( الإيفنت الجاي اللي حاحضره ..

( الإيفنت الجاي اللي حاحضره .. حاجي بعربيتي الجديدة اللادا المايباخ اللي نمرها مميزة من جٌمرك ميناء دمنهور .. لابس بدلتي الكٌحلية من أبو رحاب للشاب الأنيق التي تجعلني ساحراً في عيون النساء 🤣 .. و ساعتي الروليكس تصميم ( Ben10 ) اللي فيها ميزة إنها تبخ ميّة في قفا اللي قاعد قٌدّامي ... و حاعلن عن إفتتاح 7 فروع جٌداد ل أحد شركاتي .. و حافتح باب التعيين ل 1700 وظيفة شاغرة بالمناسبة دي ..

و ك مٌفاجأة خاصة .. و بمناسبة فوز هالاند علي البرازيل .. حابني إستاد و أشتري نادي كورة و أسمّيه نادي ( الأغنياء الجامدين بس اللي زيي ) .. و أشتري هالاند ... و حنافس بيه علي كاس العالم اللي جاي كمان ) .

و حتشوف أخباري و صوري في كل الفيس و السوشيال ميديا .. و تمصمص شفايفك و تقول : شوف الإنطرابرانور الناجح ؟ .. الرايق ؟ .. اللي بيشرب فرابتشينو بالفليّة و النعناع ؟! ..

سؤال ؟! ..

أنا جبت فلوس لكل الكلام اللي فوق ده منين ؟!

إجابة السؤال ده .. هي دي قصّة ( دايو ) .. تاني أكبر شركة في كوريا الجنوبية .. و أحد أكبر 10 شركات في آسيا و العالم كله علي الإطلاق .. و اللي في يوم و ليلة حرفياً .. فلّست بالكامل .. و رئيسها فضل هربان مٌطارد .. و بعدين راح إتحبس و إتزف زفّة بلدي في كوريا ..

رئيسها اللي كان من كام سنة بس .. أحد أقرب الأصدقاء للسٌلطة الكورية .. و بيدخل القصر الرئاسي بمزاجه من غير ما حد يوقّفه .. و لما يٌقف فأى كمين ... كان بيرن مٌباشرة علي الرئيس يقول له يتوسط له عند أمين الشٌرطة اللي موقفّه 🤣 .

زي ما شرحت ( نشأة شركات الإستثمار = Hedge Funds و أمثالها و البنوك ) في البوست اللي فات ( الجزء السابع) ..

المفروض دلوقتي تكون فهمت إن أى عشرة جنيه بتدفعها ل سواق تاكسي .. ما هي إلا جزء مٌتصل بكل الفلوس اللي بتجري في العالم كله ..

و إن دولتك طالما جزء من المنظومة الإقتصادية العالمية .. و في تجارة بينها و بين باقي الدول .. و بتتعامل مع منظومة البنوك الدولية ..

يبقي إنسي إنك تفتح كٌشك علي أول الشارع .. و تقول إنك ( إنطرابرانور مٌستقل ) .. مافيش الكلام ده ..

أى لبانة تشيكليتس بتطلّعها ك باقي في كٌشك تحت الدائري مثلاً .. هي مٌتصلة بشكل مباشر بجيب مواطن أمريكي واقف مستنّي مٌرتبه في الناحية التانية من العالم .

و دي .. أحد أكبر نقاط القوة اللي إستغلّها ( الجينيرال بارك ) .. و أصبحت أحد أكبر نقاط ضعفه اللي كانت حتدمّر كل اللي هو بناه .

( الجينيرال بارك ) لما عمل الإنقلاب العسكري بتاعه .. عمل خطوة مٌهمة جداً جداً .. و هي إنه راح طالع علي البنوك .. و قال لهم :

فلوس المليونيرات دي .. إقفل عليها ..

لاحظ إنه ( ماسرقهمش .. ماخدهمش ل نفسه أو للدولة مثلاً ) .. لا ..

