أحد آخر مشاهد مُسلسل ( لعبة السٌبّيط = Squid Game ) .. إن البطل ( جي هان ) ..

أحد آخر مشاهد مُسلسل ( لعبة السٌبّيط = Squid Game ) .. إن البطل ( جي هان ) .. بيواجه الكاميرا بشكل مٌباشر ( و بيبص للسٌلطة اللي كان بيمثّلها هنا شرير المسلسل ) .. و يقول له ( و للكامير و للمشاهدين و للناس كلهم ) :

" إحنا بشر .. مش حصنة سباق " ..

و بعدين بيرمي نفسه من فووووووووق و يموت .

لمّا شٌفت المشهد ده أيام ما نزل من سنة و نص تقريباً .. ضحكت 🤣..

و كنت ناوي أكتب بوست أيامها أشرح سبب ضحكي ده .. و كالمعتاد نسيت .. و سبحان الله .. دلوقتي و بعد سنة و نص أرجع أفتكر المشهد ده تاني و أنا باكتب البوست ده .. اللي هو الجزء الرابع في سلسلة ( قصة LG ) .

سبب ضحكي هو :

إن أغلب عناصر قصة المسلسل فيها رمزية مٌباشرة جداً جداً بشكل جداً ل تاريخ كوريا الجنوبية الحديث .. لدرجة أحياناً كنت باحس إن المٌؤلف و المٌخرج ماسكين كتاب تاريخ كوريا الحديث بتاع تالتة إبتدائي و بينقلوا منه صفحة ب صفحة .

و بالفعل .. بعد نشر المشهد ده في الحلقة الأخيرة .. شفت كمية كبيرة من البوستات علي السوشيال ميديا العالمية من كوريين بيشرحوا إن أى حد غير كوري صعب جداً يفهم المؤلف كان يٌقصد إيه بالظبط ..

لأن اللحظة دي بالذات .. سنة 1970 .. تقريباً من أحد أشهر لحظات تاريخ كوريا الحديث .. و هي :

لحظة ما ( جيون تاي إيل ) .. الشاب اللي كان عنده 22 سنة .. بيٌقف فوسط أحد ميادين العاصمة ( سيول ) .. و يٌصب علي نفسه بنزين .. و يوّلع فنفسه .

و آخر حاجة يقولها قبل ما يموت هي :

" إحنا بشر مش مكن " .

لو قرأت البوست اللي فات ( اللي قبل ده علي بروفايلي مباشرة ) .. حتبقي واقف عند لحظة ما ( ليي = رئيس سامسونج ) رجع كوريا الجنوبية ..

بعد ما درس شخصية ( بارك = الجينيرال رئيس كوريا ) .. و عرف إنه شخص براجماتي لأقصي درجة .

فبالتالي .. أول ما نزل كوريا و هو راجع من اليابان .. إتّاخد علي أوضة الإجتماعات .

إجتماع بين ( بارك ) .. اللي دخله في كامل بدلته العسكرية و كإنه مٌستعد لحرب حرفياً .. كان لسة في عز شبابه عنده 44 سنة وقتها ..

و بين ( ليي ) .. اللي كان لابس بدلة شيك جداً ( باشا إبن باشا زي ما قلت ) .. و كان عنده 51 سنة .. و اللي كان من القوة و السيطرة إنه يتكلم بإسم باقي الشلة اللي كانت محبوسة في السجن وقتها ( LG , Hyundai , SK ) .

الكلام ده كان سنة 1961 ..

بارك إبتدي الحوار مباشرة ب لغة كورية فٌصحي رصينة و قال :

" ده إنتوا شلّة حرامية و حاطلّع تراباتتييييييييييت تيتتتتتتت .. و سامسونج دي حافككها و أبيعها خٌردة يا إبن التييييييييت .. و إصحابك اللي في السجن دول حاتيتتيتييييييييييت .. "

ليي سمع الحوار الهادئ ده .. و إفتكر صفات شخصية ( بارك ) اللي درسها علي مدار الشهر اللي فات .. و رد بهدوء هو كمان و إحترام بنفس اللغة الكورية الفٌصحي الرصينة :

" بقي بٌص بقي ياض إنت ببدلتك الميري اللي إنت فرحان بيها دي .. آخرك هاته .. بس إبقي إشرب بعده و دوّر عاللي حاينجدك من الشعب و هو بيتتيتييييييييييييتك بعد كام شهر ..

إنت لسة ماسك البلد إمبارح الضٌهر في إنقلاب عسكري عشان الشعب بيكح تٌراب و إنت قلت إنك حتمنجهم و تشّربهم الفخفخينا ..

