البوست ده بالذات حيحتاج شوية روقان إن شاء الله .. منّي عشان أعرف أشرحه صح ..

البوست ده بالذات حيحتاج شوية روقان إن شاء الله .. منّي عشان أعرف أشرحه صح .. و منّك عشان تفهمه صح .

ألف ألف مبروك .. إنت عندك 20 سنة إتعينت موظف في شركة في أمريكا .. و خلاص رستأت أمورك و دٌنيتك إن دي حتبقي هي حياتك علي مدار ال40 سنة اللي جايين .. تتفحت و تتردم 5 أيام في الأسبوع من 9 صباحاً ل 5 مساءاً .. و ترجع كل يوم تقعد ساعتين قٌدّام التيليفزيون و تنام .. و شكراً علي كده .

ليه ؟! .. مش بس عشان المٌرتّب ... لا .. في حلم أكبر من المرتّب بكتييييير ..

و هو حلم ال ( تقاعد = سن المعاش = Retirement ) .. و هو إنك توصل ل سن 60 سنة .. يكون لسة الجسم فيه شوية صحة إنه ينحرف 🤣 .. و تعرف بقي تروح إنت و المٌدام ( لو لسة متجوزين يعني ) تشوفوا لكم مٌنتجع لطيف تعيشوا فيه باقي سنين عمركم تحت الشمس و قدام البحر ... من غير قلق بمواعيد شغل أو بصمة أو تمضي الصبح .. أو مدير .. أو أى بلح فبتنجان من ده .

لكن .. حتبص جنبك كده .. حتلاقي شاب ستّيني زيّك بالظبط .. لكنه راكب عربية أحدث موديل .. ضارب شعره أكسجين و راكب اليخت بتاعه ( مش بيأجّر ساعة كل يوم علي يخت المنتجع بالدور ) .. و مصاحب بنت عشرينية واضح إنه بيمارس حياة الشوجر دادي عليها .. من غير ما يكون قلقان إن مراته اللي طلقها أخدت نص ثروته ..

تسأله : ألّا باقول لك يا صاحبي يا أمريكاني .. إنت كنت شغال فنفس الشركة اللي أنا إشتغلت فيها .. جبت الفلوس دي كلها منين ياض ؟! .

يرد عليك و هو بيطلّع السيجارة الكوبي من بقه : فلوس معاشي .. إستثمرتها .

ترد عليه : إستثمرتها في إيه و إزاي ؟!

يقول لك : فاكر من 40 سنة لما إنت مضيت إستمارة ال( 401K) مع شركة حمادة عشان تستثمر لك فلوس المعاش بتاعتك ؟ .

( ** ال401K دي .. أحد أشهر إستمارات الحلم الأمريكي عموماً.. حاجة كده زي ما إستمارة الرفد عندنا إسمها إستمارة 6 😅 ... إستمارة المعاش عندهم إسمها ال401K ) .

ترد عليه و تقول له : فاكر .

يرد عليك و يقول لك : أهو أنا بقي إستثمرت ال ( 401K ) بتاعتي مع شركة ( توتو ) .. و شركة ( توتو ) دي .. بتدّي لك عوائد أضخم بكتييييييييير من حمادة .

و آديني دلوقتي باستمتع ب الثروة دي .

تسألني إنت بقي :

هو شركة ( حمادة ) كانت بتعمل إيه أساساً ؟

و شركة ( توتو ) عملت إيه مٌختلف عن حمادة ؟! .. و بالتالي بتكسّب أكتر ؟!

الشركات ( حمادة و توتو و سوسو و كوكو و غيرهم 🤣) في أمريكا .. تٌعتبر أحد أهم و أقدم أعمدة الإقتصاد الأمريكي منذ بداية نشأة البلد اللي بيتلعب فيها كاس عالم دلوقتي دي ..

زماااااااااااااااان .. كنت كتبت شوية عن الموضوع ده ( بعد ما شٌفت و حفظت مسرحية هاميلتون اللي إتعرضت سنة 2015 .. و ما زلت مٌحتفظ بالمسرحية كاملة علي موبايلي و حافظها بكل أغانيها تقريباً 🤣 ) ..

في إتنين مشهورين لو ليك مزاج تقرأ كتبهم .. حتعرف تفاصيل الموضوع من بدايته ( كتاب ل آدم سميث .. أبو الإقتصاد الأمريكي ... و الكتب اللي بتشرح شغل أليكساندر هاميلتون .. و إزاي أسس البنك الفيديرالي الأمريكي ) .