هو بس قفل عليها ..

نظرياً .. هي لسة بتاعت المليونيرات .. و لما كانوا بيفتحوا إنستاباي علي موبايلاتهم ( في كوريا سنة 1961 🤣 ) .. كانوا بيشوفوا رصيدهم بالكامل ..

لكن .. مايعرفوش يبعتوا لحد .. و لما بيستقبلوا .. بينزل في حسابهم ..

لكن مايعرفوش يشتروا بيه أى حاجة .. إلا لما يستأذنوا عمو الجينيرال بارك الأول .

ده هو كان أحد أكبر و أضخم الفروق بين ( تجربة كوريا الجنوبية ) .. و باقي تجارب الدول اللي حصل فيها إنقلابات عسكرية .. تبعها مباشرة إن الدولة تأمم أو تستولي علي ثروات الطبقة اللي كانت مسيطرة قبلها .

إن الجينيرال بارك .. قال للمليونيرات : فلوسكم في الحفظ و الصون .. لكن .. تصرفوها إزاي بقي ؟! .. دي بمزاجي و تستأذنوني فيها .

( بالظبط زي ما مامتك بتعمل معاك في العيدية ... إنت عارف إنت خدت عيدية كام .. لكن لما تقول لمامتك .. أنا عايز أجيب بيها يورانيوم من عمو البقال اللي تحت ..

مامتك ترد عليك و تقول لك : لا .. عمو البقال ده حرامي .. و بعدين بلاش يورانيوم دلوقتي .. إنت لسة شاري بلوتونيوم بعد الغدا ) .

و بعدين ..

أى حاجة بقي الجينيرال بارك بيكلّف بيها المليونيرات بتوعه .. زي ( إبنيلي يابني شركة بترول هنا ) ..

و يردّوا عليه ب لهجة كورية فٌصحي رصينة و يقولوا : " أطبخي يا جارية .. كلّف يا سيدي " 🤣 .

يقول لهم : إستلفوا من البنوك !!!! ..

يسألوه : نستلف ؟!!! .. نستلف ليه ؟!! .. ما أنا رصيدي كفاية و يغطّي .. ما أصرف منه ..

يقول لهم : لا ... رصيدك ده أنا باحوشه لك .. لكن مشاريعك .. عشان تعملها .. تستلف من البنك .. بالربا .. و لو إتأخرت .. الديون تتراكم عليك .. و لو ماسددتش .. حاخد أنا من رصيدك .. و شركاتك .. و مصانعك .. و أقعدّك في الشارع بلبوص .

و يكمّل : و بعدين إنت قلقان ليه يا سامسونج ؟! .. إنت مش واثق فنفسك إنك تقدر تعمل اللي أنا طالبه منك في ميعاده ؟! .. هو إبن خالتك ( بتاع LG ) أحسن منك ؟! .. ده أنا طلبت منه إمبارح يعمل لي مصنع بلاستك .. رجع عامل مصنعين ..

يا خيبة أملي فيك يا سامسونج .. ياللي تاعب قلبي معاك يا سامسونج .. قلبي و ربي غضبانين عليك يا سامسونج .

سامسونج يتكسف من نفسه .. و يروح ياخد قرض من البنك .. و يبدأ يشتغل .. و هو بيلعن اليوم اللي لقي نفسه فيه تحت ضرس الجينيرال بارك .

ف يضغط موظفينه و عٌماله .. و يشغلهم 18 ساعة في اليوم .. و ماحدش منهم يعرف يشتكي .. لأن سامسونج ضهره محمي بالحكومة .

و بالفعل .. المصنع بيتبني في وقت قياسي .. و سامسونج بيشوف رصيده في البنك بيكبر و يتضاعف .. أينعم هو مايقدرش يصرفه في ملذاته و شهواته لسة .. لكنه بيقول بينه و بين نفسه ( مسيرك يا ملوخية تيجي تحت المخرطة ) .

