صٌنع في ... دٌمياط ؟! 🤣 .. بدل ( تايوان ) .

إتخيل مثلاً .. إنك و إنت بتفتح ضهر الآيفون 19 الجديد بتاعك و بتعضعض في البطارية عشان تعصر منها آخر شوية شٌحنة عشان تعرف تكمّل قراية البوست القصير جداً ده 🤣..

إنك لاحظت إن تحت البطارية مكتوب علي شوية الشرايح الإلكترونية السودا دي .. ( صٌنع في دٌمياط ) .. و إحتمال كمان تلاقي تحتها إسم الورشة مثلاً :

( ورشة أبورحاب للشاب التكنولوجي .. الأنيق ) .

هل ده صعب ؟!

الحقيقة هو إن مافيش فرق كبير بين ( دٌمياط ) و ( تايوان ) ..

و قبل ما تستغرب .. خلّيني أشرح .

دلوقتي لو إنت فجأة قررت تطاوع حسّك الإبداعي العالي .. و رؤيتك الفنّية المٌلتهبة .. و قررت تفتح خط إنتاج عفش و ديكور حديث مودرن مٌدهب يٌعبّر عن شخصية الشاب الكاجوال .. حتعمل إيه ؟

حتبني خط الإنتاج ده جوة أوضتك ؟ .. بين السرير و الكرسي اللي بتستخدمه ك دولاب عشان مكسّل تطبّق هدومك و تحطها جوة الدولاب ؟!

حتنزل تحطّب في الغابات و تجيب الخشب معاك في التوكتوك و تدفع أٌجرة زيادة ؟!

حتكلّم إصحابك و إصحاب صٌحابك و تعزمهم كلهم علي كيس شيبسي واحد من الصٌغير و ميّة من الكولدير اللي جنب الجامع مٌقابل إنهم يساعدوك في تشغيل خط الإنتاج ده ؟!

ولّا ؟!

ولّا القصة كلها إنك شٌفت صورتين تلاتة لشوية عفش عالفيس .. و حسّيت بالحس الإبداعي بيلتهب جواك .. و قررت تصمم علي برنامج الرسّام كام كٌرسي علي كام طبلية .. و دلوقتي عايز تنزل تنافس قبنوري بالتصميمات الجامدة فحت دي ؟

الحقيقة هي إنك تقدر فعلاً تنافس بالتصميمات دي ..

كل اللي إنت محتاج تعمله .. إنك تدّي للتوكتوك 3 جنيه و 75 قرش زيادة .. و يطلع بيك علي دٌمياط .. تدوّر هناك علي ورشة فيها ناس حتتفهّم طموحك .. و تورّيه التصميمات بتاعتك ..

و هو حينتج لك التصميمات دي .. بعد ما يحلف لك ( و العشرة دول ) إنه مش حيسرق تصميمات و ينزلها بإسم ورشته هو ( أبو رحاب للنجّار الأنيق ) .

حتحتاج طبعاً تدفع له عربون .. و حتحتاج طبعاً تكون لفّيت قبل كده علي محلات بيع العفش و ظبطت زباين للإنتاج اللي لسة حيطلع ده ..

لكن .. كل اللي كنت محتاجه عشان الليلة دي كلها تحصل هو : تصميماتك .. و فلوسك .. و شكراً .

في المٌقابل بقي .. ( الأٌسطي صاحب ورشة أبو رحاب ) .. إستفاد إيه ؟

أولاً : فلوسك .

ثانياً : و ده الأهم .. مهارة و خبرة التصنيع .

و أثناء ما إنت رايح تحتفل و فرحان بنفسك في كل الإيفنتات ك إنطرابرانور شركته مٌقدّرة ب مئات الجٌنيهات .. و أخبارك بتنزل فكل الدي جي هات فأى فرح في المنطقة ..

الأٌسطي صاحب ورشة أبو رحاب .. بيتوسع .. و يتوسع .. و يتوسع ..

و ينتج لك .. و ينتج لصاحبك اللي شاف السبوبة بتاعتك ماشية و قرر يقلدك و ينافسك .. و ينتج لإبن عمه اللي شاف السبوبة بتاعتكم ماشية و قرر يقلدكم و ينافسكم ... و لجوز أخته اللي منفسن منه .. و هكذا ..

و عند مرحلة مٌعينة ..

و ف أول خناقة بينك و بين صاحبك اللي بيحرق في سعر البٌضاعة عشان يسرق زبونك .. و إبن عمه اللي سرق تصميماتك .. و جوز أخته اللي إستغل علاقاته و بدأ يتوسع في الشارع اللي وراكم ..

بتكتشفوا جميعاً إن المعلّم الحقيقي الكبير أوي .. و أكبر كسبان في الشٌغلانة .. هو :

صاحب الورشة .. الأٌسطي أبو رحاب ...

و اللي لو قرر في أى يوم ينتج لنفسه .. أو حتي ياخد يومين أجازة عشان سبوع رحاب ..

