الفيديو اللي في التعليق الأول +18 و صادم شوية ..
الفيديو اللي في التعليق الأول +18 و صادم شوية .. و حتلاقي إن اليوتيوب نفسه حيطلب منك تأكيد سنّك و إنك فاهم إنك حتشوف حاجة صعبة .
ده ببساطة .. فيديو من 15 أغسطس 1974 .. عن :
رئيس كوريا الجنوبية في الوقت ده .. ( الجينيرال بارك تشونج هيي ) .. كان واقف بيلقي خطاب ممل كالمعتاد عن إقتصاد الدولة ..
واحد من اللي قاعدين و اللي غالباً برضو كان بيكره البوستات الطويلة 🤣 تقريباً زهق .. راح مطلّع (طبنجة ) مُسدّس و ضارب عليه نار ..
الطلقة خبطت في الدرع الواقي بين ( بارك) و بين الجمهور .. و ردّت في مين ؟! ..
الله ينور عليك .. في دماغ المٌدام ( زوجة الرئيس بارك ) اللي كانت قاعدة عالمسرح ..
الحرس طبعاً إتضايقوا و راحوا مطلّعين طبنجاتهم هما كمان و ضربوا نار .. لكن الطلقة المرة دي خبطت في الحيطة و ردّت في بنوتة في ثانوي كان عندها 17 سنة و كانت ضمن فريق الكورال اللي بيغنّي إحتفالاً بالرئيس ..
تقريباً ماحدش في اليوم ده كان عارف ينشّن .. المهم ..
الحرس راحوا ناطّين علي الراجل اللي كان بيضرب .. و كتّفوه ..
و شوية تانيين راحوا واخدين المٌدام زوجة الرئيس اللي كانت مضروبة نار في دماغها و نزلوها من عالمسرح عشان طرطشة الدم ..
و الرئيس ؟! .. الجينيرال ( بارك ) ؟! ..
الراجل راح قايم .. منفّض بدلته .. و عدل الميكروفون .. و إتنحنح .. و بعدين راح قايل :
" كفاية دوشة بقي مش عايز حد يقاطعني تاني " .. و كمّل الخٌطبة بتاعته 🤣🤣🤣🤣 ..
ده فعلاً اللي حصل قسماً بالله ..
الراجل فعلاً قام .. و نفّض هدومه .. و كمّل الخٌطبة عادي خااااااااالص ..
مين بقي هو الراجل ده ( رئيس كوريا الجنوبية ) ؟! .. و دماغه بتشتغل إزاي ؟! .. الراجل اللي بيكمّل خٌطبته عادي خالص بعد محاولة إغتياله ... و حتي بعد ما شاف مراته بتموت .. و ليه ؟!
ده هو البوست التالت في سلسلة ( قصة LG ) ..
السلسلة اللي ماكنتش ناوي أكتبها إطلاقاً لما بدأتها .. و لكن كالمعتاد .. سؤال جاب سؤال .. و حكاية جابت حكاية ..
لو عايز تفهم الليلة من الأول .. حتلاقي البوستين اللي فاتوا ( اللي بنفس صورة حازم إمام دي ) قبل البوست ده علي بروفايلي .
و سبب إن البوست ده بيبتدي بالمشهد العجيب ده من حياة رئيس كوريا الجنوبية ..
ف ده لأنه أحد أهم شخصيات المٌسلسل .. أقصد القصّة ..
و لأنه .. أحد أكثر الشخصيات حتي يومنا هذا .. اللي مٌختلف عليه في تاريخ كوريا الجنوبية ..
نص كوريا الجنوبية تقريباً .. شايفينه البطل الأسطوري الأوحد اللي مسك كوريا و حوّلها خلال 18 سنة من دولة بتكح تراب .. و حرفياً أهلها كانوا بيغلوا ورق الشجر و يعملوا عليه شوربة من الجوع ..
ل بلد .. من أقوي الإقتصادات علي مستوي العالم .. و مستوي دخل الفرد فيها من أعلي المستويات ..
يا عم ده كفاية إنه أحد أهم الأسباب إن عالمنا يبقي فيه ( K-POP و دراما كوري 🤣 ) .
و النص التاني من كوريا الجنوبية .. شايفينه إبن ستين في سبعين .. خاين .. عميل .. فاسد .. ديكتاتور .. مٌختل عقليا و نفسياً .. و تقريباً كمان كان ريحته وحشة و مابيستحمّاش في الصيف الحر ده .. و ينزل يقرف الناس في المواصلات .
طيب .. إزاي بالظبط شخص واحد الناس تنقسم عليه بالمنظر ده ؟!
خلّيني أحكي لك مشهد تاني من حياته .. و إنت حتفهم إحنا جيبنا سيرته ليه دلوقتي .
لو خدت آلة زمن من علي ناصية الشارع .. و ركبتها و نزلت سنة 1961 .. و بعدين إديته 5 جنيه زيادة عشان ينزّلك بالظبط في مايو .. يوم 16 ..