ف لمّا تحبسنا أنا و شلّتي ولّا تقتلنا .. مين اللي حيدوّر مصانعنا و شركاتنا ؟! .. عساكرك ؟! ..

تفهم حاجة إنت في البيزنس ولّا المصانع ولّا فأى بلح في بتنجان ؟! " .

بارك سمع الرد .. و رجع في كٌرسيه لورا كده و شد نفس من الشيشة و قلّب الكلام في نافوخه .. و قال بنفس الكورية الرصينة :

" بس أنا برضو وعدت الشعب إني حانتقم لهم من الأغنياء و أعلّم عليهم " .

ليي مباشرة فهم إن الصنارة غمزت .. و كمّل :

" تعلّم يا كبير .. علّم براحتك و إحنا حنطلع نقول إننا إتعلّم علينا .. و كمان حنطلع نوّري الشعب علامة إيدك علي .. إحم .. قفانا ..

بس سيبنا إحنا ندوّر لك مصانعنا و شركاتنا .. و أهو تبقي حتي إستفادت مننا بدل قعدتنا في السجن دي " .

و قد كان ..

اللحظة دي .. و الإتفاق ده في الإجتماع ده .. هو اللي حدد شكل كوريا حتي يومنا الحالي ..

بارك .. طلع قٌدّام الناس زي أى فتوة في فيلم عربي قديم و هو بيبرم شنبه و يعدل عمّته و يحسس علي صدره ..

و قدامه صف من المليونيرات اللي الشعب كان بيحقد عليهم و بيكرههم .. و شافوا المليونيرات دول بيعيطوا و بيعترفوا إنهم حرامية ولاد@%^# و فاسدين حتي النٌخاع ... و بيوعدوا إنها آخر مرة و مش حنعمل كده تاني .

و فنفس الوقت .. إستفاد إن المليونيرات دول .. و اللي كان عدد منهم عايز يخلص من الليلة بإنه يدفع ديونه بالعملة الكوري .. مش حيعملوا كده .. لأن العملة الكوري ولا كان ليها أى قيمة أساساً وقتها ..

و لكن حيشغلهم يغسلوا صحون ب الفلوس اللي سرقوها ( يبنوا و يشتغلوا عند الحكومة يعني ) .

و المليونيرات دول .. إستفادوا إنهم مش حيقعدوا مع فرج في السجن 🤣 .

و لكن ( ليي = رئيس سامسونج ) .. كان باصص لبعيد أوي .. و كان شايف حقيقة الوضع فعلاً ..

إن بالمنظر ده .. هو ضمن إنه مصانعه و شركاته حتبقي تحت حماية الحكومة و الجيش مباشرة ..

يعني .. إنسي بقي إن بنك يقول لك ( معلش ماعندناش كاش نطلّع لك قرض النهاردة ) .. أو إن موظف مثلاً يعمل عليك نقابة و يحاول يفلسع من الشغل بدري ..

و قد كان .

و بيبتدي ما سيعرفه التاريخ بعد كده بإسم :

( معجزة علي نهر هان = Miracle on the Han River ) ..

** و ده بالمناسبة الإسم اللي شدّني من سنيييييييييييييييييييين زماااااااان إني أبحث و أقرا عن الكلام و القصص دي كلها .. إني شفت الجملة صٌدفة بعد ما شٌفت فيلم ( Margin call ) اللي إتعمل سنة 2011 عن لحظات ما قبل إنهيار الإقتصاد العالمي سنة 2008 .. و إنها مشابهة لمصيبة آسيا سنة 1997 ..

ف طبعاً أنا لقيت نفسي إتسحلت أسبوعين باقرأ كل حاجة في تاريخ كوريا الحديث ****

إيه بقي هي المٌعجزة دي بتلخيص شديد فحت ؟!

من سنة 1961 ل 1970 .. الجينيرال ( بارك ) قال ل ( ليي ) و شلته " عايز دولارات " 🙂 ..

تتشقلبولي ف قلب كوريا .. تطلّعولي دولارات ماعرفش إزاي و منين .

ده يحصل إزاي ؟!

ببساطة بإنك تصنّع و تصدّر أى حاجة في بلدك .. و تبيعها للأمريكان .. ف يدفعوا ليك بالدولار ... بسيطة .. صح ؟

إطلاقاً مش بسيطة ..

لأنك طالع من حرب مع كوريا الشمالية ( اللي كانت في الوقت ده عايشة في نغنغة و بيشربوا مانجا خلاط بالعسل عادي خالص من غير ما يقلقوا بالحساب عالقهوة بالليل ) .

و ماعندكش أى حاجة حرفياً .. غير : البشر .