و فجأة كوريا يبقي عندها مصانع كتير .. و إنتاج أكتر .. و كل يوم معلقين كهارب و مشغّلين صابّات بيفتتحوا محل جديد !! ..

مين بقي اللي باصص من بعيد و مراقب ؟!

الله ينور عليك .. Wall street فأمريكا .. شايفين كل اللي بيحصل ده .. و بيقولوا لنفسهم .. ما إحنا كمان عايزين ينوبنا من الحٌب جانب .

يروحوا رايحين للجينرال بارك .. و يقولوا له :

يا معلّم .. إحنا جايين نبارك و نعمل واجب .. مش عايز أى مٌساعدة ؟!

يرد عليهم الجينيرال بارك :

مٌساعدة دلوقتي يا ولاد ال@#% ؟ .. ما أنا كنت جيت لكم لما حبّيت أبني طريق سريع بين العاصمة و المينا في بوسان .. و قلتوا ليا " حمرا "

** راجع الجزء الثاني في السلسلة 😅

و بعدين لما طلبت أستلف فلوس عشان أعمل مصنع سٌفن عملاقة .. سقّعتولي و عملتوا ( see ) و ماردتوش ..

جايين دلوقتي تباركوا ؟!

يردوا عليه :

إحنا ولاد النهاردة يا معلّم .. و مايبقاش قلبك إسود بقي .. و اللي فات مات .

يرد عليهم :

و أنا مسامح .. و المسامح كريم ..

و راح منادي : ولا يا دايوووووووووووووووو ... خٌد ياض ..

و راح قايل له : سلّم ياض يا دايو علي عمامك بتوع wall street .. بيقولوا عايزين يراضونا و يدّونا فلوس ... خد و عبّي منهم ياض .

و قد كان ..

المشهد العبثي اللي فوق ده .. تقريباً بيوصف بدقة حركة الإقتصاد و رؤوس الأموال بعد الحرب العالمية التانية .. و خلال الفترة من ( 1960 ل 1990 ) ..

الفترة دي .. كانت فترة إستقرار عجيب في أمريكا سياسياً و إقتصادياً ..

لأن .. في الحرب العالمية التانية .. أمريكا كانت أكبر تاجر سلاح إستفاد إقتصادياً من اللي حصل .. و كل الفلوس اللي كانت في أوروبا ... و الدهب .. سافر علي أمريكا .

ف أصبح عندهم فلوس كتير فحت .. و فنفس الوقت .. عايزين بقي يستثمروا الفلوس دي .. و إلا فرصة السيادة الإقتصادية المٌستمرة النادرة اللي كانت عندهم .. كانت حتضيع .

ف خلال ال30 سنة من 1960 ل 1990 .. كانت دول جنوب شرق آسيا هي المكان الأمثل للإستثمارات دي ..

حرفياً .. لو كان عندك القدرة اللوجيستية و الفهم الكافي لإزاي تبني شوية كلام بيزنس علي ورق ..

كنت تاخد أول طيارة علي أمريكا .. تقعد في بنك .. و تطلع ب قرض بملايين الدولارات .. ترجع بيه علي دولتك في جنوب شرق آسيا ..

تفتح شركاتك اللي بتبيع ( ولا يفرق ) .. تبني مصانعك اللي بتبني ( ولا يشغلك ) .. تركب أجدع عربيات و تلبس أغلي ساعات و تعيش ملك زمانك ..

و بعدين ؟!

لما فلوس القرض اللي أخدته تخلص ؟! ( لأنك ماكسبتش ما يكفي إنك تدفعه إطلاااااااااااااااااااااقاً ) ... تعمل إيه ؟! تدفع الأقساط اللي عليك إزاي ؟!

بسيطة ..

تكوي البدلة و تلبسها تاني .. و تطلع علي أمريكا .. و تقول لهم :

عايز قرض تاني عشان ولامؤاخذة .. أتوسع 🤣 .