الشركات دي .. فكرتها سهلة جداً .. و بتحصل في كل بيت مصري تقريباً كل عيد 🤣 .. و هي :

بدل ما تاخد فلوس مٌرتبك كلها .. و تحوشها تحت المرتبة ..أو تضيعها يا مٌستهتر .. لا ..

هاتهالي .. و أنا أحوشهالك عندي .. و أستثمرها لك .. و أكبرها لك .. و أدّيلك بعد ما تطلع علي المعاش ثروة كبيرة تروح تشتري بيها اللي إنت عايزه من الحلويات عند عمو البقّال .

و لأن ..

إنك تستثمر 100 جنيه .. غير إنك تستثمر 1000 جنيه .. غير إنك تستثمر مليار جنيه .

الحكومة و الشركات و المٌجتمع و الناس و الدعاية و الإعلان و التيليفزيون و الأفلام و كله .. أصبح كلهم بيشجعوا فكرة إن :

حوّش مع الشركات دي ( توتو و حمادة و سوسو و غيرهم ) ..

لأن .. كل ما الشركة ( أو الشركات دي عموماً ) .. أصبح معاها فلوس أكتر .. كل ما قدرت تشتري حاجات أغلي في أماكن أغلي .

ف مثلاً ..

شركة ( حمادة ) عشان تستثمر ال (1000 جنيه ) اللي هي أساساً جمّعتهم من 100 موظف مثلاً .. آخرها تروح تشتري جهاز بلايستيشن 3 مستعمل و تأجّره بالساعة .. و ألف مبروك .. ده كده مشروع يادوب يخلّي أرباح راس المال الأساسي ده كفاية إنك تجيب باكو بسكوت تسأسأه في الشاي بعد التقاعد .

لكن ..

لو شركة ( حمادة ) أقنعت مليون موظف .. فأصبح راس المال ( اللي هو أساساً مش بتاعها إطلاقاً ) 10 مليون جنيه ..

فبالتالي شركة حمادة تقدر تشتري محل بلايستيشن كبير مليان أجهزة حديثة .. و بالتالي أرباح المشروع تبقي أضخم .. و تلاقي إنك بعد التقاعد معاك فلوس تجيب كرتونة بسكوت كاملة .. و يمكن بالشوكولاتة كمان .. مش باكو بسكوت واحد .

لكن ...

في السوق ال (حٌر ) بقي ..

و اللي فيه تنافس كامل مفتوح بين شركات مٌختلفة ( حمادة و توتو و سوسو و لولو ) .. متخيل الخناقات عاملة إزاي ؟!

أصل حمادة و توتو و سوسو .. مش بس حيتخانقوا علي مين اللي حياخد مرتبات الموظفين ... لا ..

هما كمان حيتخانقوا علي مين اللي حيشتري محل البلايستيشن ..

و مين اللي حيلاقي فرص إستثمارية العائد بتاعها أكبر .. و مستقبلها أفضل .. ف يروحوا عاملين حملة دعاية بناءاً علي الفرص دي .. ف يقنعوا موظفين أكتر إنهم يدّولهم مرتباتهم ..

و هكذا و هكذا و هكذا .. من نفس الدايرة المٌغلقة دي ..

اللي فات ده بالكامل ..

هو ده أبسط تلخيص أقدر أقوله لك عن ( Wall street = شارع الحيطة 🤣) .. اللي هو عصب إقتصاد أمريكا ..

اللي هو الشارع اللي فيه مكاتب أغلب الشركات المشهورة دي في عوالم الإستثمار ..

( حمادة و توتو و سوسو و لولو ... أو .. لو حنستخدم أساميهم الحقيقية مش أسامي الدلع 🤣..

بيركشاير هاثاواي ( بتاعت واررين بافيت ) .. بلاك روك .. فانجارد .. و تقريباً أغلب البنوك الضخمة المشهورة اللي تسمع عنها ... و اللي كان من أشهرهم بنك الأخوين ليمان .