حتشوف نفس الشخص ده ( الجينيرال بارك ) .. و هو داخل ( سيول = عاصمة كوريا ) في موكب دبّابات .. في إنقلاب عسكري صغنن .. عشان يمسك السٌلطة ..
( بغض النظر عن تفاصيل الإنقلاب العسكري اللي عالضيّق ده ) .. حنحكيها بعدين ..
إلا إنه أول ما دخل ( سيول ) .. راح راكن عند معرض هيونداي اللي جنب بتاع العصير اللي عالناصية .. و راح لامم في البوكس كل رؤساء الشركات المشهورين في كوريا وقتها ..
زي :
LG : اللي إحنا بنحكي قصته أساساً ..
هيونداي : أيون هي بتاعت إلنترا و توسان .
SK : لو ليك في الجيمينج .. أيون .. هما دول الشركة اللي بتملك فريق ليج أوف ليجيندز اللي كان Faker بيلعب فيه في الأول .
و بعدين سأل علي صاحبهم .. البيج بوص الكبير أوي بتاعهم ( لي بيونج شول = رئيس و مؤسس سامسونج اللي كنت كتبت عنه من 12 سنة ) .. قالوا له إنه راح يقضي مشوار بسرعة في اليابان فركة كعب و راجع .
ف بارك راح قايل ( ماشي ) .. و حرفياً ( زفّهم ) ..
لبسّهم طراطير ( فعلاً مش هزار ) .. ( رؤساء الشركات اللي كانوا يٌعتبروا بشوات كوريا الجنوبية في الوقت ده ) ..
و مشّاهم في الشارع لابسين يٌفط مكتوب عليها :
( I am a corrupt swine who ate the people’s money. = أنا خنزير باكل حق الغلابة ) .
و راح باعت ل رئيس سامسونج اللي في اليابان علي الواتس بتاعه رسالة بيقول له :
إرجع بما يٌرضي الله .. و إلا إصحابك و شلّتك من البشوات حيدخلوا يقابلوا فرج في السجن .. و كل ممتلكاتك في كوريا حترجع مش حتلاقيها ..
ف بيرجع فعلاً ( لي بيونج شول ) رئيس سامسونج ل كوريا ..
و لكنه بيرجع بعد شهر تقريباً .. في 26 يونيو 1961 ..
طيب .. ليه قعد شهر ؟! .. إتأخّر ليه ؟! ..
إطلاقاً مش عشان المواصلات من اليابان ل كوريا .. و لكنه كان بيذاكر ..
كان بيذاكر الشخصية اللي مسكت كوريا الجنوبية دي ..
إختياري ل ( لي بيونج شول ) و ( سامسونج ) عشان أكتب عنه في أوائل ما كتبت من 12 سنة .. ماكنش إعتباطي .. و لكن لأنه من أذكي الشخصيات علي مدار التاريخ الحديث .. و أكثرهم تأثيراً ..
ف لما شخص زي ده .. ييجي له تهديد من جينيرال لسة ماسك البلد بعد إنقلاب عسكري ..
ماتصرّفش بناءاً علي خوف .. أو تسرّع ..
ماربطش الروب الأحمر و نزل من عالسلّم و قال " أنا لو وقعت مش حاقع لوحدي " 🤣 ..
و لكن ..
و لكنه ذاكر الشخصية .. و عرف إن ال ( جينيرال ) ده .. راجل .. براجماااااااااااااااااااااااااااااااااااااااااااااااتي .. لأقصي درجة ممكنة ..
يعني إيه بقي ( براجماتي - Pragmatist ) ..
يعني بالحلمنتيشي : اللي يتجوّز أمه .. يقول له يا عمو ..
يعني بتاع مصلحته فقط .. فوق كل شيء .. حتي فوق كرامته الشخصية و مبادءه و مشاعره .
راجل زي ال ( جينيرال بارك ) ده ..
إتولد سنة 1917 .. فأسرة فقيييييييرة جداً .. فأعماق فترة إحتلال اليابان ل كوريا ..
اليابان اللي زي ما شرحت لك في البوست اللي فات .. من أفظع الدول علي مستوي التاريخ في بشاعة تعاملها في الحروب و في إحتلالهم ..
ف بارك بيشوف بكل وضوح جداً ..
الحياة مافيش فيها أخلاق .. مافيش مشاعر .. مافيش غير : القوة .
كل النساء في عيلته .. سبايا لليابان .. و كل الرجال .. عبيد ..
ف بارك بيقرر .. إنه يعلن ولاءه بالدم ( حرفياً ) لليابان ..
و بيقدّم عشان يدخل الأكاديمية اليابانية العسكرية .. و عشان يعلن ولاءه لليابان .. بيكتب بدمّه حرفياً .. عهد ولاء للإمبراطور الياباني ..
و بيغيّر إسمه قانونياً ل :
تاكاجي ماساو .
و بالفعل ... بيعيش فترة بداياته و شبابه ك ظابط في جيش الإحتلال الياباني .. ( زي كتير جداً من شباب كوريا فعلاً في الوقت ده ) ..