و العجيبة يا أخي .. ماحدش كان بيقول لا ..

اللي كان عايز يتوسع .. كانوا بيسيبوه يتوسع 🤣 ..

و تاخد القرض .. و تعمل نفس القصة تاني .. تفتح شركات جديدة .. كتير منها كان بيبقي علي الورق بس ... و تشتري مصانع فاشلة أساساً .. و تعيش لك يومين ملك زمانك تاني ..

و الفلوس تخلص .. و هكذا و هكذا .

عايز تعرف أكبر مٌصيبة حقيقية في الموضوع ده ( بدون هزار و قلش هنا ) :

إن حتي يومنا هذا .. قسماً بالله .. جزء ضخم من شكل العالم الإقتصادي .. و بالذات في وطننا العربي اللذيذ .. بيعيد نفس القصة بحذافيرها .

أنا إتكلمت عن ده زمااااااااااااااااااااااااااان أيام ما كنت باتكلم كتير علي البيزنس علي العام .. و إتكلمت إن أى حد عنده شوية منطق و علم .. و عمل شركة جديدة أو ستارت أب .. لو إتعرض عليه 10 إستثمارات و تمويلات مثلاً .. لازم يكون أول حاجة يفكّر فيها هو إنه يرفض ..

و إن إطلاقاً مش حاجة حلوة إن كل يوم تشوف ( شركة كذا للإستثمار إستثمرت ملبغ كذا في شركة كذا الناشئة ) ..

و إن إطلاقاً مش حاجة حلوة إنك تشوف صور ل رواد أعمال بين يوم و ليلة بقوا راكبين عربيات نضيفة .. و أصبحوا نجوم مٌجتمع بيتم الإحتفاء بيهم ..

فقط لمجرد إنهم ( خدوا إستثمار ) ..

لكن ..

هيهات هيهات ..

مبدأ :

يا جدع خلينا نعيش لنا يومين بقي و نقب علي وش الدنيا و ( fake it until you make it ) .. دائماً و أبداً هو اللي بيسيطر علي العامة .

المٌصيبة إبتدت في يوليو 1997 ..

البنك الفيديرالي الأمريكي فجأة قرر : من النهاردة .. اللي حيستلف 10 جنيه .. ولامؤاخذة حيردّهم 20 جنيه ... مش 12 جنيه زي ما كان .

ليه الكلام ده حصل ؟!

فاكر شوية الحرامية بتوع wall street اللي فوق .. و اللي كنت شرحتهم تفصيلياً في البوست اللي فات ( حمادة و توتو و سوسو و لولو ) .. و إنهم طول الوقت بيتخانقوا علي حاجتين أساسيين فقط :

الأولي - نقنع إزاي ناس أكتر إنهم يحوشوا فلوسهم معانا .

التانية - فين الفرصة الجامدة اللي جاية اللي لو إستثمرت فيها حاحتكر السوق و أعلّم علي الباقيين ( محل البلايستيشن زي ما شرحت البوست اللي فات ) .

و لأن الحرامية دول شغالين بالدولار ( اللي هو عملة ورقية مٌعتمدة علي غطاء من الذهب المفروض إنه مساوي له و ثابت ) ..

*** لو متابعني من زمان .. شرحت كل موضوع العملات الورقية و الدهب ده في فيديوهات سنة 2015 أيام ما شرحت البيتكوين .

فبالتالي ..

أنا دلوقتي شركة ( حمادة ) .. و عندي تحت إسمي مثلاً ( 100 جنيه ) من الفلوس اللي الموظفين الأمريكان محوشينهم معايا ..

و إستثمرت ال 100 جنيه دول في محلين بلايستيشن مثلاً .. و مستني ييجي العوايد بتاعتهم ..

لكن .. شفت فرصة جامدة فحت إني أستثمر في كشك سجاير جديد ..