ف تيجي إنت بقي .. و تقول لي :

يا عم بلاها سوسو و لولو و التعقيد و الهري ده كله .. أنا مش بتاع وظيفة .. لا .. أنا إنطرابرانور .. و طالبة معايا أفتح شركتي بنفسي .. و أروح إيفنتات و أقف عالمسرح و أدّي خطب تحفيزية .. و أحضر بودكاستات .. و يبقي إسمي الإنطرابرانور راح .. الإنطرابرانور جه .

أضحك و أقول لك : ماشي .. جرّب .. ورّيني حتعمل إيه ..

ليه باضحك ؟!

لأنك بمجرد ما تعمل أى شركة بتبيع أى حاجة ... و لنفرض مثلاً إنك حصلت علي براءة إختراع ( شرابات مقطوعة جاهز من عند الكعب و الصوباع الكبير ) .. و بدأت تبيع فعلاً ..

حتلاقي حد ظريف لابس بدلة شيك .. و لابس الشراب بتاعك اللي مقطوع من عند الكعب و الصوباع الكبير عشان يحسسك إنه مؤمن برسالتك .. جاي بيخبّط عليك و يقول لك :

إنت بتكسب كام ؟! .. أصل أنا عندي عرض ليك .. و هو :

نظرفك تمويل ب مليون جنيه .. و تدّي لنا نسبة من الشركة .

عينيك تزغلل .. و تفرح و تتنطط و تقول بس خلاص جات اللحظة اللي حانزّل فيها بوست عالفيس و أقول ( الحمد لله الذي بنعمته تتم الصالحات ) .. و أنزّل صورتي و أنا بافرش مكتبي الإزاز الجديد و أعلن عن التمويل اللي خدته .

و بعدين تسأل :

هي مع عدم اللامؤاخذة .. الفلوس دي منين ؟!

يرد عليك عمو الشيك أبو شراب مقطّع ب رد مجعلص كبير يحسسك إنك ساقط دور تاني من تانية إبتدائي .. حاجة زي مثلاً :

صندوق إستثماري مٌشترك مٌهيكل بعوائد كمّية تحت شراكات إستثمارية مٌتداخلة بإشراف لوجيستي مع مٌنظمات حقوق الناس في الشرابات المقطّعة .

و قبل ما تتوهم إنت .. خلّيني أترجم لك الجٌملة المجعلصة دي .. و هي :

إحنا شركة حمادة .. بندور علي أى سبوبة شغالة .. عشان نقنع شوية موظفين يدّونا فلوس مرتباتهم نشغلها لهم .. و نكيّش إحنا و نغتني .. و تولع إنت و الموظفين و الناس كلهم .. المهم مصلحتنا إحنا بس 🤣 .

اللي هو من الآخر ما معناه :

مافيش فلوس في العالم بالكااااااامل إلا و هي جزء من الدايرة المٌغلقة الملعونة دي .

ده كان و مازال ( و سيظل شوية حلوين لسة ) .. شكل العالم المالي و الإقتصادي علي مدار ال150 سنة اللي فاتوا تقريباً ..

و بداياته في أساسه خااااااااااااااااااالص .. كنت إتكلمت عن جزء منها و شرحته تفصيلياً لما إتكلمت علي تاريخ ( عصر النهضة ) في أوروبا .. و إزاي إن كل ما نعرفه حالياً من ( ليوناردو دافنشي .. و عصر النهضة .. و موناليزا .. و كل الهري ده ) .. أساسه في البداية خالص هي إمبراطورية قامت علي الإقتراض بالربا .. و البنك اللي أسسه عيلة ( ميديتشي ) .

و بعدين إزاي إن بعد ما تم إستعمار أمريكا ( بعد حملة كولومبس ) .. و أصبحت أمريكا ( حتة بعيدة عن الدوشة بتاعت حروب أوروبا ) .. كانت هي المكان الأمثل إن ( فلوس و بنوك الربا ) دي بالكامل تروح هناك .. لدرجة إن كل إستثمارات الكنيسة الكاثوليكية بالكامل تروح تهرب هناك قبل الحرب العالمية الأولي ب فترة .

لكن ماكنتش كتبت عن ( و غالباً ممكن أعمل ده قريباً ) : عن إن إزاي أكثر الإستثمارات المٌربحة في الحياة هي : الحروب .

و إن في الحرب العالمية الأولي .. و التانية .. شركات حمادة و توتو و سوسو بتوع ( wall street ) كانوا بيمولوا كل الأطراف حرفياً .. و بيستفيدوا من كل الأطراف ..