إنكوا كلكوا .. حتتسوحوا .

القلش الرخيص أوي اللي فات ده كله .. تقريباً هو بالظبط قصة تحوّل تايوان ل دولة ماسكة العالم من منطقة حسّاسة .. و ماحدش يستجرأ يضايقها .

و اللي بني بني تايوان .. كان في الأصل .. مٌهندس سيادتك .. مش حلواني .

و ده الفرق 🤣 ..

خليني أشرح :

لو متابع حتي الآن .. في الأجزاء اللي فاتت .. شرحت إزاي إن تايوان أصبحت جزيرة رأسمالية ( و فيها الفلوس و الدهب و الثروات اللي خدها معاه تشيانج كاي تشيك ) علي بٌعد خطوتين بالبانانا 🤣( 150 كيلو تقريباً ) من الصين الشيوعية .

و إن عشان أمريكا تفضل محافظة علي مٌسمار جٌحا ده في قفا الصين و الإتحاد السوفييتي الشيوعيين ..

أعلنت إن تايوان منطقة محظورة و تحت الحماية العسكرية لمدة 30 سنة .

خلال ال30 سنة دول .. تايوان إبتدت نفس قصة دٌمياط دي بالظبط ..

و لكن .. لكل حاجة .. مش للخشب و النجارة بس .

حرفياً .. أى حاجة في العالم كانت محتاجة عمالة .. و تصنيع ..

كان فجأة بيظهر راجل تايواني في القعدة من حيث لا تدري .. و يقول لهم :

ياسطا ما تيجي تصنّع عندي .. و حادّيلك المٌنتج بتاعك ب تكلفة أقل من أى ورشة فأى حتة تانية .. و كمان حتلاقي عندي اللي مش حتلاقيه عند أيها حد .

ليه بقي تايوان بالذات كان عندها اللي مش عند حد ؟!

لأنها كانت رأسمالية تحت الحماية الأمريكية .. لكن بيتم إدارتها ك ديكتاتورية عسكرية ( ب نفس الطريقة اللي كانت في كوريا الجنوبية في الوقت ده لو تفتكر زي ما شرحت لك )

اللي هو .. أنا ك ديكتاتور عسكري .. أقدر أجبر شعبي إنه يشتغل 18 ساعة في اليوم .. و يقبض ملاليم .. بالسٌخرة .. و بالتالي .. تكلفة إنتاج القطعة عندي تبقي أرخص من أى مكان في الكرة الأرضية فيه موظفين عايزين مٌرتبات طبيعية و ( work life balance ) 🤣 .

و فنفس ذات الوقت .. انا دولة رأسمالية فاتحة حدودها ولامؤاخذة و بتاجر مع اللي يسوا و اللي مايسواش ..

يعني أى راجل أعمال يقدر يعدّي عليا .. يدّيني شوية دولارات .. أنتج له شوية بلاستيكات .. ياخدهم بالرخيص .. يبيعهم في الدول اللي حدودها مف.... إحم .. توحة .. و شكراً ..

الكل مٌستفيد .. صح ؟!

و لمدة 30 سنة .. فعلاً تايوان بتزوّد الإحتياطي بتاعها من الدولارات بشكل فظيع .. لكن مش بس كده ..

دي كمان بتزوّد قدرتها علي التصنيع بشكل غير مسبوق ..

أى حاجة عايز تعملها و تصنعها في الحياة ؟! .. تعالي يا حاج ..

أينعم ماكنش أعلي جودة .. أينعم ماكنش أفضل معايير ..

لكن دي لعب بلاستيك و أجهزة رخيصة .. مين اللي عايز أعلي جودة فأسواق الدول النامية اللي تم إغراقها بالبضائع دي ؟!

مصر .. الهند .. و أغلب الدول النامية في السبعينات و التمانينات .. اللي دخلوا عالم الإنفتاح الإقتصادي اللي يسمح للأفراد ب التجارة الحرة مع الدول الأجنبية .. أسواقها كان 90% منها ... تايواني .

و ده سبب إن اللفظ نفسه في أذهان ( جيلي و أجيال أبويا و أمي ) .. معناه :

حاجة رخيصة تقليد أى كلام .

لكن ..

سنة 1985 .. بيحصل الحاجة .. اللي بتغير شكل عالمنا الحالي بالكااااااامل ..

و هي :

البرنس الكبير أوي أوي .. بابا المجال حرفياً .. و المعلّم و الأوسطي :

موريس تشانج .

بيرجع تايوان .

مين هو بقي الحاج ( موريس ) ده ؟!

ده هو زي ( محمد صلاح ) كده .. بس من 5 سنين مثلاً .. أيام ما كان لسة ملك ليفربول المتوّج .. و الكينج المصري ..

و بعدين .. إتخيل إنه في ماتش مٌعين .. المدرب مادالوش شارة الكبتنة .. و قعّده إحتياطي .. راح زعلان و متضايق .. و واخد بعضه و راجع المقاولين مرة تانية 🤣🤣 .