لكن ماعيش دلوقتي فلوس أستثمر فيه .. و لو إستنيت لحد أول الشهر علي ما عوائد محلات البلايستيشن تيجي .. شركة توتو حتيجي تاخد مني إستثمار كشك السجاير ده ..

أعمل إيه ؟!

الله ينور عليك .. أروح أستلف .. بضمان العوائد اللي إن شاء الله لسة حتيجي .و أروح أستثمر في الكشك .. اللي هو أساساً مش معروف لسة حيجيب عوائد و يكسب إمتي .

و بعدين ؟! ..

شفت فرصة تالتة .. و أنا لسة مفلّس في الحقيقة مافيش في جيبي ملّيم .. لكن علي الورق ؟!. .علي الورق أنا شركة إستثمارية ضخمة معايا مليارات .

أعمل إيه ؟! .. أروح أستلف بضمان اللي بإذن الله مسيره ييجي من الكشك .. و أستثمر الفلوس دي في الفرصة التالتة .

و هكذا .

الفلوس اللي أنا باستلفها .. مش باخدها دهب ولامؤاخذة ..

ولكن باخدها ( كمبيالات ورق ) ..

و المفروض .. إن اللي أنا باستلف منه ( البنك الفيديرالي و ال FCC و باقي المؤسسة المالية الأمريكية ) .. عنده بقي ناس عارفين كويس جداً تسلسل الشبكة العنكبوتية المعقربة دي بكل تفاصيلها .

ليه ؟!

لأن لو حصل في يوم من الأيام .. و موظف أمريكي صغنن قرر لأى سبب :

عايز فلوسي .

أنا حر يا أخي .. عايز فلوسي دلوقتي .. مش عايز أستثمر معاكوا خلاص ..

بمجرد ما يسحب راس ماله ( من الشركة الإستثمارية .. أو البنك ) ..

المؤسسة المالية الأمريكية تبدأ تقلق ..

لأن لو موظف أمريكي طلب .. و غيره طلب .. و غيره ..

فجأة الإقتصاد الأمريكي بالكاااااااااااااااااااااااااامل .. يقع .

فبالتالي ..

في ناس وظيفتها إنها تتوقع البلا قبل وقوعه .. و بناءاً عليه .. بيغيروا حاجات زي : ال interest rates = فوائد القروض .

و سنة 1997 .. كان اللي فوق ده حصل بالظبط ..

الانترنت كان لسة طالع سخن بقاله 3 سنين ( الإنترنت إبتدي سنة 1994 ) ..

و كان فرصة جذااااااااااااااااااابة جداً .. كل الشركات الإستثمارية و البنوك كانوا عايزين يلحقوها سخنة طازة .

ف عملوا إيه ؟! .. بدأوا يصبّوا فلوس كتير هناك ..

فلوس هي أساساً مش معاهم .. لأنهم كان بقالهم 30 سنة بيصبوا كل الفلوس اللي معاهم في دول جنوب شرق آسيا .

راح البنك الفيديرالي الأمريكي معلّي النسبة بتاعت الفوائد ..

راحت الشركات دي خافت .. راحت باعتة رسالة واتس للدول اللي في جنوب شرق آسيا و قالت فيها :

فلووووووووووووووسي ... عايزة فلوسي دلوقتي حالاً .. و إلا حاطلع علي المؤسسات الدولية و حاجرّسك في الحارة .. و حتبقي دولة عليها عقوبات و لامؤاخذة .

ف بالتالي .. دول جنوب شرق آسيا قالت : هدّي أخلاقك يا حمادة و يا توتو ..

اللي ليه ملّيم .. حياخده فوق الجزمة كمان ..

لكن فجأة ... تايلاند راحت راقعة بالصوت 🤣🤣 ..

ليه ؟!

لأن تايلاند كانت ماشية دايرة في الحارة ( العالم يعني ) تقول إن اللي حيستثمر في المحلات اللي عندها .. مضمون له دايماً نفس تمن الدولار ( مثبتة سعر الصرف يعني ) ..