فبالتالي ..

في الوقت ده .. كوريا الجنوبية أصبحت هي المٌصدر رقم واحد في العالم في : بواريك الشعر .

نساء كوريا ( اللي كانوا لسة بيعانوا المٌر من إحتلال اليابان ) .. أصبح جزء مٌعتاد من حياتهم إنهم يقطعوا شعرهم و يبيعوه للمصانع الكورية .. عشان يعملوه بواريك شعر تتباع فأمريكا 🥲 .

و فوقت فراغهم بعد ما يقطعوا شعرهم .. كانوا بيروحوا يشتغلوا بالسٌخرة في مصانع بتشتري القطن الخام من أمريكا .. و يصنعوه ل تيشيرتات و قمصان .. عشان تتباع فأمريكا تاني ب رٌخص التراب مقارنة بالمٌنتج الأمريكاني ..

و عشان المصانع دي تشتغل .. و البضايع دي تتنقل ..

ال ( جينيرال بارك ) .. راح باعت رسالة واتس ل ( تشونج جي يونج = رئيس هيونداي ) .. قال له فيها :

" الميناء في ( بوسان = Busan ) علي بٌعد 400 كيلو من العاصمة ( سيول ) صح ؟! " .

رئيس هيونداي راح عامل ( ثامبس أب ) علي الرسالة .. و رد ب " صح " .. و بعت تحتها ستيكر واحد بيبلع ريقه و هو خايف ..

بارك راح رادد علطول " قشطة .. إبنيلي طريق سريع بينهم 🙂 "

( تشونج جي يونج = رئيس هيونداي ) راح باعت سكرين شوت بالحوار لل ( world bank = البنك العالمي ) .. عشان ياخد قرض بالكلام ده ..

البنك العالمي رفض .. و بعت رسالة شديدة اللهجة ل ( بارك ) قالوا له فيها بصيغة رسمية :

" حمرا "

( بارك ) بعت ل ( تشونج ) قال له بصيغة رسمية برضو :

" هي بقي نونوت في دماغي .. عايز طريق سريع يعني عايز طريق سريع "

و لو عايز فلوس عشان تبنيه .. روح بيع كام ألف من الشباب كوريين يشتغلوا في مناجم ألمانيا ( اللي كانت فقيييييييييرة جداً للعمالة البشرية بعد الحرب العالمية التانية ) ..

كوريا مش بس فضلت تصدّر شعر نساءها ك بواريك عشان تدخّل دولارات ..

و لكن صحاري الشرق الأوسط .. و مناجم ألمانيا .. و حروب فييتنام .. كانت مليانة بالدم و العرق بتاع الآلاف من الكوريين .. اللي كانوا بيشتغلوا بالسٌخرة حرفياً .. و 80% من رواتبهم كانت بتروح مباشرة للحكومة الكورية بالعٌملة الصعبة .. و كوريا تدّي أهاليهم ما يٌعادلها بالكوري ..

و قد كان .. و خلال سنتين و نص بالعدد .. إتبني طريق سريع 400 كيلو بيربط العاصمة بالميناء ..

و اللي من غيره عٌمر ما كانت كوريا حتعرف تدخل المرحلة اللي بعدها في تاريخ المٌعجزة دي ..

و بما إني عايز أروح الجيم دلوقتي ..

و بما إن البوست طوّل بما فيه الكفاية حتي الآن ..

و بما إن المرحلة القادمة في حياة كوريا فيها تفاصيل و قصص تتطلّب كتابة أكتر ..

ف إلي لقاء في الجزء الخامس إذن إن شاء الله .

و الله أعلم .

**** صورة أحمد مكي ( في لعبة السٌبّيط ) أكتر صورة باتخيلها لما باقرأ التعليقات اللي مٌتضررة من كم ال " إفيهات " اللي باستخدمه 🤣🤣🤣 .

أنا كنت كتبت تفصيلياً زمااااااان عن طريقة كتابتي .. و سبب إني بافكّر بالطريقة دي من الإفيهات و القلش الرخيص أثناء دراستي لأى شيء عميق مهما كان مجاله ( من أكثر الرياضيات و الفيزياء تعقيداً .. ل أقسي مشاهد التاريخ دموية و فظاعة مثلاً ) .

مش حاعيد اللي كتبته تاني هنا تفصيلياً أكيد دلوقتي .. و لكن ححاول أوعد إن بإذن الله خلال يومين تلاتة .. حاقعد و أكتب شرح لطريقتي دي تاني في بوست جديد .. و حيحتوي علي إجابات علي أكثر الأسئلة تكراراً إن شاء الله في التعليقات علي السلسلة دي .