يعني .. حتي في الحرب العالمية التانية .. و اللي أمريكا ذات نفسها كانت طرف فيها ...

شركات ( حمادة و توتو و سوسو ) كانوا بيمولوا الطرف التاني فنفس الوقت .. و يكونوا سماسرة صفقات السلاح و الدعم و حتي الأكل المٌعلّب اللي كانوا جنود الطرف التاني بياكلوه .

لأن زي ما شرحت فوق .. الخناقة بتاعت ( يا تري إيه بيكسّب أكتر .. فألم من الناس فلوس أكتر ) .. هي دي أكبر خناقة في التاريخ علي مدار ال150 سنة اللي فاتوا .. كل خناقة تانية مهما ظنيت إنها كبيرة ( دينية , عرقية , فلسفية , أيديولوجية , .... ) تافهة و صغننة بالنسبة للشركات دي .. و مجرد وسيلة عشان ( نكسب أكتر ) .

و أحد أمتع الكتب اللي بتشرح ده بكل تفاصيله و صفقاته .. و اللي تقدر تقراها و كنت كتبت عنه من سنتين تقريباً أيام ما قرأته ..هو :

( Tower of Basel: The Shadowy History of the Secret Bank that Runs the World ) .

المهم ..

كما تتوقع أكيد .. عالم ملعون بالمنظر ده .. بيسبب مصايب كتيييييييييييييييييير جداً جداً .. مصايب ضحاياها بالملايين من البشر .. بل إن ضحايا السرطان المالي ده .. هما أكبر عدد ضحايا في التاريخ بالكامل ( حديثاً و قديماً ) .. لو حسبت إن حروب كتير بدأت و إستمرّت .. فقط بسبب العالم ده .

في مصايب كتيييير مشهورة .. لكن مصايب اكتر بكتييييييييييييييييييير ولا بيتعلن عنها .. و ولا بتطلع تريندات ولا يتعمل عليها أفلام ..

ببساطة .. لأن ضحاياها شعرهم مش أصفر و عينيهم مش زرقا .

زي المصايب اللي بتحصل في أفريقيا حتي يومنا هذا .

أشهر مصيبة ( إتعرفت ) خلال السنين اللي فاتت .. هو الإنهيار الإقتصادي اللي حصل سنة 2008 .. و سبب إنه كان فضيحة بجلاجل .. مش حجمه إطلاقاً .. و لكن إن تأثيره إمتد للمواطن أبو شعر أصفر و عينين زرقا .. ف كتب عنه مقالات و إتعمل عنه أفلام .

و مع ذلك .. الليلة إتلمّت و إنطبخت بدون ما حد حقيقي يتحمل مسئولية أى حاجة ..

أصلك حتلم مين ولا مين في البوكس ؟!

السرطان ده متغلغل لأعمق أعماااااااااااااااااق الجسم العالمي عموماً .. و الأمريكي و الغربي خصوصاً ..

مافيش أى جراحة ممكن تتعامل معاه أبداً .

لكن ..

كان في قبل 2008 ب 11 سنة بالظبط مصيبة كبيرة جداً برضو ..

و السبب الوحيد إنها دلوقتي معروفة و مشهورة نسبياً .. هو إن ضحاياها بدأ يبقي لهم صوت قوي برضو ( دول جنوب شرق آسيا ) ..

و المصيبة دي إسمها : إنهيار إقتصاد دول جنوب شرق آسيا سنة 1997 .

أو أحد أساميها المشهورة : ( The Tom Yum Goong Crisis = أزمة توم يوم جوونج 🤣 )

( توم يوم جوونج ) دي .. إسم أحد أشهر أنواع الشوربة التايلاني .. جربتها في دبي و ماعجبتنيش بكل أمانة .. بس أنا مابحبش ال سي فوود عموماً 🤣 .

و سبب إنها إتسمّت بالإسم ده .. إن المصيبة السودا دي إبتدت ب تايلاند ..

إيه بالظبط اللي حصل ؟!

و إزاي عدوي المصيبة السودا دي إنتشرت ل كوريا ..

و بسببها إنهارت شركة ( دايوووووو مافيش زيّوووو ) للأبد ..

و ده أدّي لإيه في يومنا الحالي ..

كل ده في الجزء القادم إذن إن شاء الله .. البوست ده طوّل بما يكفي حتي الآن 😅..

و الله أعلم .