يعني كنت تروح تايلاند ب 10 دولار .. تاخد بيهم 250 ( باهت - عملة تايلاند - Baht ) ..

تعمل بيهم شغلانتك في تايلاند .. تكسب 1000 ( باهت ) .. تبدّلهم دولارات و إنت طالع ( 40 دولار ) يعني مكسب أربع أضعاف ..

لكن في الحقيقة ؟ .. ماكنش في أى شغلانات أو بيزنس أو مصانع بتحصل جوة عندها ... و لكن مجرد الحكومة قاعدة بتطبع فلوس و فرحانة بالدولارات و خلاص .

ف لما أمريكا طلبت فلوسها .. تايلاند راحت قالت ( ماشي ياختي .. خدي دولاراتك مش عايزة منك حاجة ) ..

لكن في الحقيقة إن ( تايلاند ) كانت بتلف علي باقي جيرانها في الحارة تشتري دولارات عشان تسدد ل أمريكا ... و بتدي لهم مكانها ( باهت تايلاندي ) .. و الناس كانت مش مخونة .

مين بقي خد باله ؟! ..

( جورج سوروس ) أحد أكبر شياطين أمريكا .. الملياردير اللي لو متابع أى حاجة في السياسة الأمريكية إنت أكيد عارفه .

راح رايح في البورصة الأمريكاني و قال :

أنا يا جدعان براااااااااااااااااهن إن تايلاند حتفلّس .. مين يشتري الرهان ؟!

( دي حاجة إسمها shorting .. إنك تراهن علي إن حاجة مٌستقرة ضد كل التوقعات .. حتنهار ) .

لما أى عبيط يعمل موضوع ال (shorting ) ده .. ماحدش بيهتم بيه ..

لكن .. لما ( ملياردير من حيتان أمريكا زي سوروس ) يقول كده .. باقي السوق حرفياً بيتحرك معاه ..

ف باقي الحارة في جنوب شرق آسيا و أمريكا فجأة قالوا ل ( تايلاند ) .. خلاص مش واخدين منك عملتك .. إنتي طالع عليكي سٌمعة مش كويسة ..

و من الناحية التانية .. أمريكا لسة عايزة دولاراتها ..

راحت تايلاند واقفة فوسط الحارة و قالت : يالاااااااااااااااهواااااااي ..

و أعلنت إفلاسها ..

إيه اللي يحصل عند اللحظة دي ؟! ..

إنك بتسمع في البورصة الأمريكاني أصوات قبيحة كتير فجأة فنفس الوقت .

ده ( تايلاند ) اللي كانت مٌستقرة و فلوسنا كتير هناك .. فجأة أعلنت إفلاسها ..

يبقي أكيد باقي الحارة دي ( دول جنوب شرق آسيا ) .. حارة مشمومة ..

يا باقي الدول : فلوسنا تحضر حالاً و إلا حنطلع علي البندر ( قسم الشرطة )..

و باقي قطع الدومينو تقع ورا بعضها :

تايلاند وقعت في شهر 7 ...

بعدها الفلبين .. و بعدها بيومين ماليزيا .. و مباشرة بعدها إندونيسيا ..

و علي شهر 11 .. كوريا الجنوبية ..

فاكر بقي فوووووووووووووووووووق خالص .. اللقطة اللي ( الجينيرال بارك ) نادي فيها علي الواد ( دايو ) .. و قال له ( عبّي فلوس ) من عمامك بتوع wall street ياض ؟.

دايو كان فضل يعبّي فلوس .. لدرجة إنه قبل الإنهيار كان وصل إنه تاني أكبر شركة في كوريا .. علي الورق .

تيليفزيونات و رداوي و عربيات و بلاستيكات و كل الإعلانات اللي تفتكرها بتاعت التيليفزيون زمان في التسعينيات دي ..