و لكن .. بين يوم و ليلة .. و بدون ما أى حد يقدر يتوقّع ...
الإمبراطورية اليابانية بتاكل قنبلتين نووي ورا بعض .. و خلال أيام .. بتعلن اليابان : ( باي باي كوريا .. إحنا ماشيين بقي .. آسفين علي اللي فات و سامحونا ) 😅.
ف يعمل إيه ( تاكاجي ماساو ) .. اللي هو أساساً ( بارك ) ..
بالظبط كده زي ما تخيلت ..
يروح رايح ل خلية شيوعية في الجيش الكوري .. و يقول لهم ( ده أنا أساساً شيوعي أباً عن جد ) 🤣 .. و إسمي الحقيقي ( بارك ) .. لكن كنت باكوسبلاي بس إني ظابط ياباني 🤣 .
و بعد 3 سنين بالعدد .. و في الخناقات بين الشيوعية ( اللي حتتركز في كوريا الشمالية بعد كده ) .. و السبهللية 🤣( اللي حتتركز في كوريا الجنوبية ) ... بتتمسك الخلية الشيوعية دي .. و يتقبض عليهم بالكامل ..
تتخيل كده .. ( بارك ) .. اللي هو راح حلف ولاءه بالدم لليابان .. و بعدين قلب عليهم في يوم و ليلة ... يعمل إيه ؟!
بالظبط زي ما إنت تخيلت بالظبط ..
راح مخبّط علي باب الزنزانة .. و قال " باشااااااااااااا .. أنا عندي معلومات و عايز أقولها للباشا الكبير بيني و بينه " ..
و راح واشي علي كل زمايله في الخلية بالكااااااااامل .. أساميهم و عناوينهم و صفحات الفيس بتاعتهم .. و كمان الأكاونتات السرية اللي كانوا بينزلوا عليها ميمز من غير ما يتعرف هما مين 🤣 .
مقابل ؟! ...
مقابل إنهم يعفوا عنه و مايتقتلش معاهم ..
و بالفعل ..
بيعيش ذليل حقير لقيط عاطل كام سنة .. لحد ما تيجي له فرصة علي طبق من دهب .
لو تفتكر من البوست اللي فات .. كنت شرحت إن كوريا الشمالية كانت في عزّها في الوقت ده ..
متصاحبة عالصين الشيوعية .. و عندها مصانع .. و خلاص .. قاب قوسين أو أدني إنها تسيطر علي كوريا كلها .
خصووووووصاً .. إن كل جيش كوريا الجنوبية .. كان فعلاً عايش مرحلة ال ( سبهللة ) ..
و بالفعل .. في أحد الأيام العجيبة اللي الحملات العسكرية بتاعت كوريا الشمالية خلاص حتفرتك كوريا الجنوبية ..
بعض قوات جيش كوريا الجنوبية بيلاقوا نفسهم مش عارفين يروحوا فين ولا يعملوا إيه ..
لأن : علم القيادة العسكرية ماكنش عندهم ..
كان عند مييييييييييييين ؟! ...
الله ينور عليك ..
كان عند الذليل الحقير العاطل المنبوذ اللي قاعد هناك ده و إسمه ( بارك ) ..
راحوا له .. قالوا له : إنت ياض .. إنت كنت ظابط في الجيش الياباني .. صح ؟
قال لهم : أيون ..
قالوا له : تمسكنا تقودنا و نسمّيك جينيرال .. لكن تقول لنا نعمل إيه ؟!
قال لهم : قشطة .
و قد كان .. و بين يوم و ليلة .. بيتحول ( بارك ) لجينيرال .. و فعلاً بيلمع نجمه جداً جداً ..
لأنه .. بينجح .. و أياً كان هدفه .. بيضحي في سبيله بآخر عسكري في وحدته ..
لكنه بينجح ..
و بيفضل ينجح عسكرياً و عسكرياً .. لحد ما عند مرحلة مٌعينة .. بيبقي هو الإسم الجاهز للجيش إنهم يدعموه عشان ينقلب علي اللي كان ماسك قبله .
و بيدخل كوريا الجنوبية و يمسك الحكم ... و يلم كل البشوات أصحاب رؤوس الأموال في البوكس .. و يبعت ل بتاع سامسونج و يقول له ( إحضر في التو و اللحظة ) .
و بيحضر فعلاً رئيس سامسونج .. و يلم باقي شلّته من السجن ..
و يروحوا كلهم يحضروا إجتماع مع ( الجينيرال بارك ) ..
الإجتماع ده .. بين ( الجينيرال بارك ) .. و بين ( رؤساء شركات كوريا الجنوبية ) .. يٌقال عنه إنه هي دي اللحظة اللي إتولدت فيها كوريا الجنوبية الحقيقية بصورتها اللي نعرفها حالياً .
حصل فيه إيه ؟!
إتقال فيه إيه ؟!
إتشرب فيه عصير إيه ؟! 🤣
كل التفاصيل دي في الجزء الرابع إذن ..إن شاء الله .
و الله أعلم .
نهاية المحطة 12