. إنه صح .

الكتاب باع نسخة واحدة بس 🙂

مقالات برووووم ؟! .... كانت بتبيع آلاف النسخ .

في أغلب الكتب اللي بتشرح الجزء ده من التاريخ .. بيتم ذكر الهدم المٌدمّر ده لشخصية ( توماس يونج ) ... و بيتم تصوير ( بروووم ) ده ك شخصية شريرة ..

لكن الحقيقة هي إني دلوقتي .. و بعد اللي شفته خلال سنين عمري حتي الآن ... أنا قادر أفهم ..

قادر أفهم إن ( بروووم ) ده كان سياسي .. و شاف صيدة .. و إصطادها ..

و لو ماكنش هو إصطادها .. كان أى سياسي غيره حيصطادها .

برووووم .. طلع في كل البرامج و الجرانين و الصحافة و الإعلام ك ( حامي حمي تاريخ بريطانيا ) .. حامي لواء ( إسحق نيوتن ) اللي دلوقتي طالع عيّل صغير في عشرينياته بيقول إنه كان غلط ..

نيوتن كان مات من 100 سنة قبل الكلام ده تقريباً ..

لكن زي ما شرحت لك .. بريطانيا في الوقت ده كانت في حالة حرب مع فرنسا ..

يعني المياه كانت حرفياً ( عكرة ) ...

و في المياه العكرة .. بيظهر دايماً ألف صيّاد .

قبل ما تكره ( بروووووم =brougham ) .. أنصحك تعمل سيرش سريع عنه .

الراجل وصل إنه أصبح أحد أشهر سياسيين بريطانيا بالكامل .. و مسك منصب مشابه ل ( وزير العدل و الداخلية = Lord Chancellor ) ..

- كان من أكتر الناس اللي إشتغلوا علي تحريم العبودية و تجريمها .

- أتاح التعليم الجامعي العالي و المجّاني لأغلب فئات بريطانيا ( مهما كان دينهم أو جنسهم و عرقهم .. بما فيهم فئة الرعّاشين اللي منها توماس يونج 😅 ) .

- فاز بقضايا محورية كتير في تاريخ بريطانيا .

- و إخترع كمان تصميم عربية كارّو بشكل جديد ( اللي هي عربية بيجرها حصان ) .. و التصميم بتاعه إنتشر و بقي هو التريند لأنه حل مشاكل كتير في التصميمات القديمة .

توماس يونج .. فهم الليلة دي كلها بقي و إتعلّم من الدرس ..

و حرفياً راح سايب الفيزياء و الضوء و ساب المجال بالكامل .. و راح إشتغل علي كل حاجة تانية هو كان أساساً شاطر فيها ..

اللي هو ( يابا و أنا حاوجع دماغي مش شوية ناس تييييييييييت ليه ؟! ) ..

بعد 15 سنة .. مهندس فرنساوي إسمه ( فريزنل ) بيثبت إن يونج كان صح ..

هل تتوقع بقي إن الميديا و الإعلام يشيروا الكلام ده مثلاً بعد كده ؟!

هل تتوقع إن ( بروووم ) يطلع يقول أنا غلط و سامحوني ؟! ..

ولا البلح ..

برووووم .. عاش فوق ال85 سنة .. بدون ما يفكّر مرة واحدة يعتذر و يقول إنه غلط و أخّر الفيزياء البريطانية 15 سنة علي الأقل .. لأنه طرد توماس يونج برة مجال الفيزياء بالكامل .

توماس يونج .. عاش و عمل حاجات كتير تانية في حياته في مجالات كتير تانية غير الضوء و الفيزياء ..

و وصل إنه بقي من علية القوم في بريطانيا .. و نجم مجتمع هو كمان .

لكن قصتهم مع بعض ؟! ..

قصتهم مع بعض إتكررت بأسماء تانية .. و فأزمان تانية .. كتييييييييير جداً في الماضي .. و حتفضل تتكرر في المستقبل برضو علي مدار الزمن و التاريخ ..

تستفيد إنت منها إزاي ؟! ..

ولا تشغل بالك ياسطا بالكلام ده كلّه ... إنت زي الفل .. إنت فاهم كويس و مش زي الناس الوحشة اللي مش بتاخد بالها من الرسائل المخفية في بوستاتي اللي بتشرح و بدقة مواعيد خروج التنين الأبيض ذو الرؤوس الثلاث صاحب قوة البرق الأزرق و سلاح الزلزال المدمّر 🙂.

الجزء القادم إن شاء الله .. حنكمّل الزوحليقة بتاعت طيف الترددات الكهرومغناطيسية ..

و حافتكر كم ضخم من القصص اللي إتعلمتها في مكتبة ساحة النصر و أنا في إبتدائي بعد تمرين الكاراتيه .. لمّا سألت عمو أمين المكتبة :

عمو عمو ... هو الراديو بيشتغل إزاي 😅 ؟!!

و الله أعلم .

** ملحوظة أخيرة :

توماس يونج .. مٌتعارف عليه فأوساط كتير إنه ( آخر الناس اللي ينفع يٌطلع عليهم لقب بوليماث Polymath ) .. أنصح فعلاً بالقراءة عنه .. و أنا ضمن الفئة اللي بتختلف مع الموضوع ده بشكل كبير جداً ..

في البوستات القادمة إن شاء الله ... حنقرّب بشكل كبير من شرح أسباب إختلافي دي ..