دي هي بالظبط قصة ( موريس تشانج ) ..

راجل عنده 54 سنة .. معاه ماجستير في الهندسة الميكانيكية من MIT .. و دكتوراة في الهندسة الكهربائية من ستانفورد ..

و شغّال مٌحترف بقاله 25 سنة في ( Texas Instruments = البريمييرليج بتاع الإلكترونيات في العالم في الوقت ده 🤣 ) .

و خلاص بقي .. الراجل مرستأ نفسه و مظبّط أموره إنه حيمسك ( CEO = بيج بوص ) .. و حياخد المكتب الكبير .. و ....

بياخد فعلاً .. مش مكتب .. و لكن خازوق كبير شوية .. و حد تاني ( غير مؤهل زيه ) .. هو اللي بيمسك ( CEO ) ..

لاحظ إن الكلام ده في نص التمانينات .. يعني الموضة أيامها كانت العٌنصرية مش زي دلوقتي ..

دلوقتي .. الموضة هي إنك تجيب ( CEO ) أجنبي .. و ياحبذا لو كان هندي 🤣 ..

زمان .. في منتصف التمانينات بالذات .. كان لازم الشعر الأصفر و العينين الزرقا .

ف زي أى شخصية من أصدقائك تعرفهم بالظبط ... موريس بيحلف :

" وحياتك يا سٌهير " .. أقصد " وحياتك يا تكساس " ..

و بيفتح رسايل ال(Others ) يشوف مين كانت باعت ( هاي .. مٌعجبة .. ما تيجي نتعرف ) ..

و بالفعل ... بيقرر يقبل طلب الصداقة بتاع ( لي كووه تينج Li Kwoh-ting ) .. و اللي كان قاعد بقاله 6 سنين تقريباً بيبعت ل موريس عالواتس و الفيس و فكل حتة .. يقول له ( إرجع بلدك يا ولدي .. طين بلدك أولي بيك يا ولدي ) ..

( لي كووه تينج ) ده .. كان جينيرال هو كمان .. لكن جينيرال مٌهندس ..

و كان فاهم وضع تايوان كويس .. و عارف إن حوار ( إحنا مصنع العالم الرخيص للحاجات التقليد و الرخيصة دي ) .. مش حيدوم ..

و إنه لازم يلاقي طريقة ينضّف بيها سٌمعة البلد ..

ف أنشأ حاجة إسمها ( إتري 🤣🤣🤣 .. ITRI (Industrial Technology Research Institute) ... ) ... معهد الأبحاث التكنولوجية و الصناعية .

و ظيفتها ؟!

بالظبط زي إسمها .. و هي : هات لي يابني العلماء و الخريجين و الناس اللي بتفهم في الهندسة و التصنيع و التكنولوجيا ... و تتشقلبوا ليا في قلب المعمل .. تطلعوا ليا حاجة عليها القيمة ..

إحنا بنصنع بقالنا كتير فحت ... و نسخنا تصميمات كل الناس اللي صنعنا لهم علي مدار السنين ..

و كوريا الجنوبية جنبنا بدأوا ينتجوا حاجات بتاعتهم هما ( سامسونج و LG و هايونداي ) .. و إحنا مش أقل منهم .. هما عينيهم ضيقة .. و إحنا كمان عينينا ضيقة .

و بالظبط .. تخيل إنه علي مدار 6 سنين ..فضل يبعت ل ( موريس ) يقول له :

تعالي بس .. و إمسك المعهد ..

و موريس يرد عليه : إنت عبيط ياض ؟! .. أنا كابتن الدوري الإنلجيزي .. أرجع ألعب في المقاولين ؟!

لحد ما حصل اللي حصل .. و موريس أصبح مش قادر يقعد يوم تاني في أمريكا ..

ف راح راجع علي تايوان .. و قال ل ( لي كووه ) : المعهد بتاعي ؟!

لي كووه قال له : بتاعك ياسطي .

موريس قال : شيك علي بياض ؟!

لي كووه قال : إصرف و مايهمكش يابا .. إحنا بقالنا 30 سنة بنحوش دولارات ... بس فاجئني ..

موريس قال له : حفاجئك ..

لي كووه قال له : وريني .

موريس قال له : حابهرك ..

لي كووه قال له : حتعمل إيه بقي ؟!!!!!!!!

موريس قال له : حافتح ورشة و أصنّع للعالم بالرخيص 🤣🤣🤣🤣

لي كووه كان لسة حايقول كلام أبيح مش كويس .. و بعدين إفتكر إن البوست طوّل زيادة عن اللزوم .. و قرر يستني يقول الكلام ده في الجزء القادم إن شاء الله ..

و اللي حيشهد ولادة ( TSMC = مصنع تايوان بتاع السيميكونداكطور .. للشاب الأنيق 🤣🤣) .... أحد أقوي مؤسسات العالم بالكامل حالياً .. أقوي من دول عالم أول كاملة بالمناسبة .

و الله أعلم .