ف لما فجأة أمريكا قالت ل كوريا .. ( فلوسي يا كوريا ) ..

الحكومة راحت للشركات ال5 الكٌبار ( سامسونج , LG , هيونداي , بوسكو , دايو ) ..

و لو تفتكر حتي الآن .. 3 منهم ( سامسونج و هيونداي و LG ) .. بشوات ولاد بشوات .. فلوس قديمة .. ناس فاهمين شغل و بيزنس من زماااااااااااان ..

و ( بوسكو ) ده ماحدش يقدر يكلمه أساساً .. ده راجل حرفياً ملك صناعة الصلب و الحديد .. برنس كبير أوي .

لكن ( دايو ) ؟! .. ده كان الواد الجديد اللي أول مرة يدوق طعم الفلوس .. اللي كان شبع بعد جوعه .. و كان مفكّر نفسه جاب الديل من ديبه ..

علي مدار سنين شغله .. كان يشوف سامسونج و LG قاعدين بيذاكروا ( بيصرفوا ملاييين و مليارات علي البحث و التطوير R&D ) .. و هو يقول :

شوف العبيط اللي قاعد بيذاكر هناك ده و مابيتوسعش ..

ياض أنا تاجر ياض .. أنا بفلوسي أشتري التكنولوجيا اللي إنتوا قاعدين بتبحثوا فيها دي ..

** دي مقولة حقيقية 100% بالمناسبة :

"If you don't have the technology, all you need is to buy those with the technology."

ف كانت النتيجة إيه ؟!

إن لما حنفية الفلوس إتقفلت .. و أصبح لازم تفتح كراساتك و توري الناس شغلك و الواجب بتاعك ..

سامسونج و LG .. كل واحد منهم راح مسيّل حاجات و بايع مصانع ..

سامسونج مثلاً قفلت مصنع عربيات كانت حرفياً حتنافس بيه و تبقي من حيتان المجال .. و باعت كل التكنولوجيا و الشغل ده ل ( رينو ) ..

و سرّحوا موظفين .. و قفلوا فروع ... و عملوا كل حاجة ممكن تتعمل .. عشان يسدّوا الفلوس اللي عليهم ..

لكن ( دايو ) ؟! ..

دايو كان مايعرفش غير إن ( إتوسع .. إتوسع ) .. و إنه أكبر من إنه يقع لوحده .. و إنه ( أنا كوريا و كوريا أنا ) ..

ف كان بيعمل إيه ؟! ... كان كل ما ينطلب منه فلوس .. يروح رايح مستلف فلوس أكتر ... فاتح بيها مصانع أكتر و شاري شركات أكتر ..

دايو وصل إنه وظّف رٌبع مليون بني آدم ( 250,000 ) إنسان في 110 دولة ..

و بين يوم و ليلة .. و سنة 1999 ... دايو بتعلن إفلاسها و هي عليها ديون :

50 مليار دولار ..

دايو راهن علي إن كوريا حتتحمّل عنه الديون دي .. و قرأ المٌستقبل غلط ..

لكن ( كوريا ) ؟! .. و باقي شلة الناس القديمة في البزنس ولاد البشوات ..

كانوا عارفين إن القاعدة الأزلية لا تتغير أبداً مهما حدث .. و هي :

السلف تلف .. و الرد خسارة 😅 .

إزاي بقي حصل السلف المرة دي ( لما كوريا إستلفت من الIMF .. اللي هما أحد شياطين عالمنا الحالي برضو ) ؟..

و إيه التلف اللي حصل ؟!

و الله أعلم .

السلسلة لسة مكمّلة .. لأن الجزء اللي جاي .. حنرجع ل LG .. و حيبقي قصص من عالم التخصص بتاعي .. عوالم ال semiconductors و الإليكترونيات ..

و إزاي سامسونج و LG .. أصبحوا هما تيليفزيونات العالم .

إن شاء الله .